೬. ಭೇಸಜ್ಜಕ್ಖನ್ಧಕೋ
ಪಞ್ಚಭೇಸಜ್ಜಾದಿಕಥಾವಣ್ಣನಾ
೨೬೦. ಭೇಸಜ್ಜಕ್ಖನ್ಧಕೇ ಪಿತ್ತಂ ಕೋಟ್ಠಬ್ಭನ್ತರಗತಂ ಹೋತೀತಿ ಬಹಿಸರೀರೇ ಬ್ಯಾಪೇತ್ವಾ ಠಿತಂ ಅಬದ್ಧಪಿತ್ತಂ ಕೋಟ್ಠಬ್ಭನ್ತರಗತಂ ಹೋತಿ, ತೇನ ಪಿತ್ತಂ ಕುಪಿತಂ ಹೋತೀತಿ ಅಧಿಪ್ಪಾಯೋ।
೨೬೧-೨. ಪಾಳಿಯಂ ನಚ್ಛಾದೇನ್ತೀತಿ ರುಚಿಂ ನ ಉಪ್ಪಾದೇನ್ತಿ। ಸುಸುಕಾತಿ ಸಮುದ್ದೇ ಏಕಾ ಮಚ್ಛಜಾತಿ, ಕುಮ್ಭಿಲಾತಿಪಿ ವದನ್ತಿ। ಸಂಸಟ್ಠನ್ತಿ ಪರಿಸ್ಸಾವಿತಂ।
೨೬೩. ಪಿಟ್ಠೇಹೀತಿ ಪಿಸಿತೇಹಿ। ಕಸಾವೇಹೀತಿ ತಚಾದೀನಿ ಉದಕೇ ತಾಪೇತ್ವಾ ಗಹಿತಊಸರೇಹಿ। ಉಬ್ಭಿದನ್ತಿ ಊಸರಪಂಸುಮಯಂ। ಲೋಣಬಿಲನ್ತಿ ಲೋಣವಿಸೇಸೋ।
೨೬೪-೫. ಛಕಣನ್ತಿ ಗೋಮಯಂ। ಪಾಕತಿಕಚುಣ್ಣನ್ತಿ ಅಪಕ್ಕಕಸಾವಚುಣ್ಣಂ, ಗನ್ಧಚುಣ್ಣಂ ಪನ ನ ವಟ್ಟತಿ। ಪಾಳಿಯಂ ಚುಣ್ಣಚಾಲಿನಿನ್ತಿ ಉದುಕ್ಖಲೇ ಕೋಟ್ಟಿತಚುಣ್ಣಪರಿಸ್ಸಾವನಿಂ। ಸುವಣ್ಣಗೇರುಕೋತಿ ಸುವಣ್ಣತುತ್ಥಾದಿ। ಪಾಳಿಯಂ ಅಞ್ಜನೂಪಪಿಸನನ್ತಿ ಅಞ್ಜನೇ ಉಪನೇತುಂ ಪಿಸಿತಬ್ಬಭೇಸಜ್ಜಂ।
೨೬೭-೯. ಕಬಳಿಕಾತಿ ಉಪನಾಹಭೇಸಜ್ಜಂ। ಘರದಿನ್ನಕಾಬಾಧೋ ನಾಮ ಘರಣಿಯಾ ದಿನ್ನವಸೀಕರಣಭೇಸಜ್ಜಸಮುಟ್ಠಿತಆಬಾಧೋ। ತಾಯ ಛಾರಿಕಾಯ ಪಗ್ಘರಿತಂ ಖಾರೋದಕನ್ತಿ ಪರಿಸ್ಸಾವನೇ ತಚ್ಛಾರಿಕಂ ಪಕ್ಖಿಪಿತ್ವಾ ಉದಕೇ ಅಭಿಸಿಞ್ಚಿತೇ ತತೋ ಛಾರಿಕತೋ ಹೇಟ್ಠಾ ಪಗ್ಘರಿತಂ ಖಾರೋದಕಂ। ಪಾಳಿಯಂ ಅಕಟಯೂಸೇನಾತಿ ಅನಭಿಸಙ್ಖತೇನ ಮುಗ್ಗಯೂಸೇನ। ಕಟಾಕಟೇನಾತಿ ಮುಗ್ಗೇ ಪಚಿತ್ವಾ ಅಚಾಲೇತ್ವಾ ಪರಿಸ್ಸಾವಿತೇನ ಮುಗ್ಗಯೂಸೇನಾತಿ ವದನ್ತಿ।
