ಸಙ್ಘಾದಿಸೇಸಕಣ್ಡೋ

೧. ಉಸ್ಸಯವಾದಿಕಾಸಿಕ್ಖಾಪದವಣ್ಣನಾ

ಸಙ್ಘಾದಿಸೇಸೇಸು ಪಠಮೇ ಉಸ್ಸಯವಾದಿಕಾತಿ ಮಾನುಸ್ಸಯವಸೇನ ಕೋಧುಸ್ಸಯವಸೇನ ಅಡ್ಡಕರಣತ್ಥಾಯ ವಿನಿಚ್ಛಯಮಹಾಮತ್ತಾನಂ ಸನ್ತಿಕೇ ವಿವದಮಾನಾ। ಗಹಪತಿನಾ ವಾತಿಆದೀಹಿ ಠಪೇತ್ವಾ ಪಞ್ಚ ಸಹಧಮ್ಮಿಕೇ ಅವಸೇಸಾ ಗಹಟ್ಠಪಬ್ಬಜಿತಾ ಸಙ್ಗಹಿತಾ। ಅಯಂ ಭಿಕ್ಖುನೀ ಪಠಮಾಪತ್ತಿಕನ್ತಿ ಆದಿಮ್ಹಿ ಪಠಮಂ ಆಪತ್ತಿ ಏತಸ್ಸಾತಿ ಪಠಮಾಪತ್ತಿಕೋ, ವೀತಿಕ್ಕಮಕ್ಖಣೇಯೇವ ಆಪಜ್ಜಿತಬ್ಬೋತಿ ಅತ್ಥೋ, ತಂ ಪಠಮಾಪತ್ತಿಕಂ। ಆಪನ್ನಾತಿ ಅಡ್ಡಪರಿಯೋಸಾನೇ ಆಪನ್ನಾ। ಭಿಕ್ಖುನಿಂ ಸಙ್ಘತೋ ನಿಸ್ಸಾರೇತೀತಿ ನಿಸ್ಸಾರಣೀಯೋ, ತಂ ನಿಸ್ಸಾರಣೀಯಂ। ಸಙ್ಘಾದಿಸೇಸನ್ತಿ ಏವಂನಾಮಕಂ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಉಸ್ಸಯವಾದಿಕವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಂ, ‘‘ಅಡ್ಡಂ ಕರಿಸ್ಸಾಮೀ’’ತಿ ಯಂಕಿಞ್ಚಿ ದುತಿಯಿಕಂ ವಾ ಸಕ್ಖಿಂ ವಾ ಸಹಾಯಂ ವಾ ಪರಿಯೇಸನ್ತಿಯಾ ಪರಿಯೇಸನೇ ದುಕ್ಕಟಂ, ಯತ್ಥ ಠಿತಾಯ ‘‘ಅಡ್ಡಂ ಕಾತುಂ ಗಚ್ಛಾಮೀ’’ತಿ ಚಿತ್ತಂ ಉಪ್ಪಜ್ಜತಿ, ತತೋ ಪಟ್ಠಾಯ ಗಚ್ಛನ್ತಿಯಾ ಪದೇ ಪದೇ ದುಕ್ಕಟಂ, ಯತ್ಥಕತ್ಥಚಿ ಅನ್ತಮಸೋ ಭಿಕ್ಖುನುಪಸ್ಸಯಂ ಆಗತೇಪಿ ವೋಹಾರಿಕೇ ದಿಸ್ವಾ ಅತ್ತನೋ ಕಥಂ ಆರೋಚೇನ್ತಿಯಾ ದುಕ್ಕಟಂ। ಇತರೇನ ಅತ್ತನೋ ಕಥಾಯ ಆರೋಚಿತಾಯ ಭಿಕ್ಖುನಿಯಾ ಥುಲ್ಲಚ್ಚಯಂ, ಪಠಮಂ ಇತರೇನ ಪಚ್ಛಾ ಭಿಕ್ಖುನಿಯಾ ಆರೋಚನೇಪಿ ಏಸೇವ ನಯೋ। ಸಚೇ ಪನ ಭಿಕ್ಖುನೀ ತಂ ವದತಿ ‘‘ಮಮ ಚ ತವ ಚ ಕಥಂ ತ್ವಂಯೇವ ಆರೋಚೇಹೀ’’ತಿ, ಸೋ ಅತ್ತನೋ ವಾ ಕಥಂ ಪಠಮಂ ಆರೋಚೇತು, ತಸ್ಸಾ ವಾ, ಪಠಮಾರೋಚನೇ ಭಿಕ್ಖುನಿಯಾ ದುಕ್ಕಟಂ, ದುತಿಯೇ ಥುಲ್ಲಚ್ಚಯಂ, ತೇನ ಏವಂ ವುತ್ತಾಯ ಭಿಕ್ಖುನಿಯಾ ಆರೋಚನೇಪಿ ಏಸೇವ ನಯೋ। ಸಚೇ ಪನ ಭಿಕ್ಖುನೀ ಅಞ್ಞೇನ ಕಥಾಪೇತಿ, ತತ್ರಾಪಿ ಏಸೇವ ನಯೋ। ಯಥಾ ವಾ ತಥಾ ವಾ ಹಿ ಆರೋಚಿಯಮಾನೇ ಪಠಮಾರೋಚನೇ ಭಿಕ್ಖುನಿಯಾ ದುಕ್ಕಟಂ, ದುತಿಯೇ ಥುಲ್ಲಚ್ಚಯಂ। ಉಭಿನ್ನಂ ಪನ ಕಥಂ ಸುತ್ವಾ ವೋಹಾರಿಕೇಹಿ ವಿನಿಚ್ಛಯೇ ಕತೇ ಅಡ್ಡಪರಿಯೋಸಾನಂ ನಾಮ ಹೋತಿ, ತಸ್ಮಿಂ ಅಡ್ಡಪರಿಯೋಸಾನೇ ಭಿಕ್ಖುನಿಯಾ ಜಯೇಪಿ ಪರಾಜಯೇಪಿ ಸಙ್ಘಾದಿಸೇಸೋ।

