೮. ವತ್ತಕ್ಖನ್ಧಕೋ

ಆಗನ್ತುಕವತ್ತಕಥಾವಣ್ಣನಾ

೩೫೭. ವತ್ತಕ್ಖನ್ಧಕೇ ಪತ್ಥರಿತಬ್ಬನ್ತಿ ಆತಪೇ ಪತ್ಥರಿತಬ್ಬಂ। ಪಾಳಿಯಂ ಅಭಿವಾದಾಪೇತಬ್ಬೋತಿ ವನ್ದನತ್ಥಾಯ ವಸ್ಸಂ ಪುಚ್ಛನೇನ ನವಕೋ ಸಯಮೇವ ವನ್ದತೀತಿ ವುತ್ತಂ। ನಿಲ್ಲೋಕೇತಬ್ಬೋತಿ ಓಲೋಕೇತಬ್ಬೋ।

ಆಗನ್ತುಕವತ್ತಕಥಾವಣ್ಣನಾ ನಿಟ್ಠಿತಾ।

ಆವಾಸಿಕವತ್ತಕಥಾವಣ್ಣನಾ

೩೫೯. ‘‘ಯಥಾಭಾಗ’’ನ್ತಿ ಠಪಿತಟ್ಠಾನಂ ಅನತಿಕ್ಕಮಿತ್ವಾ ಮಞ್ಚಪೀಠಾದಿಂ ಪಪ್ಫೋಟೇತ್ವಾ ಪತ್ಥರಿತ್ವಾ ಉಪರಿ ಪಚ್ಚತ್ಥರಣಂ ದತ್ವಾ ದಾನಮ್ಪಿ ಸೇನಾಸನಪಞ್ಞಾಪನಮೇವಾತಿ ದಸ್ಸೇನ್ತೋ ಆಹ ‘‘ಪಪ್ಫೋಟೇತ್ವಾ ಹಿ ಪತ್ಥರಿತುಂ ಪನ ವಟ್ಟತಿಯೇವಾ’’ತಿ।

ಆವಾಸಿಕವತ್ತಕಥಾವಣ್ಣನಾ ನಿಟ್ಠಿತಾ।

ಅನುಮೋದನವತ್ತಕಥಾವಣ್ಣನಾ

೩೬೨. ಪಞ್ಚಮೇ ನಿಸಿನ್ನೇತಿ ಅನುಮೋದನತ್ಥಾಯ ನಿಸಿನ್ನೇ। ನ ಮಹಾಥೇರಸ್ಸ ಭಾರೋ ಹೋತೀತಿ ಅನುಮೋದಕಂ ಆಗಮೇತುಂ ನ ಭಾರೋ। ಅಜ್ಝಿಟ್ಠೋವ ಆಗಮೇತಬ್ಬೋತಿ ಅತ್ತನಾ ಅಜ್ಝಿಟ್ಠೇಹಿ ಭಿಕ್ಖೂಹಿ ಅನುಮೋದನ್ತೇಯೇವ ನಿಸೀದಿತಬ್ಬನ್ತಿ ಅತ್ಥೋ।

ಅನುಮೋದನವತ್ತಕಥಾವಣ್ಣನಾ ನಿಟ್ಠಿತಾ।

ಭತ್ತಗ್ಗವತ್ತಕಥಾವಣ್ಣನಾ

೩೬೪. ಮನುಸ್ಸಾನಂ ಪರಿವಿಸನಟ್ಠಾನನ್ತಿ ಯತ್ಥ ಅನ್ತೋವಿಹಾರೇಪಿ ಮನುಸ್ಸಾ ಸಪುತ್ತದಾರಾ ಆವಸಿತ್ವಾ ಭಿಕ್ಖೂ ನೇತ್ವಾ ಭೋಜೇನ್ತಿ। ಆಸನೇಸು ಸತೀತಿ ನಿಸೀದನಟ್ಠಾನೇಸು ಸನ್ತೇಸು। ಇದಂ, ಭನ್ತೇ, ಆಸನಂ ಉಚ್ಚನ್ತಿ ಆಸನ್ನೇ ಸಮಭೂಮಿಭಾಗೇ ಪಞ್ಞತ್ತಂ ಥೇರಾಸನೇನ ಸಮಕಂ ಆಸನಂ ಸನ್ಧಾಯ ವುತ್ತಂ, ಥೇರಾಸನತೋ ಪನ ಉಚ್ಚತರೇ ಆಪುಚ್ಛಿತ್ವಾಪಿ ನಿಸೀದಿತುಂ ನ ವಟ್ಟತಿ। ಯದಿ ತಂ ಆಸನ್ನಮ್ಪಿ ನೀಚತರಂ ಹೋತಿ, ಅನಾಪುಚ್ಛಾಪಿ ನಿಸೀದಿತುಂ ವಟ್ಟತಿ। ಮಹಾಥೇರಸ್ಸೇವ ಆಪತ್ತೀತಿ ಆಸನೇನ ಪಟಿಬಾಹನಾಪತ್ತಿಯಾ ಆಪತ್ತಿ। ಅವತ್ಥರಿತ್ವಾತಿ ಪಾರುತಸಙ್ಘಾಟಿಂ ಅವತ್ಥರಿತ್ವಾ, ಅನುಕ್ಖಿಪಿತ್ವಾತಿ ಅತ್ಥೋ।