ಪಞ್ಚಭೇಸಜ್ಜಾದಿಕಥಾವಣ್ಣನಾ ನಿಟ್ಠಿತಾ।
ಗುಳಾದಿಅನುಜಾನನಕಥಾವಣ್ಣನಾ
೨೭೨-೪. ಗುಳಕರಣನ್ತಿ ಅವಿಸ್ಸತ್ಥಾತಿ ಸಾಸಙ್ಕಾ।
೨೭೬. ಅಪ್ಪಮತ್ತಕೇಪಿ ವಾರೇನ್ತೀತಿ ಅಪ್ಪಮತ್ತಕೇ ದಿನ್ನೇ ದಾಯಕಾನಂ ಪೀಳಾತಿ ಪಟಿಕ್ಖಿಪನ್ತಿ। ಪಟಿಸಙ್ಖಾಪೀತಿ ಏತ್ತಕೇನಪಿ ಯಾಪೇತುಂ ಸಕ್ಕಾ, ‘‘ಅವಸೇಸಂ ಅಞ್ಞೇಸಂ ಹೋತೂ’’ತಿ ಸಲ್ಲಕ್ಖೇತ್ವಾಪಿ ಪಟಿಕ್ಖಿಪನ್ತಿ।
೨೭೯. ವತ್ಥಿಪೀಳನನ್ತಿ ಯಥಾ ವತ್ಥಿಗತತೇಲಾದಿ ಅನ್ತೋಸರೀರೇ ಆರೋಹನ್ತಿ, ಏವಂ ಹತ್ಥೇನ ವತ್ಥಿಮದ್ದನಂ। ಸಮ್ಬಾಧೇ ಸತ್ಥಕಮ್ಮವತ್ಥಿಕಮ್ಮಾನಮೇವ ಪಟಿಕ್ಖಿತ್ತತ್ತಾ ದಹನಕಮ್ಮಂ ವಟ್ಟತಿ ಏವ।
ಗುಳಾದಿಅನುಜಾನನಕಥಾವಣ್ಣನಾ ನಿಟ್ಠಿತಾ।
ಯಾಗುಮಧುಗೋಳಕಾದಿಕಥಾವಣ್ಣನಾ
೨೮೨-೩. ಪಾಳಿಯಂ ದಸಸ್ಸ ಠಾನಾನೀತಿ ಅಸ್ಸ ಪಟಿಗ್ಗಾಹಕಸ್ಸ ದಸ ಠಾನಾನಿ ಕಾರಣಾನಿ ಧಮ್ಮೇನಾತಿ ಅತ್ಥೋ। ಅನುಪ್ಪವೇಚ್ಛತೀತಿ ದೇತಿ। ವಾತಞ್ಚ ಬ್ಯಪನೇತೀತಿ ಸಮ್ಬನ್ಧೋ, ವಾತಞ್ಚ ಅನುಲೋಮೇತೀತಿ ಅತ್ಥೋ। ಸಗ್ಗಾ ತೇ ಆರದ್ಧಾತಿ ತಯಾ ದೇವಲೋಕಾ ಆರಾಧಿತಾ।
ಯಾಗುಮಧುಗೋಳಕಾದಿಕಥಾವಣ್ಣನಾ ನಿಟ್ಠಿತಾ।
ಪಾಟಲಿಗಾಮವತ್ಥುಕಥಾವಣ್ಣನಾ
