೨೭. ಉಪಜ್ಝಾಯಾದಿವತ್ತವಿನಿಚ್ಛಯಕಥಾ

೧೮೩. ವತ್ತನ್ತಿ ಏತ್ಥ ಪನ ವತ್ತಂ ನಾಮೇತಂ ಉಪಜ್ಝಾಯವತ್ತಂ ಆಚರಿಯವತ್ತಂ ಆಗನ್ತುಕವತ್ತಂ ಆವಾಸಿಕವತ್ತಂ ಗಮಿಕವತ್ತಂ ಭತ್ತಗ್ಗವತ್ತಂ ಪಿಣ್ಡಚಾರಿಕವತ್ತಂ ಆರಞ್ಞಿಕವತ್ತಂ ಸೇನಾಸನವತ್ತಂ ಜನ್ತಾಘರವತ್ತಂ ವಚ್ಚಕುಟಿವತ್ತನ್ತಿ ಬಹುವಿಧಂ। ತತ್ಥ ಉಪಜ್ಝಾಯವತ್ತಂ ತಾವ ಏವಂ ವೇದಿತಬ್ಬಂ – ಸದ್ಧಿವಿಹಾರಿಕೇನ ಕಾಲಸ್ಸೇವ ಉಟ್ಠಾಯ ಉಪಾಹನಾ ಓಮುಞ್ಚಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಪಜ್ಝಾಯಸ್ಸ ದನ್ತಕಟ್ಠಂ ದಾತಬ್ಬಂ, ಮುಖೋದಕಂ ದಾತಬ್ಬಂ। ತತ್ಥ ದನ್ತಕಟ್ಠಂ ದೇನ್ತೇನ ಮಹನ್ತಂ ಮಜ್ಝಿಮಂ ಖುದ್ದಕನ್ತಿ ತೀಣಿ ದನ್ತಕಟ್ಠಾನಿ ಉಪನೇತ್ವಾ ಇತೋ ಯಂ ತೀಣಿ ದಿವಸಾನಿ ಗಣ್ಹಾತಿ, ಚತುತ್ಥದಿವಸತೋ ಪಟ್ಠಾಯ ತಾದಿಸಮೇವ ದಾತಬ್ಬಂ। ಸಚೇ ಅನಿಯಮಂ ಕತ್ವಾ ಯಂ ವಾ ತಂ ವಾ ಗಣ್ಹಾತಿ, ಅಥ ಯಾದಿಸಂ ಲಭತಿ, ತಾದಿಸಂ ದಾತಬ್ಬಂ। ಮುಖೋದಕಂ ದೇನ್ತೇನಪಿ ಸೀತಞ್ಚ ಉಣ್ಹಞ್ಚ ಉದಕಂ ಉಪನೇತ್ವಾ ತತೋ ಯಂ ತೀಣಿ ದಿವಸಾನಿ ವಳಞ್ಜೇತಿ। ಚತುತ್ಥದಿವಸತೋ ಪಟ್ಠಾಯ ತಾದಿಸಮೇವ ಮುಖಧೋವನೋದಕಂ ದಾತಬ್ಬಂ। ಸಚೇ ದುವಿಧಮ್ಪಿ ವಳಞ್ಜೇತಿ, ದುವಿಧಮ್ಪಿ ಉಪನೇತಬ್ಬಂ। ಉದಕಂ ಮುಖಧೋವನಟ್ಠಾನೇ ಠಪೇತ್ವಾ ವಚ್ಚಕುಟಿತೋ ಪಟ್ಠಾಯ ಸಮ್ಮಜ್ಜಿತಬ್ಬಂ। ಥೇರೇ ವಚ್ಚಕುಟಿಗತೇ ಪರಿವೇಣಂ ಸಮ್ಮಜ್ಜಿತಬ್ಬಂ, ಏವಂ ಪರಿವೇಣಂ ಅಸುಞ್ಞಂ ಹೋತಿ। ಥೇರೇ ವಚ್ಚಕುಟಿತೋ ಅನಿಕ್ಖನ್ತೇಯೇವ ಆಸನಂ ಪಞ್ಞಪೇತಬ್ಬಂ। ಸರೀರಕಿಚ್ಚಂ ಕತ್ವಾ ಆಗನ್ತ್ವಾ ತಸ್ಮಿಂ ನಿಸಿನ್ನಸ್ಸ ಸಚೇ ಯಾಗು ಹೋತಿ, ಭಾಜನಂ ಧೋವಿತ್ವಾ ಯಾಗು ಉಪನಾಮೇತಬ್ಬಾ, ಯಾಗುಂ ಪಿವಿತಸ್ಸ ಉದಕಂ ದತ್ವಾ ಭಾಜನಂ ಪಟಿಗ್ಗಹೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಧೋವಿತ್ವಾ ಪಟಿಸಾಮೇತಬ್ಬಂ। ಉಪಜ್ಝಾಯಮ್ಹಿ ವುಟ್ಠಿತೇ ಆಸನಂ ಉದ್ಧರಿತಬ್ಬಂ। ಸಚೇ ಸೋ ದೇಸೋ ಉಕ್ಲಾಪೋ ಹೋತಿ ಕೇನಚಿ ಕಚವರೇನ ಸಂಕಿಣ್ಣೋ, ಸೋ ದೇಸೋ ಸಮ್ಮಜ್ಜಿತಬ್ಬೋ। ಸಚೇ ಪನ ಅಞ್ಞೋ ಕಚವರೋ ನತ್ಥಿ, ಉದಕಫುಸಿತಾನೇವ ಹೋನ್ತಿ, ಹತ್ಥೇನ ಪಮಜ್ಜಿತಬ್ಬೋ।

ಸಚೇ ಉಪಜ್ಝಾಯೋ ಗಾಮಂ ಪವಿಸಿತುಕಾಮೋ ಹೋತಿ, ನಿವಾಸನಂ ದಾತಬ್ಬಂ, ಪಟಿನಿವಾಸನಂ ಪಟಿಗ್ಗಹೇತಬ್ಬಂ, ಕಾಯಬನ್ಧನಂ ದಾತಬ್ಬಂ, ಸಗುಣಂ ಕತ್ವಾ ಸಙ್ಘಾಟಿಯೋ ದಾತಬ್ಬಾ, ಧೋವಿತ್ವಾ ಪತ್ತೋ ಸಉದಕೋ ದಾತಬ್ಬೋ। ಸಚೇ ಉಪಜ್ಝಾಯೋ ಪಚ್ಛಾಸಮಣಂ ಆಕಙ್ಖತಿ, ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಉಪಜ್ಝಾಯಸ್ಸ ಪಚ್ಛಾಸಮಣೇನ ಹೋತಬ್ಬಂ, ನಾತಿದೂರೇ ಗನ್ತಬ್ಬಂ, ನಾಚ್ಚಾಸನ್ನೇ ಗನ್ತಬ್ಬಂ। ಏತ್ಥ ಪನ ಸಚೇ ಉಪಜ್ಝಾಯಂ ನಿವತ್ತಿತ್ವಾ ಓಲೋಕೇನ್ತಂ ಏಕೇನ ವಾ ದ್ವೀಹಿ ವಾ ಪದವೀತಿಹಾರೇಹಿ ಸಮ್ಪಾಪುಣಾತಿ, ಏತ್ತಾವತಾ ನಾತಿದೂರೇ ನಾಚ್ಚಾಸನ್ನೇ ಗತೋ ಹೋತೀತಿ ವೇದಿತಬ್ಬಂ। ಸಚೇ ಉಪಜ್ಝಾಯೇನ ಭಿಕ್ಖಾಚಾರೇ ಯಾಗುಯಾ ವಾ ಭತ್ತೇ ವಾ ಲದ್ಧೇ ಪತ್ತೋ ಉಣ್ಹೋ ವಾ ಭಾರಿಕೋ ವಾ ಹೋತಿ, ಅತ್ತನೋ ಪತ್ತಂ ತಸ್ಸ ದತ್ವಾ ಸೋ ಪತ್ತೋ ಗಹೇತಬ್ಬೋ, ನ ಉಪಜ್ಝಾಯಸ್ಸ ಭಣಮಾನಸ್ಸ ಅನ್ತರನ್ತರಾ ಕಥಾ ಓಪಾತೇತಬ್ಬಾ। ಇತೋ ಪಟ್ಠಾಯ ಪನ ಯತ್ಥ ಯತ್ಥ ನ-ಕಾರೇನ ಪಟಿಸೇಧೋ ಕರೀಯತಿ, ಸಬ್ಬತ್ಥ ದುಕ್ಕಟಾಪತ್ತಿ ವೇದಿತಬ್ಬಾ। ಉಪಜ್ಝಾಯೋ ಆಪತ್ತಿಸಾಮನ್ತಾ ಭಣಮಾನೋ ನಿವಾರೇತಬ್ಬೋ। ನಿವಾರೇನ್ತೇನ ಚ ‘‘ಭನ್ತೇ, ಈದಿಸಂ ನಾಮ ವತ್ತುಂ ವಟ್ಟತಿ, ಆಪತ್ತಿ ನ ಹೋತೀ’’ತಿ ಏವಂ ಪುಚ್ಛನ್ತೇನ ವಿಯ ವಾರೇತಬ್ಬೋ, ‘‘ವಾರೇಸ್ಸಾಮೀ’’ತಿ ಪನ ಕತ್ವಾ ‘‘ಮಹಲ್ಲಕ, ಮಾ ಏವಂ ಭಣಾ’’ತಿ ನ ವತ್ತಬ್ಬೋ।

ಸಚೇ ಆಸನ್ನೇ ಗಾಮೋ ಹೋತಿ, ವಿಹಾರೇ ವಾ ಗಿಲಾನೋ ಭಿಕ್ಖು ಹೋತಿ, ಗಾಮತೋ ಪಠಮತರಂ ಆಗನ್ತಬ್ಬಂ। ಸಚೇ ದೂರೇ ಗಾಮೋ ಹೋತಿ, ಉಪಜ್ಝಾಯೇನ ಸದ್ಧಿಂ ಆಗಚ್ಛನ್ತೋಪಿ ನತ್ಥಿ, ತೇನೇವ ಸದ್ಧಿಂ ಗಾಮತೋ ನಿಕ್ಖಮಿತ್ವಾ ಚೀವರೇನ ಪತ್ತಂ ವೇಠೇತ್ವಾ ಅನ್ತರಾಮಗ್ಗತೋ ಪಠಮತರಂ ಆಗನ್ತಬ್ಬಂ। ಏವಂ ಪಠಮತರಂ ಆಗತೇನ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಟಿನಿವಾಸನಂ ದಾತಬ್ಬಂ, ನಿವಾಸನಂ ಪಟಿಗ್ಗಹೇತಬ್ಬಂ। ಸಚೇ ಚೀವರಂ ಸೇದಗ್ಗಹಿತಂ ಹೋತಿ, ಮುಹುತ್ತಂ ಉಣ್ಹೇ ಓತಾಪೇತಬ್ಬಂ, ನ ಚ ಉಣ್ಹೇ ಚೀವರಂ ನಿದಹಿತಬ್ಬಂ, ಚೀವರಂ ಸಙ್ಘರಿತಬ್ಬಂ। ಚೀವರಂ ಸಙ್ಘರನ್ತೇನ ಚ ಚತುರಙ್ಗುಲಂ ಕಣ್ಣಂ ಉಸ್ಸಾರೇತ್ವಾ ಚೀವರಂ ಸಙ್ಘರಿತಬ್ಬಂ। ಕಿಂಕಾರಣಾ? ಮಾ ಮಜ್ಝೇ ಭಙ್ಗೋ ಅಹೋಸೀತಿ। ಸಮಂ ಕತ್ವಾ ಸಙ್ಘರಿತಸ್ಸ ಹಿ ಮಜ್ಝೇ ಭಙ್ಗೋ ಹೋತಿ, ತತೋ ನಿಚ್ಚಂ ಭಿಜ್ಜಮಾನಂ ದುಬ್ಬಲಂ ಹೋತಿ, ತಂ ನಿವಾರಣತ್ಥಮೇತಂ ವುತ್ತಂ। ತಸ್ಮಾ ಯಥಾ ಅಜ್ಜ ಭಙ್ಗಟ್ಠಾನೇಯೇವ ಸ್ವೇ ನ ಭಿಜ್ಜಿಸ್ಸತಿ, ತಥಾ ದಿವಸೇ ದಿವಸೇ ಚತುರಙ್ಗುಲಂ ಉಸ್ಸಾರೇತ್ವಾ ಸಙ್ಘರಿತಬ್ಬಂ, ಓಭೋಗೇ ಕಾಯಬನ್ಧನಂ ಕಾತಬ್ಬಂ।

ಸಚೇ ಪಿಣ್ಡಪಾತೋ ಹೋತಿ, ಉಪಜ್ಝಾಯೋ ಚ ಭುಞ್ಜಿತುಕಾಮೋ ಹೋತಿ, ಉದಕಂ ದತ್ವಾ ಪಿಣ್ಡಪಾತೋ ಉಪನಾಮೇತಬ್ಬೋ, ಉಪಜ್ಝಾಯೋ ಪಾನೀಯೇನ ಪುಚ್ಛಿತಬ್ಬೋ। ಪುಚ್ಛನ್ತೇನ ಚ ತಿಕ್ಖತ್ತುಂ ‘‘ಪಾನೀಯಂ, ಭನ್ತೇ, ಆಹರೀಯತೂ’’ತಿ ಪಾನೀಯೇನ ಪುಚ್ಛಿತಬ್ಬೋ। ಸಚೇ ಕಾಲೋ ಅತ್ಥಿ, ಉಪಜ್ಝಾಯೇ ಭುತ್ತೇ ಸಯಂ ಭುಞ್ಜಿತಬ್ಬಂ। ಸಚೇ ಉಪಕಟ್ಠೋ ಕಾಲೋ, ಪಾನೀಯಂ ಉಪಜ್ಝಾಯಸ್ಸ ಸನ್ತಿಕೇ ಠಪೇತ್ವಾ ಸಯಮ್ಪಿ ಭುಞ್ಜಿತಬ್ಬಂ। ಭುತ್ತಾವಿಸ್ಸ ಉದಕಂ ದತ್ವಾ ಪತ್ತಂ ಪಟಿಗ್ಗಹೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಧೋವಿತ್ವಾ ವೋದಕಂ ಕತ್ವಾ ಮುಹುತ್ತಂ ಉಣ್ಹೇ ಓತಾಪೇತಬ್ಬೋ, ನ ಚ ಉಣ್ಹೇ ಪತ್ತೋ ನಿದಹಿತಬ್ಬೋ, ಪತ್ತಚೀವರಂ ನಿಕ್ಖಿಪಿತಬ್ಬಂ। ಪತ್ತಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಪತ್ತಂ ಗಹೇತ್ವಾ ಏಕೇನ ಹತ್ಥೇನ ಹೇಟ್ಠಾಮಞ್ಚಂ ವಾ ಹೇಟ್ಠಾಪೀಠಂ ವಾ ಪರಾಮಸಿತ್ವಾ ಪತ್ತೋ ನಿಕ್ಖಿಪಿತಬ್ಬೋ, ನ ಚ ತಟ್ಟಿಕಚಮ್ಮಖಣ್ಡಾದೀಹಿ ಅನನ್ತರಹಿತಾಯ ಭೂಮಿಯಾ ಪತ್ತೋ ನಿಕ್ಖಿಪಿತಬ್ಬೋ। ಸಚೇ ಪನ ಕಾಳವಣ್ಣಕತಾ ವಾ ಸುಧಾಬದ್ಧಾ ವಾ ಭೂಮಿ ಹೋತಿ ನಿರಜಮತ್ತಿಕಾ, ತಥಾರೂಪಾಯ ಭೂಮಿಯಾ ಠಪೇತುಂ ವಟ್ಟತಿ, ಧೋತವಾಲಿಕಾಯಪಿ ಠಪೇತುಂ ವಟ್ಟತಿ, ಪಂಸುರಜಸಕ್ಖರಾದೀಸು ನ ವಟ್ಟತಿ। ತತ್ರ ಪನ ಪಣ್ಣಂ ವಾ ಆಧಾರಕಂ ವಾ ಠಪೇತ್ವಾ ತತ್ರ ನಿಕ್ಖಿಪಿತಬ್ಬೋ। ಚೀವರಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಚೀವರಂ ಗಹೇತ್ವಾ ಏಕೇನ ಹತ್ಥೇನ ಚೀವರವಂಸಂ ವಾ ಚೀವರರಜ್ಜುಂ ವಾ ಪಮಜ್ಜಿತ್ವಾ ಪಾರತೋ ಅನ್ತಂ ಓರತೋ ಭೋಗಂ ಕತ್ವಾ ಚೀವರಂ ನಿಕ್ಖಿಪಿತಬ್ಬಂ। ಇದಞ್ಚ ಚೀವರವಂಸಾದೀನಂ ಹೇಟ್ಠಾ ಹತ್ಥಂ ಪವೇಸೇತ್ವಾ ಅಭಿಮುಖೇನ ಹತ್ಥೇನ ಸಣಿಕಂ ನಿಕ್ಖಿಪನತ್ಥಂ ವುತ್ತಂ। ಅನ್ತೇ ಪನ ಗಹೇತ್ವಾ ಭೋಗೇನ ಚೀವರವಂಸಾದೀನಂ ಉಪರಿ ಖಿಪನ್ತಸ್ಸ ಭಿತ್ತಿಯಂ ಭೋಗೋ ಪಟಿಹಞ್ಞತಿ, ತಸ್ಮಾ ತಥಾ ನ ಕಾತಬ್ಬಂ। ಉಪಜ್ಝಾಯಮ್ಹಿ ವುಟ್ಠಿತೇ ಆಸನಂ ಉದ್ಧರಿತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಪಟಿಸಾಮೇತಬ್ಬಂ। ಸಚೇ ಸೋ ದೇಸೋ ಉಕ್ಲಾಪೋ ಹೋತಿ, ಸೋ ದೇಸೋ ಸಮ್ಮಜ್ಜಿತಬ್ಬೋ।

