ಪಞ್ಚವಗ್ಗೋ

೧. ಕಮ್ಮವಗ್ಗೋ

೪೮೨. ಚತ್ತಾರಿ ಕಮ್ಮಾನಿ। ಅಪಲೋಕನಕಮ್ಮಂ, ಞತ್ತಿಕಮ್ಮಂ, ಞತ್ತಿದುತಿಯಕಮ್ಮಂ, ಞತ್ತಿಚತುತ್ಥಕಮ್ಮಂ – ಇಮಾನಿ ಚತ್ತಾರಿ ಕಮ್ಮಾನಿ। ಕತಿಹಾಕಾರೇಹಿ ವಿಪಜ್ಜನ್ತಿ? ಇಮಾನಿ ಚತ್ತಾರಿ ಕಮ್ಮಾನಿ ಪಞ್ಚಹಾಕಾರೇಹಿ ವಿಪಜ್ಜನ್ತಿ – ವತ್ಥುತೋ ವಾ ಞತ್ತಿತೋ ವಾ ಅನುಸ್ಸಾವನತೋ ವಾ ಸೀಮತೋ ವಾ ಪರಿಸತೋ ವಾ।

೪೮೩. ಕಥಂ ವತ್ಥುತೋ ಕಮ್ಮಾನಿ ವಿಪಜ್ಜನ್ತಿ? ಸಮ್ಮುಖಾಕರಣೀಯಂ ಕಮ್ಮಂ ಅಸಮ್ಮುಖಾ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಪಟಿಪುಚ್ಛಾಕರಣೀಯಂ ಕಮ್ಮಂ ಅಪಟಿಪುಚ್ಛಾ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಪಟಿಞ್ಞಾಯ ಕರಣೀಯಂ ಕಮ್ಮಂ ಅಪಟಿಞ್ಞಾಯ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಸತಿವಿನಯಾರಹಸ್ಸ ಅಮೂಳ್ಹವಿನಯಂ ದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಅಮೂಳ್ಹವಿನಯಾರಹಸ್ಸ ತಸ್ಸಪಾಪಿಯಸಿಕಾಕಮ್ಮಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ತಸ್ಸಪಾಪಿಯಸಿಕಾಕಮ್ಮಾರಹಸ್ಸ ತಜ್ಜನೀಯಕಮ್ಮಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ತಜ್ಜನೀಯಕಮ್ಮಾರಹಸ್ಸ ನಿಯಸ್ಸಕಮ್ಮಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ನಿಯಸ್ಸಕಮ್ಮಾರಹಸ್ಸ ಪಬ್ಬಾಜನೀಯಕಮ್ಮಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಪಬ್ಬಾಜನೀಯಕಮ್ಮಾರಹಸ್ಸ ಪಟಿಸಾರಣೀಯಕಮ್ಮಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಪಟಿಸಾರಣೀಯಕಮ್ಮಾರಹಸ್ಸ ಉಕ್ಖೇಪನೀಯಕಮ್ಮಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಉಕ್ಖೇಪನೀಯಕಮ್ಮಾರಹಸ್ಸ ಪರಿವಾಸಂ ದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ ; ಪರಿವಾಸಾರಹಂ ಮೂಲಾಯ ಪಟಿಕಸ್ಸತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಮೂಲಾಯಪಟಿಕಸ್ಸನಾರಹಸ್ಸ ಮಾನತ್ತಂ ದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಮಾನತ್ತಾರಹಂ ಅಬ್ಭೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಅಬ್ಭಾನಾರಹಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಅನುಪೋಸಥೇ ಉಪೋಸಥಂ ಕರೋತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ; ಅಪವಾರಣಾಯ ಪವಾರೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಏವಂ ವತ್ಥುತೋ ಕಮ್ಮಾನಿ ವಿಪಜ್ಜನ್ತಿ।

೪೮೪. ಕಥಂ ಞತ್ತಿತೋ ಕಮ್ಮಾನಿ ವಿಪಜ್ಜನ್ತಿ? ಪಞ್ಚಹಾಕಾರೇಹಿ ಞತ್ತಿತೋ ಕಮ್ಮಾನಿ ವಿಪಜ್ಜನ್ತಿ – ವತ್ಥುಂ ನ ಪರಾಮಸತಿ, ಸಙ್ಘಂ ನ ಪರಾಮಸತಿ, ಪುಗ್ಗಲಂ ನ ಪರಾಮಸತಿ, ಞತ್ತಿಂ ನ ಪರಾಮಸತಿ, ಪಚ್ಛಾ ವಾ ಞತ್ತಿಂ ಠಪೇತಿ – ಇಮೇಹಿ ಪಞ್ಚಹಾಕಾರೇಹಿ ಞತ್ತಿತೋ ಕಮ್ಮಾನಿ ವಿಪಜ್ಜನ್ತಿ।