೨೮೬. ಪಾಟಲಿಗಾಮೇ ನಗರಂ ಮಾಪೇನ್ತೀತಿ ಪಾಟಲಿಗಾಮಸ್ಸ ಸಮೀಪೇ ತಸ್ಸೇವ ಗಾಮಖೇತ್ತಭೂತೇ ಮಹನ್ತೇ ಅರಞ್ಞಪ್ಪದೇಸೇ ಪಾಟಲಿಪುತ್ತಂ ನಾಮ ನಗರಂ ಮಾಪೇನ್ತಿ। ಯಾವತಾ ಅರಿಯಂ ಆಯತನನ್ತಿ ಯತ್ತಕಂ ಅರಿಯಮನುಸ್ಸಾನಂ ಓಸರಣಟ್ಠಾನಂ। ಯಾವತಾ ವಣಿಪ್ಪಥೋತಿ ಯತ್ತಕಂ ವಾಣಿಜಾನಂ ಭಣ್ಡವಿಕ್ಕೀಣನಟ್ಠಾನಂ, ವಸನಟ್ಠಾನಂ ವಾ, ಇದಂ ತೇಸಂ ಸಬ್ಬೇಸಂ ಅಗ್ಗನಗರಂ ಭವಿಸ್ಸತೀತಿ ಅತ್ಥೋ। ಪುಟಭೇದನನ್ತಿ ಸಕಟಾದೀಹಿ ನಾನಾದೇಸತೋ ಆಹಟಾನಂ ಭಣ್ಡಪುಟಾನಂ ವಿಕ್ಕೀಣನತ್ಥಾಯ ಮೋಚನಟ್ಠಾನಂ। ಸರನ್ತಿ ತಳಾಕಾದೀಸುಪಿ ವತ್ತತಿ ‘‘ಸರನ್ತಿ ಇಧ ನದೀ ಅಧಿಪ್ಪೇತಾ’’ತಿ ವುತ್ತಂ ಸರತಿ ಸನ್ದತೀತಿ ಕತ್ವಾ। ವಿನಾ ಏವ ಕುಲ್ಲೇನ ತಿಣ್ಣಾತಿ ಇದಂ ಅಪ್ಪಮತ್ತಕಉದಕಮ್ಪಿ ಅಫುಸಿತ್ವಾ ವಿನಾ ಕುಲ್ಲೇನ ಪಾರಪ್ಪತ್ತಾ।
ಪಾಟಲಿಗಾಮವತ್ಥುಕಥಾವಣ್ಣನಾ ನಿಟ್ಠಿತಾ।
ಕೋಟಿಗಾಮೇಸಚ್ಚಕಥಾವಣ್ಣನಾ
೨೮೭. ಪಾಳಿಯಂ ಸನ್ಧಾವಿತನ್ತಿ ಭವತೋ ಭವಂ ಪಟಿಸನ್ಧಿಗ್ಗಹಣವಸೇನ ಸನ್ಧಾವನಂ ಕತಂ। ಸಂಸರಿತನ್ತಿ ತಸ್ಸೇವ ವೇವಚನಂ। ಮಮಞ್ಚೇವ ತುಮ್ಹಾಕಞ್ಚಾತಿ ಮಯಾ ಚ ತುಮ್ಹೇಹಿ ಚ, ಸಾಮಿವಸೇನೇವ ವಾ ಮಮ ಚ ತುಮ್ಹಾಕಞ್ಚ ಸನ್ಧಾವನಂ ಅಹೋಸೀತಿ ಅತ್ಥೋ ಗಹೇತಬ್ಬೋ। ಸಂಸರಿತನ್ತಿ ಸಂಸರಿ। ಭವತಣ್ಹಾ ಏವ ಭವತೋ ಭವಂ ನೇತೀತಿ ಭವನೇತ್ತೀತಿ ವುತ್ತಾ।
೨೮೯. ‘‘ನೀಲಾ ಹೋನ್ತೀ’’ತಿ ವುತ್ತಮೇವತ್ಥಂ ವಿವರಿತುಂ ‘‘ನೀಲವಣ್ಣಾ’’ತಿಆದಿ ವುತ್ತಂ। ನೀಲವಣ್ಣಾತಿ ನೀಲವಿಲೇಪನಾ। ಏಸ ನಯೋ ಸಬ್ಬತ್ಥ। ಪಟಿವಟ್ಟೇಸೀತಿ ಪಹರಿ। ಅಮ್ಬಕಾಯಾತಿ ಅಮ್ಬಾಯ। ಉಪಚಾರವಚನಞ್ಹೇತಂ, ಮಾತುಗಾಮೇನಾತಿ ಅತ್ಥೋ। ಉಪಸಂಹರಥಾತಿ ಉಪನೇಥ, ‘‘ಈದಿಸಾ ತಾವತಿಂಸಾ’’ತಿ ಪರಿಕಪ್ಪೇಥಾತಿ ಅತ್ಥೋ। ಇದಞ್ಚ ಭಿಕ್ಖೂನಂ ಸಂವೇಗಜನನತ್ಥಂ ವುತ್ತಂ, ನ ನಿಮಿತ್ತಗ್ಗಾಹತ್ಥಂ। ಲಿಚ್ಛವಿರಾಜಾನೋ ಹಿ ಸಬ್ಬೇ ನ ಚಿರಸ್ಸೇವ ಅಜಾತಸತ್ತುನಾ ವಿನಾಸಂ ಪಾಪುಣಿಸ್ಸನ್ತಿ।
ಕೋಟಿಗಾಮೇಸಚ್ಚಕಥಾವಣ್ಣನಾ ನಿಟ್ಠಿತಾ।
ಸೀಹಸೇನಾಪತಿವತ್ಥುಆದಿಕಥಾವಣ್ಣನಾ
೨೯೦. ಸನ್ಧಾಗಾರೇತಿ ರಾಜಕಿಚ್ಚಸ್ಸ ಸನ್ಧಾರಣತ್ಥಾಯ ನಿಚ್ಛಿದ್ದಂ ಕತ್ವಾ ವಿಚಾರಣತ್ಥಾಯ ಕತಮಹಾಸಭಾಯ। ಗಮಿಕಾಭಿಸಙ್ಖಾರೋತಿ ಗಮನೇ ವಾಯಾಮೋ। ಧಮ್ಮಸ್ಸ ಚ ಅನುಧಮ್ಮನ್ತಿ ತುಮ್ಹೇಹಿ ವುತ್ತಸ್ಸ ಕಾರಣಸ್ಸ ಅನುಕಾರಣಂ, ತುಮ್ಹೇಹಿ ವುತ್ತಸ್ಸ ಅತ್ಥಸ್ಸ ಅನುರೂಪಮೇವಾತಿ ಅಧಿಪ್ಪಾಯೋ। ಸಹಧಮ್ಮಿಕೋ ವಾದಾನುವಾದೋತಿ ಪರೇಹಿ ವುತ್ತಕಾರಣೇನ ಸಕಾರಣೋ ಹುತ್ವಾ ತುಮ್ಹಾಕಂ ವಾದೋ ವಾ ಕೋಚಿ ಅಪ್ಪಮತ್ತಕೋಪಿ ಗಾರಯ್ಹಂ ಠಾನಂ ನ ಆಗಚ್ಛತೀತಿ ಕಿಂ ತವ ವಾದೇ ಗಾರಯ್ಹಕಾರಣಂ ನತ್ಥೀತಿ ವುತ್ತಂ ಹೋತಿ।
೨೯೩. ಅನುವಿಚ್ಚಕಾರನ್ತಿ ಅನುವಿದಿತಾಕಾರಂ। ರತನತ್ತಯಸ್ಸ ಸರಣಗಮನಾದಿಕಿರಿಯಂ ಕರೋತಿ। ಸಹಸಾ ಪಟಾಕಂ ಪರಿಹರೇಯ್ಯುನ್ತಿ ಧಜಪಟಾಕಂ ಉಕ್ಖಿಪಿತ್ವಾ ‘‘ಈದಿಸೋ ಅಮ್ಹಾಕಂ ಸರಣಂ ಗತೋ ಸಾವಕೋ ಜಾತೋ’’ತಿ ನಗರೇ ಘೋಸೇನ್ತಾ ಆಹಿಣ್ಡನ್ತಿ।
೨೯೪. ನಿಮಿತ್ತಕಮ್ಮಸ್ಸಾತಿ ಮಂಸಖಾದನನಿಮಿತ್ತೇನ ಉಪ್ಪನ್ನಪಾಣಾತಿಪಾತಕಮ್ಮಸ್ಸ।
ಸೀಹಸೇನಾಪತಿವತ್ಥುಆದಿಕಥಾವಣ್ಣನಾ ನಿಟ್ಠಿತಾ।
ಕಪ್ಪಿಯಭೂಮಿಅನುಜಾನನಕಥಾವಣ್ಣನಾ