ಸಚೇ ಉಪಜ್ಝಾಯೋ ನಹಾಯಿತುಕಾಮೋ ಹೋತಿ, ನಹಾನಂ ಪಟಿಯಾದೇತಬ್ಬಂ। ಸಚೇ ಸೀತೇನ ಅತ್ಥೋ ಹೋತಿ, ಸೀತಂ ಪಟಿಯಾದೇತಬ್ಬಂ। ಸಚೇ ಉಣ್ಹೇನ ಅತ್ಥೋ ಹೋತಿ, ಉಣ್ಹಂ ಪಟಿಯಾದೇತಬ್ಬಂ।

ಸಚೇ ಉಪಜ್ಝಾಯೋ ಜನ್ತಾಘರಂ ಪವಿಸಿತುಕಾಮೋ ಹೋತಿ, ಚುಣ್ಣಂ ಸನ್ನೇತಬ್ಬಂ, ಮತ್ತಿಕಾ ತೇಮೇತಬ್ಬಾ। ಜನ್ತಾಘರಪೀಠಂ ಆದಾಯ ಉಪಜ್ಝಾಯಸ್ಸ ಪಿಟ್ಠಿತೋ ಪಿಟ್ಠಿತೋ ಗನ್ತ್ವಾ ಜನ್ತಾಘರಪೀಠಂ ದತ್ವಾ ಚೀವರಂ ಪಟಿಗ್ಗಹೇತ್ವಾ ಏಕಮನ್ತೇ ನಿದ್ಧೂಮಟ್ಠಾನೇ ಠಪೇತಬ್ಬಂ, ಚುಣ್ಣಂ ದಾತಬ್ಬಂ, ಮತ್ತಿಕಾ ದಾತಬ್ಬಾ। ಸಚೇ ಉಸ್ಸಹತಿ, ಜನ್ತಾಘರಂ ಪವಿಸಿತಬ್ಬಂ, ಪವಿಸನ್ತೇನ ಮತ್ತಿಕಾಯ ಮುಖಂ ಮಕ್ಖೇತ್ವಾ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಂ ಪವಿಸಿತಬ್ಬಂ। ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ, ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ, ಜನ್ತಾಘರೇ ಉಪಜ್ಝಾಯಸ್ಸ ಪರಿಕಮ್ಮಂ ಕಾತಬ್ಬಂ। ಜನ್ತಾಘರೇ ಪರಿಕಮ್ಮಂ ನಾಮ ಅಙ್ಗಾರಮತ್ತಿಕಾಉಣ್ಹೋದಕದಾನಾದಿಕಂ ಸಬ್ಬಕಿಚ್ಚಂ। ಜನ್ತಾಘರಾ ನಿಕ್ಖಮನ್ತೇನ ಜನ್ತಾಘರಪೀಠಂ ಆದಾಯ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಾ ನಿಕ್ಖಮಿತಬ್ಬಂ।

ಉದಕೇಪಿ ಉಪಜ್ಝಾಯಸ್ಸ ಅಙ್ಗಪಚ್ಚಙ್ಗಘಂಸನಾದಿಕಂ ಪರಿಕಮ್ಮಂ ಕಾತಬ್ಬಂ, ನಹಾತೇನ ಪಠಮತರಂ ಉತ್ತರಿತ್ವಾ ಅತ್ತನೋ ಗತ್ತಂ ವೋದಕಂ ಕತ್ವಾ ನಿವಾಸೇತ್ವಾ ಉಪಜ್ಝಾಯಸ್ಸ ಗತ್ತತೋ ಉದಕಂ ಪಮಜ್ಜಿತಬ್ಬಂ, ನಿವಾಸನಂ ದಾತಬ್ಬಂ, ಸಙ್ಘಾಟಿ ದಾತಬ್ಬಾ , ಜನ್ತಾಘರಪೀಠಂ ಆದಾಯ ಪಠಮತರಂ ಆಗನ್ತ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಉಪಜ್ಝಾಯೋ ಪಾನೀಯೇನ ಪುಚ್ಛಿತಬ್ಬೋ। ಜನ್ತಾಘರೇ ಹಿ ಉಣ್ಹಸನ್ತಾಪೇನ ಪಿಪಾಸಾ ಹೋತಿ। ಸಚೇ ಉದ್ದಿಸಾಪೇತುಕಾಮೋ ಹೋತಿ, ಉದ್ದಿಸಿತಬ್ಬೋ। ಸಚೇ ಪರಿಪುಚ್ಛಿತುಕಾಮೋ ಹೋತಿ, ಪರಿಪುಚ್ಛಿತಬ್ಬೋ।

ಯಸ್ಮಿಂ ವಿಹಾರೇ ಉಪಜ್ಝಾಯೋ ವಿಹರತಿ, ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಸಚೇ ಉಸ್ಸಹತಿ, ಕೇನಚಿ ಗೇಲಞ್ಞೇನ ಅನಭಿಭೂತೋ ಹೋತಿ, ಸೋಧೇತಬ್ಬೋ। ಅಗಿಲಾನೇನ ಹಿ ಸದ್ಧಿವಿಹಾರಿಕೇನ ಸಟ್ಠಿವಸ್ಸೇನಪಿ ಸಬ್ಬಂ ಉಪಜ್ಝಾಯವತ್ತಂ ಕಾತಬ್ಬಂ, ಅನಾದರೇನ ಅಕರೋನ್ತಸ್ಸ ವತ್ತಭೇದೇ ದುಕ್ಕಟಂ, ನ-ಕಾರಪಟಿಸಂಯುತ್ತೇಸು ಪನ ಪದೇಸು ಗಿಲಾನಸ್ಸಪಿ ಪಟಿಕ್ಖಿತ್ತಕಿರಿಯಂ ಕರೋನ್ತಸ್ಸ ದುಕ್ಕಟಮೇವ। ವಿಹಾರಂ ಸೋಧೇನ್ತೇನ ಪಠಮಂ ಪತ್ತಚೀವರಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ನಿಸೀದನಪಚ್ಚತ್ಥರಣಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಭಿಸಿಬಿಮ್ಬೋಹನಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಮಞ್ಚೋ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬೋ, ಪೀಠಂ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಮಞ್ಚಪಟಿಪಾದಕಾ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಾ, ಖೇಳಮಲ್ಲಕೋ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬೋ, ಅಪಸ್ಸೇನಫಲಕಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ। ಭೂಮತ್ಥರಣಂ ಯಥಾಪಞ್ಞತ್ತಂ ಸಲ್ಲಕ್ಖೇತ್ವಾ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ। ಸಚೇ ವಿಹಾರೇ ಸನ್ತಾನಕಂ ಹೋತಿ, ಉಲ್ಲೋಕಾ ಪಠಮಂ ಓಹಾರೇತಬ್ಬಂ, ಆಲೋಕಸನ್ಧಿಕಣ್ಣಭಾಗಾ ಪಮಜ್ಜಿತಬ್ಬಾ। ಸಚೇ ಗೇರುಕಪರಿಕಮ್ಮಕತಾ ಭಿತ್ತಿ ಕಣ್ಣಕಿತಾ ಹೋತಿ, ಚೋಳಕಂ ತೇಮೇತ್ವಾ ಪೀಳೇತ್ವಾ ಪಮಜ್ಜಿತಬ್ಬಾ। ಸಚೇ ಕಾಳವಣ್ಣಕತಾ ಭೂಮಿ ಕಣ್ಣಕಿತಾ ಹೋತಿ, ಚೋಳಕಂ ತೇಮೇತ್ವಾ ಪೀಳೇತ್ವಾ ಪಮಜ್ಜಿತಬ್ಬಾ। ಸಚೇ ಅಕತಾ ಹೋತಿ ಭೂಮಿ, ಉದಕೇನ ಪರಿಪ್ಫೋಸಿತ್ವಾ ಪರಿಪ್ಫೋಸಿತ್ವಾ ಸಮ್ಮಜ್ಜಿತಬ್ಬಾ ‘‘ಮಾ ವಿಹಾರೋ ರಜೇನ ಉಹಞ್ಞೀ’’ತಿ, ಸಙ್ಕಾರಂ ವಿಚಿನಿತ್ವಾ ಏಕಮನ್ತಂ ಛಡ್ಡೇತಬ್ಬಂ।

ಭೂಮತ್ಥರಣಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅಭಿಹರಿತ್ವಾ ಯಥಾ ಪಠಮಂ ಪಞ್ಞತ್ತಂ ಅಹೋಸಿ, ತಥೇವ ಪಞ್ಞಪೇತಬ್ಬಂ। ಏತದತ್ಥಮೇವ ಹಿ ‘‘ಯಥಾಪಞ್ಞತ್ತಂ ಸಲ್ಲಕ್ಖೇತ್ವಾ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬ’’ನ್ತಿ ವುತ್ತಂ। ಸಚೇ ಪನ ಪಠಮಂ ಅಜಾನನ್ತೇನ ಕೇನಚಿ ಪಞ್ಞತ್ತಂ ಅಹೋಸಿ, ಸಮನ್ತತೋ ಭಿತ್ತಿಂ ದ್ವಙ್ಗುಲಮತ್ತೇನ ವಾ ತಿವಙ್ಗುಲಮತ್ತೇನ ವಾ ಮೋಚೇತ್ವಾ ಪಞ್ಞಪೇತಬ್ಬಂ। ಇದಞ್ಹೇತ್ಥ ಪಞ್ಞಾಪನವತ್ತಂ – ಸಚೇ ಕಟಸಾರಕೋ ಹೋತಿ ಅತಿಮಹನ್ತೋ ಚ, ಛಿನ್ದಿತ್ವಾ ಕೋಟಿಂ ನಿವತ್ತೇತ್ವಾ ಬನ್ಧಿತ್ವಾ ಪಞ್ಞಪೇತಬ್ಬೋ। ಸಚೇ ಕೋಟಿಂ ನಿವತ್ತೇತ್ವಾ ಬನ್ಧಿತುಂ ನ ಜಾನಾತಿ, ನ ಛಿನ್ದಿತಬ್ಬೋ। ಮಞ್ಚಪಟಿಪಾದಕಾ ಓತಾಪೇತ್ವಾ ಪಮಜ್ಜಿತ್ವಾ ಯಥಾಠಾನೇ ಠಪೇತಬ್ಬಾ, ಮಞ್ಚೋ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬೋ, ಪೀಠಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ, ಭಿಸಿಬಿಮ್ಬೋಹನಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ, ನಿಸೀದನಪಚ್ಚತ್ಥರಣಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ, ಖೇಳಮಲ್ಲಕೋ ಓತಾಪೇತ್ವಾ ಪಮಜ್ಜಿತ್ವಾ ಅತಿಹರಿತ್ವಾ ಯಥಾಠಾನೇ ಠಪೇತಬ್ಬೋ, ಅಪಸ್ಸೇನಫಲಕಂ ಓತಾಪೇತ್ವಾ ಪಮಜ್ಜಿತ್ವಾ ಅತಿಹರಿತ್ವಾ ಯಥಾಠಾನೇ ಠಪೇತಬ್ಬಂ। ಪತ್ತಚೀವರಂ ನಿಕ್ಖಿಪಿತಬ್ಬಂ, ಪತ್ತಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಪತ್ತಂ ಗಹೇತ್ವಾ ಏಕೇನ ಹತ್ಥೇನ ಹೇಟ್ಠಾಮಞ್ಚಂ ವಾ ಹೇಟ್ಠಾಪೀಠಂ ವಾ ಪರಾಮಸಿತ್ವಾ ಪತ್ತೋ ನಿಕ್ಖಿಪಿತಬ್ಬೋ, ನ ಚ ಅನನ್ತರಹಿತಾಯ ಭೂಮಿಯಾ ಪತ್ತೋ ನಿಕ್ಖಿಪಿತಬ್ಬೋ। ಚೀವರಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಚೀವರಂ ಗಹೇತ್ವಾ ಏಕೇನ ಹತ್ಥೇನ ಚೀವರವಂಸಂ ವಾ ಚೀವರರಜ್ಜುಂ ವಾ ಪಮಜ್ಜಿತ್ವಾ ಪಾರತೋ ಅನ್ತಂ, ಓರತೋ ಭೋಗಂ ಕತ್ವಾ ಚೀವರಂ ನಿಕ್ಖಿಪಿತಬ್ಬಂ।

ಸಚೇ ಪುರತ್ಥಿಮಾ ಸರಜಾ ವಾತಾ ವಾಯನ್ತಿ, ಪುರತ್ಥಿಮಾ ವಾತಪಾನಾ ಥಕೇತಬ್ಬಾ। ಸಚೇ ಪಚ್ಛಿಮಾ, ಉತ್ತರಾ, ದಕ್ಖಿಣಾ ಸರಜಾ ವಾತಾ ವಾಯನ್ತಿ, ದಕ್ಖಿಣಾ ವಾತಪಾನಾ ಥಕೇತಬ್ಬಾ। ಸಚೇ ಸೀತಕಾಲೋ ಹೋತಿ, ದಿವಾ ವಾತಪಾನಾ ವಿವರಿತಬ್ಬಾ, ರತ್ತಿಂ ಥಕೇತಬ್ಬಾ। ಸಚೇ ಉಣ್ಹಕಾಲೋ ಹೋತಿ, ದಿವಾ ಥಕೇತಬ್ಬಾ, ರತ್ತಿಂ ವಿವರಿತಬ್ಬಾ।

ಸಚೇ ಉಕ್ಲಾಪಂ ಹೋತಿ, ಪರಿವೇಣಂ ಸಮ್ಮಜ್ಜಿತಬ್ಬಂ, ಕೋಟ್ಠಕೋ ಸಮ್ಮಜ್ಜಿತಬ್ಬೋ, ಉಪಟ್ಠಾನಸಾಲಾ ಸಮ್ಮಜ್ಜಿತಬ್ಬಾ, ಅಗ್ಗಿಸಾಲಾ ಸಮ್ಮಜ್ಜಿತಬ್ಬಾ, ವಚ್ಚಕುಟಿ ಸಮ್ಮಜ್ಜಿತಬ್ಬಾ, ಪಾನೀಯಂ ಪರಿಭೋಜನೀಯಂ ಉಪಟ್ಠಪೇತಬ್ಬಂ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ।

ಸಚೇ ಉಪಜ್ಝಾಯಸ್ಸ ಅನಭಿರತಿ ಉಪ್ಪನ್ನಾ ಹೋತಿ, ಸದ್ಧಿವಿಹಾರಿಕೇನ ಅಞ್ಞತ್ಥ ನೇತಬ್ಬೋ, ಅಞ್ಞೋ ವಾ ಭಿಕ್ಖು ವತ್ತಬ್ಬೋ ‘‘ಥೇರಂ ಗಹೇತ್ವಾ ಅಞ್ಞತ್ಥ ಗಚ್ಛಾ’’ತಿ, ಧಮ್ಮಕಥಾ ವಾಸ್ಸ ಕಾತಬ್ಬಾ। ಸಚೇ ಉಪಜ್ಝಾಯಸ್ಸ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ, ಸದ್ಧಿವಿಹಾರಿಕೇನ ವಿನೋದೇತಬ್ಬಂ, ಅಞ್ಞೇನ ವಾ ವಿನೋದಾಪೇತಬ್ಬಂ ಧಮ್ಮಕಥಾ ವಾಸ್ಸ ಕಾತಬ್ಬಾ। ಸಚೇ ಉಪಜ್ಝಾಯಸ್ಸ ದಿಟ್ಠಿಗತಂ ಉಪ್ಪನ್ನಂ ಹೋತಿ, ಸದ್ಧಿವಿಹಾರಿಕೇನ ವಿಸ್ಸಜ್ಜೇತಬ್ಬಂ, ಅಞ್ಞೋ ವಾ ವತ್ತಬ್ಬೋ ‘‘ಥೇರಂ ದಿಟ್ಠಿಗತಂ ವಿಸ್ಸಜ್ಜಾಪೇಹೀ’’ತಿ, ಧಮ್ಮಕಥಾ ವಾಸ್ಸ ಕಾತಬ್ಬಾ। ಸಚೇ ಉಪಜ್ಝಾಯೋ ಗರುಧಮ್ಮಂ ಅಜ್ಝಾಪನ್ನೋ ಹೋತಿ ಪರಿವಾಸಾರಹೋ, ಸದ್ಧಿವಿಹಾರಿಕೇನ ಉಸ್ಸುಕ್ಕಂ ಕಾತಬ್ಬಂ, ಪರಿವಾಸದಾನತ್ಥಂ ಸೋ ಸೋ ಭಿಕ್ಖು ಉಪಸಙ್ಕಮಿತ್ವಾ ಯಾಚಿತಬ್ಬೋ। ಸಚೇ ಅತ್ತನಾ ಪಟಿಬಲೋ ಹೋತಿ, ಅತ್ತನಾವ ದಾತಬ್ಬೋ। ನೋ ಚೇ ಪಟಿಬಲೋ ಹೋತಿ, ಅಞ್ಞೇನ ದಾಪೇತಬ್ಬೋ। ಸಚೇ ಉಪಜ್ಝಾಯೋ ಮೂಲಾಯಪಟಿಕಸ್ಸನಾರಹೋ ಹೋತಿ ಮಾನತ್ತಾರಹೋ ಅಬ್ಭಾನಾರಹೋ ವಾ, ವುತ್ತನಯೇನೇವ ಉಸ್ಸುಕ್ಕಂ ಕಾತಬ್ಬಂ। ಸಚೇ ಸಙ್ಘೋ ಉಪಜ್ಝಾಯಸ್ಸ ಕಮ್ಮಂ ಕತ್ತುಕಾಮೋ ಹೋತಿ ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ, ಸದ್ಧಿವಿಹಾರಿಕೇನ ಉಸ್ಸುಕ್ಕಂ ಕಾತಬ್ಬಂ ‘‘ಕೇನ ನು ಖೋ ಉಪಾಯೇನ ಸಙ್ಘೋ ಉಪಜ್ಝಾಯಸ್ಸ ಕಮ್ಮಂ ನ ಕರೇಯ್ಯ, ಲಹುಕಾಯ ವಾ ಪರಿಣಾಮೇಯ್ಯಾ’’ತಿ। ಸದ್ಧಿವಿಹಾರಿಕೇನ ಹಿ ‘‘ಉಪಜ್ಝಾಯಸ್ಸ ಉಕ್ಖೇಪನೀಯಕಮ್ಮಂ ಕತ್ತುಕಾಮೋ ಸಙ್ಘೋ’’ತಿ ಞತ್ವಾ ಏಕಮೇಕಂ ಭಿಕ್ಖುಂ ಉಪಸಙ್ಕಮಿತ್ವಾ ‘‘ಮಾ, ಭನ್ತೇ, ಅಮ್ಹಾಕಂ ಉಪಜ್ಝಾಯಸ್ಸ ಕಮ್ಮಂ ಕರಿತ್ಥಾ’’ತಿ ಯಾಚಿತಬ್ಬಾ। ಸಚೇ ಕರೋನ್ತಿಯೇವ, ‘‘ತಜ್ಜನೀಯಂ ವಾ ನಿಯಸ್ಸಂ ವಾ ಲಹುಕಕಮ್ಮಂ ಕರೋಥಾ’’ತಿ ಯಾಚಿತಬ್ಬಾ। ಸಚೇ ಕರೋನ್ತಿಯೇವ, ಅಥ ಉಪಜ್ಝಾಯೋ ‘‘ಸಮ್ಮಾ ವತ್ತಥ, ಭನ್ತೇ’’ತಿ ಯಾಚಿತಬ್ಬೋ। ಇತಿ ತಂ ಸಮ್ಮಾ ವತ್ತಾಪೇತ್ವಾ ‘‘ಪಟಿಪ್ಪಸ್ಸಮ್ಭೇಥ, ಭನ್ತೇ, ಕಮ್ಮ’’ನ್ತಿ ಭಿಕ್ಖೂ ಯಾಚಿತಬ್ಬಾ।

ಸಚೇ ಉಪಜ್ಝಾಯಸ್ಸ ಚೀವರಂ ಧೋವಿತಬ್ಬಂ ಹೋತಿ, ಸದ್ಧಿವಿಹಾರಿಕೇನ ಧೋವಿತಬ್ಬಂ, ಉಸ್ಸುಕ್ಕಂ ವಾ ಕಾತಬ್ಬಂ ‘‘ಕಿನ್ತಿ ನು ಖೋ ಉಪಜ್ಝಾಯಸ್ಸ ಚೀವರಂ ಧೋವಿಯೇಥಾ’’ತಿ। ಸಚೇ ಉಪಜ್ಝಾಯಸ್ಸ ಚೀವರಂ ಕಾತಬ್ಬಂ ಹೋತಿ, ರಜನಂ ವಾ ಪಚಿತಬ್ಬಂ, ಚೀವರಂ ವಾ ರಜೇತಬ್ಬಂ ಹೋತಿ, ಸದ್ಧಿವಿಹಾರಿಕೇನ ಸಬ್ಬಂ ಕಾತಬ್ಬಂ, ಉಸ್ಸಕ್ಕಂ ವಾ ಕಾತಬ್ಬಂ ‘‘ಕಿನ್ತಿ ನು ಖೋ ಉಪಜ್ಝಾಯಸ್ಸ ಚೀವರಂ ರಜಿಯೇಥಾ’’ತಿ। ಚೀವರಂ ರಜನ್ತೇನ ಸಾಧುಕಂ ಸಂಪರಿವತ್ತೇತ್ವಾ ರಜೇತಬ್ಬಂ, ನ ಚ ಅಚ್ಛಿನ್ನೇ ಥೇವೇ ಪಕ್ಕಮಿತಬ್ಬಂ।

ನ ಉಪಜ್ಝಾಯಂ ಅನಾಪುಚ್ಛಾ ಏಕಚ್ಚಸ್ಸ ಪತ್ತೋ ದಾತಬ್ಬೋ, ನ ಏಕಚ್ಚಸ್ಸ ಪತ್ತೋ ಪಟಿಗ್ಗಹೇತಬ್ಬೋ, ನ ಏಕಚ್ಚಸ್ಸ ಚೀವರಂ ದಾತಬ್ಬಂ, ನ ಏಕಚ್ಚಸ್ಸ ಚೀವರಂ ಪಟಿಗ್ಗಹೇತಬ್ಬಂ, ನ ಏಕಚ್ಚಸ್ಸ ಪರಿಕ್ಖಾರೋ ದಾತಬ್ಬೋ, ನ ಏಕಚ್ಚಸ್ಸ ಪರಿಕ್ಖಾರೋ ಪಟಿಗ್ಗಹೇತಬ್ಬೋ, ನ ಏಕಚ್ಚಸ್ಸ ಕೇಸಾ ಛೇದೇತಬ್ಬಾ, ನ ಏಕಚ್ಚೇನ ಕೇಸಾ ಛೇದಾಪೇತಬ್ಬಾ , ನ ಏಕಚ್ಚಸ್ಸ ಪರಿಕಮ್ಮಂ ಕಾತಬ್ಬಂ, ನ ಏಕಚ್ಚೇನ ಪರಿಕಮ್ಮಂ ಕಾರಾಪೇತಬ್ಬಂ, ನ ಏಕಚ್ಚಸ್ಸ ವೇಯ್ಯಾವಚ್ಚೋ ಕಾತಬ್ಬೋ, ನ ಏಕಚ್ಚೇನ ವೇಯ್ಯಾವಚ್ಚೋ ಕಾರಾಪೇತಬ್ಬೋ, ನ ಏಕಚ್ಚಸ್ಸ ಪಚ್ಛಾಸಮಣೇನ ಹೋತಬ್ಬಂ, ನ ಏಕಚ್ಚೋ ಪಚ್ಛಾಸಮಣೋ ಆದಾತಬ್ಬೋ, ನ ಏಕಚ್ಚಸ್ಸ ಪಿಣ್ಡಪಾತೋ ನೀಹರಿತಬ್ಬೋ, ನ ಏಕಚ್ಚೇನ ಪಿಣ್ಡಪಾತೋ ನೀಹರಾಪೇತಬ್ಬೋ, ನ ಉಪಜ್ಝಾಯಂ ಅನಾಪುಚ್ಛಾ ಗಾಮೋ ಪವಿಸಿತಬ್ಬೋ, ಪಿಣ್ಡಾಯ ವಾ ಅಞ್ಞೇನ ವಾ ಕರಣೀಯೇನ ಪವಿಸಿತುಕಾಮೇನ ಆಪುಚ್ಛಿತ್ವಾವ ಪವಿಸಿತಬ್ಬೋ। ಸಚೇ ಉಪಜ್ಝಾಯೋ ಕಾಲಸ್ಸೇವ ವುಟ್ಠಾಯ ದೂರಂ ಭಿಕ್ಖಾಚಾರಂ ಗನ್ತುಕಾಮೋ ಹೋತಿ, ‘‘ದಹರಾ ಪಿಣ್ಡಾಯ ಪವಿಸನ್ತೂ’’ತಿ ವತ್ವಾ ಗನ್ತಬ್ಬಂ। ಅವತ್ವಾ ಗತೇ ಪರಿವೇಣಂ ಗನ್ತ್ವಾ ಉಪಜ್ಝಾಯಂ ಅಪಸ್ಸನ್ತೇನ ಗಾಮಂ ಪವಿಸಿತುಂ ವಟ್ಟತಿ। ಸಚೇ ಗಾಮಂ ಪವಿಸನ್ತೋಪಿ ಪಸ್ಸತಿ, ದಿಟ್ಠಟ್ಠಾನತೋ ಪಟ್ಠಾಯ ಆಪುಚ್ಛಿತುಂಯೇವ ವಟ್ಟತಿ। ನ ಉಪಜ್ಝಾಯಂ ಅನಾಪುಚ್ಛಾ ವಾಸತ್ಥಾಯ ವಾ ಅಸುಭದಸ್ಸನತ್ಥಾಯ ವಾ ಸುಸಾನಂ ಗನ್ತಬ್ಬಂ, ನ ದಿಸಾ ಪಕ್ಕಮಿತಬ್ಬಾ, ಪಕ್ಕಮಿತುಕಾಮೇನ ಪನ ಕಮ್ಮಂ ಆಚಿಕ್ಖಿತ್ವಾ ಯಾವತತಿಯಂ ಯಾಚಿತಬ್ಬೋ। ಸಚೇ ಅನುಜಾನಾತಿ, ಸಾಧು, ನೋ ಚೇ ಅನುಜಾನಾತಿ, ತಂ ನಿಸ್ಸಾಯ ವಸತೋ ಚಸ್ಸ ಉದ್ದೇಸೋ ವಾ ಪರಿಪುಚ್ಛಾ ವಾ ಕಮ್ಮಟ್ಠಾನಂ ವಾ ನ ಸಮ್ಪಜ್ಜತಿ, ಉಪಜ್ಝಾಯೋ ಬಾಲೋ ಹೋತಿ ಅಬ್ಯತ್ತೋ, ಕೇವಲಂ ಅತ್ತನೋ ಸನ್ತಿಕೇ ವಸಾಪೇತುಕಾಮತಾಯ ಏವ ಗನ್ತುಂ ನ ದೇತಿ, ಏವರೂಪೇ ನಿವಾರೇನ್ತೇಪಿ ಗನ್ತುಂ ವಟ್ಟತಿ। ಸಚೇ ಉಪಜ್ಝಾಯೋ ಗಿಲಾನೋ ಹೋತಿ, ಯಾವಜೀವಂ ಉಪಟ್ಠಾಪೇತಬ್ಬೋ, ವುಟ್ಠಾನಮಸ್ಸ ಆಗಮೇತಬ್ಬಂ, ನ ಕತ್ಥಚಿ ಗನ್ತಬ್ಬಂ। ಸಚೇ ಅಞ್ಞೋ ಭಿಕ್ಖು ಉಪಟ್ಠಾಕೋ ಅತ್ಥಿ, ಭೇಸಜ್ಜಂ ಪರಿಯೇಸಿತ್ವಾ ತಸ್ಸ ಹತ್ಥೇ ದತ್ವಾ ‘‘ಭನ್ತೇ, ಅಯಂ ಉಪಟ್ಠಹಿಸ್ಸತೀ’’ತಿ ವತ್ವಾ ಗನ್ತಬ್ಬಂ। ಇದಂ ತಾವ ಉಪಜ್ಝಾಯವತ್ತಂ।

೧೮೪. ಇದಮೇವ ಚ ಅನ್ತೇವಾಸಿಕೇನ ಆಚರಿಯಸ್ಸ ಕತ್ತಬ್ಬತ್ತಾ ಆಚರಿಯವತ್ತನ್ತಿ ವುಚ್ಚತಿ। ನಾಮಮತ್ತಮೇವ ಹೇತ್ಥ ನಾನಂ। ತತ್ಥ ಯಾವ ಚೀವರರಜನಂ, ತಾವ ವತ್ತೇ ಅಕರಿಯಮಾನೇ ಉಪಜ್ಝಾಯಸ್ಸ ಆಚರಿಯಸ್ಸ ಚ ಪರಿಹಾನಿ ಹೋತಿ, ತಸ್ಮಾ ತಂ ಅಕರೋನ್ತಸ್ಸ ನಿಸ್ಸಯಮುತ್ತಕಸ್ಸಪಿ ಅಮುತ್ತಕಸ್ಸಪಿ ಆಪತ್ತಿಯೇವ, ಏಕಚ್ಚಸ್ಸ ಪತ್ತದಾನತೋ ಪಟ್ಠಾಯ ಅಮುತ್ತನಿಸ್ಸಯಸ್ಸೇವ ಆಪತ್ತಿ। ಉಪಜ್ಝಾಯೇ ಆಚರಿಯೇ ವಾ ವತ್ತಂ ಸಾದಿಯನ್ತೇ ಸದ್ಧಿವಿಹಾರಿಕಾ ಅನ್ತೇವಾಸಿಕಾ ಚ ಬಹುಕಾಪಿ ಹೋನ್ತು, ಸಬ್ಬೇಸಂ ಆಪತ್ತಿ। ಸಚೇ ಉಪಜ್ಝಾಯೋ ಆಚರಿಯೋ ವಾ ‘‘ಮಯ್ಹಂ ಉಪಟ್ಠಾಕೋ ಅತ್ಥಿ, ತುಮ್ಹೇ ಅತ್ತನೋ ಸಜ್ಝಾಯಮನಸಿಕಾರಾದೀಸು ಯೋಗಂ ಕರೋಥಾ’’ತಿ ವದತಿ, ಸದ್ಧಿವಿಹಾರಿಕಾದೀನಂ ಅನಾಪತ್ತಿ। ಉಪಜ್ಝಾಯೋ ವಾ ಆಚರಿಯೋ ವಾ ಸಚೇ ಸಾದಿಯನಂ ವಾ ಅಸಾದಿಯನಂ ವಾ ನ ಜಾನಾತಿ, ಬಾಲೋ ಹೋತಿ, ಸದ್ಧಿವಿಹಾರಿಕಾದಯೋ ಬಹೂ, ತೇಸು ಏಕೋ ವತ್ತಸಮ್ಪನ್ನೋ ಭಿಕ್ಖು ‘‘ಉಪಜ್ಝಾಯಸ್ಸ ವಾ ಆಚರಿಯಸ್ಸ ವಾ ಕಿಚ್ಚಂ ಅಹಂ ಕರಿಸ್ಸಾಮಿ, ತುಮ್ಹೇ ಅಪ್ಪೋಸ್ಸುಕ್ಕಾ ವಿಹರಥಾ’’ತಿ ಏವಞ್ಚೇ ಅತ್ತನೋ ಭಾರಂ ಕತ್ವಾ ಇತರೇ ವಿಸ್ಸಜ್ಜೇತಿ, ತಸ್ಸ ಭಾರಕರಣತೋ ಪಟ್ಠಾಯ ತೇಸಂ ಅನಾಪತ್ತಿ। ಏತ್ಥ ಅನ್ತೇವಾಸಿಕೇಸು ಪನ ನಿಸ್ಸಯನ್ತೇವಾಸಿಕೇನ ಯಾವ ಆಚರಿಯಂ ನಿಸ್ಸಾಯ ವಸತಿ, ತಾವ ಸಬ್ಬಂ ಆಚರಿಯವತ್ತಂ ಕಾತಬ್ಬಂ। ಪಬ್ಬಜ್ಜಉಪಸಮ್ಪದಧಮ್ಮನ್ತೇವಾಸಿಕೇಹಿ ಪನ ನಿಸ್ಸಯಮುತ್ತಕೇಹಿಪಿ ಆದಿತೋ ಪಟ್ಠಾಯ ಯಾವ ಚೀವರರಜನಂ, ತಾವ ವತ್ತಂ ಕಾತಬ್ಬಂ। ಅನಾಪುಚ್ಛಿತ್ವಾ ಪತ್ತದಾನಾದಿಮ್ಹಿ ಪನ ಏತೇಸಂ ಅನಾಪತ್ತಿ।

