ನಿಸ್ಸಗ್ಗಿಯಕಣ್ಡೋ

೧. ಪತ್ತಸನ್ನಿಚಯಸಿಕ್ಖಾಪದವಣ್ಣನಾ

ನಿಸ್ಸಗ್ಗಿಯೇಸು ಆದಿವಗ್ಗಸ್ಸ ತಾವ ಪಠಮೇ ಪತ್ತಸನ್ನಿಚಯಂ ಕರೇಯ್ಯಾತಿ ಪತ್ತಸನ್ನಿಧಿಂ ಕರೇಯ್ಯ, ಏಕಾಹಂ ಅನಧಿಟ್ಠಹಿತ್ವಾ ವಾ ಅವಿಕಪ್ಪೇತ್ವಾ ವಾ ಅಧಿಟ್ಠಾನುಪಗಂ ಪತ್ತಂ ಠಪೇಯ್ಯಾತಿ ಅತ್ಥೋ।

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪತ್ತಸನ್ನಿಚಯವತ್ಥುಸ್ಮಿಂ ಪಞ್ಞತ್ತಂ, ಸೇಸಕಥಾಮಗ್ಗೋ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ವೇದಿತಬ್ಬೋ, ತತ್ರ ಹಿ ದಸಾಹಾತಿಕ್ಕಮೇ ಆಪತ್ತಿ, ಇಧ ಏಕಾಹಾತಿಕ್ಕಮೇತಿ ಏತ್ತಕಮೇವ ತಸ್ಸ ಚ ಇಮಸ್ಸ ಚ ನಾನಾಕರಣಂ, ಸೇಸಂ ತಾದಿಸಮೇವಾತಿ।

ಪತ್ತಸನ್ನಿಚಯಸಿಕ್ಖಾಪದವಣ್ಣನಾ ನಿಟ್ಠಿತಾ।

೨. ಅಕಾಲಚೀವರಸಿಕ್ಖಾಪದವಣ್ಣನಾ

ದುತಿಯೇ ಅಕಾಲಚೀವರನ್ತಿ ಅತ್ಥತೇ ಕಥಿನೇ ಕಥಿನಮಾಸೇಹಿ, ಅನತ್ಥತೇ ಚೀವರಮಾಸತೋ ಅಞ್ಞಸ್ಮಿಂ ಕಾಲೇ ಉಪ್ಪನ್ನಂ, ಯಂ ವಾ ಪನ ಕಾಲೇಪಿ ಆದಿಸ್ಸ ದಿನ್ನಂ। ಆದಿಸ್ಸ ದಿನ್ನಂ ನಾಮ ‘‘ಸಮ್ಪತ್ತಾ ಭಾಜೇನ್ತೂ’’ತಿ ವತ್ವಾ ವಾ, ‘‘ಇದಂ ಗಣಸ್ಸ, ಇದಂ ತುಮ್ಹಾಕಂ ದಮ್ಮೀ’’ತಿ ವತ್ವಾ ವಾ, ದಾತುಕಾಮತಾಯ ಪಾದಮೂಲೇ ಠಪೇತ್ವಾ ವಾ ದಿನ್ನಂ। ಇಚ್ಚೇತಂ ಅಕಾಲಚೀವರಂ ‘‘ಕಾಲಚೀವರ’’ನ್ತಿ ಅಧಿಟ್ಠಹಿತ್ವಾ ಭಾಜಾಪೇನ್ತಿಯಾ ಪಯೋಗೇ ದುಕ್ಕಟಂ, ಯಂ ಅತ್ತನಾ ಲದ್ಧಂ, ತಂ ನಿಸ್ಸಗ್ಗಿಯಂ ಹೋತಿ। ನಿಸ್ಸಟ್ಠಂ ಪಟಿಲಭಿತ್ವಾಪಿ ಯಥಾದಾನೇಯೇವ ಉಪನೇತಬ್ಬಂ, ಅಞ್ಞಸ್ಮಿಮ್ಪಿ ಏವರೂಪೇ ಸಿಕ್ಖಾಪದೇ ಏಸೇವ ನಯೋ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಅಕಾಲಚೀವರಂ ‘‘ಕಾಲಚೀವರ’’ನ್ತಿ ಅಧಿಟ್ಠಹಿತ್ವಾ ಭಾಜನವತ್ಥುಸ್ಮಿಂ ಪಞ್ಞತ್ತಂ, ಅಕಾಲಚೀವರೇ ವೇಮತಿಕಾಯ, ಕಾಲಚೀವರೇ ಅಕಾಲಚೀವರಸಞ್ಞಾಯ ಚೇವ ವೇಮತಿಕಾಯ ಚ ದುಕ್ಕಟಂ। ಉಭೋಸು ಕಾಲಚೀವರಸಞ್ಞಾಯ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅಕಾಲಚೀವರತಾ, ತಥಾಸಞ್ಞಿತಾ, ‘‘ಕಾಲಚೀವರ’’ನ್ತಿ ಅಧಿಟ್ಠಾಯ ಲೇಸೇನ ಭಾಜಾಪನಂ, ಪಟಿಲಾಭೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನೀತಿ।