ಯಾ ಪನ ಪಚ್ಚತ್ಥಿಕಮನುಸ್ಸೇಹಿ ದೂತಂ ವಾ ಪಹಿಣಿತ್ವಾ, ಸಯಂ ವಾ ಆಗನ್ತ್ವಾ ‘‘ಏಹಿ, ಅಯ್ಯೇ’’ತಿ ಆಕಡ್ಢಿಯಮಾನಾ ಗಚ್ಛತಿ, ಯಾ ವಾ ಉಪಸ್ಸಯೇ ಅಞ್ಞೇಹಿ ಕತಂ ಅನಾಚಾರಂ ಅನೋದಿಸ್ಸ ಆಚಿಕ್ಖನ್ತೀ ರಕ್ಖಂ ಯಾಚತಿ, ಯಾಯ ಚ ಕಿಞ್ಚಿ ಅವುತ್ತಾ ವೋಹಾರಿಕಾ ಅಞ್ಞತೋ ಸುತ್ವಾ ಸಯಮೇವ ಅಡ್ಡಂ ಪರಿಯೋಸಾಪೇನ್ತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅಞ್ಞೇಹಿ ಅನಾಕಡ್ಢಿತಾಯ ಅಡ್ಡಕರಣಂ, ಅಡ್ಡಪರಿಯೋಸಾನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಕಥಿನಸದಿಸಾನಿ, ಇದಂ ಪನ ಕಿರಿಯಮೇವಾತಿ।

ಉಸ್ಸಯವಾದಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ।

೨. ಚೋರಿವುಟ್ಠಾಪಿಕಾಸಿಕ್ಖಾಪದವಣ್ಣನಾ

ದುತಿಯೇ ಯಾಯ ಪಞ್ಚಮಾಸಗ್ಘನಕತೋ ಪಟ್ಠಾಯ ಯಂಕಿಞ್ಚಿ ಪರಸನ್ತಕಂ ಅವಹರಿತಂ, ಅಯಂ ಚೋರೀ ನಾಮ, ತಂ ಚೋರಿಂ। ವಜ್ಝಂ ವಿದಿತನ್ತಿ ತೇನ ಕಮ್ಮೇನ ‘‘ವಧಾರಹಾ ಅಯ’’ನ್ತಿ ಏವಂ ವಿದಿತಂ। ಅನಪಲೋಕೇತ್ವಾತಿ ಅನಾಪುಚ್ಛಾ। ಗಣನ್ತಿ ಮಲ್ಲಗಣಭಟಿಪುತ್ತಗಣಾದಿಕಂ। ಪೂಗನ್ತಿ ಧಮ್ಮಗಣಂ। ಸೇಣಿನ್ತಿ ಗನ್ಧಿಕಸೇಣಿದುಸ್ಸಿಕಸೇಣಿಆದಿಕಂ। ಯತ್ಥ ಯತ್ಥ ಹಿ ರಾಜಾನೋ ಗಣಾದೀನಂ ಗಾಮನಿಗಮೇ ನಿಯ್ಯಾತೇನ್ತಿ ‘‘ತುಮ್ಹೇವ ಏತ್ಥ ಅನುಸಾಸಥಾ’’ತಿ, ತತ್ಥ ತತ್ಥ ತೇಯೇವ ಇಸ್ಸರಾ ಹೋನ್ತಿ, ತಸ್ಮಾ ತೇ ಸನ್ಧಾಯ ಇದಂ ವುತ್ತಂ। ಏತ್ಥ ಚ ರಾಜಾನಂ ವಾ ಗಣಾದಿಕೇ ವಾ ಅಪಲೋಕೇತ್ವಾಪಿ ಭಿಕ್ಖುನಿಸಙ್ಘೋ ಅಪಲೋಕೇತಬ್ಬೋವ। ಅಞ್ಞತ್ರ ಕಪ್ಪಾತಿ ತಿತ್ಥಿಯೇಸು ವಾ ಅಞ್ಞಭಿಕ್ಖುನೀಸು ವಾ ಪಬ್ಬಜಿತಪುಬ್ಬಾ ಕಪ್ಪಾ ನಾಮ, ತಂ ಠಪೇತ್ವಾ ಅಞ್ಞಂ ಉಪಸಮ್ಪಾದೇನ್ತಿಯಾ ಗಣಆಚರಿನೀ ಪತ್ತಚೀವರಪರಿಯೇಸನೇಸು ಸೀಮಾಸಮ್ಮುತಿಯಾ ಞತ್ತಿಯಾ ಚ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಂ, ಕಮ್ಮವಾಚಾಪರಿಯೋಸಾನೇ ಸಙ್ಘಾದಿಸೇಸೋ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಚೋರಿಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ, ಚೋರಿಯಾ ವೇಮತಿಕಾಯ ದುಕ್ಕಟಂ, ತಥಾ ಅಚೋರಿಯಾ ಚೋರಿಸಞ್ಞಾಯ ಚೇವ ವೇಮತಿಕಾಯ ಚ। ಅಚೋರಿಸಞ್ಞಾಯ, ಅಜಾನನ್ತಿಯಾ, ಅಪಲೋಕೇತ್ವಾ ವುಟ್ಠಾಪೇನ್ತಿಯಾ, ಕಪ್ಪಂ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಚೋರಿತಾ, ಚೋರಿಸಞ್ಞಿತಾ, ಅಞ್ಞತ್ರ ಅನುಞ್ಞಾತಕಾರಣಾ ವುಟ್ಠಾಪನನ್ತಿ, ಇಮಾನೇತ್ಥ ತೀಣಿ ಅಙ್ಗಾನಿ। ಚೋರಿವುಟ್ಠಾಪನಸಮುಟ್ಠಾನಂ, ಕಿರಿಯಾಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ತಿಚಿತ್ತಂ, ತಿವೇದನನ್ತಿ।

ಚೋರಿವುಟ್ಠಾಪಿಕಾಸಿಕ್ಖಾಪದವಣ್ಣನಾ ನಿಟ್ಠಿತಾ।

೩. ಏಕಗಾಮನ್ತರಗಮನಸಿಕ್ಖಾಪದವಣ್ಣನಾ

ತತಿಯೇ ಗಾಮನ್ತರನ್ತಿಆದೀಸು ಸಕಗಾಮತೋ ತಾವ ನಿಕ್ಖಮನ್ತಿಯಾ ಅನಾಪತ್ತಿ, ನಿಕ್ಖಮಿತ್ವಾ ಪನ ಅಞ್ಞಂ ಗಾಮಂ ಗಚ್ಛನ್ತಿಯಾ ಪದೇ ಪದೇ ದುಕ್ಕಟಂ, ಏಕೇನ ಪಾದೇನ ಇತರಸ್ಸ ಗಾಮಸ್ಸ ಪರಿಕ್ಖೇಪೇ ವಾ ಉಪಚಾರೇ ವಾ ಅತಿಕ್ಕನ್ತೇ ಥುಲ್ಲಚ್ಚಯಂ, ದುತಿಯೇನ ಅತಿಕ್ಕನ್ತಮತ್ತೇ ಸಙ್ಘಾದಿಸೇಸೋ, ತತೋ ನಿಕ್ಖಮಿತ್ವಾ ಪುನ ಸಕಗಾಮಂ ಪವಿಸನ್ತಿಯಾಪಿ ಏಸೇವ ನಯೋ। ಸಚೇ ಪನ ಖಣ್ಡಪಾಕಾರೇನ ವಾ ವತಿಚ್ಛಿದ್ದೇನ ವಾ ಭಿಕ್ಖುನಿವಿಹಾರಭೂಮಿಂಯೇವ ಸಕ್ಕಾ ಹೋತಿ ಪವಿಸಿತುಂ, ಏವಂ ಪವಿಸಮಾನಾಯ ಕಪ್ಪಿಯಭೂಮಿಯಾ ಪವಿಟ್ಠಾ ನಾಮ ಹೋತಿ, ತಸ್ಮಾ ವಟ್ಟತಿ। ಬಹಿಗಾಮೇ ಠತ್ವಾ ಯಂಕಿಞ್ಚಿ ಸಕಗಾಮಂ ವಾ ಪರಗಾಮಂ ವಾ ಅಕಪ್ಪಿಯಭೂಮಿಂ ಪದಸಾ ಪವಿಸನ್ತಿಯಾ ಆಪತ್ತೀತಿ ಅಯಮೇತ್ಥ ಸಙ್ಖೇಪೋ।