೪೮೫. ಕಥಂ ಅನುಸ್ಸಾವನತೋ ಕಮ್ಮಾನಿ ವಿಪಜ್ಜನ್ತಿ? ಪಞ್ಚಹಾಕಾರೇಹಿ ಅನುಸ್ಸಾವನತೋ ಕಮ್ಮಾನಿ ವಿಪಜ್ಜನ್ತಿ – ವತ್ಥುಂ ನ ಪರಾಮಸತಿ, ಸಙ್ಘಂ ನ ಪರಾಮಸತಿ, ಪುಗ್ಗಲಂ ನ ಪರಾಮಸತಿ, ಸಾವನಂ ಹಾಪೇತಿ, ಅಕಾಲೇ ವಾ ಸಾವೇತಿ – ಇಮೇಹಿ ಪಞ್ಚಹಾಕಾರೇಹಿ ಅನುಸ್ಸಾವನತೋ ಕಮ್ಮಾನಿ ವಿಪಜ್ಜನ್ತಿ।

೪೮೬. ಕಥಂ ಸೀಮತೋ ಕಮ್ಮಾನಿ ವಿಪಜ್ಜನ್ತಿ? ಏಕಾದಸಹಿ ಆಕಾರೇಹಿ ಸೀಮತೋ ಕಮ್ಮಾನಿ ವಿಪಜ್ಜನ್ತಿ – ಅತಿಖುದ್ದಕಂ ಸೀಮಂ ಸಮ್ಮನ್ನತಿ, ಅತಿಮಹತಿಂ ಸೀಮಂ ಸಮ್ಮನ್ನತಿ, ಖಣ್ಡನಿಮಿತ್ತಂ ಸೀಮಂ ಸಮ್ಮನ್ನತಿ, ಛಾಯಾನಿಮಿತ್ತಂ ಸೀಮಂ ಸಮ್ಮನ್ನತಿ, ಅನಿಮಿತ್ತಂ ಸೀಮಂ ಸಮ್ಮನ್ನತಿ, ಬಹಿಸೀಮೇ ಠಿತೋ ಸೀಮಂ ಸಮ್ಮನ್ನತಿ, ನದಿಯಾ ಸೀಮಂ ಸಮ್ಮನ್ನತಿ, ಸಮುದ್ದೇ ಸೀಮಂ ಸಮ್ಮನ್ನತಿ, ಜಾತಸ್ಸರೇ ಸೀಮಂ ಸಮ್ಮನ್ನತಿ, ಸೀಮಾಯ ಸೀಮಂ ಸಮ್ಭಿನ್ದತಿ, ಸೀಮಾಯ ಸೀಮಂ ಅಜ್ಝೋತ್ಥರತಿ – ಇಮೇಹಿ ಏಕಾದಸಹಿ ಆಕಾರೇಹಿ ಸೀಮತೋ ಕಮ್ಮಾನಿ ವಿಪಜ್ಜನ್ತಿ।

೪೮೭. ಕಥಂ ಪರಿಸತೋ ಕಮ್ಮಾನಿ ವಿಪಜ್ಜನ್ತಿ? ದ್ವಾದಸಹಿ ಆಕಾರೇಹಿ ಪರಿಸತೋ ಕಮ್ಮಾನಿ ವಿಪಜ್ಜನ್ತಿ – ಚತುವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ, ಚತುವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ, ಚತುವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ। ಪಞ್ಚವಗ್ಗಕರಣೇ ಕಮ್ಮೇ…ಪೇ॰… ದಸವಗ್ಗಕರಣೇ ಕಮ್ಮೇ…ಪೇ॰… ವೀಸತಿವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ, ವೀಸತಿವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ, ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ, ವೀಸತಿವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ, ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಇಮೇಹಿ ದ್ವಾದಸಹಿ ಆಕಾರೇಹಿ ಪರಿಸತೋ ಕಮ್ಮಾನಿ ವಿಪಜ್ಜನ್ತಿ।

೪೮೮. ಚತುವಗ್ಗಕರಣೇ ಕಮ್ಮೇ ಚತ್ತಾರೋ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ । ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ। ಪಞ್ಚವಗ್ಗಕರಣೇ ಕಮ್ಮೇ ಪಞ್ಚ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ। ದಸವಗ್ಗಕರಣೇ ಕಮ್ಮೇ ದಸ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ। ವೀಸತಿವಗ್ಗಕರಣೇ ಕಮ್ಮೇ ವೀಸತಿ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ।

೪೮೯. ಚತ್ತಾರಿ ಕಮ್ಮಾನಿ – ಅಪಲೋಕನಕಮ್ಮಂ, ಞತ್ತಿಕಮ್ಮಂ, ಞತ್ತಿದುತಿಯಕಮ್ಮಂ, ಞತ್ತಿಚತುತ್ಥಕಮ್ಮಂ। ಇಮಾನಿ ಚತ್ತಾರಿ ಕಮ್ಮಾನಿ ಕತಿಹಾಕಾರೇಹಿ ವಿಪಜ್ಜನ್ತಿ? ಇಮಾನಿ ಚತ್ತಾರಿ ಕಮ್ಮಾನಿ ಪಞ್ಚಹಾಕಾರೇಹಿ ವಿಪಜ್ಜನ್ತಿ – ವತ್ಥುತೋ ವಾ ಞತ್ತಿತೋ ವಾ ಅನುಸ್ಸಾವನತೋ ವಾ ಸೀಮತೋ ವಾ ಪರಿಸತೋ ವಾ।