೨೯೫. ಅನುಪ್ಪಗೇ ಏವಾತಿ ಪಾತೋವ। ಓರವಸದ್ದನ್ತಿ ಮಹಾಸದ್ದಂ। ತಂ ಪನ ಅವತ್ವಾಪೀತಿ ಪಿ-ಸದ್ದೇನ ತಥಾವಚನಮ್ಪಿ ಅನುಜಾನಾತಿ। ಅಟ್ಠಕಥಾಸೂತಿ ಅನ್ಧಕಟ್ಠಕಥಾವಿರಹಿತಾಸು ಸೇಸಟ್ಠಕಥಾಸು। ಸಾಧಾರಣಲಕ್ಖಣನ್ತಿ ಅನ್ಧಕಟ್ಠಕಥಾಯ ಸಹ ಸಬ್ಬಟ್ಠಕಥಾನಂ ಸಮಾನಂ।
ಚಯನ್ತಿ ಅಧಿಟ್ಠಾನಉಚ್ಚವತ್ಥುಂ। ಯತೋ ಪಟ್ಠಾಯಾತಿ ಯತೋ ಇಟ್ಠಕಾದಿತೋ ಪಟ್ಠಾಯ, ಯಂ ಆದಿಂ ಕತ್ವಾ ಭಿತ್ತಿಂ ಉಟ್ಠಾಪೇತುಕಾಮಾತಿ ಅತ್ಥೋ। ‘‘ಥಮ್ಭಾ ಪನ ಉಪರಿ ಉಗ್ಗಚ್ಛನ್ತಿ, ತಸ್ಮಾ ವಟ್ಟನ್ತೀ’’ತಿ ಏತೇನ ಇಟ್ಠಕಪಾಸಾಣಾ ಹೇಟ್ಠಾ ಪತಿಟ್ಠಾಪಿತಾಪಿ ಯದಿ ಚಯತೋ, ಭೂಮಿತೋ ವಾ ಏಕಙ್ಗುಲಮತ್ತಮ್ಪಿ ಉಗ್ಗತಾ ತಿಟ್ಠನ್ತಿ, ವಟ್ಟನ್ತೀತಿ ಸಿದ್ಧಂ ಹೋತಿ।
ಆರಾಮೋತಿ ಉಪಚಾರಸೀಮಾಪರಿಚ್ಛಿನ್ನೋ ಸಕಲೋ ವಿಹಾರೋ। ಸೇನಾಸನಾನೀತಿ ವಿಹಾರಸ್ಸ ಅನ್ತೋ ತಿಣಕುಟಿಆದಿಕಾನಿ ಸಙ್ಘಸ್ಸ ನಿವಾಸಗೇಹಾನಿ। ವಿಹಾರಗೋನಿಸಾದಿಕಾ ನಾಮಾತಿ ಸೇನಾಸನಗೋನಿಸಾದಿಕಾ। ಸೇನಾಸನಾನಿ ಹಿ ಸಯಂ ಪರಿಕ್ಖಿತ್ತಾನಿಪಿ ಆರಾಮಪರಿಕ್ಖೇಪಾಭಾವೇನ ‘‘ಗೋನಿಸಾದಿಕಾನೀ’’ತಿ ವುತ್ತಾನಿ। ‘‘ಉಪಡ್ಢಪರಿಕ್ಖಿತ್ತೋಪೀ’’ತಿ ಇಮಿನಾ ತತೋ ಊನಪರಿಕ್ಖಿತ್ತೋ ಯೇಭುಯ್ಯೇನ ಅಪರಿಕ್ಖಿತ್ತೋ ನಾಮ, ತಸ್ಮಾ ಅಪರಿಕ್ಖಿತ್ತಸಙ್ಖ್ಯಮೇವ ಗಚ್ಛತೀತಿ ದಸ್ಸೇತಿ। ಏತ್ಥಾತಿ ಉಪಡ್ಢಾದಿಪರಿಕ್ಖಿತ್ತೇ। ಕಪ್ಪಿಯಕುಟಿಂ ಲದ್ಧುಂ ವಟ್ಟತೀತಿ ಗೋನಿಸಾದಿಯಾ
