೩. ನಿಸ್ಸಗ್ಗಿಯಕಣ್ಡಂ

೨. ದುತಿಯನಿಸ್ಸಗ್ಗಿಯಾದಿಪಾಚಿತ್ತಿಯಸಿಕ್ಖಾಪದವಣ್ಣನಾ

೭೩೩. ನಿಸ್ಸಗ್ಗಿಯೇಸುಪಿ ಪಠಮಂ ಉತ್ತಾನಮೇವ।

೭೪೦. ದುತಿಯೇ ಅಯ್ಯಾಯ ದಮ್ಮೀತಿ ಏವಂ ಪಟಿಲದ್ಧನ್ತಿ ನಿಸ್ಸಟ್ಠಪಟಿಲದ್ಧಂ, ನಿಸ್ಸಟ್ಠಂ ಪಟಿಲಭಿತ್ವಾಪಿ ಯಂ ಉದ್ದಿಸ್ಸ ದಾಯಕೇಹಿ ದಿನ್ನಂ, ತತ್ಥೇವ ದಾತಬ್ಬಂ। ತೇನಾಹ ‘‘ಯಥಾದಾನೇಯೇವ ಉಪನೇತಬ್ಬ’’ನ್ತಿ। ಅಕಾಲಚೀವರತಾ, ತಂ ಞತ್ವಾ ಕಾಲಚೀವರನ್ತಿ ಲೇಸೇನ ಭಾಜಾಪನಂ, ಪಟಿಲಾಭೋತಿ ತೀಣಿ ಅಙ್ಗಾನಿ।

೭೪೩. ತತಿಯೇ ಮೇತನ್ತಿ ಮಮೇವೇತಂ ಚೀವರಂ। ಉಪಸಮ್ಪನ್ನತಾ, ಪರಿವತ್ತಿತವಿಕಪ್ಪನುಪಗಚೀವರಸ್ಸ ಸಕಸಞ್ಞಾಯ ಅಚ್ಛಿನ್ದನಾದೀತಿ ದ್ವೇ ಅಙ್ಗಾನಿ।

೭೪೮-೭೫೨. ಚತುತ್ಥೇ ಆಹಟಸಪ್ಪಿಂ ದತ್ವಾತಿ ಅತ್ತನೋ ದತ್ವಾ। ಯಮಕಂ ಪಚಿತಬ್ಬನ್ತಿ ಸಪ್ಪಿಞ್ಚ ತೇಲಞ್ಚ ಏಕತೋ ಪಚಿತಬ್ಬಂ। ಲೇಸೇನ ಗಹೇತುಕಾಮತಾ, ಅಞ್ಞಸ್ಸ ವಿಞ್ಞತ್ತಿ, ಪಟಿಲಾಭೋತಿ ತೀಣಿ ಅಙ್ಗಾನಿ।

೭೫೩. ಪಞ್ಚಮೇ ಸಾತಿ ಥುಲ್ಲನನ್ದಾ। ಅಯನ್ತಿ ಸಿಕ್ಖಮಾನಾ। ಚೇತಾಪೇತ್ವಾತಿ ಜಾನಾಪೇತ್ವಾತಿ ಇಧ ವುತ್ತಂ, ಮಾತಿಕಾಟ್ಠಕಥಾಯಂ ಪನ ‘‘ಅತ್ತನೋ ಕಪ್ಪಿಯಭಣ್ಡೇನ ‘ಇದಂ ನಾಮ ಆಹರಾ’ತಿ ಅಞ್ಞಂ ಪರಿವತ್ತಾಪೇತ್ವಾ’’ತಿ (ಕಙ್ಖಾ॰ ಅಟ್ಠ॰ ಅಞ್ಞಚೇತಾಪನಸಿಕ್ಖಾಪದವಣ್ಣನಾ) ವುತ್ತಂ।

೭೫೮. ಛಟ್ಠೇ ಪಾವಾರಿಕಸ್ಸಾತಿ ದುಸ್ಸವಾಣಿಜಕಸ್ಸ।

೭೬೪. ಸತ್ತಮೇ ಸಞ್ಞಾಚಿತಕೇನಾತಿ ಸಯಂ ಯಾಚಿತಕೇನಪೀತಿ ಅತ್ಥೋ।

೭೬೯-೭೮೯. ಅಟ್ಠಮತೋ ಯಾವದ್ವಾದಸಮಾ ಉತ್ತಾನಮೇವ।

ನಿಸ್ಸಗ್ಗಿಯವಣ್ಣನಾನಯೋ ನಿಟ್ಠಿತೋ।