ನದಿಪಾರಗಮನೇ ವುತ್ತಲಕ್ಖಣಾಯ ನದಿಯಾ ದುತಿಯಿಕಂ ವಿನಾ ಪರತೀರಂ ಗಚ್ಛನ್ತಿಯಾ ವಾ ಅನ್ತರಾನದಿಯಂ ದುತಿಯಿಕಾಯ ಸದ್ಧಿಂ ಭಣ್ಡಿತ್ವಾ ಪುನ ಓರಿಮತೀರಮೇವ ಪಚ್ಚುತ್ತರನ್ತಿಯಾ ವಾ ಪಠಮಪಾದಂ ಉದ್ಧರಿತ್ವಾ ತೀರೇ ಠಪಿತಕ್ಖಣೇ ಥುಲ್ಲಚ್ಚಯಂ, ದುತಿಯಪಾದುದ್ಧಾರೇ ಸಙ್ಘಾದಿಸೇಸೋ। ಇದ್ಧಿಸೇತುಯಾನನಾವಾಹಿ ಪನ ಪರತೀರಂ ಓತರಿತುಂ, ನಹಾನಾದಿಕಾರಣೇನ ಚ ಓತಿಣ್ಣಾಯ ಓರಿಮತೀರಂ ಪದಸಾಪಿ ಪಚ್ಚುತ್ತರಿತುಂ ವಟ್ಟತಿ।

ರತ್ತಿವಿಪ್ಪವಾಸೇ ‘‘ಪುರೇಅರುಣೇಯೇವ ದುತಿಯಿಕಾಯ ಹತ್ಥಪಾಸಂ ಓಕ್ಕಮಿಸ್ಸಾಮೀ’’ತಿ ಆಭೋಗಂ ವಿನಾ ಏಕಗಬ್ಭೇಪಿ ದುತಿಯಿಕಾಯ ಹತ್ಥಪಾಸಾತಿಕ್ಕಮೇ ಠತ್ವಾ ಅರುಣಂ ಉಟ್ಠಾಪೇನ್ತಿಯಾ ಆಪತ್ತಿ।

ಏಕಾ ವಾ ಗಣಮ್ಹಾತಿ ಏತ್ಥ ಪನ ಏಕಾ ಭಿಕ್ಖುನೀಪಿ ಗಣೋಯೇವ। ಓಹೀಯೇಯ್ಯಾತಿ ಅವಹೀಯೇಯ್ಯ, ದಸ್ಸನೂಪಚಾರಂ ವಾ ಸವನೂಪಚಾರಂ ವಾ ವಿಜಹೇಯ್ಯಾತಿ ಅತ್ಥೋ। ತಸ್ಮಾ ಇನ್ದಖೀಲಾತಿಕ್ಕಮತೋ ಪಟ್ಠಾಯ ಬಹಿಗಾಮೇ ರುಕ್ಖಥಮ್ಭಸಾಣಿಪಾಕಾರಾದಿಅನ್ತರಿತಭಾವೇನಾಪಿ ದುತಿಯಿಕಾಯ ದಸ್ಸನೂಪಚಾರೇ ವಿಜಹಿತೇ ಸಚೇಪಿ ಸವನೂಪಚಾರೋ ಅತ್ಥಿ, ಆಪತ್ತಿಯೇವ। ಅಜ್ಝೋಕಾಸೇ ಪನ ದೂರೇಪಿ ದಸ್ಸನೂಪಚಾರೋ ಹೋತಿ, ತತ್ಥ ಮಗ್ಗಮೂಳ್ಹಸದ್ದೇನ ವಿಯ ಧಮ್ಮಸ್ಸವನಾರೋಚನಸದ್ದೇನ ವಿಯ ಚ ‘ಅಯ್ಯೇ’ತಿ ಸದ್ದಾಯನ್ತಿಯಾ ಸದ್ದಸ್ಸವನಾತಿಕ್ಕಮೇ ಆಪತ್ತಿಯೇವ। ಸಚೇ ಪನ ಮಗ್ಗಂ ಗಚ್ಛನ್ತೀ ಓಹೀಯಿತ್ವಾ ‘‘ಇದಾನಿ ಪಾಪುಣಿಸ್ಸಾಮೀ’’ತಿ ಸಉಸ್ಸಾಹಾ ಅನುಬನ್ಧತಿ, ವಟ್ಟತಿ।

ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಗಾಮನ್ತರಗಮನವತ್ಥುಸ್ಮಿಂ ಪಞ್ಞತ್ತಂ, ‘‘ಏಕಾ ವಾ ನದಿಪಾರ’’ನ್ತಿಆದಿಕಾ ಏತ್ಥ ತಿವಿಧಾ ಅನುಪಞ್ಞತ್ತಿ, ಪುರೇ ಅರುಣೇ ಸಕಗಾಮತೋ ನಿಕ್ಖಮಿತ್ವಾ ಅರುಣುಗ್ಗಮನಕಾಲೇ ಗಾಮನ್ತರಪರಿಯಾಪನ್ನಂ ನದಿಪಾರಂ ಓಕ್ಕಮನನ್ತಿಯಾ ಪನ ಚತಸ್ಸೋಪಿ ಆಪತ್ತಿಯೋ ಏಕಕ್ಖಣೇಯೇವ ಹೋನ್ತಿ। ವುತ್ತಮ್ಪಿ ಚೇತಂ –