೪೯೦. ಕಥಂ ವತ್ಥುತೋ ಕಮ್ಮಾನಿ ವಿಪಜ್ಜನ್ತಿ? ಪಣ್ಡಕಂ ಉಪಸಮ್ಪಾದೇತಿ , ವತ್ಥುವಿಪನ್ನಂ ಅಧಮ್ಮಕಮ್ಮಂ। ಥೇಯ್ಯಸಂವಾಸಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ತಿತ್ಥಿಯಪಕ್ಕನ್ತಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ತಿರಚ್ಛಾನಗತಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಮಾತುಘಾತಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಪಿತುಘಾತಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಅರಹನ್ತಘಾತಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಭಿಕ್ಖುನಿದೂಸಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಸಙ್ಘಭೇದಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಲೋಹಿತುಪ್ಪಾದಕಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಉಭತೋಬ್ಯಞ್ಜನಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಊನವೀಸತಿವಸ್ಸಂ ಪುಗ್ಗಲಂ ಉಪಸಮ್ಪಾದೇತಿ, ವತ್ಥುವಿಪನ್ನಂ ಅಧಮ್ಮಕಮ್ಮಂ। ಏವಂ ವತ್ಥುತೋ ಕಮ್ಮಾನಿ ವಿಪಜ್ಜನ್ತಿ।

೪೯೧. ಕಥಂ ಞತ್ತಿತೋ ಕಮ್ಮಾನಿ ವಿಪಜ್ಜನ್ತಿ? ಪಞ್ಚಹಾಕಾರೇಹಿ ಞತ್ತಿತೋ ಕಮ್ಮಾನಿ ವಿಪಜ್ಜನ್ತಿ। ವತ್ಥುಂ ನ ಪರಾಮಸತಿ, ಸಙ್ಘಂ ನ ಪರಾಮಸತಿ, ಪುಗ್ಗಲಂ ನ ಪರಾಮಸತಿ, ಞತ್ತಿಂ ನ ಪರಾಮಸತಿ, ಪಚ್ಛಾ ವಾ ಞತ್ತಿಂ ಠಪೇತಿ – ಇಮೇಹಿ ಪಞ್ಚಹಾಕಾರೇಹಿ ಞತ್ತಿತೋ ಕಮ್ಮಾನಿ ವಿಪಜ್ಜನ್ತಿ।

೪೯೨. ಕಥಂ ಅನುಸ್ಸಾವನತೋ ಕಮ್ಮಾನಿ ವಿಪಜ್ಜನ್ತಿ? ಪಞ್ಚಹಾಕಾರೇಹಿ ಅನುಸ್ಸಾವನತೋ ಕಮ್ಮಾನಿ ವಿಪಜ್ಜನ್ತಿ – ವತ್ಥುಂ ನ ಪರಾಮಸತಿ, ಸಙ್ಘಂ ನ ಪರಾಮಸತಿ, ಪುಗ್ಗಲಂ ನ ಪರಾಮಸತಿ, ಸಾವನಂ ಹಾಪೇತಿ, ಅಕಾಲೇ ವಾ ಸಾವೇತಿ – ಇಮೇಹಿ ಪಞ್ಚಹಾಕಾರೇಹಿ ಅನುಸ್ಸಾವನತೋ ಕಮ್ಮಾನಿ ವಿಪಜ್ಜನ್ತಿ।

೪೯೩. ಕಥಂ ಸೀಮತೋ ಕಮ್ಮಾನಿ ವಿಪಜ್ಜನ್ತಿ? ಏಕಾದಸಹಿ ಆಕಾರೇಹಿ ಸೀಮತೋ ಕಮ್ಮಾನಿ ವಿಪಜ್ಜನ್ತಿ। ಅತಿಖುದ್ದಕಂ ಸೀಮಂ ಸಮ್ಮನ್ನತಿ, ಅತಿಮಹತಿಂ ಸೀಮಂ ಸಮ್ಮನ್ನತಿ, ಖಣ್ಡನಿಮಿತ್ತಂ ಸೀಮಂ ಸಮ್ಮನ್ನತಿ, ಛಾಯಾನಿಮಿತ್ತಂ ಸೀಮಂ ಸಮ್ಮನ್ನತಿ, ಅನಿಮಿತ್ತಂ ಸೀಮಂ ಸಮ್ಮನ್ನತಿ, ಬಹಿಸೀಮೇ ಠಿತೋ ಸೀಮಂ ಸಮ್ಮನ್ನತಿ, ನದಿಯಾ ಸೀಮಂ ಸಮ್ಮನ್ನತಿ, ಸಮುದ್ದೇ ಸೀಮಂ ಸಮ್ಮನ್ನತಿ, ಜಾತಸ್ಸರೇ ಸೀಮಂ ಸಮ್ಮನ್ನತಿ, ಸೀಮಾಯ ಸೀಮಂ ಸಮ್ಭಿನ್ದತಿ, ಸೀಮಾಯ ಸೀಮಂ ಅಜ್ಝೋತ್ಥರತಿ – ಇಮೇಹಿ ಏಕಾದಸಹಿ ಆಕಾರೇಹಿ ಸೀಮತೋ ಕಮ್ಮಾನಿ ವಿಪಜ್ಜನ್ತಿ।