ಪಾಳಿಯಂ ‘‘ಉಭೋಹಿ ಹತ್ಥೇಹಿ…ಪೇ॰… ಓದನೋ ಪಟಿಗ್ಗಹೇತಬ್ಬೋ’’ತಿ ಇದಂ ಹತ್ಥತಲೇ ವಾ ಪಚ್ಛಿಪಿಟ್ಠಿಆದಿದುಸ್ಸಣ್ಠಿತಾಧಾರೇ ವಾ ಪತ್ತಂ ಠಪೇತ್ವಾ ಓದನಸ್ಸ ಗಹಣಕಾಲೇ ಪತ್ತಸ್ಸ ಅಪತನತ್ಥಾಯ ವುತ್ತಂ, ಸುಸಜ್ಜಿತೇ ಪನ ಆಧಾರೇ ಪತ್ತಂ ಠಪೇತ್ವಾ ಏಕೇನ ಹತ್ಥೇನ ತಂ ಪರಾಮಸಿತ್ವಾಪಿ ಓದನಂ ಪಟಿಗ್ಗಹೇತುಂ ವಟ್ಟತಿ ಏವ। ಉಭೋಹಿ ಹತ್ಥೇಹಿ…ಪೇ॰… ಉದಕಂ ಪಟಿಗ್ಗಹೇತಬ್ಬನ್ತಿ ಏತ್ಥಾಪಿ ಏಸೇವ ನಯೋ।

ಹತ್ಥಧೋವನಉದಕನ್ತಿ ಭೋಜನಾವಸಾನೇ ಉದಕಂ। ತೇನಾಹ ‘‘ಪಾನೀಯಂ ಪಿವಿತ್ವಾ ಹತ್ಥಾ ಧೋವಿತಬ್ಬಾ’’ತಿ। ತೇನ ಪರಿಯೋಸಾನೇ ಧೋವನಮೇವ ಪಟಿಕ್ಖಿತ್ತಂ, ಭೋಜನನ್ತರೇ ಪನ ಪಾನೀಯಪಿವನಾದಿನಾ ನಯೇನ ಹತ್ಥಂ ಧೋವಿತ್ವಾ ಪುನ ಭುಞ್ಜಿತುಂ ವಟ್ಟತೀತಿ ದಸ್ಸೇತಿ। ಪೋತ್ಥಕೇಸು ಪನ ‘‘ಪಾನೀಯಂ ಪಿವಿತ್ವಾ ಹತ್ಥಾ ನ ಧೋವಿತಬ್ಬಾ’’ತಿ ಲಿಖನ್ತಿ, ತಂ ಪುರಿಮವಚನೇನ ನ ಸಮೇತಿ ಪರಿಯೋಸಾನೇ ಉದಕಸ್ಸೇವ ‘‘ಹತ್ಥಧೋವನಉದಕ’’ನ್ತಿ ವುತ್ತತ್ತಾ। ಸಚೇ ಮನುಸ್ಸಾ ಧೋವಥ, ಭನ್ತೇತಿಆದಿ ನಿಟ್ಠಿತಭತ್ತಂ ನಿಸಿನ್ನಂ ಥೇರಂ ಸನ್ಧಾಯ ವುತ್ತಂ। ಧುರೇ ದ್ವಾರಸಮೀಪೇ।

ಭತ್ತಗ್ಗವತ್ತಕಥಾವಣ್ಣನಾ ನಿಟ್ಠಿತಾ।

ಪಿಣ್ಡಚಾರಿಕವತ್ತಕಥಾದಿವಣ್ಣನಾ

೩೬೬. ಪಾಳಿಯಂ ಠಾಪೇತಿ ವಾತಿ ತಿಟ್ಠ ಭನ್ತೇತಿ ವದನ್ತಿ।

೩೬೭. ಅತ್ಥಿ, ಭನ್ತೇ, ನಕ್ಖತ್ತಪದಾನೀತಿ ನಕ್ಖತ್ತಪದವಿಸಯಾನಿ ಞಾತಾನಿ ಅತ್ಥಿ, ಅಸ್ಸಯುಜಾದಿನಕ್ಖತ್ತಂ ಜಾನಾಥಾತಿ ಅಧಿಪ್ಪಾಯೋ। ತೇನಾಹ ‘‘ನ ಜಾನಾಮ, ಆವುಸೋ’’ತಿ। ಅತ್ಥಿ, ಭನ್ತೇ , ದಿಸಾಭಾಗನ್ತಿ ಏತ್ಥಾಪಿ ಏಸೇವ ನಯೋ। ಕೇನಜ್ಜ, ಭನ್ತೇ, ಯುತ್ತನ್ತಿ ಕೇನ ನಕ್ಖತ್ತೇನ ಚನ್ದೋ ಯುತ್ತೋತಿ ಅತ್ಥೋ।

೩೬೯. ಅಙ್ಗಣೇತಿ ಅಬ್ಭೋಕಾಸೇ। ಏವಮೇವ ಪಟಿಪಜ್ಜಿತಬ್ಬನ್ತಿ ಉದ್ದೇಸದಾನಾದಿ ಆಪುಚ್ಛಿತಬ್ಬನ್ತಿ ದಸ್ಸೇತಿ।

೩೭೪. ನಿಬದ್ಧಗಮನತ್ಥಾಯಾತಿ ಅತ್ತನೋವ ನಿರನ್ತರಗಮನತ್ಥಾಯ। ಊಹದಿತಾತಿ ಏತ್ಥ ಹದ-ಧಾತುಸ್ಸ ವಚ್ಚವಿಸ್ಸಜ್ಜನತ್ಥತಾಯಾಹ ‘‘ಬಹಿ ವಚ್ಚಮಕ್ಖಿತಾ’’ತಿ।

ಪಿಣ್ಡಚಾರಿಕವತ್ತಕಥಾದಿವಣ್ಣನಾ ನಿಟ್ಠಿತಾ।

ವತ್ತಕ್ಖನ್ಧಕವಣ್ಣನಾನಯೋ ನಿಟ್ಠಿತೋ।