‘‘ಸಿಕ್ಖಾಪದಾ ಬುದ್ಧವರೇನ ವಣ್ಣಿತಾ।

ಸಙ್ಘಾದಿಸೇಸಾ ಚತುರೋ ಭವೇಯ್ಯುಂ।

ಆಪಜ್ಜೇಯ್ಯ ಏಕಪಯೋಗೇನ ಸಬ್ಬಾ।

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ’’ತಿ॥ (ಪರಿ॰ ೪೭೯)।

ಏತೇನುಪಾಯೇನ ತಿಣ್ಣಂ, ದ್ವಿನ್ನಞ್ಚ ಏಕತೋಭಾವೋ ವೇದಿತಬ್ಬೋ। ದುತಿಯಿಕಾಯ ಪನ ಪಕ್ಕನ್ತಾಯ ವಾ ವಿಬ್ಭನ್ತಾಯ ವಾ ಕಾಲಙ್ಕತಾಯ ವಾ ಪಕ್ಖಸಙ್ಕನ್ತಾಯ ವಾ ಆಪದಾಸು ವಾ ಗಾಮನ್ತರಗಮನಾದೀನಿ ಕರೋನ್ತಿಯಾ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅನ್ತರಾಯೇನ ಏಕತೋಭಾವೋ, ಗಾಮನ್ತರಗಮನಾದೀಸು ಅಞ್ಞತರತಾಪಜ್ಜನಂ, ಆಪದಾಯ ಅಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನಿ, ಇದಂ ಪನ ಪಣ್ಣತ್ತಿವಜ್ಜಂ, ತಿಚಿತ್ತಂ, ತಿವೇದನನ್ತಿ।

ಏಕಗಾಮನ್ತರಗಮನಸಿಕ್ಖಾಪದವಣ್ಣನಾ ನಿಟ್ಠಿತಾ।

೪. ಉಕ್ಖಿತ್ತಕಓಸಾರಣಸಿಕ್ಖಾಪದವಣ್ಣನಾ

ಚತುತ್ಥೇ ಉಕ್ಖಿತ್ತನ್ತಿ ಆಪತ್ತಿಯಾ ಅದಸ್ಸನಾದೀಸು ಉಕ್ಖಿತ್ತಂ। ಅನಞ್ಞಾಯ ಗಣಸ್ಸ ಛನ್ದನ್ತಿ ತಸ್ಸೇವ ಕಾರಕಸಙ್ಘಸ್ಸ ಛನ್ದಂ ಅಜಾನಿತ್ವಾ। ಓಸಾರೇಯ್ಯಾತಿ ಓಸಾರಣಕಮ್ಮಂ ಕರೇಯ್ಯ। ತಸ್ಸಾ ಏವಂ ಕರೋನ್ತಿಯಾ, ಗಣಪರಿಯೇಸನೇ ಸೀಮಾಸಮ್ಮುತಿಯಾ ಞತ್ತಿಯಾ ಚ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಂ, ಕಮ್ಮವಾಚಾಪರಿಯೋಸಾನೇ ಸಙ್ಘಾದಿಸೇಸೋ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏವಂ ಓಸಾರಣವತ್ಥುಸ್ಮಿಂ ಪಞ್ಞತ್ತಂ, ತಿಕಸಙ್ಘಾದಿಸೇಸಂ, ಅಧಮ್ಮಕಮ್ಮೇ ತಿಕದುಕ್ಕಟಂ, ಕಾರಕಸಙ್ಘಂ ವಾ ಆಪುಚ್ಛಿತ್ವಾ, ಗಣಸ್ಸ ವಾ ಛನ್ದಂ ಜಾನಿತ್ವಾ, ವತ್ತೇ ವಾ ವತ್ತನ್ತಿಂ, ಅಸನ್ತೇ ಕಾರಕಸಙ್ಘೇ ಓಸಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಧಮ್ಮಕಮ್ಮೇನ ಉಕ್ಖಿತ್ತತಾ, ಅಞ್ಞತ್ರ ಅನುಞ್ಞಾತಕಾರಣಾ ಓಸಾರಣನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಸಙ್ಘಭೇದಸಿಕ್ಖಾಪದೇ ವುತ್ತನಯಾನೇವ, ಇದಂ ಪನ ಕಿರಿಯಾಕಿರಿಯನ್ತಿ।

ಉಕ್ಖಿತ್ತಕಓಸಾರಣಸಿಕ್ಖಾಪದವಣ್ಣನಾ ನಿಟ್ಠಿತಾ।

೫. ಭೋಜನಪ್ಪಟಿಗ್ಗಹಣಪಠಮಸಿಕ್ಖಾಪದವಣ್ಣನಾ

ಪಞ್ಚಮೇ ಅವಸ್ಸುತಾತಿ ಛನ್ದರಾಗೇನ ತಿನ್ತಾ। ಅವಸ್ಸುತಸ್ಸಾತಿ ತಾದಿಸಸ್ಸೇವ। ಖಾದೇಯ್ಯ ವಾ ಭುಞ್ಜೇಯ್ಯ ವಾತಿ ಏತ್ಥ ಪಟಿಗ್ಗಹಣೇ ಥುಲ್ಲಚ್ಚಯಂ, ಅಜ್ಝೋಹಾರೇ ಅಜ್ಝೋಹಾರೇ ಸಙ್ಘಾದಿಸೇಸೋ।

ಸಾವತ್ಥಿಯಂ ಸುನ್ದರೀನನ್ದಂ ಆರಬ್ಭ ಅವಸ್ಸುತಾಯ ಅವಸ್ಸುತಸ್ಸ ಹತ್ಥತೋ ಆಮಿಸಪ್ಪಟಿಗ್ಗಹಣವತ್ಥುಸ್ಮಿಂ ಪಞ್ಞತ್ತಂ, ಏಕತೋಅವಸ್ಸುತೇ ಪಟಿಗ್ಗಹಣೇ ದುಕ್ಕಟಂ, ಅಜ್ಝೋಹಾರೇ ಅಜ್ಝೋಹಾರೇ ಥುಲ್ಲಚ್ಚಯಂ, ಯಕ್ಖಪೇತಪಣ್ಡಕತಿರಚ್ಛಾನಗತಮನುಸ್ಸವಿಗ್ಗಹಾನಂ ಹತ್ಥತೋ ಉಭತೋಅವಸ್ಸುತೇಪಿ ಸತಿ ಏಸೇವ ನಯೋ। ತತ್ಥ ಪನ ಏಕತೋಅವಸ್ಸುತೇ ಸತಿ ದುಕ್ಕಟಂ, ಸಬ್ಬತ್ಥ ಉದಕದನ್ತಪೋನಗ್ಗಹಣೇಪಿ ಪರಿಭೋಗೇಪಿ ದುಕ್ಕಟಮೇವ। ಉಭೋಸು ಅನವಸ್ಸುತೇಸು, ‘‘ಅನವಸ್ಸುತೋ’’ತಿ ವಾ ಞತ್ವಾ ಗಣ್ಹನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಉದಕದನ್ತಪೋನತೋ ಅಞ್ಞಂ ಅಜ್ಝೋಹರಣೀಯಂ, ಉಭತೋಅವಸ್ಸುತತಾ, ಸಹತ್ಥಾ ಗಹಣಂ, ಅಜ್ಝೋಹರಣನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನೀತಿ।