೪೯೪. ಕಥಂ ಪರಿಸತೋ ಕಮ್ಮಾನಿ ವಿಪಜ್ಜನ್ತಿ? ದ್ವಾದಸಹಿ ಆಕಾರೇಹಿ ಪರಿಸತೋ ಕಮ್ಮಾನಿ ವಿಪಜ್ಜನ್ತಿ – ಚತುವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ, ಚತುವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ। ಚತುವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ ಸಮ್ಮುಖೀಭೂತಾ ಪಟಿಕ್ಕೋಸನ್ತಿ। ಪಞ್ಚವಗ್ಗಕರಣೇ ಕಮ್ಮೇ…ಪೇ॰… ದಸವಗ್ಗಕರಣೇ ಕಮ್ಮೇ…ಪೇ॰… ವೀಸತಿವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ। ವೀಸತಿವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ। ವೀಸತಿವಗ್ಗಕರಣೇ ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಇಮೇಹಿ ದ್ವಾದಸಹಿ ಆಕಾರೇಹಿ ಪರಿಸತೋ ಕಮ್ಮಾನಿ ವಿಪಜ್ಜನ್ತಿ।

೪೯೫. ಅಪಲೋಕನಕಮ್ಮಂ ಕತಿ ಠಾನಾನಿ ಗಚ್ಛತಿ? ಞತ್ತಿಕಮ್ಮಂ ಕತಿ ಠಾನಾನಿ ಗಚ್ಛತಿ? ಞತ್ತಿದುತಿಯಕಮ್ಮಂ ಕತಿ ಠಾನಾನಿ ಗಚ್ಛತಿ? ಞತ್ತಿಚತುತ್ಥಕಮ್ಮಂ ಕತಿ ಠಾನಾನಿ ಗಚ್ಛತಿ? ಅಪಲೋಕನಕಮ್ಮಂ ಪಞ್ಚ ಠಾನಾನಿ ಗಚ್ಛತಿ। ಞತ್ತಿಕಮ್ಮಂ ನವ ಠಾನಾನಿ ಗಚ್ಛತಿ। ಞತ್ತಿದುತಿಯಕಮ್ಮಂ ಸತ್ತ ಠಾನಾನಿ ಗಚ್ಛತಿ। ಞತ್ತಿಚತುತ್ಥಕಮ್ಮಂ ಸತ್ತ ಠಾನಾನಿ ಗಚ್ಛತಿ।

೪೯೬. ಅಪಲೋಕನಕಮ್ಮಂ ಕತಮಾನಿ ಪಞ್ಚ ಠಾನಾನಿ ಗಚ್ಛತಿ? ಓಸಾರಣಂ, ನಿಸ್ಸಾರಣಂ, ಭಣ್ಡುಕಮ್ಮಂ, ಬ್ರಹ್ಮದಣ್ಡಂ, ಕಮ್ಮಲಕ್ಖಣಞ್ಞೇವ ಪಞ್ಚಮಂ – ಅಪಲೋಕನಕಮ್ಮಂ ಇಮಾನಿ ಪಞ್ಚ ಠಾನಾನಿ ಗಚ್ಛತಿ । ಞತ್ತಿಕಮ್ಮಂ ಕತಮಾನಿ ನವ ಠಾನಾನಿ ಗಚ್ಛತಿ? ಓಸಾರಣಂ, ನಿಸ್ಸಾರಣಂ, ಉಪೋಸಥಂ, ಪವಾರಣಂ, ಸಮ್ಮುತಿಂ, ದಾನಂ, ಪಟಿಗ್ಗಹಂ, ಪಚ್ಚುಕ್ಕಡ್ಢನಂ, ಕಮ್ಮಲಕ್ಖಣಞ್ಞೇವ ನವಮಂ – ಞತ್ತಿಕಮ್ಮಂ ಇಮಾನಿ ನವ ಠಾನಾನಿ ಗಚ್ಛತಿ। ಞತ್ತಿದುತಿಯಕಮ್ಮಂ ಕತಮಾನಿ ಸತ್ತ ಠಾನಾನಿ ಗಚ್ಛತಿ? ಓಸಾರಣಂ, ನಿಸ್ಸಾರಣಂ, ಸಮ್ಮುತಿಂ, ದಾನಂ, ಉದ್ಧರಣಂ, ದೇಸನಂ, ಕಮ್ಮಲಕ್ಖಣಞ್ಞೇವ ಸತ್ತಮಂ – ಞತ್ತಿದುತಿಯಕಮ್ಮಂ ಇಮಾನಿ ಸತ್ತ ಠಾನಾನಿ ಗಚ್ಛತಿ। ಞತ್ತಿಚತುತ್ಥಕಮ್ಮಂ ಕತಮಾನಿ ಸತ್ತ ಠಾನಾನಿ ಗಚ್ಛತಿ? ಓಸಾರಣಂ, ನಿಸ್ಸಾರಣಂ, ಸಮ್ಮುತಿಂ, ದಾನಂ, ನಿಗ್ಗಹಂ, ಸಮನುಭಾಸನಂ, ಕಮ್ಮಲಕ್ಖಣಞ್ಞೇವ ಸತ್ತಮಂ – ಞತ್ತಿಚತುತ್ಥಕಮ್ಮಂ ಇಮಾನಿ ಸತ್ತ ಠಾನಾನಿ ಗಚ್ಛತಿ।