ಏತೇಸು ಪಬ್ಬಜ್ಜನ್ತೇವಾಸಿಕೋ ಚ ಉಪಸಮ್ಪದನ್ತೇವಾಸಿಕೋ ಚ ಆಚರಿಯಸ್ಸ ಯಾವಜೀವಂ ಭಾರಾ। ನಿಸ್ಸಯನ್ತೇವಾಸಿಕೋ ಚ ಧಮ್ಮನ್ತೇವಾಸಿಕೋ ಚ ಯಾವ ಸಮೀಪೇ ವಸನ್ತಿ, ತಾವ ಆಚರಿಯುಪಜ್ಝಾಯೇಹಿಪಿ ಅನ್ತೇವಾಸಿಕಸದ್ಧಿವಿಹಾರಿಕಾ ಸಙ್ಗಹೇತಬ್ಬಾ ಅನುಗ್ಗಹೇತಬ್ಬಾ ಉದ್ದೇಸೇನ ಪರಿಪುಚ್ಛಾಯ ಓವಾದೇನ ಅನುಸಾಸನಿಯಾ। ಸಚೇ ಅನ್ತೇವಾಸಿಕಸದ್ಧಿವಿಹಾರಿಕಾನಂ ಪತ್ತೋ ವಾ ಚೀವರಂ ವಾ ಅಞ್ಞೋ ವಾ ಕೋಚಿ ಪರಿಕ್ಖಾರೋ ನತ್ಥಿ, ಅತ್ತನೋ ಅತಿರೇಕಪತ್ತಚೀವರಂ ಅತಿರೇಕಪರಿಕ್ಖಾರೋ ವಾ ಅತ್ಥಿ, ದಾತಬ್ಬಂ। ನೋ ಚೇ, ಧಮ್ಮಿಯೇನ ನಯೇನ ಪರಿಯೇಸನತ್ಥಾಯ ಉಸ್ಸುಕ್ಕಂ ಕಾತಬ್ಬಂ। ಸಚೇ ಅನ್ತೇವಾಸಿಕಸದ್ಧಿವಿಹಾರಿಕಾ ಗಿಲಾನಾ ಹೋನ್ತಿ, ಉಪಜ್ಝಾಯವತ್ತೇ ವುತ್ತನಯೇನ ದನ್ತಕಟ್ಠದಾನಂ ಆದಿಂ ಕತ್ವಾ ಆಚಮನಕುಮ್ಭಿಯಾ ಉದಕಸಿಞ್ಚನಪರಿಯೋಸಾನಂ ಸಬ್ಬಂ ವತ್ತಂ ಕಾತಬ್ಬಮೇವ, ಅಕರೋನ್ತಾನಂ ಆಪತ್ತಿ। ತಸ್ಮಾ ಆಚರಿಯುಪಜ್ಝಾಯೇಹಿಪಿ ಅನ್ತೇವಾಸಿಕಸದ್ಧಿವಿಹಾರಿಕೇಸು ಸಮ್ಮಾ ವತ್ತಿತಬ್ಬಂ। ಆಚರಿಯುಪಜ್ಝಾಯಾದೀಸು ಹಿ ಯೋ ಯೋ ನ ಸಮ್ಮಾ ವತ್ತತಿ, ತಸ್ಸ ತಸ್ಸ ಆಪತ್ತಿ। ಉಪಜ್ಝಾಯಾದಿವತ್ತಕಥಾ।

೧೮೫. ಇದಾನಿ ಆಗನ್ತುಕವತ್ತಾದೀನಿ ವೇದಿತಬ್ಬಾನಿ। ಆಗನ್ತುಕೇನ ಭಿಕ್ಖುನಾ ಉಪಚಾರಸೀಮಾಸಮೀಪಂ ಗನ್ತ್ವಾ ಉಪಾಹನಾ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಉಪಾಹನದಣ್ಡಕೇನ ಗಹೇತ್ವಾ ಛತ್ತಂ ಉಪನಾಮೇತ್ವಾ ಸೀಸಂ ವಿವರಿತ್ವಾ ಸೀಸೇ ಚೀವರಂ ಖನ್ಧೇ ಕರಿತ್ವಾ ಸಾಧುಕಂ ಅತರಮಾನೇನ ಆರಾಮೋ ಪವಿಸಿತಬ್ಬೋ, ಆರಾಮಂ ಪವಿಸನ್ತೇನ ಸಲ್ಲಕ್ಖೇತಬ್ಬಂ ‘‘ಕತ್ಥ ಆವಾಸಿಕಾ ಭಿಕ್ಖೂ ಸನ್ನಿಪತನ್ತೀ’’ತಿ। ಯತ್ಥ ಆವಾಸಿಕಾ ಭಿಕ್ಖೂ ಸನ್ನಿಪತನ್ತಿ ಉಪಟ್ಠಾನಸಾಲಾಯ ವಾ ಮಣ್ಡಪೇ ವಾ ರುಕ್ಖಮೂಲೇ ವಾ, ತತ್ಥ ಗನ್ತ್ವಾ ಏಕಮನ್ತಂ ಪತ್ತೋ ನಿಕ್ಖಿಪಿತಬ್ಬೋ, ಏಕಮನ್ತಂ ಚೀವರಂ ನಿಕ್ಖಿಪಿತಬ್ಬಂ, ಪತಿರೂಪಂ ಆಸನಂ ಗಹೇತ್ವಾ ನಿಸೀದಿತಬ್ಬಂ, ಪಾನೀಯಂ ಪುಚ್ಛಿತಬ್ಬಂ, ಪರಿಭೋಜನೀಯಂ ಪುಚ್ಛಿತಬ್ಬಂ ‘‘ಕತಮಂ ಪಾನೀಯಂ, ಕತಮಂ ಪರಿಭೋಜನೀಯ’’ನ್ತಿ। ಸಚೇ ಪಾನೀಯೇನ ಅತ್ಥೋ ಹೋತಿ, ಪಾನೀಯಂ ಗಹೇತ್ವಾ ಪಾತಬ್ಬಂ। ಸಚೇ ಪರಿಭೋಜನೀಯೇನ ಅತ್ಥೋ ಹೋತಿ, ಪರಿಭೋಜನೀಯಂ ಗಹೇತ್ವಾ ಪಾದಾ ಧೋವಿತಬ್ಬಾ। ಪಾದೇ ಧೋವನ್ತೇನ ಏಕೇನ ಹತ್ಥೇನ ಉದಕಂ ಆಸಿಞ್ಚಿತಬ್ಬಂ, ಏಕೇನ ಹತ್ಥೇನ ಪಾದಾ ಧೋವಿತಬ್ಬಾ, ನ ತೇನೇವ ಹತ್ಥೇನ ಉದಕಂ ಆಸಿಞ್ಚಿತಬ್ಬಂ, ನ ತೇನೇವ ಹತ್ಥೇನ ಪಾದಾ ಧೋವಿತಬ್ಬಾ, ಉಪಾಹನಪುಞ್ಛನಚೋಳಕಂ ಪುಞ್ಛಿತ್ವಾ ಉಪಾಹನಾ ಪುಞ್ಛಿತಬ್ಬಾ, ಉಪಾಹನಾ ಪುಞ್ಛನ್ತೇನ ಪಠಮಂ ಸುಕ್ಖೇನ ಚೋಳಕೇನ ಪುಞ್ಛಿತಬ್ಬಾ, ಪಚ್ಛಾ ಅಲ್ಲೇನ, ಉಪಾಹನಪುಞ್ಛನಚೋಳಕಂ ಧೋವಿತ್ವಾ ಏಕಮನ್ತಂ ಪತ್ಥರಿತಬ್ಬಂ।

ಸಚೇ ಆವಾಸಿಕೋ ಭಿಕ್ಖು ವುಡ್ಢೋ ಹೋತಿ, ಅಭಿವಾದೇತಬ್ಬೋ। ಸಚೇ ನವಕೋ ಹೋತಿ, ಅಭಿವಾದಾಪೇತಬ್ಬೋ। ಸೇನಾಸನಂ ಪುಚ್ಛಿತಬ್ಬಂ ‘‘ಕತಮಂ ಮೇ ಸೇನಾಸನಂ ಪಾಪುಣಾತೀ’’ತಿ, ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಪುಚ್ಛಿತಬ್ಬಂ, ‘‘ಗೋಚರಗಾಮೋ ಆಸನ್ನೇ, ಉದಾಹು ದೂರೇ, ಕಾಲಸ್ಸೇವ ಪಿಣ್ಡಾಯ ಚರಿತಬ್ಬಂ, ಉದಾಹು ದಿವಾ’’ತಿ ಏವಂ ಭಿಕ್ಖಾಚಾರೋ ಪುಚ್ಛಿತಬ್ಬೋ, ಅಗೋಚರೋ ಪುಚ್ಛಿತಬ್ಬೋ, ಗೋಚರೋ ಪುಚ್ಛಿತಬ್ಬೋ। ಅಗೋಚರೋ ನಾಮ ಮಿಚ್ಛಾದಿಟ್ಠಿಕಾನಂ ಗಾಮೋ ಪರಿಚ್ಛಿನ್ನಭಿಕ್ಖೋ ವಾ ಗಾಮೋ, ಯತ್ಥ ಏಕಸ್ಸ ವಾ ದ್ವಿನ್ನಂ ವಾ ಭಿಕ್ಖಾ ದೀಯತಿ, ಸೇಕ್ಖಸಮ್ಮಹಾನಿ ಕುಲಾನಿ ಪುಚ್ಛಿತಬ್ಬಾನಿ, ವಚ್ಚಟ್ಠಾನಂ ಪುಚ್ಛಿತಬ್ಬಂ, ಪಸ್ಸಾವಟ್ಠಾನಂ ಪುಚ್ಛಿತಬ್ಬಂ, ‘‘ಕಿಂ ಇಮಿಸ್ಸಾ ಪೋಕ್ಖರಣಿಯಾ ಪಾನೀಯಂಯೇವ ಪಿವನ್ತಿ, ನಹಾನಾದಿಪರಿಭೋಗಮ್ಪಿ ಕರೋನ್ತೀ’’ತಿ ಏವಂ ಪಾನೀಯಞ್ಚೇವ ಪರಿಭೋಜನೀಯಞ್ಚ ಪುಚ್ಛಿತಬ್ಬಂ, ಕತ್ತರದಣ್ಡೋ ಪುಚ್ಛಿತಬ್ಬೋ, ಸಙ್ಘಸ್ಸ ಕತಿಕಸಣ್ಠಾನಂ ಪುಚ್ಛಿತಬ್ಬಂ, ಕೇಸುಚಿ ಠಾನೇಸು ವಾಳಮಿಗಾ ವಾ ಅಮನುಸ್ಸಾ ವಾ ಹೋನ್ತಿ, ತಸ್ಮಾ ‘‘ಕಂ ಕಾಲಂ ಪವಿಸಿತಬ್ಬಂ, ಕಂ ಕಾಲಂ ನಿಕ್ಖಮಿತಬ್ಬ’’ನ್ತಿ ಪುಚ್ಛಿತಬ್ಬಂ। ಸಚೇ ವಿಹಾರೋ ಅನಜ್ಝಾವುಟ್ಠೋ ಹೋತಿ, ಕವಾಟಂ ಆಕೋಟೇತ್ವಾ ಮುಹುತ್ತಂ ಆಗಮೇತ್ವಾ ಘಟಿಕಂ ಉಗ್ಘಾಟೇತ್ವಾ ಕವಾಟಂ ಪಣಾಮೇತ್ವಾ ಬಹಿ ಠಿತೇನ ನಿಲ್ಲೋಕೇತಬ್ಬೋ।

ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಮಞ್ಚೇ ವಾ ಮಞ್ಚೋ ಆರೋಪಿತೋ ಹೋತಿ, ಪೀಠೇ ವಾ ಪೀಠಂ ಆರೋಪಿತಂ ಹೋತಿ, ಸೇನಾಸನಂ ಉಪರಿ ಪುಞ್ಜೀಕತಂ ಹೋತಿ, ಸಚೇ ಸಕ್ಕೋತಿ, ಸಬ್ಬೋ ವಿಹಾರೋ ಸೋಧೇತಬ್ಬೋ, ಅಸಕ್ಕೋನ್ತೇನ ಅತ್ತನೋ ವಸನೋಕಾಸೋ ಜಗ್ಗಿತಬ್ಬೋ। ಸಬ್ಬಂ ಸೋಧೇತುಂ ಸಕ್ಕೋನ್ತೇನ ಪನ ಉಪಜ್ಝಾಯವತ್ತೇ ವುತ್ತನಯೇನ ಭೂಮತ್ಥರಣಮಞ್ಚಪೀಠಾದೀನಿ ಬಹಿ ನೀಹರಿತ್ವಾ ವಿಹಾರಂ ಸೋಧೇತ್ವಾ ಪುನ ಅತಿಹರಿತ್ವಾ ಯಥಾಠಾನೇ ಪಞ್ಞಪೇತಬ್ಬಾನಿ।

ಸಚೇ ಪುರತ್ಥಿಮಾ ಸರಜಾ ವಾತಾ ವಾಯನ್ತಿ, ಪುರತ್ಥಿಮಾ ವಾತಪಾನಾ ಥಕೇತಬ್ಬಾ। ಸಚೇ ಪಚ್ಛಿಮಾ, ಉತ್ತರಾ, ದಕ್ಖಿಣಾ ಸರಜಾ ವಾತಾ ವಾಯನ್ತಿ, ದಕ್ಖಿಣಾ ವಾತಪಾನಾ ಥಕೇತಬ್ಬಾ। ಸಚೇ ಸೀತಕಾಲೋ ಹೋತಿ, ದಿವಾ ವಾತಪಾನಾ ವಿವರಿತಬ್ಬಾ, ರತ್ತಿಂ ಥಕೇತಬ್ಬಾ। ಸಚೇ ಉಣ್ಹಕಾಲೋ ಹೋತಿ, ದಿವಾ ಥಕೇತಬ್ಬಾ, ರತ್ತಿಂ ವಿವರಿತಬ್ಬಾ।

ಸಚೇ ಉಕ್ಲಾಪಂ ಹೋತಿ, ಪರಿವೇಣಂ ಸಮ್ಮಜ್ಜಿತಬ್ಬಂ, ಕೋಟ್ಠಕೋ ಸಮ್ಮಜ್ಜಿತಬ್ಬೋ, ಉಪಟ್ಠಾನಸಾಲಾ ಸಮ್ಮಜ್ಜಿತಬ್ಬಾ , ಅಗ್ಗಿಸಾಲಾ ಸಮ್ಮಜ್ಜಿತಬ್ಬಾ, ವಚ್ಚಕುಟಿ ಸಮ್ಮಜ್ಜಿತಬ್ಬಾ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಬ್ಬಂ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ। ಇದಂ ಆಗನ್ತುಕವತ್ತಂ।

೧೮೬. ಆವಾಸಿಕವತ್ತೇ ಆವಾಸಿಕೇನ ಭಿಕ್ಖುನಾ ಆಗನ್ತುಕಂ ಭಿಕ್ಖುಂ ವುಡ್ಢತರಂ ದಿಸ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಾನೀಯೇನ ಪುಚ್ಛಿತಬ್ಬೋ, ಪುಚ್ಛನ್ತೇನ ಪನ ಸಕಿಂ ಆನೀತಂ ಪಾನೀಯಂ ಸಬ್ಬಂ ಪಿವತಿ, ‘‘ಪುನ ಆನೇಮೀ’’ತಿ ಪುಚ್ಛಿತಬ್ಬೋಯೇವ। ಬೀಜನೇನಪಿ ಬೀಜಿತಬ್ಬೋ, ಬೀಜನ್ತೇನ ಸಕಿಂ ಪಾದಪಿಟ್ಠಿಯಂ ಬೀಜಿತ್ವಾ ಸಕಿಂ ಮಜ್ಝೇ, ಸಕಿಂ ಸೀಸೇ ಬೀಜಿತಬ್ಬೋ, ‘‘ಅಲಂ ಹೋತೂ’’ತಿ ವುತ್ತೇನ ಮನ್ದತರಂ ಬೀಜಿತಬ್ಬಂ, ಪುನ ‘‘ಅಲ’’ನ್ತಿ ವುತ್ತೇನ ತತೋ ಮನ್ದತರಂ ಬೀಜಿತಬ್ಬಂ, ತತಿಯವಾರಂ ವುತ್ತೇನ ಬೀಜನೀ ಠಪೇತಬ್ಬಾ, ಪಾದಾಪಿಸ್ಸ ಧೋವಿತಬ್ಬಾ। ಸಚೇ ಅತ್ತನೋ ತೇಲಂ ಅತ್ಥಿ, ತೇಲೇನ ಮಕ್ಖೇತಬ್ಬಾ। ನೋ ಚೇ ಅತ್ಥಿ, ತಸ್ಸ ಸನ್ತಕೇನ ಮಕ್ಖೇತಬ್ಬಾ। ಸಚೇ ಉಸ್ಸಹತಿ, ಉಪಾಹನಾ ಪುಞ್ಛಿತಬ್ಬಾ। ಉಪಾಹನಾ ಪುಞ್ಛನ್ತೇನ ಪಠಮಂ ಸುಕ್ಖೇನ ಚೋಳೇನ ಪುಞ್ಛಿತಬ್ಬಾ, ಪಚ್ಛಾ ಅಲ್ಲೇನ, ಉಪಾಹನಪುಞ್ಛನಚೋಳಕಂ ಧೋವಿತ್ವಾ ಏಕಮನ್ತಂ ವಿಸ್ಸಜ್ಜೇತಬ್ಬಂ।