ತೇಸಂ ಗೇಹಾನೀತಿ ಏತ್ಥ ಭಿಕ್ಖೂನಂ ವಾಸತ್ಥಾಯ ಕತಮ್ಪಿ ಯಾವ ನ ದೇನ್ತಿ, ತಾವ ತೇಸಂ ಸನ್ತಕಂಯೇವ ಭವಿಸ್ಸತೀತಿ ದಟ್ಠಬ್ಬಂ। ವಿಹಾರಂ ಠಪೇತ್ವಾತಿ ಉಪಸಮ್ಪನ್ನಾನಂ ವಾಸತ್ಥಾಯ ಕತಗೇಹಂ ಠಪೇತ್ವಾತಿ ಅತ್ಥೋ। ಗೇಹನ್ತಿ ನಿವಾಸಗೇಹಂ, ತದಞ್ಞಂ ಪನ ಉಪೋಸಥಾಗಾರಾದಿ ಸಬ್ಬಂ ಅನಿವಾಸಗೇಹಂ ಚತುಕಪ್ಪಿಯಭೂಮಿವಿಮುತ್ತಾ ಪಞ್ಚಮೀ ಕಪ್ಪಿಯಭೂಮಿ। ಸಙ್ಘಸನ್ತಕೇಪಿ ಹಿ ಏತಾದಿಸೇ ಗೇಹೇ ಸುಟ್ಠು ಪರಿಕ್ಖಿತ್ತಾರಾಮತ್ತೇಪಿ ‘‘ಯಂ ಪನಾ’’ತಿಆದಿ। ತತ್ಥ ‘‘ಸಙ್ಘಿಕಂ ವಾ ಪುಗ್ಗಲಿಕಂ ವಾ’’ತಿ ಇದಂ ಕಿಞ್ಚಾಪಿ ಭಿಕ್ಖುನೀನಂ ಸಾಮಞ್ಞತೋ ವುತ್ತಂ, ಭಿಕ್ಖೂನಂ ಪನ ಸಙ್ಘಿಕಂ ಪುಗ್ಗಲಿಕಞ್ಚ ಭಿಕ್ಖುನೀನಂ, ತಾಸಂ ಸಙ್ಘಿಕಂ ಪುಗ್ಗಲಿಕಞ್ಚ ಭಿಕ್ಖೂನಂ ಗಿಹಿಸನ್ತಕಟ್ಠಾನೇ ತಿಟ್ಠತೀತಿ ವೇದಿತಬ್ಬಂ।
ಮುಖಸನ್ನಿಧೀತಿ ಅನ್ತೋಸನ್ನಿಹಿತದೋಸೋ ಹಿ ಮುಖಪ್ಪವೇಸನನಿಮಿತ್ತಂ ಆಪತ್ತಿಂ ಕರೋತಿ, ನಾಞ್ಞಥಾ। ತಸ್ಮಾ ‘‘ಮುಖಸನ್ನಿಧೀ’’ತಿ ವುತ್ತೋ।
ತತ್ಥ ತತ್ಥ ಖಣ್ಡಾ ಹೋನ್ತೀತಿ ಉಪಡ್ಢತೋ ಅಧಿಕಂ ಖಣ್ಡಾ ಹೋನ್ತಿ। ಸಬ್ಬಸ್ಮಿಂ ಛದನೇ ವಿನಟ್ಠೇತಿ ತಿಣಪಣ್ಣಾದಿವಸ್ಸಪರಿತ್ತಾಯಕೇ ಛದನೇ ವಿನಟ್ಠೇ। ಗೋಪಾನಸೀನಂ ಪನ ಉಪರಿ ವಲ್ಲೀಹಿ ಬದ್ಧದಣ್ಡೇಸು ಠಿತೇಸುಪಿ ಜಹಿತವತ್ಥುಕಾ ಹೋನ್ತಿ ಏವ। ಪಕ್ಖಪಾಸಕಮಣ್ಡಲನ್ತಿ ಏಕಸ್ಮಿಂ ಪಸ್ಸೇ ತಿಣ್ಣಂ ಗೋಪಾನಸೀನಂ ಉಪರಿ ಠಿತತಿಣಪಣ್ಣಾದಿಚ್ಛದನಂ ವುಚ್ಚತಿ।