ಅಕಾಲಚೀವರಸಿಕ್ಖಾಪದವಣ್ಣನಾ ನಿಟ್ಠಿತಾ।

೩. ಚೀವರಪರಿವತ್ತನಸಿಕ್ಖಾಪದವಣ್ಣನಾ

ತತಿಯೇ ಹನ್ದಾತಿ ಗಣ್ಹ। ಅಚ್ಛಿನ್ದೇಯ್ಯಾತಿ ಸಯಂ ಅಚ್ಛಿನ್ದನ್ತಿಯಾ ಬನ್ಧಿತ್ವಾ ಠಪಿತೇಸು ಬಹೂಸುಪಿ ಏಕಾಪತ್ತಿ, ಇತರೇಸು ವತ್ಥುಗಣನಾಯ ಆಪತ್ತಿಯೋ। ಅಚ್ಛಿನ್ದಾಪನೇ ಪನ ಏಕಾಯ ಆಣತ್ತಿಯಾ ಬಹೂಸು ಅಚ್ಛಿನ್ನೇಸುಪಿ ಏಕಾವಾಪತ್ತಿ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಚೀವರಂ ಪರಿವತ್ತೇತ್ವಾ ಅಚ್ಛಿನ್ದನವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಂ, ತಿಕಪಾಚಿತ್ತಿಯಂ, ಅಞ್ಞಸ್ಮಿಂ ಪರಿಕ್ಖಾರೇ ತಿಕದುಕ್ಕಟಂ, ಅನುಪಸಮ್ಪನ್ನಾಯ ಚೀವರೇಪಿ ತಿಕದುಕ್ಕಟಮೇವ। ಯಾ ಪನ ತಾಯ ವಾ ದಿಯ್ಯಮಾನಂ, ತಸ್ಸಾ ವಾ ವಿಸ್ಸಾಸಂ ಗಣ್ಹಾತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಉಪಸಮ್ಪನ್ನತಾ, ಪರಿವತ್ತಿತಚೀವರಸ್ಸ ವಿಕಪ್ಪನುಪಗತಾ, ಸಕಸಞ್ಞಾಯ ಅಚ್ಛಿನ್ದನಂ ವಾ ಅಚ್ಛಿನ್ದಾಪನಂ ವಾತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ದುಕ್ಖವೇದನನ್ತಿ।

