ಅಧಿಕರಣಭೇದಂ
ಉಕ್ಕೋಟನಭೇದಾದಿಕಥಾವಣ್ಣನಾ
೩೪೧. ‘‘ಅಲಂ ಆವುಸೋ’’ತಿ ಅತ್ತಪಚ್ಚತ್ಥಿಕೇ ಸಞ್ಞಾಪೇತ್ವಾತಿ ಪತ್ತಚೀವರಾದಿಅತ್ಥಾಯ ಅಲಂ ಭಣ್ಡನಾದಿಕರಣನ್ತಿ ವಿವಾದಾದೀಸು ದೋಸದಸ್ಸನಮತ್ತೇನ ಸಞ್ಞಾಪೇತ್ವಾ ಅಞ್ಞಮಞ್ಞಂ ಖಮಾಪೇತ್ವಾ ವೂಪಸಮೇನ್ತಿ, ನ ಪನ ಅಞ್ಞಮಞ್ಞಂ ಆಪತ್ತಾನಾಪತ್ತಿದಸ್ಸನವಸೇನಾತಿ ಅಧಿಪ್ಪಾಯೋ। ತೇನಾಹ ‘‘ಪಾಳಿಮುತ್ತಕವಿನಿಚ್ಛಯೇನೇವಾ’’ತಿ।
ವಿಸಮಾನಿ ಕಾಯಕಮ್ಮಾದೀನಿ ನಿಸ್ಸಿತೋ ಭಿಕ್ಖು ವಿಸಮನಿಸ್ಸಿತೋ ನಾಮ, ಮಿಚ್ಛಾದಿಟ್ಠಿನಿಸ್ಸಿತೋ ಗಹನನಿಸ್ಸಿತೋ, ಬಲವನ್ತೇ ಪುರಿಸೇ ನಿಸ್ಸಿತೋ ಬಲವನಿಸ್ಸಿತೋ ನಾಮಾತಿ ದಸ್ಸೇನ್ತೋ ‘‘ಏಕೋ ವಿಸಮಾನೀ’’ತಿಆದಿಮಾಹ।
ಉಕ್ಕೋಟನಭೇದಾದಿಕಥಾವಣ್ಣನಾ ನಿಟ್ಠಿತಾ।
ಅಧಿಕರಣನಿದಾನಾದಿವಣ್ಣನಾ
೩೪೨. ಆಪತ್ತಿಂ ನಿಸ್ಸಾಯ ಉಪ್ಪಜ್ಜನಕಆಪತ್ತಿವಸೇನಾತಿ ಪರೇಸಂ, ಅತ್ತನೋ ಚ ಆಪತ್ತಿಂ ಪಟಿಚ್ಛಾದೇನ್ತಾನಂ ವಜ್ಜಪಟಿಚ್ಛಾದೀನಂ ಪಾರಾಜಿಕಾದಿಆಪತ್ತಿಮೇವ ಸನ್ಧಾಯ ವುತ್ತಂ, ನ ಸಬ್ಬಾಪತ್ತಿಯೋ। ಕಿಚ್ಚಂ ನಿಸ್ಸಾಯ ಉಪ್ಪಜ್ಜನಕಕಿಚ್ಚಾನನ್ತಿ ಉಕ್ಖೇಪನೀಯಾದಿಕಮ್ಮಂ ನಿಸ್ಸಾಯ ಉಪ್ಪಜ್ಜನಕಾನಂ ತದನುವತ್ತಿಕಾಯ ಭಿಕ್ಖುನಿಯಾ ಯಾವತತಿಯಾನುಸ್ಸಾವನಾನಂ ಕಿಚ್ಚಾನಂ ವಸೇನ, ನ ಸಬ್ಬೇಸಂ ಕಿಚ್ಚಾನಂ ವಸೇನಾತಿ।
೩೪೪. ಪಾಳಿಯಂ ‘‘ಕತಿಹಿ ಅಧಿಕರಣೇಹೀ’’ತಿ ಪುಚ್ಛಾಯ ‘‘ಏಕೇನ ಅಧಿಕರಣೇನ ಕಿಚ್ಚಾಧಿಕರಣೇನಾ’’ತಿ ವುತ್ತಂ। ‘‘ಕತಿಸು ಠಾನೇಸೂ’’ತಿ ಪುಚ್ಛಾಯ ‘‘ತೀಸು ಠಾನೇಸು ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ’’ತಿ ವುತ್ತಂ। ‘‘ಕತಿಹಿ ಸಮಥೇಹೀ’’ತಿ ಪುಚ್ಛಾಯ ‘‘ತೀಹಿ ಸಮಥೇಹೀ’’ತಿ ವುತ್ತಂ। ತೀಹಿಪಿ ಏತೇಹಿ ಏಕೋ ವೂಪಸಮನಪ್ಪಕಾರೋವ ಪುಚ್ಛಿತೋ, ವಿಸ್ಸಜ್ಜಿತೋ ಚಾತಿ ವೇದಿತಬ್ಬೋ।