ಅನುಪಸಮ್ಪನ್ನಸ್ಸ ದಾತಬ್ಬೋ ಅಸ್ಸಾತಿಆದಿನಾ ಅಕಪ್ಪಿಯಕುಟಿಯಂ ವುತ್ಥಮ್ಪಿ ಅನುಪಸಮ್ಪನ್ನಸ್ಸ ದಿನ್ನೇ ಕಪ್ಪಿಯಂ ಹೋತಿ, ಸಾಪೇಕ್ಖದಾನಞ್ಚೇತ್ಥ ವಟ್ಟತಿ, ಪಟಿಗ್ಗಹಣಂ ವಿಯ ನ ಹೋತೀತಿ ದಸ್ಸೇತಿ।
೨೯೯. ಪಾಳಿಯಂ ಕನ್ತಾರೇ ಸಮ್ಭಾವೇಸೀತಿ ಅಪ್ಪಭಕ್ಖಕನ್ತಾರೇ ಸಮ್ಪಾಪುಣಿ।
ಕಪ್ಪಿಯಭೂಮಿಅನುಜಾನನಕಥಾವಣ್ಣನಾ ನಿಟ್ಠಿತಾ।
ಕೇಣಿಯಜಟಿಲವತ್ಥುಕಥಾವಣ್ಣನಾ
೩೦೦. ಜಟಿಲೋತಿ ಪವತ್ತಾರೋ ಪಾವಚನವಸೇನ ವತ್ತಾರೋ। ಯೇಸಂ ಸನ್ತಕಮಿದಂ, ಯೇಹಿ ವಾ ಇದಂ ಗೀತನ್ತಿ ಅತ್ಥೋ। ಗೀತಂ ಪವುತ್ತಂ ಸಮಿಹಿತನ್ತಿ ಅಞ್ಞಮಞ್ಞಸ್ಸ ಪರಿಯಾಯವಚನಂ ವುತ್ತನ್ತಿ ಅತ್ಥೋ। ತದನುಗಾಯನ್ತೀತಿ ತಂ ತೇಹಿ ಪುಬ್ಬೇ ಗೀತಂ ಅನುಗಾಯನ್ತಿ। ಏವಂ ಸೇಸೇಸು ಚ।
ಯಾವಕಾಲಿಕಪಕ್ಕಾನನ್ತಿ ಪಕ್ಕೇ ಸನ್ಧಾಯ ವುತ್ತಂ, ಆಮಾನಿ ಪನ ಅನುಪಸಮ್ಪನ್ನೇಹಿ ಸೀತುದಕೇ ಮದ್ದಿತ್ವಾ ಪರಿಸ್ಸಾವೇತ್ವಾ ದಿನ್ನಪಾನಂ ಪಚ್ಛಾಭತ್ತಮ್ಪಿ ಕಪ್ಪತಿ ಏವ। ಅಯಞ್ಚ ಅತ್ಥೋ ಮಹಾಅಟ್ಠಕಥಾಯಂ ಸರೂಪತೋ ‘‘ಕುರುನ್ದಿಯಂ ಪನಾ’’ತಿಆದಿ। ‘‘ಉಚ್ಛುರಸೋ ನಿಕಸಟೋ’’ತಿ ಇದಂ ಪಾತಬ್ಬಸಾಮಞ್ಞೇನ ಯಾಮಕಾಲಿಕಕಥಾಯಂ ವುತ್ತಂ, ತಂ ಪನ ಸತ್ತಾಹಕಾಲಿಕಮೇವಾತಿ ಗಹೇತಬ್ಬಂ। ಇಮೇ ಚತ್ತಾರೋ ರಸಾತಿ ಫಲಪತ್ತಪುಪ್ಫಉಚ್ಛುರಸಾ ಚತ್ತಾರೋ।
ಪಾಳಿಯಂ ಅಗ್ಗಿಹುತ್ತಮುಖಾತಿ ಅಗ್ಗಿಜುಹನಪುಬ್ಬಕಾ। ಛನ್ದಸೋತಿ ವೇದಸ್ಸ। ಸಾವಿತ್ತೀ ಮುಖಂ ಪಠಮಂ ಸಜ್ಝಾಯಿತಬ್ಬಾತಿ ಅತ್ಥೋ। ತಪತನ್ತಿ ವಿಜೋತನ್ತಾನಂ।