ಚೀವರಪರಿವತ್ತನಸಿಕ್ಖಾಪದವಣ್ಣನಾ ನಿಟ್ಠಿತಾ।

೪. ಅಞ್ಞವಿಞ್ಞಾಪನಸಿಕ್ಖಾಪದವಣ್ಣನಾ

ಚತುತ್ಥೇ ವಿಞ್ಞಾಪೇತ್ವಾತಿ ಜಾನಾಪೇತ್ವಾ, ‘‘ಇದಂ ನಾಮ ಆಹರಾ’’ತಿ ಯಾಚಿತ್ವಾ ವಾ। ಅಞ್ಞಂ ವಿಞ್ಞಾಪೇಯ್ಯಾತಿ ಯಂ ಪುಬ್ಬೇ ‘‘ಕಿನ್ತೇ, ಅಯ್ಯೇ, ಅಫಾಸು, ಕಿಂ ಆಹರಿಯತೂ’’ತಿ ವುತ್ತಾಯ ವಿಞ್ಞಾಪಿತಂ, ತಂ ಪಟಿಕ್ಖಿಪಿತ್ವಾ ತಞ್ಚೇವ ಅಞ್ಞಞ್ಚ ಗಹೇತುಕಾಮಾ ತತೋ ಅಞ್ಞಂ ವಿಞ್ಞಾಪೇಯ್ಯ, ತಸ್ಸಾ ವಿಞ್ಞತ್ತಿಯಾ ದುಕ್ಕಟಂ, ಪಟಿಲಾಭೇನ ನಿಸ್ಸಗ್ಗಿಯಂ ಹೋತಿ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಅಞ್ಞಂ ವಿಞ್ಞಾಪೇತ್ವಾ ಅಞ್ಞಂ ವಿಞ್ಞಾಪನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನಞ್ಞೇ ದ್ವಿಕದುಕ್ಕಟಂ। ಅನಞ್ಞೇ ಅನಞ್ಞಸಞ್ಞಾಯ ಪನ, ತಸ್ಮಿಂ ಅಪ್ಪಹೋನ್ತೇ ಪುನ ತಞ್ಞೇವ, ಅಞ್ಞೇನಪಿ ಅತ್ಥೇ ಸತಿ ತೇನ ಸದ್ಧಿಂ ಅಞ್ಞಞ್ಚ, ಯಞ್ಚ ವಿಞ್ಞತ್ತಂ, ತತೋ ಚೇ ಅಞ್ಞಂ ಸಮಗ್ಘತರಂ ಹೋತಿ, ಇಮಂ ಆನಿಸಂಸಂ ದಸ್ಸೇತ್ವಾ ಸುದ್ಧಂ ಅಞ್ಞಮೇವ ಚ ವಿಞ್ಞಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಲೇಸೇನ ಗಹೇತುಕಾಮತಾ, ಅಞ್ಞಸ್ಸ ವಿಞ್ಞಾಪನಂ, ಪಟಿಲಾಭೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಸಞ್ಚರಿತ್ತಸದಿಸಾನೀತಿ।

ಅಞ್ಞವಿಞ್ಞಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

೫. ಅಞ್ಞಚೇತಾಪನಸಿಕ್ಖಾಪದವಣ್ಣನಾ

ಪಞ್ಚಮೇ ಅಞ್ಞಂ ಚೇತಾಪೇತ್ವಾತಿ ಅತ್ತನೋ ಕಪ್ಪಿಯಭಣ್ಡೇನ ‘‘ಇದಂ ನಾಮ ಆಹರಾ’’ತಿ ಅಞ್ಞಂ ಪರಿವತ್ತಾಪೇತ್ವಾ। ಅಞ್ಞಂ ಚೇತಾಪೇಯ್ಯಾತಿ ‘‘ಏವಂ ಮೇ ಇದಂ ದತ್ವಾ ಅಞ್ಞಮ್ಪಿ ಆಹರಿಸ್ಸತೀ’’ತಿ ಮಞ್ಞಮಾನಾ ‘‘ನ ಮೇ ಇಮಿನಾ ಅತ್ಥೋ, ಇದಂ ನಾಮ ಮೇ ಆಹರಾ’’ತಿ ತತೋ ಅಞ್ಞಂ ಚೇತಾಪೇಯ್ಯ। ತಸ್ಸಾ ಚೇತಾಪನಪ್ಪಯೋಗೇ ದುಕ್ಕಟಂ, ಪಟಿಲಾಭೇನ ತೇನ ವಾ ಅಞ್ಞೇನ ವಾ ಮೂಲೇನ ಆಹಟಂ ನಿಸ್ಸಗ್ಗಿಯಂ ಹೋತಿ, ಸೇಸಂ ಚತುತ್ಥಸದಿಸಮೇವಾತಿ।