ಆಗನ್ತುಕೋ ಭಿಕ್ಖು ಅಭಿವಾದೇತಬ್ಬೋ, ಸೇನಾಸನಂ ಪಞ್ಞಪೇತಬ್ಬಂ ‘‘ಏತಂ ಸೇನಾಸನಂ ಪಾಪುಣಾತೀ’’ತಿ। ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಆಚಿಕ್ಖಿತಬ್ಬಂ, ಗೋಚರೋ ಆಚಿಕ್ಖಿತಬ್ಬೋ, ಅಗೋಚರೋ ಆಚಿಕ್ಖಿತಬ್ಬೋ, ಸೇಕ್ಖಸಮ್ಮತಾನಿ ಕುಲಾನಿ ಆಚಿಕ್ಖಿತಬ್ಬಾನಿ, ವಚ್ಚಟ್ಠಾನಂ ಆಚಿಕ್ಖಿತಬ್ಬಂ, ಪಸ್ಸಾವಟ್ಠಾನಂ ಆಚಿಕ್ಖಿತಬ್ಬಂ, ಪಾನೀಯಂ ಆಚಿಕ್ಖಿತಬ್ಬಂ, ಪರಿಭೋಜನೀಯಂ ಆಚಿಕ್ಖಿತಬ್ಬಂ, ಕತ್ತರದಣ್ಡೋ ಆಚಿಕ್ಖಿತಬ್ಬೋ, ಸಙ್ಘಸ್ಸ ಕತಿಕಸಣ್ಠಾನಂ ಆಚಿಕ್ಖಿತಬ್ಬಂ ‘‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’’ನ್ತಿ।

ಸಚೇ ಆಗನ್ತುಕೋ ನವಕೋ ಹೋತಿ, ನಿಸಿನ್ನಕೇನೇವ ಆಚಿಕ್ಖಿತಬ್ಬಂ ‘‘ಅತ್ರ ಪತ್ತಂ ನಿಕ್ಖಿಪಾಹಿ, ಅತ್ರ ಚೀವರಂ ನಿಕ್ಖಿಪಾಹಿ, ಇದಂ ಆಸನಂ, ನಿಸೀದಾಹೀ’’ತಿ। ಪಾನೀಯಂ ಆಚಿಕ್ಖಿತಬ್ಬಂ, ಪರಿಭೋಜನೀಯಂ ಆಚಿಕ್ಖಿತಬ್ಬಂ, ಉಪಾಹನಪುಞ್ಛನಚೋಳಕಂ ಆಚಿಕ್ಖಿತಬ್ಬಂ, ಆಗನ್ತುಕೋ ಭಿಕ್ಖು ಅಭಿವಾದಾಪೇತಬ್ಬೋ, ಸೇನಾಸನಾದೀನಿಪಿ ನಿಸಿನ್ನೇನೇವ ಆಚಿಕ್ಖಿತಬ್ಬಾನಿ। ವುಡ್ಢತರೇ ಪನ ಆಗತೇ ಆಸನಂ ಪಞ್ಞಪೇತಬ್ಬನ್ತಿ ಏವಮಾದಿ ಸಬ್ಬಂ ಚೀವರಕಮ್ಮಂ ವಾ ನವಕಮ್ಮಂ ವಾ ಠಪೇತ್ವಾಪಿ ಕಾತಬ್ಬಂ। ಚೇತಿಯಙ್ಗಣಂ ಸಮ್ಮಜ್ಜನ್ತೇನ ಸಮ್ಮುಞ್ಜನಿಂ ನಿಕ್ಖಿಪಿತ್ವಾ ತಸ್ಸ ವತ್ತಂ ಕಾತುಂ ಆರಭಿತಬ್ಬಂ। ಪಣ್ಡಿತೋ ಹಿ ಆಗನ್ತುಕೋ ‘‘ಸಮ್ಮಜ್ಜಾಹಿ ತಾವ ಚೇತಿಯಙ್ಗಣ’’ನ್ತಿ ವಕ್ಖತಿ। ಗಿಲಾನಸ್ಸ ಭೇಸಜ್ಜಂ ಕರೋನ್ತೇನ ಪನ ಸಚೇ ನಾತಿಆತುರೋ ಗಿಲಾನೋ ಹೋತಿ, ಭೇಸಜ್ಜಂ ಅಕತ್ವಾ ವತ್ತಮೇವ ಕಾತಬ್ಬಂ, ಮಹಾಗಿಲಾನಸ್ಸ ಪನ ಭೇಸಜ್ಜಮೇವ ಕಾತಬ್ಬಂ। ಪಣ್ಡಿತೋ ಹಿ ಆಗನ್ತುಕೋ ‘‘ಕರೋಹಿ ತಾವ ಭೇಸಜ್ಜ’’ನ್ತಿ ವಕ್ಖತಿ। ಇದಂ ಆವಾಸಿಕವತ್ತಂ।

೧೮೭. ಗಮಿಕವತ್ತೇ ಗಮಿಕೇನ ಭಿಕ್ಖುನಾ ಮಞ್ಚಪೀಠಾದಿದಾರುಭಣ್ಡಂ ಮತ್ತಿಕಾಭಣ್ಡಮ್ಪಿ ರಜನಭಾಜನಾದಿ ಸಬ್ಬಂ ಅಗ್ಗಿಸಾಲಾಯಂ ವಾ ಅಞ್ಞಸ್ಮಿಂ ವಾ ಗುತ್ತಟ್ಠಾನೇ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ಸೇನಾಸನಂ ಆಪುಚ್ಛಿತ್ವಾ ಪಕ್ಕಮಿತಬ್ಬಂ। ಸಚೇ ಭಿಕ್ಖು ನ ಹೋತಿ, ಸಾಮಣೇರೋ ಆಪುಚ್ಛಿತಬ್ಬೋ। ಸಚೇ ಸಾಮಣೇರೋ ನ ಹೋತಿ, ಆರಾಮಿಕೋ ಆಪುಚ್ಛಿತಬ್ಬೋ। ಸಚೇ ನ ಹೋತಿ ಭಿಕ್ಖು ವಾ ಸಾಮಣೇರೋ ವಾ ಆರಾಮಿಕೋ ವಾ, ಚತೂಸು ಪಾಸಾಣೇಸು ಮಞ್ಚಂ ಪಞ್ಞಪೇತ್ವಾ ಮಞ್ಚೇ ಮಞ್ಚಂ ಆರೋಪೇತ್ವಾ ಪೀಠೇ ಪೀಠಂ ಆರೋಪೇತ್ವಾ ಸೇನಾಸನಂ ಉಪರಿ ಪುಞ್ಜಂ ಕರಿತ್ವಾ ದಾರುಭಣ್ಡಂ ಮತ್ತಿಕಾಭಣ್ಡಂ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ಪಕ್ಕಮಿತಬ್ಬಂ। ಸಚೇ ವಿಹಾರೋ ಓವಸ್ಸತಿ, ಸಚೇ ಉಸ್ಸಹತಿ, ಸಬ್ಬೋ ಛಾದೇತಬ್ಬೋ, ಉಸ್ಸುಕ್ಕಂ ವಾ ಕಾತಬ್ಬಂ ‘‘ಕಿನ್ತಿ ನು ಖೋ ವಿಹಾರೋ ಛಾದಿಯೇಥಾ’’ತಿ, ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ಯೋ ದೇಸೋ ಅನೋವಸ್ಸಕೋ ಹೋತಿ, ತತ್ಥ ಚತೂಸು ಪಾಸಾಣೇಸು ಮಞ್ಚಂ ಪಞ್ಞಪೇತ್ವಾ ಮಞ್ಚೇ ಮಞ್ಚಂ ಆರೋಪೇತ್ವಾ ಪೀಠೇ ಪೀಠಂ ಆರೋಪೇತ್ವಾ ಸೇನಾಸನಂ ಉಪರಿ ಪುಞ್ಜಂ ಕರಿತ್ವಾ ದಾರುಭಣ್ಡಂ ಮತ್ತಿಕಾಭಣ್ಡಂ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ಪಕ್ಕಮಿತಬ್ಬಂ। ಸಚೇ ವಿಹಾರೋ ಓವಸ್ಸತಿ, ಸಚೇ ಉಸ್ಸಹತಿ, ಸೇನಾಸನಂ ಗಾಮಂ ಅತಿಹರಿತಬ್ಬಂ, ಉಸ್ಸುಕ್ಕಂ ವಾ ಕಾತಬ್ಬಂ ‘‘ಕಿನ್ತಿ ನು ಖೋ ಸೇನಾಸನಂ ಗಾಮಂ ಅತಿಹರಿಯೇಥಾ’’ತಿ, ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ಅಜ್ಝೋಕಾಸೇ ಚತೂಸು ಪಾಸಾಣೇಸು ಮಞ್ಚಂ ಪಞ್ಞಪೇತ್ವಾ ಮಞ್ಚೇ ಮಞ್ಚಂ ಆರೋಪೇತ್ವಾ ಪೀಠೇ ಪೀಠಂ ಆರೋಪೇತ್ವಾ ಸೇನಾಸನಂ ಉಪರಿ ಪುಞ್ಜಂ ಕರಿತ್ವಾ ದಾರುಭಣ್ಡಂ ಮತ್ತಿಕಾಭಣ್ಡಂ ಪಟಿಸಾಮೇತ್ವಾ ತಿಣೇನ ವಾ ಪಣ್ಣೇನ ವಾ ಪಟಿಚ್ಛಾದೇತ್ವಾ ಪಕ್ಕಮಿತಬ್ಬಂ ‘‘ಅಪ್ಪೇವ ನಾಮ ಅಙ್ಗಾನಿಪಿ ಸೇಸೇಯ್ಯು’’ನ್ತಿ। ಇದಂ ಗಮಿಕವತ್ತಂ।

೧೮೮. ಭತ್ತಗ್ಗವತ್ತೇ ಸಚೇ ಆರಾಮೇ ಕಾಲೋ ಆರೋಚಿತೋ ಹೋತಿ, ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ।

ನ ಓಕ್ಕಮ್ಮ ಥೇರಾನಂ ಭಿಕ್ಖೂನಂ ಪುರತೋ ಗನ್ತಬ್ಬಂ। ಸುಪ್ಪಟಿಚ್ಛನ್ನೇನ, ಸುಸಂವುತೇನ, ಓಕ್ಖಿತ್ತಚಕ್ಖುನಾ, ಅಪ್ಪಸದ್ದೇನ ಅನ್ತರಘರೇ ಗನ್ತಬ್ಬಂ, ನ ಉಕ್ಖಿತ್ತಕಾಯ, ನ ಉಜ್ಜಗ್ಘಿಕಾಯ ಅನ್ತರಘರೇ ಗನ್ತಬ್ಬಂ, ನ ಕಾಯಪ್ಪಚಾಲಕಂ, ನ ಬಾಹುಪ್ಪಚಾಲಕಂ, ನ ಸೀಸಪ್ಪಚಾಲಕಂ ಅನ್ತರಘರೇ ಗನ್ತಬ್ಬಂ, ನ ಖಮ್ಭಕತೇನ, ನ ಓಗುಣ್ಠಿತೇನ, ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ।

ಸುಪ್ಪಟಿಚ್ಛನ್ನೇನ , ಸುಸಂವುತೇನ, ಓಕ್ಖಿತ್ತಚಕ್ಖುನಾ, ಅಪ್ಪಸದ್ದೇನ ಅನ್ತರಘರೇ ನಿಸೀದಿತಬ್ಬಂ, ನ ಉಕ್ಖಿತ್ತಕಾಯ, ನ ಉಜ್ಜಗ್ಘಿಕಾಯ ಅನ್ತರಘರೇ ನಿಸೀದಿತಬ್ಬಂ, ನ ಕಾಯಪ್ಪಚಾಲಕಂ, ನ ಬಾಹುಪ್ಪಚಾಲಕಂ, ನ ಸೀಸಪ್ಪಚಾಲಕಂ ಅನ್ತರಘರೇ ನಿಸೀದಿತಬ್ಬಂ, ನ ಖಮ್ಭಕತೇನ, ನ ಓಗುಣ್ಠಿತೇನ, ನ ಪಲ್ಲತ್ಥಿಕಾಯ ಅನ್ತರಘರೇ ನಿಸೀದಿತಬ್ಬಂ, ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ। ಸಚೇ ಮಹಾಥೇರಸ್ಸ ನಿಸಿನ್ನಾಸನೇನ ಸಮಕಂ ಆಸನಂ ಹೋತಿ, ಬಹೂಸು ಆಸನೇಸು ಸತಿ ಏಕಂ ದ್ವೇ ಆಸನಾನಿ ಠಪೇತ್ವಾ ನಿಸೀದಿತಬ್ಬಂ। ಭಿಕ್ಖೂ ಗಣೇತ್ವಾ ಪಞ್ಞತ್ತಾಸನೇಸು ಅನಿಸೀದಿತ್ವಾ ಮಹಾಥೇರೇನ ‘‘ನಿಸೀದಾ’’ತಿ ವುತ್ತೇನ ನಿಸೀದಿತಬ್ಬಂ। ನೋ ಚೇ ಮಹಾಥೇರೋ ವದತಿ, ‘‘ಇದಂ, ಭನ್ತೇ, ಆಸನಂ ಉಚ್ಚ’’ನ್ತಿ ವತ್ತಬ್ಬಂ। ‘‘ನಿಸೀದಾ’’ತಿ ವುತ್ತೇನ ನಿಸೀದಿತಬ್ಬಂ। ಸಚೇ ಪನ ಏವಂ ಆಪುಚ್ಛಿತೇಪಿ ನ ವದತಿ, ನಿಸೀದನ್ತಸ್ಸ ಅನಾಪತ್ತಿ, ಮಹಾಥೇರಸ್ಸೇವ ಆಪತ್ತಿ। ನವಕೋ ಹಿ ಏವರೂಪೇ ಆಸನೇ ಅನಾಪುಚ್ಛಾ ನಿಸೀದನ್ತೋ ಆಪಜ್ಜತಿ, ಥೇರೋ ಆಪುಚ್ಛಿತೇ ಅನನುಜಾನನ್ತೋ। ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ, ನ ಸಙ್ಘಾಟಿಕಂ ಓತ್ಥರಿತ್ವಾ ಅನ್ತರಘರೇ ನಿಸೀದಿತಬ್ಬಂ।

ಪತ್ತಧೋವನೋದಕೇ ದೀಯಮಾನೇ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಉದಕಂ ಪಟಿಗ್ಗಹೇತಬ್ಬಂ, ದಕ್ಖಿಣೋದಕಂ ಪನ ಪುರತೋ ಆಧಾರಕೇ ಪತ್ತಂ ಠಪೇತ್ವಾ ಗಹೇತಬ್ಬಂ, ನೀಚಂ ಕತ್ವಾ ಉದಕಸದ್ದಂ ಅಕರೋನ್ತೇನ ಅಪಟಿಘಂಸನ್ತೇನ ಪತ್ತೋ ಧೋವಿತಬ್ಬೋ। ಸಚೇ ಉದಕಪಟಿಗ್ಗಾಹಕೋ ಹೋತಿ, ನೀಚಂ ಕತ್ವಾ ಉದಕಪಟಿಗ್ಗಾಹಕೇ ಉದಕಂ ಆಸಿಞ್ಚಿತಬ್ಬಂ ‘‘ಮಾ ಉದಕಪಟಿಗ್ಗಾಹಕೋ ಉದಕೇನ ಓಸಿಞ್ಚಿ , ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀ’’ತಿ। ಸಚೇ ಉದಕಪಟಿಗ್ಗಾಹಕೋ ನ ಹೋತಿ, ನೀಚಂ ಕತ್ವಾ ಛಮಾಯ ಉದಕಂ ಆಸಿಞ್ಚಿತಬ್ಬಂ ‘‘ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀ’’ತಿ।