ಕೇಣಿಯಜಟಿಲವತ್ಥುಕಥಾವಣ್ಣನಾ ನಿಟ್ಠಿತಾ।
ರೋಜಮಲ್ಲಾದಿವತ್ಥುಕಥಾವಣ್ಣನಾ
೩೦೧. ಬಹುಕತೋ ಬುದ್ಧೇ ವಾತಿ ಬುದ್ಧೇ ಕತಬಹುಮಾನೋತಿ ಅತ್ಥೋ। ಸೋ ಖೋ ಅಹಂ, ಭನ್ತೇ ಆನನ್ದ, ಞಾತೀನಂ ದಣ್ಡಭಯತಜ್ಜಿತೋ ಅಹೋಸಿನ್ತಿ ಸೇಸೋ। ಏವಞ್ಹಿ ಸತಿ ‘‘ಏವಾಹ’’ನ್ತಿ ಪುನ ಅಹಂ-ಗಹಣಂ ಯುಜ್ಜತಿ। ವಿವರೀತಿ ‘‘ವಿವರತೂ’’ತಿ ಚಿನ್ತಾಮತ್ತೇನ ವಿವರಿ, ನ ಉಟ್ಠಾಯ ಹತ್ಥೇನ।
೩೦೩. ಅಞ್ಞತರೋತಿ ಸುಭದ್ದೋ ವುಡ್ಢಪಬ್ಬಜಿತೋ। ದ್ವೇ ದಾರಕಾತಿ ಸಾಮಣೇರಭೂಮಿಯಂ ಠಿತಾ ದ್ವೇ ಪುತ್ತಾ। ನಾಳಿಯಾವಾಪಕೇನಾತಿ ನಾಳಿಯಾ ಚೇವ ಥವಿಕಾಯ ಚ। ಸಂಹರಥ ಇಮೇಹಿ ಭಾಜನೇಹಿ ತಣ್ಡುಲಾದೀನಿ ಸಙ್ಕಡ್ಢಥಾತಿ ಅತ್ಥೋ। ಭುಸಾಗಾರೇತಿ ಪಲಾಲಮಯೇ ಅಗಾರೇ, ಪಲಾಲಪುಞ್ಜಂ ಅಬ್ಭನ್ತರತೋ ಪಲಾಲಂ ಸಙ್ಕಡ್ಢಿತ್ವಾ ಅಗಾರಂ ಕತಂ ಹೋತಿ, ತತ್ಥಾತಿ ಅತ್ಥೋ।
ರೋಜಮಲ್ಲಾದಿವತ್ಥುಕಥಾವಣ್ಣನಾ ನಿಟ್ಠಿತಾ।
ಚತುಮಹಾಪದೇಸಕಥಾವಣ್ಣನಾ
೩೦೫. ಪರಿಮದ್ದನ್ತಾತಿ ದ್ವೇ ಪಟಾ ದೇಸನಾಮೇನೇವ ವುತ್ತಾತಿ ತೇಸಂ ಸರೂಪದಸ್ಸನಪದಮೇತಂ। ನಾಞ್ಞನಿವತ್ತನಪದಂ ಪತ್ತುಣ್ಣಪಟಸ್ಸಾಪಿ ದೇಸನಾಮೇನ ವುತ್ತತ್ತಾ।
ತುಮ್ಬಾತಿ ಭಾಜನಾನಿ। ಫಲತುಮ್ಬೋ ನಾಮ ಲಾಬುಆದಿ। ಉದಕತುಮ್ಬೋ ಉದಕಘಟೋ। ಕಿಲಞ್ಜಚ್ಛತ್ತನ್ತಿ ವೇಳುವಿಲೀವೇಹಿ ವಾಯಿತ್ವಾ ಕತಛತ್ತಂ। ಸಮ್ಭಿನ್ನರಸನ್ತಿ ಮಿಸ್ಸೀಭೂತರಸಂ।
ಚತುಮಹಾಪದೇಸಕಥಾವಣ್ಣನಾ ನಿಟ್ಠಿತಾ।
ಭೇಸಜ್ಜಕ್ಖನ್ಧಕವಣ್ಣನಾನಯೋ ನಿಟ್ಠಿತೋ।