ಅಞ್ಞಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

೬. ಪಠಮಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ

ಛಟ್ಠೇ ಅಞ್ಞದತ್ಥಿಕೇನಾತಿ ಅಞ್ಞಸ್ಸತ್ಥಾಯ ದಿನ್ನೇನ। ಅಞ್ಞುದ್ದಿಸಿಕೇನಾತಿ ಅಞ್ಞಂ ಉದ್ದಿಸಿತ್ವಾ ದಿನ್ನೇನ। ಸಙ್ಘಿಕೇನಾತಿ ಸಙ್ಘಸ್ಸ ಪರಿಚ್ಚತ್ತೇನ। ಪರಿಕ್ಖಾರೇನಾತಿ ಕಪ್ಪಿಯಭಣ್ಡೇನ। ಅಞ್ಞಂ ಚೇತಾಪೇಯ್ಯಾತಿ ‘‘ಇದಂ ನಾಮ ಪರಿಭುಞ್ಜೇಯ್ಯಾಥಾ’’ತಿ ಯಂ ಉದ್ದಿಸಿತ್ವಾ ನಿಯಮೇತ್ವಾ ಯೋ ಪರಿಕ್ಖಾರೋ ದಿನ್ನೋ, ತತೋ ಅಞ್ಞಂ ಪರಿವತ್ತಾಪೇಯ್ಯ, ತಸ್ಸಾ ಪಯೋಗೇ ದುಕ್ಕಟಂ, ಪಟಿಲಾಭೇನ ನಿಸ್ಸಗ್ಗಿಯಂ।

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ತಾದಿಸೇನ ಪರಿಕ್ಖಾರೇನ ಅಞ್ಞಂ ಚೇತಾಪನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನಞ್ಞದತ್ಥಿಕೇ ದ್ವಿಕದುಕ್ಕಟಂ। ತಸ್ಮಿಂ ಪನ ಅನಞ್ಞದತ್ಥಿಕಸಞ್ಞಾಯ, ಸೇಸಕಂ ಉಪನೇನ್ತಿಯಾ, ‘‘ತುಮ್ಹೇಹಿ ಏತದತ್ಥಾಯ ದಿನ್ನೋ, ಅಮ್ಹಾಕಞ್ಚ ಇಮಿನಾ ನಾಮ ಅತ್ಥೋ’’ತಿ ಸಾಮಿಕೇ ಅಪಲೋಕೇತ್ವಾ ಉಪನೇನ್ತಿಯಾ, ಯದಾ ಭಿಕ್ಖುನಿಯೋ ವಿಹಾರಮ್ಪಿ ಛಡ್ಡೇತ್ವಾ ಪಕ್ಕಮನ್ತಿ, ಏವರೂಪಾಸು ಆಪದಾಸು ಉಪನೇನ್ತೀನಂ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ಚತುತ್ಥಸದಿಸಮೇವಾತಿ।

ಪಠಮಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

೭. ದುತಿಯಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ

ಸತ್ತಮೇ ಸಞ್ಞಾಚಿಕೇನಾತಿ ಸಯಂ ಯಾಚಿತಕೇನಾಪಿ। ಏತದೇವೇತ್ಥ ನಾನಾಕರಣಂ, ಸೇಸಂ ಛಟ್ಠಸದಿಸಮೇವಾತಿ।

ದುತಿಯಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

೮. ಪಠಮಗಣಿಕಚೇತಾಪನಸಿಕ್ಖಾಪದವಣ್ಣನಾ

ಅಟ್ಠಮೇ ಮಹಾಜನಿಕೇನಾತಿ ಗಣಸ್ಸ ಪರಿಚ್ಚತ್ತೇನ, ಇದಮೇತ್ಥ ಛಟ್ಠತೋ ನಾನಾಕರಣಂ।

ಪಠಮಗಣಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

೯. ದುತಿಯಗಣಿಕಚೇತಾಪನಸಿಕ್ಖಾಪದವಣ್ಣನಾ

ನವಮೇ ಸಞ್ಞಾಚಿಕೇನಾತಿ ಇದಂ ಅಟ್ಠಮತೋ ಅತಿರಿತ್ತಂ, ಸೇಸಂ ದ್ವೀಸುಪಿ ಛಟ್ಠಸಿಕ್ಖಾಪದಸದಿಸಮೇವಾತಿ।

ದುತಿಯಗಣಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೦. ಪುಗ್ಗಲಿಕಚೇತಾಪನಸಿಕ್ಖಾಪದವಣ್ಣನಾ

ದಸಮೇ ಪುಗ್ಗಲಿಕೇನಾತಿ ಏಕಭಿಕ್ಖುನಿಯಾ ಪರಿಚ್ಚತ್ತೇನ। ಸಞ್ಞಾಚಿಕೇನಾತಿ ಸಯಂ ಯಾಚಿತಕೇನ ಚ। ಅಞ್ಞಂ ಚೇತಾಪೇಯ್ಯಾತಿ ಯಂ ಉದ್ದಿಸಿತ್ವಾ ದಿನ್ನಂ, ತತೋ ಅಞ್ಞಂ ಚೇತಾಪೇನ್ತಿಯಾ ಪಯೋಗೇ ದುಕ್ಕಟಂ, ಪಟಿಲಾಭೇನ ನಿಸ್ಸಗ್ಗಿಯಂ ಹೋತಿ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ತಾದಿಸೇನ ಪರಿಕ್ಖಾರೇನ ಅಞ್ಞಂ ಚೇತಾಪನವತ್ಥುಸ್ಮಿಂ ಪಞ್ಞತ್ತಂ, ಸೇಸಂ ಛಟ್ಠಸದಿಸಮೇವಾತಿ।

ಪುಗ್ಗಲಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।

ಪತ್ತವಗ್ಗೋ ಪಠಮೋ।

೧೧. ಗರುಪಾವುರಣಸಿಕ್ಖಾಪದವಣ್ಣನಾ

ದುತಿಯಸ್ಸ ಪಠಮೇ ಗರುಪಾವುರಣನ್ತಿ ಸೀತಕಾಲೇ ಪಾವುರಣಂ। ಚತುಕ್ಕಂಸಪರಮನ್ತಿ ಕಂಸೋ ನಾಮ ಚತುಕ್ಕಹಾಪಣಿಕೋ ಹೋತಿ, ತಸ್ಮಾ ಸೋಳಸಕಹಾಪಣಗ್ಘನಕಂ। ಚೇತಾಪೇತಬ್ಬನ್ತಿ ಠಪೇತ್ವಾ ಸಹಧಮ್ಮಿಕೇ ಚ ಞಾತಕಪ್ಪವಾರಿತೇ ಚ ಅಞ್ಞೇನ ಕಿಸ್ಮಿಞ್ಚಿದೇವ ಗುಣೇ ಪರಿತುಟ್ಠೇನ ‘‘ವದೇಥಾಯ್ಯೇ, ಯೇನತ್ಥೋ’’ತಿ ವುತ್ತಾಯ ವಿಞ್ಞಾಪೇತಬ್ಬಂ। ತತೋ ಚೇ ಉತ್ತರೀತಿ ತತುತ್ತರಿ ವಿಞ್ಞಾಪೇನ್ತಿಯಾ ದುಕ್ಕಟಂ, ಪಟಿಲದ್ಧಂ ನಿಸ್ಸಗ್ಗಿಯಂ ಹೋತಿ।