ಓದನೇ ದೀಯಮಾನೇ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಓದನೋ ಪಟಿಗ್ಗಹೇತಬ್ಬೋ। ಯಥಾ ಸೂಪಸ್ಸ ಓಕಾಸೋ ಹೋತಿ, ಏವಂ ಮತ್ತಾಯ ಓದನೋ ಗಣ್ಹಿತಬ್ಬೋ। ಸಚೇ ಹೋತಿ ಸಪ್ಪಿ ವಾ ತೇಲಂ ವಾ ಉತ್ತರಿಭಙ್ಗಂ ವಾ, ಥೇರೇನ ವತ್ತಬ್ಬೋ ‘‘ಸಬ್ಬೇಸಂ ಸಮಕಂ ಸಮ್ಪಾದೇಹೀ’’ತಿ। ಇದಞ್ಚ ನ ಕೇವಲಂ ಸಪ್ಪಿಆದೀಸು, ಓದನೇಪಿ ವತ್ತಬ್ಬಂ। ಸಪ್ಪಿಆದೀಸು ಪನ ಯಂ ಅಪ್ಪಂ ಹೋತಿ ಏಕಸ್ಸ ವಾ ದ್ವಿನ್ನಂ ವಾ ಅನುರೂಪಂ, ತಂ ಸಬ್ಬೇಸಂ ಸಮಕಂ ಸಮ್ಪಾದೇಹೀತಿ ವುತ್ತೇ ಮನುಸ್ಸಾನಂ ವಿಹೇಸಾ ಹೋತಿ, ತಸ್ಮಾ ತಾದಿಸಂ ಸಕಿಂ ವಾ ದ್ವಿಕ್ಖತ್ತುಂ ವಾ ಗಹೇತ್ವಾ ಸೇಸಂ ನ ಗಹೇತಬ್ಬಂ। ಸಕ್ಕಚ್ಚಂ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ, ಪತ್ತಸಞ್ಞಿನಾ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ, ಸಮಸೂಪಕೋ ಸಮತಿತ್ಥಿಕೋ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ, ನ ತಾವ ಥೇರೇನ ಭುಞ್ಜಿತಬ್ಬಂ, ಯಾವ ನ ಸಬ್ಬೇಸಂ ಓದನೋ ಸಮ್ಪತ್ತೋ ಹೋತಿ। ಇದಞ್ಚ ಯಂ ಪರಿಚ್ಛಿನ್ನಭಿಕ್ಖುಕಂ ಭತ್ತಗ್ಗಂ, ಯತ್ಥ ಮನುಸ್ಸಾ ಸಬ್ಬೇಸಂ ಪಾಪೇತ್ವಾ ವನ್ದಿತುಕಾಮಾ ಹೋನ್ತಿ, ತಂ ಸನ್ಧಾಯ ವುತ್ತಂ । ಯಂ ಪನ ಮಹಾಭತ್ತಗ್ಗಂ ಹೋತಿ, ಯತ್ಥ ಏಕಸ್ಮಿಂ ಪದೇಸೇ ಭುಞ್ಜನ್ತಿ, ಏಕಸ್ಮಿಂ ಪದೇಸೇ ಉದಕಂ ದೀಯತಿ, ತತ್ಥ ಯಥಾಸುಖಂ ಭುಞ್ಜಿತಬ್ಬಂ।

ಸಕ್ಕಚ್ಚಂ ಪಿಣ್ಡಪಾತೋ ಭುಞ್ಜಿತಬ್ಬೋ, ಪತ್ತಸಞ್ಞಿನಾ ಪಿಣ್ಡಪಾತೋ ಭುಞ್ಜಿತಬ್ಬೋ, ಸಪದಾನೋ ಪಿಣ್ಡಪಾತೋ ಭುಞ್ಜಿತಬ್ಬೋ, ಸಮಸೂಪಕೋ ಪಿಣ್ಡಪಾತೋ ಭುಞ್ಜಿತಬ್ಬೋ, ನ ಥೂಪಕತೋ ಓಮದ್ದಿತ್ವಾ ಪಿಣ್ಡಪಾತೋ ಭುಞ್ಜಿತಬ್ಬೋ, ನ ಸೂಪಂ ವಾ ಬ್ಯಞ್ಜನಂ ವಾ ಓದನೇನ ಪಟಿಚ್ಛಾದೇತಬ್ಬಂ ಭಿಯ್ಯೋಕಮ್ಯತಂ ಉಪಾದಾಯ, ನ ಸೂಪಂ ವಾ ಓದನಂ ವಾ ಅಗಿಲಾನೇನ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜಿತಬ್ಬಂ, ನ ಉಜ್ಝಾನಸಞ್ಞಿನಾ ಪರೇಸಂ ಪತ್ತೋ ಓಲೋಕೇತಬ್ಬೋ, ನಾತಿಮಹನ್ತೋ ಕಬಳೋ ಕಾತಬ್ಬೋ, ಪರಿಮಣ್ಡಲಂ ಆಲೋಪೋ ಕಾತಬ್ಬೋ, ನ ಅನಾಹಟೇ ಕಬಳೇ ಮುಖದ್ವಾರಂ ವಿವರಿತಬ್ಬಂ, ನ ಭುಞ್ಜಮಾನೇನ ಸಬ್ಬೋ ಹತ್ಥೋ ಮುಖೇ ಪಕ್ಖಿಪಿತಬ್ಬೋ, ನ ಸಕಬಳೇನ ಮುಖೇನ ಬ್ಯಾಹರಿತಬ್ಬಂ, ನ ಪಿಣ್ಡುಕ್ಖೇಪಕಂ ಭುಞ್ಜಿತಬ್ಬಂ, ನ ಕಬಳಾವಚ್ಛೇಕಂ, ನ ಅವಗಣ್ಡಕಾರಕಂ, ನ ಹತ್ಥನಿದ್ಧುನಕಂ, ನ ಸಿತ್ಥಾವಕಾರಕಂ, ನ ಜಿವ್ಹಾನಿಚ್ಛಾರಕಂ, ನ ಚಪುಚಪುಕಾರಕಂ, ನ ಸುರುಸುರುಕಾರಕಂ, ನ ಹತ್ಥನಿಲ್ಲೇಹಕಂ, ನ ಪತ್ತನಿಲ್ಲೇಹಕಂ, ನ ಓಟ್ಠನಿಲ್ಲೇಹಕಂ ಭುಞ್ಜಿತಬ್ಬಂ।

ನ ಸಾಮಿಸೇನ ಹತ್ಥೇನ ಪಾನೀಯಥಾಲಕೋ ಪಟಿಗ್ಗಹೇತಬ್ಬೋ, ನ ತಾವ ಥೇರೇನ ಹತ್ಥಧೋವನಉದಕಂ ಪಟಿಗ್ಗಹೇತಬ್ಬಂ, ಯಾವ ನ ಸಬ್ಬೇ ಭುತ್ತಾವಿನೋ ಹೋನ್ತಿ। ಸಚೇ ಮನುಸ್ಸಾ ‘‘ಧೋವಥ, ಭನ್ತೇ, ಪತ್ತಞ್ಚ ಹತ್ಥೇ ಚಾ’’ತಿ ವದನ್ತಿ, ಭಿಕ್ಖೂ ವಾ ‘‘ತುಮ್ಹೇ ಉದಕಂ ಗಣ್ಹಥಾ’’ತಿ ವದನ್ತಿ, ವಟ್ಟತಿ। ಉದಕೇ ದೀಯಮಾನೇ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಉದಕಂ ಪಟಿಗ್ಗಹೇತಬ್ಬಂ, ನೀಚಂ ಕತ್ವಾ ಉದಕಸದ್ದಂ ಅಕರೋನ್ತೇನ ಅಪಟಿಘಂಸನ್ತೇನ ಪತ್ತೋ ಧೋವಿತಬ್ಬೋ। ಸಚೇ ಉದಕಪಟಿಗ್ಗಾಹಕೋ ಹೋತಿ, ನೀಚಂ ಕತ್ವಾ ಉದಕಪಟಿಗ್ಗಾಹಕೇ ಉದಕಂ ಆಸಿಞ್ಚಿತಬ್ಬಂ ‘‘ಮಾ ಉದಕಪಟಿಗ್ಗಾಹಕೋ ಉದಕೇನ ಓಸಿಞ್ಚಿ, ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀ’’ತಿ। ಸಚೇ ಉದಕಪಟಿಗ್ಗಾಹಕೋ ನ ಹೋತಿ, ನೀಚಂ ಕತ್ವಾ ಛಮಾಯ ಉದಕಂ ಆಸಿಞ್ಚಿತಬ್ಬಂ ‘‘ಮಾ ಸಾಮನ್ತಾ ಭಿಕ್ಖೂ ಉದಕೇನ ಓಸಿಞ್ಚಿಂಸು, ಮಾ ಸಙ್ಘಾಟಿ ಉದಕೇನ ಓಸಿಞ್ಚೀ’’ತಿ, ನ ಸಸಿತ್ಥಕಂ ಪತ್ತಧೋವನಂ ಅನ್ತರಘರೇ ಛಡ್ಡೇತಬ್ಬಂ।

ಭತ್ತಗ್ಗತೋ ಉಟ್ಠಾಯ ನಿವತ್ತನ್ತೇಸು ನವಕೇಹಿ ಭಿಕ್ಖೂಹಿ ಪಠಮತರಂ ನಿವತ್ತಿತಬ್ಬಂ, ಪಚ್ಛಾ ಥೇರೇಹಿ। ಸಮ್ಬಾಧೇಸು ಹಿ ಘರೇಸು ಮಹಾಥೇರಾನಂ ನಿಕ್ಖಮನೋಕಾಸೋ ನ ಹೋತಿ, ತಸ್ಮಾ ಏವಂ ವುತ್ತಂ। ಏವಂ ನಿವತ್ತನ್ತೇಹಿ ಪನ ನವಕೇಹಿ ಗೇಹದ್ವಾರೇ ಠತ್ವಾ ಥೇರೇಸು ನಿಕ್ಖಮನ್ತೇಸು ಪಟಿಪಾಟಿಯಾ ಗನ್ತಬ್ಬಂ। ಸಚೇ ಪನ ಮಹಾಥೇರಾ ಧುರೇ ನಿಸಿನ್ನಾ ಹೋನ್ತಿ, ನವಕಾ ಅನ್ತೋಗೇಹೇ, ಥೇರಾಸನತೋ ಪಟ್ಠಾಯ ಪಟಿಪಾಟಿಯಾ ಏವ ನಿಕ್ಖಮಿತಬ್ಬಂ , ಕಾಯೇನ ಕಾಯಂ ಅಸಙ್ಘಟ್ಟೇನ್ತೇನ ಯಥಾ ಅನ್ತರೇನ ಮನುಸ್ಸಾ ಗನ್ತುಂ ಸಕ್ಕೋನ್ತಿ, ಏವಂ ವಿರಳಾಯ ಪಾಳಿಯಾ ಗನ್ತಬ್ಬಂ।

‘‘ಅನುಜಾನಾಮಿ, ಭಿಕ್ಖವೇ, ಥೇರೇನ ಭಿಕ್ಖುನಾ ಭತ್ತಗ್ಗೇ ಅನುಮೋದಿತು’’ನ್ತಿ (ಚೂಳವ॰ ೩೬೨) ವಚನತೋ ಸಙ್ಘತ್ಥೇರೇನ ಭತ್ತಗ್ಗೇ ಅನುಮೋದಿತಬ್ಬಂ। ತಂ ಏಕಮೇವ ಓಹಾಯ ಸೇಸೇಹಿ ನ ಗನ್ತಬ್ಬಂ।

‘‘ಅನುಜಾನಾಮಿ, ಭಿಕ್ಖವೇ, ಭತ್ತಗ್ಗೇ ಚತೂಹಿ ಪಞ್ಚಹಿ ಥೇರಾನುಥೇರೇಹಿ ಭಿಕ್ಖೂಹಿ ಆಗಮೇತು’’ನ್ತಿ (ಚೂಳವ॰ ೩೬೨) ವಚನತೋ ಸಙ್ಘತ್ಥೇರೇನ ಅನುಮೋದನತ್ಥಾಯ ನಿಸಿನ್ನೇ ಹೇಟ್ಠಾ ಪಟಿಪಾಟಿಯಾ ಚತೂಹಿ ನಿಸೀದಿತಬ್ಬಂ, ಅನುಥೇರೇ ನಿಸಿನ್ನೇ ಮಹಾಥೇರೇನ ಚ ಹೇಟ್ಠಾ ಚ ತೀಹಿ ನಿಸೀದಿತಬ್ಬಂ, ಪಞ್ಚಮೇ ನಿಸಿನ್ನೇ ಉಪರಿ ಚತೂಹಿ ನಿಸೀದಿತಬ್ಬಂ, ಸಙ್ಘತ್ಥೇರೇನ ಹೇಟ್ಠಾ ದಹರಭಿಕ್ಖುಸ್ಮಿಂ ಅಜ್ಝಿಟ್ಠೇಪಿ ಸಙ್ಘತ್ಥೇರತೋ ಪಟ್ಠಾಯ ಚತೂಹಿ ನಿಸೀದಿತಬ್ಬಮೇವ। ಸಚೇ ಪನ ಅನುಮೋದಕೋ ಭಿಕ್ಖು ‘‘ಗಚ್ಛಥ, ಭನ್ತೇ, ಆಗಮೇತಬ್ಬಕಿಚ್ಚಂ ನತ್ಥೀ’’ತಿ ವದತಿ, ಗನ್ತುಂ ವಟ್ಟತಿ। ಮಹಾಥೇರೇನ ‘‘ಗಚ್ಛಾಮ, ಆವುಸೋ’’ತಿ ವುತ್ತೇ ‘‘ಗಚ್ಛಥಾ’’ತಿ ವದತಿ, ಏವಮ್ಪಿ ವಟ್ಟತಿ, ‘‘ಬಹಿಗಾಮೇ ಆಗಮಿಸ್ಸಾಮಾ’’ತಿ ಆಭೋಗಂ ಕತ್ವಾಪಿ ಬಹಿಗಾಮಂ ಗನ್ತ್ವಾ ಅತ್ತನೋ ನಿಸ್ಸಿತಕೇ ‘‘ತುಮ್ಹೇ ತಸ್ಸ ಆಗಮನಂ ಆಗಮೇಥಾ’’ತಿ ವತ್ವಾಪಿ ಗನ್ತುಂ ವಟ್ಟತಿಯೇವ। ಸಚೇ ಪನ ಮನುಸ್ಸಾ ಅತ್ತನೋ ರುಚಿತೇನ ಏಕೇನ ಅನುಮೋದನಂ ಕಾರೇನ್ತಿ, ನೇವ ತಸ್ಸ ಅನುಮೋದತೋ ಆಪತ್ತಿ, ನ ಮಹಾಥೇರಸ್ಸ ಭಾರೋ ಹೋತಿ। ಉಪನಿಸಿನ್ನಕಥಾಯಮೇವ ಹಿ ಮನುಸ್ಸೇಸು ಕಥಾಪೇನ್ತೇಸು ಥೇರೋ ಆಪುಚ್ಛಿತಬ್ಬೋ। ಮಹಾಥೇರೇನ ಚ ಅನುಮೋದನಾಯ ಅಜ್ಝಿಟ್ಠೋವ ಆಗಮೇತಬ್ಬೋತಿ ಇದಮೇತ್ಥ ಲಕ್ಖಣಂ। ‘‘ಅನುಜಾನಾಮಿ, ಭಿಕ್ಖವೇ, ಸತಿ ಕರಣೀಯೇ ಆನನ್ತರಿಕಂ ಭಿಕ್ಖುಂ ಆಪುಚ್ಛಿತ್ವಾ ಗನ್ತು’’ನ್ತಿ (ಚೂಳವ॰ ೩೬೨) ವಚನತೋ ಪನ ವಚ್ಚಾದಿಪೀಳಿತೇನ ಅನನ್ತರಂ ಭಿಕ್ಖುಂ ಆಪುಚ್ಛಿತ್ವಾ ಗನ್ತಬ್ಬನ್ತಿ। ಇದಂ ಭತ್ತಗ್ಗವತ್ತಂ।

೧೮೯. ಪಿಣ್ಡಚಾರಿಕವತ್ತೇ ಪನ ಪಿಣ್ಡಚಾರಿಕೇನ ಭಿಕ್ಖುನಾ ‘‘ಇದಾನಿ ಗಾಮಂ ಪವಿಸಿಸ್ಸಾಮೀ’’ತಿ ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ। ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬನ್ತಿಆದಿ ಸಬ್ಬಂ ಭತ್ತಗ್ಗವತ್ತೇ ವುತ್ತನಯೇನೇವ ಇಧಾಪಿ ವೇದಿತಬ್ಬಂ।

ನಿವೇಸನಂ ಪವಿಸನ್ತೇನ ಸಲ್ಲಕ್ಖೇತಬ್ಬಂ ‘‘ಇಮಿನಾ ಪವಿಸಿಸ್ಸಾಮಿ, ಇಮಿನಾ ನಿಕ್ಖಮಿಸ್ಸಾಮೀ’’ತಿ, ನಾತಿಸಹಸಾ ಪವಿಸಿತಬ್ಬಂ, ನಾತಿದೂರೇ ನಾಚ್ಚಾಸನ್ನೇ ಠಾತಬ್ಬಂ, ನಾತಿಚಿರಂ ಠಾತಬ್ಬಂ, ನಾತಿಲಹುಕಂ ನಿವತ್ತಿತಬ್ಬಂ, ಠಿತೇನ ಸಲ್ಲಕ್ಖೇತಬ್ಬಂ ‘‘ಭಿಕ್ಖಂ ದಾತುಕಾಮಾ ವಾ ಅದಾತುಕಾಮಾ ವಾ’’ತಿ । ಸಚೇ ಕಮ್ಮಂ ವಾ ನಿಕ್ಖಿಪತಿ, ಆಸನಾ ವಾ ವುಟ್ಠಾತಿ, ಕಟಚ್ಛುಂ ವಾ ಪರಾಮಸತಿ, ಭಾಜನಂ ವಾ ಪರಾಮಸತಿ, ಠಪೇತಿ ವಾ, ‘‘ದಾತುಕಾಮಸ್ಸಾ’’ತಿ ಠಾತಬ್ಬಂ। ಭಿಕ್ಖಾಯ ದೀಯಮಾನಾಯ ವಾಮೇನ ಹತ್ಥೇನ ಸಙ್ಘಾಟಿಂ ಉಚ್ಚಾರೇತ್ವಾ ದಕ್ಖಿಣೇನ ಹತ್ಥೇನ ಪತ್ತಂ ಪಣಾಮೇತ್ವಾ ಉಭೋಹಿ ಹತ್ಥೇಹಿ ಪತ್ತಂ ಪಟಿಗ್ಗಹೇತ್ವಾ ಭಿಕ್ಖಾ ಪಟಿಗ್ಗಹೇತಬ್ಬಾ, ಇತ್ಥೀ ವಾ ಹೋತು ಪುರಿಸೋ ವಾ, ಭಿಕ್ಖಾದಾನಸಮಯೇ ಮುಖಂ ನ ಓಲೋಕೇತಬ್ಬಂ, ಸಲ್ಲಕ್ಖೇತಬ್ಬಂ ‘‘ಸೂಪಂ ದಾತುಕಾಮಾ ವಾ ಅದಾತುಕಾಮಾ ವಾ’’ತಿ। ಸಚೇ ಕಟಚ್ಛುಂ ವಾ ಪರಾಮಸತಿ, ಭಾಜನಂ ವಾ ಪರಾಮಸತಿ, ಠಪೇತಿ ವಾ, ‘‘ದಾತುಕಾಮಸ್ಸಾ’’ತಿ ಠಾತಬ್ಬಂ। ಭಿಕ್ಖಾಯ ದಿನ್ನಾಯ ಸಙ್ಘಾಟಿಯಾ ಪತ್ತಂ ಪಟಿಚ್ಛಾದೇತ್ವಾ ಸಾಧುಕಂ ಅತರಮಾನೇನ ನಿವತ್ತಿತಬ್ಬಂ।

