ಉಪೋಸಥಾದಿಪುಚ್ಛಾವಿಸ್ಸಜ್ಜನಾವಣ್ಣನಾ
೩೩೨. ‘‘ಸಙ್ಘಂ, ಭನ್ತೇ, ಪವಾರೇಮೀತಿಆದಿ ಪವಾರಣಾಕಥಾ ನಾಮಾ’’ತಿ ಗಣ್ಠಿಪದೇಸು ವುತ್ತಂ।
ಅತ್ಥವಸಪಕರಣವಣ್ಣನಾ
೩೩೪. ಪಠಮಪಾರಾಜಿಕವಣ್ಣನಾಯಮೇವ ವುತ್ತನ್ತಿ ‘‘ಸಙ್ಘಸುಟ್ಠುತಾಯಾ’’ತಿಆದೀನಂ ಅತ್ಥವಣ್ಣನಂ ಸನ್ಧಾಯ ವುತ್ತಂ। ದಸಕ್ಖತ್ತುಂ ಯೋಜನಾಯ ಪದಸತಂ ವುತ್ತನ್ತಿ ಏಕಮೂಲಕನಯೇ ದಸಕ್ಖತ್ತುಂ ಯೋಜನಾಯ ಕತಾಯ ಸಙ್ಖಲಿಕನಯೇ ವುತ್ತಪದೇಹಿ ಸದ್ಧಿಂ ಪದಸತಂ ವುತ್ತನ್ತಿ ಏವಮತ್ಥೋ ಗಹೇತಬ್ಬೋ। ಅಞ್ಞಥಾ ಏಕಮೂಲಕೇ ಏವ ನಯೇ ನ ಸಕ್ಕಾ ಪದಸತಂ ಲದ್ಧುಂ। ಏಕಮೂಲಕನಯೇಹಿ ಪುರಿಮಪಚ್ಛಿಮಪದಾನಿ ಏಕತೋ ಕತ್ವಾ ಏಕೇಕಸ್ಮಿಂ ವಾರೇ ನವ ನವ ಪದಾನಿ ವುತ್ತಾನೀತಿ ದಸಕ್ಖತ್ತುಂ ಯೋಜನಾಯ ನವುತಿ ಪದಾನಿಯೇವ ಲಬ್ಭನ್ತಿ। ತಸ್ಮಾ ತಾನಿ ನವುತಿ ಪದಾನಿ ಸಙ್ಖಲಿಕನಯೇ ಬದ್ಧಚಕ್ಕವಸೇನ ಯೋಜಿತೇ ದಸ ಪದಾನಿ ಲಬ್ಭನ್ತೀತಿ ತೇಹಿ ಸದ್ಧಿಂ ಪದಸತನ್ತಿ ಸಕ್ಕಾ ವತ್ತುಂ। ಇತೋ ಅಞ್ಞಥಾ ಪನ ಉಭೋಸುಪಿ ‘‘ತತ್ಥ ಪಚ್ಛಿಮಸ್ಸ ಪಚ್ಛಿಮಸ್ಸ ಪದಸ್ಸ ವಸೇನ ಅತ್ಥಸತಂ, ಪುರಿಮಸ್ಸ ಪುರಿಮಸ್ಸ ವಸೇನ ಧಮ್ಮಸತ’’ನ್ತಿ ವುತ್ತಂ। ತಸ್ಮಿಂ ಪದಸತೇ ‘‘ಸಙ್ಘಸುಟ್ಠೂ’’ತಿಆದಿನಾ ವುತ್ತಪುರಿಮಪದಾನಂ ವಸೇನ ಧಮ್ಮಸತಂ, ‘‘ಸಙ್ಘಫಾಸೂ’’ತಿಆದಿನಾ ವುತ್ತಪಚ್ಛಿಮಪದಾನಂ ವಸೇನ ಅತ್ಥಸತನ್ತಿ ಅಧಿಪ್ಪಾಯೋ।
ಮಹಾವಗ್ಗವಣ್ಣನಾ ನಿಟ್ಠಿತಾ।