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ರಾಜಾನಂ ಕಮ್ಬಲಂ ವಿಞ್ಞಾಪನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಊನಕಚತುಕ್ಕಂಸೇ ದ್ವಿಕದುಕ್ಕಟಂ। ತಸ್ಮಿಂ ಪನ ಊನಕಸಞ್ಞಾಯ, ಚತುಕ್ಕಂಸಪರಮಂ ಚೇತಾಪೇನ್ತಿಯಾ, ಞಾತಕಪ್ಪವಾರಿತೇ ವಾ, ಅಞ್ಞಸ್ಸ ವಾ ಅತ್ಥಾಯ, ಅತ್ತನೋ ವಾ ಧನೇನ, ಮಹಗ್ಘಂ ಚೇತಾಪೇನ್ತಂ ಅಪ್ಪಗ್ಘಂ ಚೇತಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಗರುಪಾವುರಣತಾ, ಅತಿರೇಕಚತುಕ್ಕಂಸತಾ, ಅನನುಞ್ಞಾತಟ್ಠಾನೇ ವಿಞ್ಞತ್ತಿ, ಪಟಿಲಾಭೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ। ಸಮುಟ್ಠಾನಾದೀನಿ ಸಞ್ಚರಿತ್ತಸದಿಸಾನೀತಿ।

ಗರುಪಾವುರಣಸಿಕ್ಖಾಪದವಣ್ಣನಾ ನಿಟ್ಠಿತಾ।

೧೨. ಲಹುಪಾವುರಣಸಿಕ್ಖಾಪದವಣ್ಣನಾ

ದುತಿಯೇ ಲಹುಪಾವುರಣನ್ತಿ ಉಣ್ಹಕಾಲೇ ಪಾವುರಣಂ। ಅಡ್ಢತೇಯ್ಯಕಂಸಪರಮನ್ತಿ ದಸಕಹಾಪಣಗ್ಘನಕಂ, ಸೇಸಂ ಪಠಮಸದಿಸಮೇವಾತಿ।

ಲಹುಪಾವುರಣಸಿಕ್ಖಾಪದವಣ್ಣನಾ ನಿಟ್ಠಿತಾ।

ಇತೋ ಪರಾನಿ ಇಮಸ್ಮಿಂ ವಗ್ಗೇ ಅಟ್ಠ, ತತಿಯವಗ್ಗೇ ದಸಾತಿ ಇಮಾನಿ ಅಟ್ಠಾರಸ ಸಿಕ್ಖಾಪದಾನಿ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ವೇದಿತಬ್ಬಾನೀತಿ।

ಜಾತರೂಪವಗ್ಗೋ ತತಿಯೋ।

ಉದ್ದಿಟ್ಠಾ ಖೋ ಅಯ್ಯಾಯೋ ತಿಂಸ ನಿಸ್ಸಗ್ಗಿಯಾ ಪಾಚಿತ್ತಿಯಾ ಧಮ್ಮಾತಿ ಭಿಕ್ಖೂ ಆರಬ್ಭ ಪಞ್ಞತ್ತಾ ಸಾಧಾರಣಾ ಅಟ್ಠಾರಸ, ಅಸಾಧಾರಣಾ ದ್ವಾದಸಾತಿ ಏವಂ ತಿಂಸ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।

ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ ಭಿಕ್ಖುನಿಪಾತಿಮೋಕ್ಖೇ

ನಿಸ್ಸಗ್ಗಿಯಪಾಚಿತ್ತಿಯವಣ್ಣನಾ ನಿಟ್ಠಿತಾ।