ಯೋ ಪಠಮಂ ಗಾಮತೋ ಪಿಣ್ಡಾಯ ಪಟಿಕ್ಕಮತಿ, ತೇನ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಅವಕ್ಕಾರಪಾತಿ ಧೋವಿತ್ವಾ ಉಪಟ್ಠಾಪೇತಬ್ಬಾ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಬ್ಬಂ। ಯೋ ಪಚ್ಛಾ ಗಾಮತೋ ಪಿಣ್ಡಾಯ ಪಟಿಕ್ಕಮತಿ, ಸಚೇ ಹೋತಿ ಭುತ್ತಾವಸೇಸೋ, ಸಚೇ ಆಕಙ್ಖತಿ, ಭುಞ್ಜಿತಬ್ಬಂ। ನೋ ಚೇ ಆಕಙ್ಖತಿ, ಅಪ್ಪಹರಿತೇ ವಾ ಛಡ್ಡೇತಬ್ಬಂ, ಅಪ್ಪಾಣಕೇ ವಾ ಉದಕೇ ಓಪಿಲಾಪೇತಬ್ಬಂ, ತೇನ ಆಸನಂ ಉದ್ಧರಿತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಪಟಿಸಾಮೇತಬ್ಬಂ, ಅವಕ್ಕಾರಪಾತಿ ಧೋವಿತ್ವಾ ಪಟಿಸಾಮೇತಬ್ಬಾ, ಪಾನೀಯಂ ಪರಿಭೋಜನೀಯಂ ಪಟಿಸಾಮೇತಬ್ಬಂ, ಭತ್ತಗ್ಗಂ ಸಮ್ಮಜ್ಜಿತಬ್ಬಂ। ಯೋ ಪಸ್ಸತಿ ಪಾನೀಯಘಟಂ ವಾ ಪರಿಭೋಜನೀಯಘಟಂ ವಾ ವಚ್ಚಘಟಂ ವಾ ರಿತ್ತಂ ತುಚ್ಛಂ, ತೇನ ಉಪಟ್ಠಾಪೇತಬ್ಬಂ। ಸಚಸ್ಸ ಹೋತಿ ಅವಿಸಯ್ಹಂ, ಹತ್ಥವಿಕಾರೇನ ದುತಿಯಂ ಆಮನ್ತೇತ್ವಾ ಹತ್ಥವಿಲಙ್ಘಕೇನ ಉಪಟ್ಠಾಪೇತಬ್ಬಂ, ನ ಚ ತಪ್ಪಚ್ಚಯಾ ವಾಚಾ ಭಿನ್ದಿತಬ್ಬಾತಿ। ಇದಂ ಪಿಣ್ಡಚಾರಿಕವತ್ತಂ।

೧೯೦. ಆರಞ್ಞಿಕವತ್ತೇ ಆರಞ್ಞಿಕೇನ ಭಿಕ್ಖುನಾ ಕಾಲಸ್ಸೇವ ಉಟ್ಠಾಯ ಪತ್ತಂ ಥವಿಕಾಯ ಪಕ್ಖಿಪಿತ್ವಾ ಅಂಸೇ ಲಗ್ಗೇತ್ವಾ ಚೀವರಂ ಖನ್ಧೇ ಕರಿತ್ವಾ ಉಪಾಹನಾ ಆರೋಹಿತ್ವಾ ದಾರುಭಣ್ಡಂ ಮತ್ತಿಕಾಭಣ್ಡಂ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ವಸನಟ್ಠಾನತೋ ನಿಕ್ಖಮಿತಬ್ಬಂ। ‘‘ಇದಾನಿ ಗಾಮಂ ಪವಿಸಿಸ್ಸಾಮಾ’’ತಿ ಉಪಾಹನಾ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಥವಿಕಾಯ ಪಕ್ಖಿಪಿತ್ವಾ ಅಂಸೇ ಲಗ್ಗೇತ್ವಾ ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ। ಸುಪ್ಪಟಿಚ್ಛನ್ನೇನ ಅನ್ತರಘರೇ ಗನ್ತಬ್ಬನ್ತಿಆದಿ ಸಬ್ಬಂ ಗಮನವಿಧಾನಂ ಇಧಾಪಿ ಭತ್ತಗ್ಗವತ್ತೇ ವುತ್ತನಯೇನೇವ ವೇದಿತಬ್ಬಂ।

ನಿವೇಸನಂ ಪವಿಸನ್ತೇನ ಸಲ್ಲಕ್ಖೇತಬ್ಬಂ ‘‘ಇಮಿನಾ ಪವಿಸಿಸ್ಸಾಮಿ, ಇಮಿನಾ ನಿಕ್ಖಮಿಸ್ಸಾಮೀ’’ತಿಆದಿ ಸಬ್ಬಂ ಭಿಕ್ಖಾಚಾರವಿಧಾನಂ ಪಿಣ್ಡಚಾರಿಕವತ್ತೇ ವುತ್ತನಯೇನೇವ ವೇದಿತಬ್ಬಂ। ಆರಞ್ಞಿಕೇನ ಭಿಕ್ಖುನಾ ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಬ್ಬಂ। ಸಚೇ ಭಾಜನಾನಿ ನಪ್ಪಹೋನ್ತಿ, ಪಾನೀಯಮೇವ ಪರಿಭೋಜನೀಯಮ್ಪಿ ಕತ್ವಾ ಉಪಟ್ಠಾಪೇತಬ್ಬಂ। ಭಾಜನಂ ಅಲಭನ್ತೇನ ವೇಳುನಾಳಿಕಾಯಪಿ ಉಪಟ್ಠಾಪೇತಬ್ಬಂ। ತಮ್ಪಿ ಅಲಭನ್ತಸ್ಸ ಯಥಾ ಸಮೀಪೇ ಉದಕಆವಾಟೋ ಹೋತಿ, ಏವಂ ಕಾತಬ್ಬಂ। ಅಗ್ಗಿ ಉಪಟ್ಠಾಪೇತಬ್ಬೋ, ಅರಣಿಸಹಿತಂ ಉಪಟ್ಠಾಪೇತಬ್ಬಂ, ಅರಣಿಸಹಿತೇ ಸತಿ ಅಗ್ಗಿಂ ಅಕಾತುಮ್ಪಿ ವಟ್ಟತಿ। ಯಥಾ ಚ ಆರಞ್ಞಿಕಸ್ಸ, ಏವಂ ಕನ್ತಾರಪ್ಪಟಿಪನ್ನಸ್ಸಪಿ ಅರಣಿಸಹಿತಂ ಇಚ್ಛಿತಬ್ಬಂ। ಗಣವಾಸಿನೋ ಪನ ತೇನ ವಿನಾಪಿ ವಟ್ಟತಿ। ಕತ್ತರದಣ್ಡೋ ಉಪಟ್ಠಾಪೇತಬ್ಬೋ, ನಕ್ಖತ್ತಪದಾನಿ ಉಗ್ಗಹೇತಬ್ಬಾನಿ ಸಕಲಾನಿ ವಾ ಏಕದೇಸಾನಿ ವಾ, ದಿಸಾಕುಸಲೇನ ಭವಿತಬ್ಬಂ। ಇದಂ ಆರಞ್ಞಿಕವತ್ತಂ।

೧೯೧. ಸೇನಾಸನವತ್ತೇ ಯಸ್ಮಿಂ ವಿಹಾರೇ ವಿಹರತಿ, ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಸಚೇ ಉಸ್ಸಹತಿ, ಸೋಧೇತಬ್ಬೋ। ವಿಹಾರಂ ಸೋಧೇನ್ತೇನ ಪಠಮಂ ಪತ್ತಚೀವರಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ನಿಸೀದನಪಚ್ಚತ್ಥರಣಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಭಿಸಿಬಿಮ್ಬೋಹನಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಮಞ್ಚೋ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬೋ, ಪೀಠಂ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಮಞ್ಚಪಟಿಪಾದಕಾ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಾ, ಖೇಳಮಲ್ಲಕೋ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬೋ, ಅಪಸ್ಸೇನಫಲಕಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಭೂಮತ್ಥರಣಂ ಯಥಾಪಞ್ಞತ್ತಂ ಸಲ್ಲಕ್ಖೇತ್ವಾ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ। ಸಚೇ ವಿಹಾರೇ ಸನ್ತಾನಕಂ ಹೋತಿ, ಉಲ್ಲೋಕಾ ಪಠಮಂ ಓಹಾರೇತಬ್ಬಂ, ಆಲೋಕಸನ್ಧಿಕಣ್ಣಭಾಗಾ ಪಮಜ್ಜಿತಬ್ಬಾ। ಸಚೇ ಗೇರುಕಪರಿಕಮ್ಮಕತಾ ಭಿತ್ತಿ ಕಣ್ಣಕಿತಾ ಹೋತಿ, ಚೋಳಕಂ ತೇಮೇತ್ವಾ ಪೀಳೇತ್ವಾ ಪಮಜ್ಜಿತಬ್ಬಾ। ಸಚೇ ಕಾಳವಣ್ಣಕತಾ ಭೂಮಿ ಕಣ್ಣಕಿತಾ ಹೋತಿ, ಚೋಳಕಂ ತೇಮೇತ್ವಾ ಪೀಳೇತ್ವಾ ಪಮಜ್ಜಿತಬ್ಬಾ। ಸಚೇ ಅಕತಾ ಹೋತಿ ಭೂಮಿ, ಉದಕೇನ ಪರಿಪ್ಫೋಸಿತ್ವಾ ಪರಿಪ್ಫೋಸಿತ್ವಾ ಸಮ್ಮಜ್ಜಿತಬ್ಬಾ ‘‘ಮಾ ವಿಹಾರೋ ರಜೇನ ಉಹಞ್ಞೀ’’ತಿ, ಸಙ್ಕಾರಂ ವಿಚಿನಿತ್ವಾ ಏಕಮನ್ತಂ ಛಡ್ಡೇತಬ್ಬಂ।

ನ ಭಿಕ್ಖುಸಾಮನ್ತಾ ಸೇನಾಸನಂ ಪಪ್ಫೋಟೇತಬ್ಬಂ, ನ ವಿಹಾರಸಾಮನ್ತಾ ಸೇನಾಸನಂ ಪಪ್ಫೋಟೇತಬ್ಬಂ, ನ ಪಾನೀಯಸಾಮನ್ತಾ ಸೇನಾಸನಂ ಪಪ್ಫೋಟೇತಬ್ಬಂ, ನ ಪರಿಭೋಜನೀಯಸಾಮನ್ತಾ ಸೇನಾಸನಂ ಪಪ್ಫೋಟೇತಬ್ಬಂ, ನ ಪಟಿವಾತೇ ಅಙ್ಗಣೇ ಸೇನಾಸನಂ ಪಪ್ಫೋಟೇತಬ್ಬಂ, ಅಧೋವಾತೇ ಸೇನಾಸನಂ ಪಪ್ಫೋಟೇತಬ್ಬಂ।

ಭೂಮತ್ಥರಣಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ, ಮಞ್ಚಪಟಿಪಾದಕಾ ಏಕಮನ್ತಂ ಓತಾಪೇತ್ವಾ ಪಮಜ್ಜಿತ್ವಾ ಅಭಿಹರಿತ್ವಾ ಯಥಾಠಾನೇ ಠಪೇತಬ್ಬಾ, ಮಞ್ಚೋ ಏಕಮನ್ತಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬೋ, ಪೀಠಂ ಏಕಮನ್ತಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ನೀಚಂ ಕತ್ವಾ ಸಾಧುಕಂ ಅಪಟಿಘಂಸನ್ತೇನ ಅಸಙ್ಘಟ್ಟೇನ್ತೇನ ಕವಾಟಪೀಠಂ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ , ಭಿಸಿಬಿಮ್ಬೋಹನಂ ಏಕಮನ್ತಂ ಓತಾಪೇತ್ವಾ ಸೋಧೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ, ನಿಸೀದನಪಚ್ಚತ್ಥರಣಂ ಓತಾಪೇತ್ವಾ ಪಪ್ಫೋಟೇತ್ವಾ ಅತಿಹರಿತ್ವಾ ಯಥಾಪಞ್ಞತ್ತಂ ಪಞ್ಞಪೇತಬ್ಬಂ, ಖೇಳಮಲ್ಲಕೋ ಏಕಮನ್ತಂ ಓತಾಪೇತ್ವಾ ಪಮಜ್ಜಿತ್ವಾ ಅತಿಹರಿತ್ವಾ ಯಥಾಠಾನೇ ಠಪೇತಬ್ಬೋ, ಅಪಸ್ಸೇನಫಲಕಂ ಏಕಮನ್ತಂ ಓತಾಪೇತ್ವಾ ಪಮಜ್ಜಿತ್ವಾ ಯಥಾಠಾನೇ ಠಪೇತಬ್ಬಂ। ಪತ್ತಚೀವರಂ ನಿಕ್ಖಿಪಿತಬ್ಬಂ, ಪತ್ತಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಪತ್ತಂ ಗಹೇತ್ವಾ ಏಕೇನ ಹತ್ಥೇನ ಹೇಟ್ಠಾಮಞ್ಚಂ ವಾ ಹೇಟ್ಠಾಪೀಠಂ ವಾ ಪರಾಮಸಿತ್ವಾ ಪತ್ತೋ ನಿಕ್ಖಿಪಿತಬ್ಬೋ, ನ ಚ ಅನನ್ತರಹಿತಾಯ ಭೂಮಿಯಾ ಪತ್ತೋ ನಿಕ್ಖಿಪಿತಬ್ಬೋ। ಚೀವರಂ ನಿಕ್ಖಿಪನ್ತೇನ ಏಕೇನ ಹತ್ಥೇನ ಚೀವರಂ ಗಹೇತ್ವಾ ಏಕೇನ ಹತ್ಥೇನ ಚೀವರವಂಸಂ ವಾ ಚೀವರರಜ್ಜುಂ ವಾ ಪಮಜ್ಜಿತ್ವಾ ಪಾರತೋ ಅನ್ತಂ, ಓರತೋ ಭೋಗಂ ಕತ್ವಾ ಚೀವರಂ ನಿಕ್ಖಿಪಿತಬ್ಬಂ।

ಸಚೇ ಪುರತ್ಥಿಮಾ ಸರಜಾ ವಾತಾ ವಾಯನ್ತಿ, ಪುರತ್ಥಿಮಾ ವಾತಪಾನಾ ಥಕೇತಬ್ಬಾ। ಸಚೇ ಪಚ್ಛಿಮಾ, ಉತ್ತರಾ, ದಕ್ಖಿಣಾ ಸರಜಾ ವಾತಾ ವಾಯನ್ತಿ, ದಕ್ಖಿಣಾ ವಾತಪಾನಾ ಥಕೇತಬ್ಬಾ। ಸಚೇ ಸೀತಕಾಲೋ ಹೋತಿ, ದಿವಾ ವಾತಪಾನಾ ವಿವರಿತಬ್ಬಾ, ರತ್ತಿಂ ಥಕೇತಬ್ಬಾ। ಸಚೇ ಉಣ್ಹಕಾಲೋ ಹೋತಿ, ದಿವಾ ವಾತಪಾನಾ ಥಕೇತಬ್ಬಾ, ರತ್ತಿಂ ವಿವರಿತಬ್ಬಾ।