೪೯೭. ಚತುವಗ್ಗಕರಣೇ ಕಮ್ಮೇ ಚತ್ತಾರೋ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ। ಪಞ್ಚವಗ್ಗಕರಣೇ ಕಮ್ಮೇ ಪಞ್ಚ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ। ದಸವಗ್ಗಕರಣೇ ಕಮ್ಮೇ ದಸ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ। ವೀಸತಿವಗ್ಗಕರಣೇ ಕಮ್ಮೇ ವೀಸತಿ ಭಿಕ್ಖೂ ಪಕತತ್ತಾ ಕಮ್ಮಪತ್ತಾ, ಅವಸೇಸಾ ಪಕತತ್ತಾ ಛನ್ದಾರಹಾ। ಯಸ್ಸ ಸಙ್ಘೋ ಕಮ್ಮಂ ಕರೋತಿ ಸೋ ನೇವ ಕಮ್ಮಪತ್ತೋ ನಾಪಿ ಛನ್ದಾರಹೋ, ಅಪಿ ಚ ಕಮ್ಮಾರಹೋ।

ಕಮ್ಮವಗ್ಗೋ ನಿಟ್ಠಿತೋ ಪಠಮೋ।

೨. ಅತ್ಥವಸವಗ್ಗೋ

೪೯೮. ಅ॰ ನಿ॰ ೨.೨೦೧-೨೩೦ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ಸಙ್ಘಸುಟ್ಠುತಾಯ, ಸಙ್ಘಫಾಸುತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದುಮ್ಮಙ್ಕೂನಂ ಪುಗ್ಗಲಾನಂ ನಿಗ್ಗಹಾಯ, ಪೇಸಲಾನಂ ಭಿಕ್ಖೂನಂ ಫಾಸುವಿಹಾರಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದಿಟ್ಠಧಮ್ಮಿಕಾನಂ ಆಸವಾನಂ ಸಂವರಾಯ, ಸಮ್ಪರಾಯಿಕಾನಂ ಆಸವಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದಿಟ್ಠಧಮ್ಮಿಕಾನಂ ವೇರಾನಂ ಸಂವರಾಯ, ಸಮ್ಪರಾಯಿಕಾನಂ ವೇರಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದಿಟ್ಠಧಮ್ಮಿಕಾನಂ ವಜ್ಜಾನಂ ಸಂವರಾಯ, ಸಮ್ಪರಾಯಿಕಾನಂ ವಜ್ಜಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದಿಟ್ಠಧಮ್ಮಿಕಾನಂ ಭಯಾನಂ ಸಂವರಾಯ, ಸಮ್ಪರಾಯಿಕಾನಂ ಭಯಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದಿಟ್ಠಧಮ್ಮಿಕಾನಂ ಅಕುಸಲಾನಂ ಧಮ್ಮಾನಂ ಸಂವರಾಯ, ಸಮ್ಪರಾಯಿಕಾನಂ ಅಕುಸಲಾನಂ ಧಮ್ಮಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ಗಿಹೀನಂ ಅನುಕಮ್ಪಾಯ, ಪಾಪಿಚ್ಛಾನಂ ಪಕ್ಖುಪಚ್ಛೇದಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ಅಪ್ಪಸನ್ನಾನಂ ಪಸಾದಾಯ, ಪಸನ್ನಾನಂ ಭಿಯ್ಯೋಭಾವಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ। ಸದ್ಧಮ್ಮಟ್ಠಿತಿಯಾ, ವಿನಯಾನುಗ್ಗಹಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ।

ಅತ್ಥವಸವಗ್ಗೋ ನಿಟ್ಠಿತೋ ದುತಿಯೋ।

೩. ಪಞ್ಞತ್ತವಗ್ಗೋ

೪೯೯. ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಪಾತಿಮೋಕ್ಖಂ ಪಞ್ಞತ್ತಂ…ಪೇ॰… ಪಾತಿಮೋಕ್ಖುದ್ದೇಸೋ ಪಞ್ಞತ್ತೋ… ಪಾತಿಮೋಕ್ಖಟ್ಠಪನಂ ಪಞ್ಞತ್ತಂ… ಪವಾರಣಾ ಪಞ್ಞತ್ತಾ… ಪವಾರಣಾಠಪನಂ ಪಞ್ಞತ್ತಂ… ತಜ್ಜನೀಯಕಮ್ಮಂ ಪಞ್ಞತ್ತಂ… ನಿಯಸ್ಸಕಮ್ಮಂ ಪಞ್ಞತ್ತಂ… ಪಬ್ಬಾಜನೀಯಕಮ್ಮಂ ಪಞ್ಞತ್ತಂ… ಪಟಿಸಾರಣೀಯಕಮ್ಮಂ ಪಞ್ಞತ್ತಂ… ಉಕ್ಖೇಪನೀಯಕಮ್ಮಂ ಪಞ್ಞತ್ತಂ… ಪರಿವಾಸದಾನಂ ಪಞ್ಞತ್ತಂ… ಮೂಲಾಯಪಟಿಕಸ್ಸನಾ ಪಞ್ಞತ್ತಾ… ಮಾನತ್ತದಾನಂ ಪಞ್ಞತ್ತಂ… ಅಬ್ಭಾನಂ ಪಞ್ಞತ್ತಂ… ಓಸಾರಣೀಯಂ ಪಞ್ಞತ್ತಂ… ನಿಸ್ಸಾರಣೀಯಂ ಪಞ್ಞತ್ತಂ… ಉಪಸಮ್ಪದಂ ಪಞ್ಞತ್ತಂ… ಅಪಲೋಕನಕಮ್ಮಂ ಪಞ್ಞತ್ತಂ… ಞತ್ತಿಕಮ್ಮಂ ಪಞ್ಞತ್ತಂ… ಞತ್ತಿದುತಿಯಕಮ್ಮಂ ಪಞ್ಞತ್ತಂ… ಞತ್ತಿಚತುತ್ಥಕಮ್ಮಂ ಪಞ್ಞತ್ತಂ…ಪೇ॰…।

