ಸಮುಟ್ಠಾನಸೀಸವಣ್ಣನಾ
೨೫೭. ಸಮುಟ್ಠಾನಕಥಾಯ ‘‘ಬುದ್ಧಚನ್ದೇ’’ತಿ ವುತ್ತಂ, ಕಿಲೇಸತಿಮಿರಪಹಾನತೋ ‘‘ಬುದ್ಧಾದಿಚ್ಚೇ’’ತಿ ವುತ್ತಂ। ಪಿಟಕೇ ತೀಣಿ ದೇಸಯೀತಿ ಯಸ್ಮಾ ತೇ ದೇಸಯನ್ತಿ, ತಸ್ಮಾ ಅಙ್ಗಿರಸೋಪಿ ಪಿಟಕಾನಿ ತೀಣಿ ದೇಸಯಿ। ತಾನಿ ಕತಮಾನೀತಿ ಆಹ ‘‘ಸುತ್ತನ್ತ’’ನ್ತಿಆದಿ। ಮಹಾಗುಣನ್ತಿ ಮಹಾನಿಸಂಸಂ। ಏವಂ ನೀಯತಿ ಸದ್ಧಮ್ಮೋ, ವಿನಯೋ ಯದಿ ತಿಟ್ಠತೀತಿ ಯದಿ ವಿನಯಪರಿಯತ್ತಿ ಅನನ್ತರಹಿತಾ ತಿಟ್ಠತಿ ಪವತ್ತತಿ, ಏವಂ ಸತಿ ಪಟಿಪತ್ತಿಪಟಿವೇಧಸದ್ಧಮ್ಮೋ ನೀಯತಿ ಪವತ್ತತಿ। ವಿನಯಪರಿಯತ್ತಿ ಪನ ಕಥಂ ತಿಟ್ಠತೀತಿ ಆಹ ‘‘ಉಭತೋಚಾ’’ತಿಆದಿ। ಪರಿವಾರೇನ ಗನ್ಥಿತಾ ತಿಟ್ಠನ್ತೀತಿ ಯೋಜೇತಬ್ಬಂ। ತಸ್ಸೇವ ಪರಿವಾರಸ್ಸಾತಿ ತಸ್ಮಿಂಯೇವ ಪರಿವಾರೇ।
ನಿಯತಕತನ್ತಿ ಕತನಿಯತಂ, ನಿಯಮಿತನ್ತಿ ಅತ್ಥೋ। ಅಞ್ಞೇಹಿ ಸದ್ಧಿನ್ತಿ ಸೇಸಸಿಕ್ಖಾಪದೇಹಿ ಸದ್ಧಿಂ। ಅಸಮ್ಭಿನ್ನಸಮುಟ್ಠಾನಾನೀತಿ ಅಸಙ್ಕರಸಮುಟ್ಠಾನಾನಿ।
ತಸ್ಮಾ ಸಿಕ್ಖೇತಿ ಯಸ್ಮಾ ವಿನಯೇ ಸತಿ ಸದ್ಧಮ್ಮೋ ತಿಟ್ಠತಿ, ವಿನಯೋ ಚ ಪರಿವಾರೇನ ಗನ್ಥಿತೋ ತಿಟ್ಠತಿ, ಪರಿವಾರೇ ಚ ಸಮುಟ್ಠಾನಾದೀನಿ ದಿಸ್ಸನ್ತಿ, ತಸ್ಮಾ ಸಿಕ್ಖೇಯ್ಯ ಪರಿವಾರಂ, ಉಗ್ಗಣ್ಹೇಯ್ಯಾತಿ ಅತ್ಥೋ।
ಆದಿಮ್ಹಿ ತಾವ ಪುರಿಮನಯೇತಿ ‘‘ಛನ್ನಂ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠಾತೀತಿ ಏಕೇನ ಸಮುಟ್ಠಾನೇನ ಸಮುಟ್ಠಾತಿ, ಕಾಯತೋ ಚ ಚಿತ್ತತೋ ಚ ಸಮುಟ್ಠಾತೀ’’ತಿಆದಿನಾ (ಪರಿ॰ ೧೮೭) ಪಞ್ಞತ್ತಿವಾರೇ ಸಕಿಂ ಆಗತನಯಂ ಸನ್ಧಾಯೇತಂ ವುತ್ತಂ।
೨೫೮. ನಾನುಬನ್ಧೇ ಪವತ್ತಿನಿನ್ತಿ ‘‘ಯಾ ಪನ ಭಿಕ್ಖುನೀ ವುಟ್ಠಾಪಿತಂ ಪವತ್ತಿನಿಂ ದ್ವೇ ವಸ್ಸಾನಿ ನಾನುಬನ್ಧೇಯ್ಯಾ’’ತಿ (ಪಾಚಿ॰ ೧೧೧೧) ವುತ್ತಸಿಕ್ಖಾಪದಂ।
೨೭೦. ಅಕತನ್ತಿ ಅಞ್ಞೇಹಿ ಅಮಿಸ್ಸೀಕತಂ, ನಿಯತಸಮುಟ್ಠಾನನ್ತಿ ವುತ್ತಂ ಹೋತಿ।