ಸಚೇ ಉಕ್ಲಾಪಂ ಹೋತಿ, ಪರಿವೇಣಂ ಸಮ್ಮಜ್ಜಿತಬ್ಬಂ, ಕೋಟ್ಠಕೋ ಸಮ್ಮಜ್ಜಿತಬ್ಬೋ, ಉಪಟ್ಠಾನಸಾಲಾ ಸಮ್ಮಜ್ಜಿತಬ್ಬಾ, ಅಗ್ಗಿಸಾಲಾ ಸಮ್ಮಜ್ಜಿತಬ್ಬಾ, ವಚ್ಚಕುಟಿ ಸಮ್ಮಜ್ಜಿತಬ್ಬಾ। ಸಚೇ ಪಾನೀಯಂ ನ ಹೋತಿ, ಪಾನೀಯಂ ಉಪಟ್ಠಾಪೇತಬ್ಬಂ। ಸಚೇ ಪರಿಭೋಜನೀಯಂ ನ ಹೋತಿ, ಪರಿಭೋಜನೀಯಂ ಉಪಟ್ಠಾಪೇತಬ್ಬಂ। ಸಚೇ ಆಚಮನಕುಮ್ಭಿಯಾ ಉದಕಂ ನ ಹೋತಿ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ।

ಸಚೇ ವುಡ್ಢೇನ ಸದ್ಧಿಂ ಏಕವಿಹಾರೇ ವಿಹರತಿ, ನ ವುಡ್ಢಂ ಅನಾಪುಚ್ಛಾ ಉದ್ದೇಸೋ ದಾತಬ್ಬೋ, ನ ಪರಿಪುಚ್ಛಾ ದಾತಬ್ಬಾ, ನ ಸಜ್ಝಾಯೋ ಕಾತಬ್ಬೋ, ನ ಧಮ್ಮೋ ಭಾಸಿತಬ್ಬೋ, ನ ಪದೀಪೋ ಕಾತಬ್ಬೋ, ನ ಪದೀಪೋ ವಿಜ್ಝಾಪೇತಬ್ಬೋ, ನ ವಾತಪಾನಾ ವಿವರಿತಬ್ಬಾ, ನ ವಾತಪಾನಾ ಥಕೇತಬ್ಬಾ। ದ್ವಾರಂ ನಾಮ ಯಸ್ಮಾ ಮಹಾವಳಞ್ಜಂ, ತಸ್ಮಾ ತತ್ಥ ಆಪುಚ್ಛನಕಿಚ್ಚಂ ನತ್ಥಿ, ಸೇಸಾನಿ ಪನ ಉದ್ದೇಸದಾನಾದೀನಿ ಆಪುಚ್ಛಿತ್ವಾವ ಕಾತಬ್ಬಾನಿ, ದೇವಸಿಕಮ್ಪಿ ಆಪುಚ್ಛಿತುಂ ವಟ್ಟತಿ। ಅಥಾಪಿ ‘‘ಭನ್ತೇ, ಆಪುಚ್ಛಿತಮೇವ ಹೋತೂ’’ತಿ ವುತ್ತೇ ವುಡ್ಢತರೋ ‘‘ಸಾಧೂ’’ತಿ ಸಮ್ಪಟಿಚ್ಛತಿ, ಸಯಮೇವ ವಾ ‘‘ತ್ವಂ ಯಥಾಸುಖಂ ವಿಹರಾಹೀ’’ತಿ ವದತಿ, ಏವಮ್ಪಿ ವಟ್ಟತಿ। ಸಭಾಗಸ್ಸ ವಿಸ್ಸಾಸೇನಪಿ ವಟ್ಟತಿಯೇವ। ಸಚೇ ವುಡ್ಢೇನ ಸದ್ಧಿಂ ಏಕಚಙ್ಕಮೇ ಚಙ್ಕಮತಿ, ಯೇನ ವುಡ್ಢೋ, ತೇನ ಪರಿವತ್ತೇತಬ್ಬಂ, ನ ಚ ವುಡ್ಢೋ ಸಙ್ಘಾಟಿಕಣ್ಣೇನ ಘಟ್ಟೇತಬ್ಬೋ। ಇದಂ ಸೇನಾಸನವತ್ತಂ।

೧೯೨. ಜನ್ತಾಘರವತ್ತೇ ಯೋ ಪಠಮಂ ಜನ್ತಾಘರಂ ಗಚ್ಛತಿ, ಸಚೇ ಛಾರಿಕಾ ಉಸ್ಸನ್ನಾ ಹೋತಿ, ಛಾರಿಕಾ ಛಡ್ಡೇತಬ್ಬಾ। ಸಚೇ ಉಕ್ಲಾಪಂ ಹೋತಿ, ಜನ್ತಾಘರಂ ಸಮ್ಮಜ್ಜಿತಬ್ಬಂ, ಪರಿಭಣ್ಡಂ ಸಮ್ಮಜ್ಜಿತಬ್ಬಂ, ಪರಿವೇಣಂ ಸಮ್ಮಜ್ಜಿತಬ್ಬಂ, ಕೋಟ್ಠಕೋ ಸಮ್ಮಜ್ಜಿತಬ್ಬೋ, ಜನ್ತಾಘರಸಾಲಾ ಸಮ್ಮಜ್ಜಿತಬ್ಬಾ, ಚುಣ್ಣಂ ಸನ್ನೇತಬ್ಬಂ, ಮತ್ತಿಕಾ ತೇಮೇತಬ್ಬಾ, ಉದಕದೋಣಿಯಾ ಉದಕಂ ಆಸಿಞ್ಚಿತಬ್ಬಂ। ಜನ್ತಾಘರಂ ಪವಿಸನ್ತೇನ ಮತ್ತಿಕಾಯ ಮುಖಂ ಮಕ್ಖೇತ್ವಾ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಂ ಪವಿಸಿತಬ್ಬಂ, ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ, ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ। ಸಚೇ ಉಸ್ಸಹತಿ, ಜನ್ತಾಘರೇ ಥೇರಾನಂ ಭಿಕ್ಖೂನಂ ಪರಿಕಮ್ಮಂ ಕಾತಬ್ಬಂ। ಜನ್ತಾಘರಾ ನಿಕ್ಖಮನ್ತೇನ ಜನ್ತಾಘರಪೀಠಂ ಆದಾಯ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಾ ನಿಕ್ಖಮಿತಬ್ಬಂ। ಸಚೇ ಉಸ್ಸಹತಿ, ಉದಕೇಪಿ ಥೇರಾನಂ ಭಿಕ್ಖೂನಂ ಪರಿಕಮ್ಮಂ ಕಾತಬ್ಬಂ, ನ ಥೇರಾನಂ ಭಿಕ್ಖೂನಂ ಪುರತೋ ನಹಾಯಿತಬ್ಬಂ, ನ ಉಪರಿತೋ ನಹಾಯಿತಬ್ಬಂ, ನಹಾತೇನ ಉತ್ತರನ್ತೇನ ಓತರನ್ತಾನಂ ಮಗ್ಗೋ ದಾತಬ್ಬೋ। ಯೋ ಪಚ್ಛಾ ಜನ್ತಾಘರಾ ನಿಕ್ಖಮತಿ, ಸಚೇ ಜನ್ತಾಘರಂ ಚಿಕ್ಖಲ್ಲಂ ಹೋತಿ, ಧೋವಿತಬ್ಬಂ, ಮತ್ತಿಕಾದೋಣಿಂ ಧೋವಿತ್ವಾ ಜನ್ತಾಘರಪೀಠಂ ಪಟಿಸಾಮೇತ್ವಾ ಅಗ್ಗಿಂ ವಿಜ್ಝಾಪೇತ್ವಾ ದ್ವಾರಂ ಥಕೇತ್ವಾ ಪಕ್ಕಮಿತಬ್ಬಂ। ಇದಂ ಜನ್ತಾಘರವತ್ತಂ।

೧೯೩. ವಚ್ಚಕುಟಿವತ್ತೇ ಯೋ ವಚ್ಚಕುಟಿಂ ಗಚ್ಛತಿ, ಬಹಿ ಠಿತೇನ ಉಕ್ಕಾಸಿತಬ್ಬಂ, ಅನ್ತೋ ನಿಸಿನ್ನೇನಪಿ ಉಕ್ಕಾಸಿತಬ್ಬಂ, ಚೀವರವಂಸೇ ವಾ ಚೀವರರಜ್ಜುಯಾ ವಾ ಚೀವರಂ ನಿಕ್ಖಿಪಿತ್ವಾ ಸಾಧುಕಂ ಅತರಮಾನೇನ ವಚ್ಚಕುಟಿ ಪವಿಸಿತಬ್ಬಾ, ನಾತಿಸಹಸಾ ಪವಿಸಿತಬ್ಬಾ, ನ ಉಬ್ಭಜಿತ್ವಾ ಪವಿಸಿತಬ್ಬಾ, ವಚ್ಚಪಾದುಕಾಯ ಠಿತೇನ ಉಬ್ಭಜಿತಬ್ಬಂ, ನ ನಿತ್ಥುನನ್ತೇನ ವಚ್ಚೋ ಕಾತಬ್ಬೋ, ನ ದನ್ತಕಟ್ಠಂ ಖಾದನ್ತೇನ ವಚ್ಚೋ ಕಾತಬ್ಬೋ, ನ ಬಹಿದ್ಧಾ ವಚ್ಚದೋಣಿಕಾಯ ವಚ್ಚೋ ಕಾತಬ್ಬೋ, ನ ಬಹಿದ್ಧಾ ಪಸ್ಸಾವದೋಣಿಕಾಯ ಪಸ್ಸಾವೋ ಕಾತಬ್ಬೋ, ನ ಪಸ್ಸಾವದೋಣಿಕಾಯ ಖೇಳೋ ಕಾತಬ್ಬೋ, ಫಾಲಿತೇನ ವಾ ಖರೇನ ವಾ ಗಣ್ಠಿಕೇನ ವಾ ಕಣ್ಟಕೇನ ವಾ ಸುಸಿರೇನ ವಾ ಪೂತಿನಾ ವಾ ಕಟ್ಠೇನ ನ ಅವಲೇಖಿತಬ್ಬಂ, ಅವಲೇಖನಕಟ್ಠಂ ಪನ ಅಗ್ಗಹೇತ್ವಾ ಪವಿಟ್ಠಸ್ಸ ಆಪತ್ತಿ ನತ್ಥಿ, ನ ಅವಲೇಖನಕಟ್ಠಂ ವಚ್ಚಕೂಪಮ್ಹಿ ಪಾತೇತಬ್ಬಂ, ವಚ್ಚಪಾದುಕಾಯ ಠಿತೇನ ಪಟಿಚ್ಛಾದೇತಬ್ಬಂ, ನಾತಿಸಹಸಾ ನಿಕ್ಖಮಿತಬ್ಬಂ, ನ ಉಬ್ಭಜಿತ್ವಾ ನಿಕ್ಖಮಿತಬ್ಬಂ, ಆಚಮನಪಾದುಕಾಯ ಠಿತೇನ ಉಬ್ಭಜಿತಬ್ಬಂ, ನ ಚಪುಚಪುಕಾರಕಂ ಆಚಮೇತಬ್ಬಂ, ನ ಆಚಮನಸರಾವಕೇ ಉದಕಂ ಸೇಸೇತಬ್ಬಂ। ಇದಞ್ಚ ಸಬ್ಬಸಾಧಾರಣಟ್ಠಾನಂ ಸನ್ಧಾಯ ವುತ್ತಂ। ತತ್ರ ಹಿ ಅಞ್ಞೇ ಅಞ್ಞೇ ಆಗಚ್ಛನ್ತಿ, ತಸ್ಮಾ ಉದಕಂ ನ ಸೇಸೇತಬ್ಬಂ। ಯಂ ಪನ ಸಙ್ಘಿಕೇಪಿ ವಿಹಾರೇ ಏಕದೇಸೇ ನಿಬದ್ಧಗಮನತ್ಥಾಯ ಕತಂ ಠಾನಂ ಹೋತಿ ಪುಗ್ಗಲಿಕಟ್ಠಾನಂ ವಾ, ತಸ್ಮಿಂ ವಟ್ಟತಿ। ವಿರೇಚನಂ ಪಿವಿತ್ವಾ ಪುನಪ್ಪುನಂ ಪವಿಸನ್ತಸ್ಸಪಿ ವಟ್ಟತಿಯೇವ। ಆಚಮನಪಾದುಕಾಯ ಠಿತೇನ ಪಟಿಚ್ಛಾದೇತಬ್ಬಂ।

ಸಚೇ ವಚ್ಚಕುಟಿ ಉಹತಾ ಹೋತಿ ಬಹಿ ವಚ್ಚಮಕ್ಖಿತಾ, ಉದಕಂ ಆಹರಿತ್ವಾ ಧೋವಿತಬ್ಬಾ। ಉದಕಂ ಅತ್ಥಿ, ಭಾಜನಂ ನತ್ಥಿ, ಅಸನ್ತಂ ನಾಮ ಹೋತಿ। ಭಾಜನಂ ಅತ್ಥಿ, ಉದಕಂ ನತ್ಥಿ, ಏತಮ್ಪಿ ಅಸನ್ತಂ । ಉಭಯಸ್ಮಿಂ ಅಸತಿ ಅಸನ್ತಮೇವ, ಕಟ್ಠೇನ ವಾ ಕೇನಚಿ ವಾ ಪುಞ್ಛಿತ್ವಾ ಗನ್ತಬ್ಬಂ। ಸಚೇ ಅವಲೇಖನಪಿಟಕೋ ಪೂರಿತೋ ಹೋತಿ, ಅವಲೇಖನಕಟ್ಠಂ ಛಡ್ಡೇತಬ್ಬಂ। ಸಚೇ ಕಚವರಂ ಅತ್ಥಿ, ವಚ್ಚಕುಟಿ ಸಮ್ಮಜ್ಜಿತಬ್ಬಾ, ಪರಿಭಣ್ಡಂ ಸಮ್ಮಜ್ಜಿತಬ್ಬಂ, ಪರಿವೇಣಂ ಸಮ್ಮಜ್ಜಿತಬ್ಬಂ, ಕೋಟ್ಠಕೋ ಸಮ್ಮಜ್ಜಿತಬ್ಬೋ। ಸಚೇ ಆಚಮನಕುಮ್ಭಿಯಾ ಉದಕಂ ನ ಹೋತಿ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ।

‘‘ನ, ಭಿಕ್ಖವೇ, ವಚ್ಚಂ ಕತ್ವಾ ಸತಿ ಉದಕೇ ನಾಚಮೇತಬ್ಬಂ, ಯೋ ನಾಚಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ (ಚೂಳವ॰ ೩೭೩) ವಚನತೋ ಉದಕೇ ಸತಿ ಉದಕಕಿಚ್ಚಂ ಅಕರೋನ್ತಸ್ಸ ಆಪತ್ತಿ। ಸಚೇ ಉದಕಂ ಅತ್ಥಿ, ಪಟಿಚ್ಛನ್ನಟ್ಠಾನಂ ಪನ ನತ್ಥಿ, ಭಾಜನೇನ ನೀಹರಿತ್ವಾ ಆಚಮಿತಬ್ಬಂ। ಭಾಜನೇ ಅಸತಿ ಪತ್ತೇನ ನೀಹರಿತಬ್ಬಂ, ಪತ್ತೇಪಿ ಅಸತಿ ಅಸನ್ತಂ ನಾಮ ಹೋತಿ। ‘‘ಇದಂ ಅತಿವಿವಟಂ, ಪುರತೋ ಅಞ್ಞಂ ಉದಕಂ ಭವಿಸ್ಸತೀ’’ತಿ ಗತಸ್ಸ ಉದಕಂ ಅಲಭನ್ತಸ್ಸೇವ ಭಿಕ್ಖಾಚಾರವೇಲಾ ಹೋತಿ, ಕಟ್ಠೇನ ವಾ ಕೇನಚಿ ವಾ ಪುಞ್ಛಿತ್ವಾ ಗನ್ತಬ್ಬಂ, ಭುಞ್ಜಿತುಮ್ಪಿ ಅನುಮೋದಿತುಮ್ಪಿ ವಟ್ಟತಿ। ‘‘ನ, ಭಿಕ್ಖವೇ, ವಚ್ಚಕುಟಿಯಾ ಯಥಾವುಡ್ಢಂ ವಚ್ಚೋ ಕಾತಬ್ಬೋ, ಯೋ ಕರೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಆಗತಪಟಿಪಾಟಿಯಾ ವಚ್ಚಂ ಕಾತು’’ನ್ತಿ (ಚುಳವ॰ ೩೭೩) ವಚನತೋ ವಚ್ಚಕುಟಿಂ ಪವಿಸನ್ತೇನ ಆಗತಪಟಿಪಾಟಿಯಾ ಪವಿಸಿತಬ್ಬಂ। ವಚ್ಚಕುಟಿಯಂ ಪಸ್ಸಾವಟ್ಠಾನೇ ನಹಾನತಿತ್ಥೇತಿ ತೀಸುಪಿ ಆಗತಪಟಿಪಾಟಿಯೇವ ಪಮಾಣಂ। ಇದಂ ವಚ್ಚಕುಟಿವತ್ತಂ।

ಇತಿ ಪಾಳಿಮುತ್ತಕವಿನಯವಿನಿಚ್ಛಯಸಙ್ಗಹೇ

ಉಪಜ್ಝಾಯಾದಿವತ್ತವಿನಿಚ್ಛಯಕಥಾ ಸಮತ್ತಾ।