ಪಞ್ಞತ್ತವಗ್ಗೋ ನಿಟ್ಠಿತೋ ತತಿಯೋ।

೪. ಅಪಞ್ಞತ್ತೇ ಪಞ್ಞತ್ತವಗ್ಗೋ

೫೦೦. …ಪೇ॰… ಅಪಞ್ಞತ್ತೇ ಪಞ್ಞತ್ತಂ, ಪಞ್ಞತ್ತೇ ಅನುಪಞ್ಞತ್ತಂ…ಪೇ॰… ಸಮ್ಮುಖಾವಿನಯೋ ಪಞ್ಞತ್ತೋ…ಪೇ॰… ಸತಿವಿನಯೋ ಪಞ್ಞತ್ತೋ…ಪೇ॰… ಅಮೂಳ್ಹವಿನಯೋ ಪಞ್ಞತ್ತೋ…ಪೇ॰… ಪಟಿಞ್ಞಾತಕರಣಂ ಪಞ್ಞತ್ತಂ…ಪೇ॰… ಯೇಭುಯ್ಯಸಿಕಾ ಪಞ್ಞತ್ತಾ…ಪೇ॰… ತಸ್ಸಪಾಪಿಯಸಿಕಾ ಪಞ್ಞತ್ತಾ…ಪೇ॰… ತಿಣವತ್ಥಾರಕೋ ಪಞ್ಞತ್ತೋ ಸಙ್ಘಸುಟ್ಠುತಾಯ, ಸಙ್ಘಫಾಸುತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದುಮ್ಮಙ್ಕೂನಂ ಪುಗ್ಗಲಾನಂ ನಿಗ್ಗಹಾಯ, ಪೇಸಲಾನಂ ಭಿಕ್ಖೂನಂ ಫಾಸುವಿಹಾರಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದಿಟ್ಠಧಮ್ಮಿಕಾನಂ ಆಸವಾನಂ ಸಂವರಾಯ, ಸಮ್ಪರಾಯಿಕಾನಂ ಆಸವಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದಿಟ್ಠಧಮ್ಮಿಕಾನಂ ವೇರಾನಂ ಸಂವರಾಯ, ಸಮ್ಪರಾಯಿಕಾನಂ ವೇರಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದಿಟ್ಠಧಮ್ಮಿಕಾನಂ ವಜ್ಜಾನಂ ಸಂವರಾಯ, ಸಮ್ಪರಾಯಿಕಾನಂ ವಜ್ಜಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದಿಟ್ಠಧಮ್ಮಿಕಾನಂ ಭಯಾನಂ ಸಂವರಾಯ, ಸಮ್ಪರಾಯಿಕಾನಂ ಭಯಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದಿಟ್ಠಧಮ್ಮಿಕಾನಂ ಅಕುಸಲಾನಂ ಧಮ್ಮಾನಂ ಸಂವರಾಯ, ಸಮ್ಪರಾಯಿಕಾನಂ ಅಕುಸಲಾನಂ ಧಮ್ಮಾನಂ ಪಟಿಘಾತಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ಗಿಹೀನಂ ಅನುಕಮ್ಪಾಯ, ಪಾಪಿಚ್ಛಾನಂ ಪಕ್ಖುಪಚ್ಛೇದಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ಅಪ್ಪಸನ್ನಾನಂ ಪಸಾದಾಯ, ಪಸನ್ನಾನಂ ಭಿಯ್ಯೋಭಾವಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ। ಸದ್ಧಮ್ಮಟ್ಠಿತಿಯಾ, ವಿನಯಾನುಗ್ಗಹಾಯ – ಇಮೇ ದ್ವೇ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ತಿಣವತ್ಥಾರಕೋ ಪಞ್ಞತ್ತೋ।

ಅಪಞ್ಞತ್ತೇ ಪಞ್ಞತ್ತವಗ್ಗೋ ನಿಟ್ಠಿತೋ ಚತುತ್ಥೋ।

೫. ನವಸಙ್ಗಹವಗ್ಗೋ

೫೦೧. ನವಸಙ್ಗಹಾ – ವತ್ಥುಸಙ್ಗಹೋ, ವಿಪತ್ತಿಸಙ್ಗಹೋ ಆಪತ್ತಿಸಙ್ಗಹೋ, ನಿದಾನಸಙ್ಗಹೋ, ಪುಗ್ಗಲಸಙ್ಗಹೋ, ಖನ್ಧಸಙ್ಗಹೋ, ಸಮುಟ್ಠಾನಸಙ್ಗಹೋ, ಅಧಿಕರಣಸಙ್ಗಹೋ, ಸಮಥಸಙ್ಗಹೋತಿ।