ಭೋಜನಪ್ಪಟಿಗ್ಗಹಣಪಠಮಸಿಕ್ಖಾಪದವಣ್ಣನಾ ನಿಟ್ಠಿತಾ।

೬. ಭೋಜನಪ್ಪಟಿಗ್ಗಹಣದುತಿಯಸಿಕ್ಖಾಪದವಣ್ಣನಾ

ಛಟ್ಠೇ ಯತೋ ತ್ವನ್ತಿ ಯಸ್ಮಾ ತ್ವಂ। ಇಙ್ಘಾತಿ ಉಯ್ಯೋಜನತ್ಥೇ ನಿಪಾತೋ। ಅಯಮ್ಪೀತಿ ಯಾ ಏವಂ ಉಯ್ಯೋಜೇತಿ, ಸಾ ಏವಂ ಉಯ್ಯೋಜನೇನ ಚ ತೇನ ವಚನೇನ ಇತರಿಸ್ಸಾ ಪಟಿಗ್ಗಹಣೇನ ಚ ದುಕ್ಕಟಾನಿ, ಅಜ್ಝೋಹಾರಗಣನಾಯ ಥುಲ್ಲಚ್ಚಯಾನಿ ಚ ಆಪಜ್ಜಿತ್ವಾ ಭೋಜನಪರಿಯೋಸಾನೇ ಸಙ್ಘಾದಿಸೇಸಂ ಆಪಜ್ಜತಿ।

ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಏವಂ ಉಯ್ಯೋಜನವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಮೇವ, ಪುರಿಸಸ್ಸ ವಾ ಯಕ್ಖಾದೀನಂ ವಾ ಹತ್ಥತೋ ಉದಕದನ್ತಪೋನಪ್ಪಟಿಗ್ಗಹಣುಯ್ಯೋಜನೇ ಚ ತೇಸಂ ಪರಿಭೋಗೇ ಚ ದುಕ್ಕಟಂ, ಏಸ ನಯೋ ಯಕ್ಖಾದೀನಂ ಹತ್ಥತೋ ಅವಸೇಸಗ್ಗಹಣತ್ಥಂ ಉಯ್ಯೋಜನೇ, ತೇಸಂ ಗಹಣೇ, ಅಜ್ಝೋಹಾರೇ ಚ। ಭೋಜನಪರಿಯೋಸಾನೇ ಪನ ಥುಲ್ಲಚ್ಚಯಂ। ‘‘ಅನವಸ್ಸುತೋ’’ತಿ ಞತ್ವಾ ವಾ, ‘‘ಕುಪಿತಾ ನ ಪಟಿಗ್ಗಣ್ಹತೀ’’ತಿ ವಾ, ‘‘ಕುಲಾನುದ್ದಯತಾಯ ನ ಪಟಿಗ್ಗಣ್ಹತೀ’’ತಿ ವಾ ಉಯ್ಯೋಜೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಮನುಸ್ಸಪುರಿಸತಾ, ಅಞ್ಞತ್ರ ಅನುಞ್ಞಾತಕಾರಣಾ, ‘‘ಖಾದನೀಯಂ ಭೋಜನೀಯಂ ಗಹೇತ್ವಾ ಭುಞ್ಜಾ’’ತಿ ಉಯ್ಯೋಜನಾ, ತೇನ ವಚನೇನ ಗಹೇತ್ವಾ ಇತರಿಸ್ಸಾ ಭೋಜನಪರಿಯೋಸಾನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನೀತಿ।

ಭೋಜನಪ್ಪಟಿಗ್ಗಹಣದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ।

೭-೮-೯. ಸಞ್ಚರಿತ್ತಾದಿಸಿಕ್ಖಾಪದವಣ್ಣನಾ

ಸತ್ತಮಅಟ್ಠಮನವಮಸಿಕ್ಖಾಪದಾನಂ ಸಞ್ಚರಿತ್ತಾದಿತ್ತಯೇ ವುತ್ತನಯೇನೇವ ವಿನಿಚ್ಛಯೋ ವೇದಿತಬ್ಬೋ।

ಸಞ್ಚರಿತ್ತಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೦. ಸಿಕ್ಖಂಪಚ್ಚಾಚಿಕ್ಖಣಸಿಕ್ಖಾಪದವಣ್ಣನಾ

ದಸಮೇ ಕಿಂನುಮಾವ ಸಮಣಿಯೋತಿ ಕಿಂನು ಇಮಾ ಏವ ಸಮಣಿಯೋ। ತಾಸಾಹನ್ತಿ ತಾಸಂ ಅಹಂ। ಯಾವತತಿಯಕಪದತ್ಥೋ ಭಿಕ್ಖುಪಾತಿಮೋಕ್ಖವಣ್ಣನಾಯಂ (ಕಙ್ಖಾ॰ ಅಟ್ಠ॰ ನಿಗಮನವಣ್ಣನಾ), ಅವಸೇಸವಿನಿಚ್ಛಯೋ ಚ ತತ್ಥೇವ ಸಙ್ಘಭೇದಸಿಕ್ಖಾಪದವಣ್ಣನಾಯಂ ವುತ್ತನಯೇನೇವ ವೇದಿತಬ್ಬೋ, ಇದಂ ಪನ ಸಾವತ್ಥಿಯಂ ಚಣ್ಡಕಾಳಿಭಿಕ್ಖುನಿಂ (ಪಾಚಿ॰ ೭೦೯) ಆರಬ್ಭ ‘‘ಬುದ್ಧಂ ಪಚ್ಚಾಚಿಕ್ಖಾಮೀ’’ತಿಆದಿವಚನವತ್ಥುಸ್ಮಿಂ ಪಞ್ಞತ್ತಂ, ಏವಂ ವಚನಮೇವ ಚೇತ್ಥ ಚತೂಸು ಅಙ್ಗೇಸು ಪಠಮಂ ಅಙ್ಗನ್ತಿ ಅಯಂ ವಿಸೇಸೋ, ಸೇಸಂ ತಾದಿಸಮೇವಾತಿ।

ಸಿಕ್ಖಂಪಚ್ಚಾಚಿಕ್ಖಣಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೧. ಅಧಿಕರಣಕುಪಿತಸಿಕ್ಖಾಪದವಣ್ಣನಾ

