ಅಧಿಕರಣಭೇದವಣ್ಣನಾ
೩೪೦. ಯಸ್ಮಾ ‘‘ವಿವಾದಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತೀ’’ತಿಆದಿ ವುತ್ತಂ।
೩೪೧. ಪಾಳಿಮುತ್ತಕವಿನಿಚ್ಛಯೇನೇವಾತಿ ವಿನಯಲಕ್ಖಣಂ ವಿನಾ ಕೇವಲಂ ಧಮ್ಮದೇಸನಾಮತ್ತವಸೇನೇವಾತಿ ಅತ್ಥೋ। ಯೇನಾಪಿ ವಿನಿಚ್ಛಯೇನಾತಿ ಪಾಳಿಮುತ್ತಕವಿನಿಚ್ಛಯಮೇವ ಸನ್ಧಾಯ ವುತ್ತಂ। ಖನ್ಧಕತೋ ಚ ಪರಿವಾರತೋ ಚ ಸುತ್ತೇನಾತಿ ಖನ್ಧಕಪರಿವಾರತೋ ಆನೀತಸುತ್ತೇನ। ನಿಜ್ಝಾಪೇನ್ತೀತಿ ಪಞ್ಞಾಪೇನ್ತಿ।
೩೪೨. ಕಿಚ್ಚಂ ನಿಸ್ಸಾಯ ಉಪ್ಪಜ್ಜನಕಕಿಚ್ಚಾನನ್ತಿ ಪುಬ್ಬೇ ಕತಉಕ್ಖೇಪನೀಯಾದಿಕಿಚ್ಚಂ ನಿಸ್ಸಾಯ ಉಪ್ಪಜ್ಜನಕಕಿಚ್ಚಾನಂ। ಕೀದಿಸಾನಂ? ಯಾವತತಿಯಸಮನುಭಾಸನಾದೀನಂ।
೩೪೩. ತಂ ಹೀತಿ ತಂ ವಿವಾದಾಧಿಕರಣಂ।
೩೪೪. ಅಧಿಕರಣೇಸು ಯೇನ ಅಧಿಕರಣೇನ ಸಮ್ಮನ್ತಿ, ತಂ ದಸ್ಸೇತುಂ ವುತ್ತನ್ತಿ ಯದಾ ಅಧಿಕರಣೇಹಿ ಸಮ್ಮನ್ತಿ, ತದಾ ಕಿಚ್ಚಾಧಿಕರಣೇನೇವ ಸಮ್ಮನ್ತಿ, ನ ಅಞ್ಞೇಹಿ ಅಧಿಕರಣೇಹೀತಿ ದಸ್ಸನತ್ಥಂ ವುತ್ತನ್ತಿ ಅಧಿಪ್ಪಾಯೋ।
೩೫೩. ‘‘ಸತ್ತನ್ನಂ ಸಮಥಾನಂ ಕತಮೇ ಛತ್ತಿಂಸ ಸಮುಟ್ಠಾನಾ’’ತಿ ಪುಚ್ಛಿತ್ವಾಪಿ ‘‘ಕಮ್ಮಸ್ಸ ಕಿರಿಯಾ ಕರಣ’’ನ್ತಿಆದಿನಾ ಸಮ್ಮುಖಾವಿನಯಸ್ಸ ಸಮುಟ್ಠಾನಾನಿ ಅವಿಭಜಿತ್ವಾವ ಸತಿವಿನಯಾದೀನಂ ಛನ್ನಞ್ಞೇವ ಛ ಸಮುಟ್ಠಾನಾನಿ ವಿಭತ್ತಾನಿ, ತಂ ಕಸ್ಮಾತಿ ಆಹ ‘‘ಕಿಞ್ಚಾಪಿ ಸತ್ತನ್ನಂ ಸಮಥಾನ’’ನ್ತಿಆದಿ। ಸತಿವಿನಯಾದೀನಂ ವಿಯ ಸಙ್ಘಸಮ್ಮುಖತಾದೀನಂ ಕಿಚ್ಚಯತಾ ನಾಮ ನತ್ಥೀತಿ ಆಹ ‘‘ಕಮ್ಮಸಙ್ಗಹಾಭಾವೇನಾ’’ತಿ।