ಅಧಿಕರಣೇ ಸಮುಪ್ಪನ್ನೇ ಸಚೇ ಉಭೋ ಅತ್ಥಪಚ್ಚತ್ಥಿಕಾ ಆಗಚ್ಛನ್ತಿ ಉಭಿನ್ನಮ್ಪಿ ವತ್ಥು ಆರೋಚಾಪೇತಬ್ಬಂ। ಉಭಿನ್ನಮ್ಪಿ ವತ್ಥು ಆರೋಚಾಪೇತ್ವಾ ಉಭಿನ್ನಮ್ಪಿ ಪಟಿಞ್ಞಾ ಸೋತಬ್ಬಾ। ಉಭಿನ್ನಮ್ಪಿ ಪಟಿಞ್ಞಂ ಸುತ್ವಾ ಉಭೋಪಿ ವತ್ತಬ್ಬಾ – ‘‘ಅಮ್ಹಾಕಂ ಇಮಸ್ಮಿಂ ಅಧಿಕರಣೇ ವೂಪಸಮಿತೇ ವೂಪಸಮೇಪಿ (ಕ॰) ಉಭೋಪಿ ತುಟ್ಠಾ ಭವಿಸ್ಸಥಾ’’ತಿ। ಸಚೇ ಆಹಂಸು – ‘‘ಉಭೋಪಿ ತುಟ್ಠಾ ಭವಿಸ್ಸಾಮಾ’’ತಿ, ಸಙ್ಘೇನ ತಂ ಅಧಿಕರಣಂ ಸಮ್ಪಟಿಚ್ಛಿತಬ್ಬಂ। ಸಚೇ ಅಲಜ್ಜುಸ್ಸನ್ನಾ ಹೋತಿ, ಪರಿಸಾ ಉಬ್ಬಾಹಿಕಾಯ ವೂಪಸಮೇತಬ್ಬಂ। ಸಚೇ ಬಾಲುಸ್ಸನ್ನಾ ಹೋತಿ, ಪರಿಸಾ ವಿನಯಧರೋ ಪರಿಯೇಸಿತಬ್ಬೋ ಯೇನ ಧಮ್ಮೇನ ಯೇನ ವಿನಯೇನ ಯೇನ ಸತ್ಥುಸಾಸನೇನ ತಂ ಅಧಿಕರಣಂ ವೂಪಸಮ್ಮತಿ। ತಥಾ ತಂ ಅಧಿಕರಣಂ ವೂಪಸಮೇತಬ್ಬಂ।

ವತ್ಥು ಜಾನಿತಬ್ಬಂ, ಗೋತ್ತಂ ಜಾನಿತಬ್ಬಂ, ನಾಮಂ ಜಾನಿತಬ್ಬಂ, ಆಪತ್ತಿ ಜಾನಿತಬ್ಬಾ।

ಮೇಥುನಧಮ್ಮೋತಿ ವತ್ಥು ಚೇವ ಗೋತ್ತಞ್ಚ – ಪಾರಾಜಿಕನ್ತಿ ನಾಮಞ್ಚೇವ ಆಪತ್ತಿ ಚ।

ಅದಿನ್ನಾದಾನನ್ತಿ ವತ್ಥು ಚೇವ ಗೋತ್ತಞ್ಚ – ಪಾರಾಜಿಕನ್ತಿ ನಾಮಞ್ಚೇವ ಆಪತ್ತಿ ಚ।

ಮನುಸ್ಸವಿಗ್ಗಹೋತಿ ವತ್ಥು ಚೇವ ಗೋತ್ತಞ್ಚ – ಪಾರಾಜಿಕನ್ತಿ ನಾಮಞ್ಚೇವ ಆಪತ್ತಿ ಚ।

ಉತ್ತರಿಮನುಸ್ಸಧಮ್ಮೋತಿ ವತ್ಥು ಚೇವ ಗೋತ್ತಞ್ಚ – ಪಾರಾಜಿಕನ್ತಿ ನಾಮಞ್ಚೇವ ಆಪತ್ತಿ ಚ।

ಸುಕ್ಕವಿಸ್ಸಟ್ಠೀತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಕಾಯಸಂಸಗ್ಗೋತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ದುಟ್ಠುಲ್ಲವಾಚಾತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಅತ್ತಕಾಮನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಸಞ್ಚರಿತ್ತನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಸಞ್ಞಾಚಿಕಾಯ ಕುಟಿಂ ಕಾರಾಪನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಮಹಲ್ಲಕಂ ವಿಹಾರಂ ಕಾರಾಪನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಭಿಕ್ಖುಂ ಅಮೂಲಕೇನ ಪಾರಾಜಿಕೇನ ಧಮ್ಮೇನ ಅನುದ್ಧಂಸನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಭಿಕ್ಖುಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಸಙ್ಘಭೇದಕಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಭೇದಕಾನುವತ್ತಕಾನಂ ಭಿಕ್ಖೂನಂ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ದುಬ್ಬಚಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ।

ಕುಲದೂಸಕಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನನ್ತಿ ವತ್ಥು ಚೇವ ಗೋತ್ತಞ್ಚ – ಸಙ್ಘಾದಿಸೇಸೋತಿ ನಾಮಞ್ಚೇವ ಆಪತ್ತಿ ಚ…ಪೇ॰…।