ಏಕಾದಸಮೇ ಕಿಸ್ಮಿಞ್ಚಿದೇವ ಅಧಿಕರಣೇತಿ ಚತುನ್ನಂ ಅಞ್ಞತರಸ್ಮಿಂ। ಪಚ್ಚಾಕತಾತಿ ಪರಾಜಿತಾ। ಇದಮ್ಪಿ ಸಾವತ್ಥಿಯಂ ಚಣ್ಡಕಾಳಿಂ ಆರಬ್ಭ ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ’’ತಿಆದಿವಚನವತ್ಥುಸ್ಮಿಂ ಪಞ್ಞತ್ತಂ, ಸೇಸಂ ದಸಮೇ ವುತ್ತನಯೇನೇವ ವೇದಿತಬ್ಬನ್ತಿ।

ಅಧಿಕರಣಕುಪಿತಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೨. ಪಾಪಸಮಾಚಾರಪಠಮಸಿಕ್ಖಾಪದವಣ್ಣನಾ

ದ್ವಾದಸಮೇ ಸಂಸಟ್ಠಾತಿ ಪಬ್ಬಜಿತಾನಂ ಅನನುಲೋಮೇನ ಗಿಹೀನಂ ಕೋಟ್ಟನಪಚನಸಾಸನಹರಣಾದಿನಾ ಕಾಯಿಕವಾಚಸಿಕೇನ ಮಿಸ್ಸೀಭೂತಾ। ಪಾಪೋ ಕಾಯಿಕವಾಚಸಿಕೋ ಆಚಾರೋ ಏತಾಸನ್ತಿ ಪಾಪಾಚಾರಾ। ಪಾಪೋ ಕಿತ್ತಿಸದ್ದೋ ಏತಾಸನ್ತಿ ಪಾಪಸದ್ದಾ। ಪಾಪೋ ಆಜೀವಸಙ್ಖಾತೋ ಸಿಲೋಕೋ ಏತಾಸನ್ತಿ ಪಾಪಸಿಲೋಕಾ । ಭಿಕ್ಖುನಿಸಙ್ಘಸ್ಸ ವಿಹೇಸಿಕಾತಿ ಅಞ್ಞಮಞ್ಞಿಸ್ಸಾ ಕಮ್ಮೇ ಕರಿಯಮಾನೇ ಪಟಿಕ್ಕೋಸನೇನ ವಿಹೇಸಿಕಾ। ವಜ್ಜಪ್ಪಟಿಚ್ಛಾದಿಕಾತಿ ಖುದ್ದಾನುಖುದ್ದಕಸ್ಸ ವಜ್ಜಸ್ಸ ಪಟಿಚ್ಛಾದಿಕಾ।

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಸಂಸಟ್ಠವಿಹಾರವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥಾಪಿ ದಸಮೇ ವುತ್ತನಯೇನೇವ ವೇದಿತಬ್ಬಂ, ಸಮನುಭಾಸನಕಮ್ಮಕಾಲೇ ಪನ ದ್ವೇತಿಸ್ಸೋ ಏಕತೋ ಸಮನುಭಾಸಿತಬ್ಬಾತಿ।

ಪಾಪಸಮಾಚಾರಪಠಮಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೩. ಪಾಪಸಮಾಚಾರದುತಿಯಸಿಕ್ಖಾಪದವಣ್ಣನಾ

ತೇರಸಮೇ ಏವಂ ವದೇಯ್ಯಾತಿ ತಾ ಸಮನುಭಟ್ಠಾ ಭಿಕ್ಖುನಿಯೋ ಏವಂ ವದೇಯ್ಯ। ಏವಾಚಾರಾತಿ ಏವಂಆಚಾರಾ, ಯಾದಿಸೋ ತುಮ್ಹಾಕಂ ಆಚಾರೋ, ತಾದಿಸೋ ಆಚಾರೋತಿ ಅತ್ಥೋ, ಏಸ ನಯೋ ಸಬ್ಬತ್ಥ। ಉಞ್ಞಾಯಾತಿ ಅವಞ್ಞಾಯ ನೀಚಂ ಕತ್ವಾ ಜಾನನಾಯ। ಪರಿಭವೇನಾತಿ ‘‘ಕಿಂ ಇಮಾ ಕರಿಸ್ಸನ್ತೀ’’ತಿ ಏವಂ ಪರಿಭವಿತ್ವಾ ಜಾನನೇನ। ಅಕ್ಖನ್ತಿಯಾತಿ ಅಸಹನತಾಯ, ಕೋಧೇನಾತಿ ಅತ್ಥೋ। ವೇಭಸ್ಸಿಯಾತಿ ಬಲವನ್ತಸ್ಸ ಭಾವೇನ, ಅತ್ತನೋ ಬಲಪ್ಪಕಾಸನೇನ ಸಮುತ್ರಾಸೇನಾತಿ ಅತ್ಥೋ। ದುಬ್ಬಲ್ಯಾತಿ ತುಮ್ಹಾಕಂ ದುಬ್ಬಲಭಾವೇನ, ಸಬ್ಬತ್ಥ ಉಞ್ಞಾಯ ಚ ಪರಿಭವೇನ ಚಾತಿ ಏವಂ ಸಮುಚ್ಚಯತ್ಥೋ ದಟ್ಠಬ್ಬೋ। ವಿವಿಚ್ಚಥಾತಿ ನಾನಾ ಹೋಥ, ಅನನುಲೋಮಿಕಂ ಕಾಯಿಕವಾಚಸಿಕಸಂಸಗ್ಗಂ ಪಜಹಥಾತಿ ಅತ್ಥೋ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ‘‘ಸಂಸಟ್ಠಾವ, ಅಯ್ಯೇ, ತುಮ್ಹೇ ವಿಹರಥ, ಮಾ ತುಮ್ಹೇ ನಾನಾ ವಿಹರಿತ್ಥಾ’’ತಿ ಉಯ್ಯೋಜನವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥಾಪಿ ದಸಮೇ ವುತ್ತನಯೇನೇವ ವೇದಿತಬ್ಬನ್ತಿ।

ಪಾಪಸಮಾಚಾರದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೪. ಸಙ್ಘಭೇದಕಾದಿಸಿಕ್ಖಾಪದವಣ್ಣನಾ

