ಪಞ್ಞತ್ತಿವಾರವಣ್ಣನಾ
೧. ವಿಸುದ್ಧಪರಿವಾರಸ್ಸ
ಸಮನ್ತಚಕ್ಖುನಾತಿ ಸಬ್ಬಞ್ಞುತಞ್ಞಾಣೇನ। ಅತಿವಿಸುದ್ಧೇನ ಮಂಸಚಕ್ಖುನಾತಿ ರತ್ತಿನ್ದಿವಂ ಸಮನ್ತಾ ಯೋಜನಪ್ಪಮಾಣೇ ಅತಿಸುಖುಮಾನಿಪಿ ರೂಪಾನಿ ಪಸ್ಸನತೋ ಅತಿವಿಯ ಪರಿಸುದ್ಧೇನ ಪಸಾದಚಕ್ಖುನಾ। ‘‘ಅತ್ಥಿ ತತ್ಥ ಪಞ್ಞತ್ತೀ’’ತಿಆದೀಸು ಅತ್ಥಿ ನು ಖೋ ತತ್ಥ ಪಞ್ಞತ್ತೀತಿಆದಿನಾ ಅತ್ಥೋ ಗಹೇತಬ್ಬೋತಿ ಆಹ ‘‘ತತ್ಥ ಪಞ್ಞತ್ತಿ…ಪೇ॰… ಕೇನಾಭತನ್ತಿ ಪುಚ್ಛಾ’’ತಿ।
೨. ಪುಚ್ಛಾವಿಸ್ಸಜ್ಜನೇತಿ ವಿನೀತಕಥಾತಿ ವಿನೀತವತ್ಥುಕಥಾ, ಅಯಮೇವ ವಾ ಪಾಠೋ।
ದ್ವಙ್ಗಿಕೇನ ಏಕೇನ ಸಮುಟ್ಠಾನೇನಾತಿ ಅಙ್ಗದ್ವಯಸಮುದಾಯಭೂತೇನ ಏಕೇನ। ಅಙ್ಗದ್ವಯವಿಮುತ್ತಸ್ಸ ಸಮುಟ್ಠಾನಸ್ಸ ಅಭಾವೇಪಿ ತೇಸು ಏಕೇನಙ್ಗೇನ ವಿನಾ ಅಯಂ ಆಪತ್ತಿ ನ ಹೋತೀತಿ ದಸ್ಸನತ್ಥಮೇವ ‘‘ಏಕೇನ ಸಮುಟ್ಠಾನೇನಾ’’ತಿ ವುತ್ತಂ। ಇದಾನಿ ತೇಸು ದ್ವೀಸು ಅಙ್ಗೇಸು ಪಧಾನಙ್ಗಂ ದಸ್ಸೇತುಮಾಹ ‘‘ಏತ್ಥ ಹಿ ಚಿತ್ತಂ ಅಙ್ಗಂ ಹೋತೀ’’ತಿಆದಿ। ಯಸ್ಮಾ ಪನ ಮಗ್ಗೇನಮಗ್ಗಪ್ಪಟಿಪತ್ತಿಸಙ್ಖಾತಾಯ ಕಾಯವಿಞ್ಞತ್ತಿಯಾ ಸೇವನಚಿತ್ತೇನೇವ ಸಮ್ಭವೇ ಸತಿ ಅಯಂ ತಂ ಅಙ್ಗದ್ವಯಂ ಉಪಾದಾಯ ಭಗವತಾ ಪಞ್ಞತ್ತಾ ಆಪತ್ತಿಸಮ್ಮುತಿ ಹೋತಿ, ನಾಸತಿ। ತಸ್ಮಾ ತಂ ಚಿತ್ತಂ ಕಾಯವಿಞ್ಞತ್ತಿಸಙ್ಖಾತಸ್ಸ ಕಾಯಸ್ಸ ಅಙ್ಗಂ ಕಾರಣಂ ಹೋತಿ, ನ ಆಪತ್ತಿಯಾ। ತಸ್ಸ ಪನ ತಂಸಮುಟ್ಠಿತಕಾಯೋ ಏವ ಅಙ್ಗಂ ಅಬ್ಯವಹಿತಕಾರಣಂ, ಚಿತ್ತಂ ಪನ ಕಾರಣಕಾರಣನ್ತಿ ಅಧಿಪ್ಪಾಯೋ। ಏವಂ ಉಪರಿಪಿ ಸಬ್ಬತ್ಥ ಚಿತ್ತಙ್ಗಯುತ್ತಸಮುಟ್ಠಾನೇಸು ಅಧಿಪ್ಪಾಯೋ ಇಮಮತ್ಥಂ ಸನ್ಧಾಯಾತಿ ಆಪನ್ನಾಯ ಪಾರಾಜಿಕಾಪತ್ತಿಯಾ ಕೇಹಿಚಿಪಿ ಸಮಥೇಹಿ ಅನಾಪತ್ತಿಭಾವಾಪಾದನಸ್ಸ ಅಸಕ್ಕುಣೇಯ್ಯತ್ತಸಙ್ಖಾತಮತ್ಥಂ ಸನ್ಧಾಯ।
೩. ಪೋರಾಣಕೇಹಿ ಮಹಾಥೇರೇಹೀತಿ ಸಙ್ಗೀತಿತ್ತಯತೋ ಪಚ್ಛಾ ಪೋತ್ಥಕಸಙ್ಗೀತಿಕಾರಕೇಹಿ ಛಳಭಿಞ್ಞಾಪಅಸಮ್ಭಿದಾದಿಗುಣಸಮುಜ್ಜಲೇಹಿ ಮಹಾಥೇರೇಹಿ। ಚತುತ್ಥಸಙ್ಗೀತಿಸದಿಸಾ ಹಿ ಪೋತ್ಥಕಾರೋಹಸಙ್ಗೀತಿ।
೧೮೮. ಮಹಾವಿಭಙ್ಗೇತಿ ಭಿಕ್ಖುವಿಭಙ್ಗೇ। ಸೋಳಸ ವಾರಾ ದಸ್ಸಿತಾತಿ ಯೇಹಿ ವಾರೇಹಿ ಆದಿಭೂತೇಹಿ ಉಪಲಕ್ಖಿತತ್ತಾ ಅಯಂ ಸಕಲೋಪಿ ಪರಿವಾರೋ ಸೋಳಸಪರಿವಾರೋತಿ ವೋಹರೀಯತಿ, ತೇ ಸನ್ಧಾಯ ವದತಿ।
ಪಞ್ಞತ್ತಿವಾರವಣ್ಣನಾ ನಿಟ್ಠಿತಾ।