ಅನಾದರಿಯಂ ಪಟಿಚ್ಚ ಉದಕೇ ಉಚ್ಚಾರಂ ವಾ ಪಸ್ಸಾವಂ ವಾ ಖೇಳಂ ವಾ ಕರಣನ್ತಿ ವತ್ಥು ಚೇವ ಗೋತ್ತಞ್ಚ – ದುಕ್ಕಟನ್ತಿ ನಾಮಞ್ಚೇವ ಆಪತ್ತಿ ಚಾತಿ।

ನವಸಙ್ಗಹವಗ್ಗೋ ನಿಟ್ಠಿತೋ ಪಞ್ಚಮೋ।

ತಸ್ಸುದ್ದಾನಂ –

ಅಪಲೋಕನಂ ಞತ್ತಿ ಚ, ದುತಿಯಂ ಚತುತ್ಥೇನ ಚ।

ವತ್ಥು ಞತ್ತಿ ಅನುಸ್ಸಾವನಂ, ಸೀಮಾ ಪರಿಸಮೇವ ಚ॥

ಸಮ್ಮುಖಾ ಪಟಿಪುಚ್ಛಾ ಚ, ಪಟಿಞ್ಞಾ ವಿನಯಾರಹೋ।

ವತ್ಥು ಸಙ್ಘಪುಗ್ಗಲಞ್ಚ, ಞತ್ತಿಂ ನ ಪಚ್ಛಾ ಞತ್ತಿ ಚ॥

ವತ್ಥುಂ ಸಙ್ಘಪುಗ್ಗಲಞ್ಚ, ಸಾವನಂ ಅಕಾಲೇನ ಚ।

ಅತಿಖುದ್ದಕಾ ಮಹನ್ತಾ ಚ, ಖಣ್ಡಚ್ಛಾಯಾ ನಿಮಿತ್ತಕಾ॥

ಬಹಿನದೀ ಸಮುದ್ದೇ ಚ, ಜಾತಸ್ಸರೇ ಚ ಭಿನ್ದತಿ।

ಅಜ್ಝೋತ್ಥರತಿ ಸೀಮಾಯ, ಚತು ಪಞ್ಚ ಚ ವಗ್ಗಿಕಾ॥

ದಸ ವೀಸತಿವಗ್ಗಾ ಚ, ಅನಾಹಟಾ ಚ ಆಹಟಾ।

ಕಮ್ಮಪತ್ತಾ ಛನ್ದಾರಹಾ, ಕಮ್ಮಾರಹಾ ಚ ಪುಗ್ಗಲಾ॥

ಅಪಲೋಕನಂ ಪಞ್ಚಟ್ಠಾನಂ, ಞತ್ತಿ ಚ ನವಠಾನಿಕಾ।

ಞತ್ತಿ ದುತಿಯಂ ಸತ್ತಟ್ಠಾನಂ, ಚತುತ್ಥಾ ಸತ್ತಠಾನಿಕಾ॥

ಸುಟ್ಠು ಫಾಸು ಚ ದುಮ್ಮಙ್ಕು, ಪೇಸಲಾ ಚಾಪಿ ಆಸವಾ।

ವೇರವಜ್ಜಭಯಞ್ಚೇವ, ಅಕುಸಲಂ ಗಿಹೀನಞ್ಚ॥

ಪಾಪಿಚ್ಛಾ ಅಪ್ಪಸನ್ನಾನಂ, ಪಸನ್ನಾ ಧಮ್ಮಟ್ಠಪನಾ।

ವಿನಯಾನುಗ್ಗಹಾ ಚೇವ, ಪಾತಿಮೋಕ್ಖುದ್ದೇಸೇನ ಚ॥

ಪಾತಿಮೋಕ್ಖಞ್ಚ ಠಪನಾ, ಪವಾರಣಞ್ಚ ಠಪನಂ।

ತಜ್ಜನೀಯಾ ನಿಯಸ್ಸಞ್ಚ, ಪಬ್ಬಾಜನೀಯ ಪಟಿಸಾರಣೀ।

ಉಕ್ಖೇಪನ ಪರಿವಾಸಂ, ಮೂಲಮಾನತ್ತಅಬ್ಭಾನಂ।

ಓಸಾರಣಂ ನಿಸ್ಸಾರಣಂ, ತಥೇವ ಉಪಸಮ್ಪದಾ॥

ಅಪಲೋಕನಞತ್ತಿ ಚ, ದುತಿಯಞ್ಚ ಚತುತ್ಥಕಂ।

ಅಪಞ್ಞತ್ತೇನುಪಞ್ಞತ್ತಂ, ಸಮ್ಮುಖಾವಿನಯೋ ಸತಿ॥

ಅಮೂಳ್ಹಪಟಿಯೇಭುಯ್ಯ, ಪಾಪಿಯ ತಿಣವತ್ಥಾರಕಂ।

ವತ್ಥು ವಿಪತ್ತಿ ಆಪತ್ತಿ, ನಿದಾನಂ ಪುಗ್ಗಲೇನ ಚ॥

ಖನ್ಧಾ ಚೇವ ಸಮುಟ್ಠಾನಾ, ಅಧಿಕರಣಮೇವ ಚ।

ಸಮಥಾ ಸಙ್ಗಹಾ ಚೇವ, ನಾಮಆಪತ್ತಿಕಾ ತಥಾತಿ॥

ಪರಿವಾರೋ ನಿಟ್ಠಿತೋ।

ಪರಿವಾರಪಾಳಿ ನಿಟ್ಠಿತಾ।