ಸಙ್ಘಭೇದಾದೀಸು ಚತೂಸು ವುತ್ತನಯೇನೇವ ವಿನಿಚ್ಛಯೋ ವೇದಿತಬ್ಬೋ। ಕೇವಲಞ್ಹಿ ಭಿಕ್ಖುನೀ ಸಙ್ಘಂ ನ ಭಿನ್ದತಿ, ಭೇದಾಯ ಪನ ಪರಕ್ಕಮತಿ ಚೇವ ಅನುವತ್ತತಿ ಚ। ಉದ್ದಿಟ್ಠಾ ಖೋ ಅಯ್ಯಾಯೋ ಸತ್ತರಸ ಸಙ್ಘಾದಿಸೇಸಾ ಧಮ್ಮಾತಿ ಭಿಕ್ಖೂ ಆರಬ್ಭ ಪಞ್ಞತ್ತಾ ಸಾಧಾರಣಾ ಸತ್ತ, ಅಸಾಧಾರಣಾ ದಸಾತಿ ಏವಂ ಸತ್ತರಸ। ಉಭತೋಸಙ್ಘೇ ಪಕ್ಖಮಾನತ್ತಂ ಚರಿತಬ್ಬನ್ತಿ ಭಿಕ್ಖುನಿಯಾ ಹಿ ಆಪತ್ತಿಂ ಛಾದೇನ್ತಿಯಾಪಿ ಪರಿವಾಸೋ ನಾಮ ನತ್ಥಿ, ಛಾದನಪಚ್ಚಯಾಪಿ ನ ದುಕ್ಕಟಂ ಆಪಜ್ಜತಿ, ತಸ್ಮಾ ಛಾದೇತ್ವಾಪಿ ಅಛಾದೇತ್ವಾಪಿ ಏಕಂ ಪಕ್ಖಮಾನತ್ತಮೇವ ಚರಿತಬ್ಬಂ। ತಂ ಭಿಕ್ಖುನೀಹಿ ಅತ್ತನೋ ಸೀಮಂ ಸೋಧೇತ್ವಾ ವಿಹಾರಸೀಮಾಯ ವಾ, ಸೋಧೇತುಂ ಅಸಕ್ಕೋನ್ತೀಹಿ ಖಣ್ಡಸೀಮಾಯ ವಾ ಸಬ್ಬನ್ತಿಮೇನ ಪರಿಚ್ಛೇದೇನ ಚತುವಗ್ಗಂ ಗಣಂ ಸನ್ನಿಪಾತಾಪೇತ್ವಾ ದಾತಬ್ಬಂ। ಸಚೇ ಏಕಾ ಆಪತ್ತಿ ಹೋತಿ, ಏಕಿಸ್ಸಾ ವಸೇನ, ಸಚೇ ದ್ವೇ ವಾ ತಿಸ್ಸೋ ವಾ ಸಮ್ಬಹುಲಾ ವಾ ಏಕವತ್ಥುಕಾ ವಾ ನಾನಾವತ್ಥುಕಾ ವಾ, ತಾಸಂ ತಾಸಂ ವಸೇನ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತವತ್ಥುಗೋತ್ತನಾಮಆಪತ್ತಿಭೇದೇಸು ಯಂ ಯಂ ಇಚ್ಛತಿ, ತಂ ತಂ ಆದಾಯ ಯೋಜನಾ ಕಾತಬ್ಬಾ।

ತತ್ರಿದಂ ಪಠಮಾಪತ್ತಿವಸೇನ ಮುಖಮತ್ತನಿದಸ್ಸನಂ – ತಾಯ ಆಪನ್ನಾಯ ಭಿಕ್ಖುನಿಯಾ ಭಿಕ್ಖುನಿಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖುನೀನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸವಚನೀಯೋ ‘‘ಅಹಂ, ಅಯ್ಯೇ, ಏಕಂ ಆಪತ್ತಿಂ ಆಪಜ್ಜಿಂ ಉಸ್ಸಯವಾದಂ, ಸಾಹಂ, ಅಯ್ಯೇ, ಸಙ್ಘಂ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಯಾಚಾಮೀ’’ತಿ, ಏವಂ ತಿಕ್ಖತ್ತುಂ ಯಾಚಾಪೇತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಅಯ್ಯೇ, ಸಙ್ಘೋ, ಅಯಂ ಇತ್ಥನ್ನಾಮಾ ಭಿಕ್ಖುನೀ ಏಕಂ ಆಪತ್ತಿಂ ಆಪಜ್ಜಿಂ ಉಸ್ಸಯವಾದಂ, ಸಾ ಸಙ್ಘಂ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಯಾಚತಿ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಾಯ ಭಿಕ್ಖುನಿಯಾ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ದದೇಯ್ಯ, ಏಸಾ ಞತ್ತಿ।

‘‘ಸುಣಾತು ಮೇ, ಅಯ್ಯೇ, ಸಙ್ಘೋ, ಅಯಂ ಇತ್ಥನ್ನಾಮಾ ಭಿಕ್ಖುನೀ…ಪೇ॰… ದುತಿಯಮ್ಪಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ, ಸುಣಾತು ಮೇ, ಅಯ್ಯೇ, ಸಙ್ಘೋ…ಪೇ॰… ಸಾ ಭಾಸೇಯ್ಯ। ದಿನ್ನಂ ಸಙ್ಘೇನ ಇತ್ಥನ್ನಾಮಾಯ ಭಿಕ್ಖುನಿಯಾ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।

ಕಮ್ಮವಾಚಾಪರಿಯೋಸಾನೇ ‘‘ವತ್ತಂ ಸಮಾದಿಯಾಮಿ, ಮಾನತ್ತಂ ಸಮಾದಿಯಾಮೀ’’ತಿ ಸಮಾದಿಯಿತ್ವಾ ಸಙ್ಘಸ್ಸ ಆರೋಚೇತ್ವಾ ನಿಕ್ಖಿತ್ತವತ್ತೇನ ತಾವ ವಸಿತುಕಾಮಾಯ ತತ್ಥೇವ ಸಙ್ಘಮಜ್ಝೇ ವಾ ಪಕ್ಕನ್ತಾಸು ಭಿಕ್ಖುನೀಸು ಏಕಭಿಕ್ಖುನಿಯಾ ವಾ ದುತಿಯಿಕಾಯ ವಾ ಸನ್ತಿಕೇ ‘‘ವತ್ತಂ ನಿಕ್ಖಿಪಾಮಿ, ಮಾನತ್ತಂ ನಿಕ್ಖಿಪಾಮೀ’’ತಿ ನಿಕ್ಖಿಪಿತಬ್ಬಂ। ಅಞ್ಞಿಸ್ಸಾ ಪನ ಆಗನ್ತುಕಾಯ ಸನ್ತಿಕೇ ಆರೋಚೇತ್ವಾ ನಿಕ್ಖಿಪಿತಬ್ಬಂ, ನಿಕ್ಖಿತ್ತಕಾಲತೋ ಪಟ್ಠಾಯ ಪಕತತ್ತಟ್ಠಾನೇ ತಿಟ್ಠತಿ, ತತೋ ಪುರೇಅರುಣೇಯೇವ ಚತೂಹಿ ಭಿಕ್ಖುನೀಹಿ ತಂ ಭಿಕ್ಖುನಿಂ ಗಹೇತ್ವಾ ಗಾಮೂಪಚಾರತೋ ಚ ಭಿಕ್ಖೂನಂ ವಿಹಾರೂಪಚಾರತೋ ಚ ದ್ವೇ ಲೇಡ್ಡುಪಾತೇ ಅತಿಕ್ಕಮಿತ್ವಾ ಮಹಾಮಗ್ಗಾ ಓಕ್ಕಮ್ಮ ಗುಮ್ಬವತಿಆದೀಹಿ ಪಟಿಚ್ಛನ್ನೇ ಓಕಾಸೇ ನಿಸೀದಿತಬ್ಬಂ। ಚತೂಹಿ ಭಿಕ್ಖೂಹಿಪಿ ತತ್ಥ ಗನ್ತಬ್ಬಂ, ಗನ್ತ್ವಾ ಭಿಕ್ಖುನೀನಂ ಅವಿದೂರೇ ವಿಸುಂ ನಿಸೀದಿತಬ್ಬಂ। ಅಥ ತಾಯ ಭಿಕ್ಖುನಿಯಾ ವುತ್ತನಯೇನೇವ ವತ್ತಂ ಸಮಾದಿಯಿತ್ವಾ ಭಿಕ್ಖುನಿಸಙ್ಘಸ್ಸ ತಾವ ಏವಂ ಆರೋಚೇತಬ್ಬಂ –

‘‘ಅಹಂ, ಅಯ್ಯೇ, ಏಕಂ ಆಪತ್ತಿಂ ಆಪಜ್ಜಿಂ ಉಸ್ಸಯವಾದಂ, ಸಾಹಂ ಸಙ್ಘಂ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಯಾಚಿಂ, ತಸ್ಸಾ ಮೇ ಸಙ್ಘೋ ಏಕಿಸ್ಸಾ ಆಪತ್ತಿಯಾ ಉಸ್ಸಯವಾದಾಯ ಪಕ್ಖಮಾನತ್ತಂ ಅದಾಸಿ, ಸಾಹಂ ಮಾನತ್ತಂ ಚರಾಮಿ, ವೇದಯಾಮಹಂ, ಅಯ್ಯೇ, ‘ವೇದಯತೀ’ತಿ ಮಂ ಸಙ್ಘೋ ಧಾರೇತೂ’’ತಿ।

ತತೋ ಭಿಕ್ಖುಸಙ್ಘಸ್ಸ ಸನ್ತಿಕಂ ಗನ್ತ್ವಾ ಏವಂ ಆರೋಚೇತಬ್ಬಂ ‘‘ಅಹಂ, ಅಯ್ಯಾ, ಏಕಂ ಆಪತ್ತಿಂ ಆಪಜ್ಜಿಂ…ಪೇ॰… ವೇದಯಾಮಹಂ, ಅಯ್ಯಾ, ‘ವೇದಯತೀ’ತಿ ಮಂ ಸಙ್ಘೋ ಧಾರೇತೂ’’ತಿ। ಆರೋಚೇತ್ವಾ ಭಿಕ್ಖುನಿಸಙ್ಘಸ್ಸೇವ ಸನ್ತಿಕೇ ನಿಸೀದಿತಬ್ಬಂ, ತತೋ ಪಟ್ಠಾಯ ಭಿಕ್ಖೂಸು ವಾ, ದುತಿಯಿಕಂ ಠಪೇತ್ವಾ ಭಿಕ್ಖುನೀಸು ವಾ ಪಕ್ಕನ್ತಾಸುಪಿ ಉಭತೋಸಙ್ಘೇ ಮಾನತ್ತಂ ಚಿಣ್ಣಮೇವ ಹೋತಿ। ಯಾವ ಅರುಣಂ ನ ಉಟ್ಠಹತಿ, ತಾವ ಯಂ ಪಠಮಂ ಪಸ್ಸತಿ ಭಿಕ್ಖುಂ ವಾ ಭಿಕ್ಖುನಿಂ ವಾ, ತಸ್ಸಾ ಆರೋಚೇತಬ್ಬಂ। ಉಟ್ಠಿತೇ ಅರುಣೇ ವತ್ತಂ ನಿಕ್ಖಿಪಿತ್ವಾ ಉಪಸ್ಸಯಂ ಗನ್ತಬ್ಬಂ, ಏವಂ ಪಞ್ಚದಸ ಅರುಣಾ ಗಹೇತಬ್ಬಾ।

ಅನಿಕ್ಖಿತ್ತವತ್ತಾಯ ಪನ ಆಗನ್ತುಕೇಸು ಅಸತಿ ಚತುನ್ನಂ ಭಿಕ್ಖೂನಞ್ಚ ಭಿಕ್ಖುನೀನಞ್ಚ ದೇವಸಿಕಂ ಆರೋಚೇತ್ವಾ, ಆಗನ್ತುಕೇಸು ಸತಿ ಸಬ್ಬೇಸಮ್ಪಿ ಆಗನ್ತುಕಾನಂ ಆರೋಚೇನ್ತಿಯಾ ಪಞ್ಚದಸ ದಿವಸಾನಿ ಪಾರಿವಾಸಿಕಕ್ಖನ್ಧಕೇ (ಚೂಳವ॰ ೭೫ ಆದಯೋ) ವುತ್ತನಯೇನೇವ ಸಮ್ಮಾ ವತ್ತಿತಬ್ಬನ್ತಿ ಅಯಮೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಸಮನ್ತಪಾಸಾದಿಕಾಯಂ (ಚೂಳವ॰ ಅಟ್ಠ॰ ೭೫ ಆದಯೋ) ವುತ್ತೋ, ಚಿಣ್ಣಮಾನತ್ತಾಯ ಭಿಕ್ಖುನಿಯಾತಿ ಯದಾ ಏವಂ ಚಿಣ್ಣಮಾನತ್ತಾ ಭಿಕ್ಖುನೀ ಹೋತಿ, ಅಥಸ್ಸಾ ಯತ್ಥ ಸಿಯಾ ವೀಸತಿಗಣೋ ಭಿಕ್ಖುನಿಸಙ್ಘೋತಿ ವುತ್ತನಯೇನೇವ ಅಬ್ಭಾನಕಮ್ಮಂ ಕಾತಬ್ಬಂ, ಸೇಸಂ ಉತ್ತಾನಮೇವಾತಿ।

ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ

ಭಿಕ್ಖುನಿಪಾತಿಮೋಕ್ಖೇ

ಸಙ್ಘಾದಿಸೇಸವಣ್ಣನಾ ನಿಟ್ಠಿತಾ।