೩೪೮. ವಿವಾದಾಧಿಕರಣಂ ಹೋತಿ ಅನುವಾದಾಧಿಕರಣನ್ತಿಆದೀಸು ವಿವಾದಾಧಿಕರಣಮೇವ ಅನುವಾದಾಧಿಕರಣಾದಿಪಿ ಹೋತೀತಿ ಪುಚ್ಛಾಯ ವಿವಾದಾಧಿಕರಣಂ ವಿವಾದಾಧಿಕರಣಮೇವ ಹೋತಿ, ಅನುವಾದಾದಯೋ ನ ಹೋತೀತಿ ವಿಸ್ಸಜ್ಜನಂ।
ಅಧಿಕರಣನಿದಾನಾದಿವಣ್ಣನಾ ನಿಟ್ಠಿತಾ।
ಸತ್ತಸಮಥನಾನಾತ್ಥಾದಿವಣ್ಣನಾ
೩೫೪. ಅಧಿಕರಣಪುಚ್ಛಾವಿಸ್ಸಜ್ಜನೇ ವಿಪಚ್ಚಯತಾಯ ವೋಹಾರೋತಿ ವಿರೂಪವಿಪಾಕಾಯ ಅಞ್ಞಮಞ್ಞಂ ದುಕ್ಖುಪ್ಪಾದನಾಯ ಕಾಯವಚೀವೋಹಾರೋ। ಮೇಧಗನ್ತಿ ವುದ್ಧಿಪ್ಪತ್ತೋ ಕಲಹೋ।
ಅನುಸಮ್ಪವಙ್ಕತಾತಿ ವಿಪತ್ತಿಚೋದನಾಯ ಅನು ಅನು ಸಂಯುಜ್ಜನವಸೇನ ನಿನ್ನತಾ।
ಅಬ್ಭುಸ್ಸಹನತಾತಿ ಅತಿವಿಯ ಸಞ್ಜಾತುಸ್ಸಾಹತಾ। ಅನುಬಲಪ್ಪದಾನನ್ತಿ ಚೋದಕಾನಮ್ಪಿ ಉಪತ್ಥಮ್ಭಕರಣಂ। ಕಮ್ಮಸಙ್ಗಹಾಭಾವೇನಾತಿ ಸಙ್ಘಸಮ್ಮುಖತಾದಿಮತ್ತಸ್ಸ ಸಮ್ಮುಖಾವಿನಯಸ್ಸ ಸಙ್ಘಾದೀಹಿ ಕತ್ತಬ್ಬಕಿಚ್ಚೇಸು ಸಙ್ಗಹಾಭಾವಾ।
ಸತ್ತಸಮಥನಾನಾತ್ಥಾದಿವಣ್ಣನಾ ನಿಟ್ಠಿತಾ।
ಅಧಿಕರಣಭೇದವಣ್ಣನಾನಯೋ ನಿಟ್ಠಿತೋ।
ದುತಿಯಗಾಥಾಸಙ್ಗಣಿಕಂ
ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ
೩೫೯. ದುತಿಯಗಾಥಾಸಙ್ಗಣಿಕಾಯ
ಮನ್ತಗ್ಗಹಣನ್ತಿ ತೇಸಂ ವಿಚಾರಣಾಗಹಣಂ, ಸುತ್ತನ್ತಿಕತ್ಥೇರಾನಂ, ವಿನಯಧರತ್ಥೇರಾನಞ್ಚ ಅಧಿಪ್ಪಾಯಗಹಣನ್ತಿ ಪಾಟೇಕ್ಕಂ ವಿನಿಚ್ಛಯಸನ್ನಿಟ್ಠಾಪನತ್ಥನ್ತಿ ತೇಸಂ ಪಚ್ಚೇಕಂ ಅಧಿಪ್ಪಾಯಂ ಞತ್ವಾ ತೇಹಿ ಸಮುಟ್ಠಾಪಿತನಯಮ್ಪಿ ಗಹೇತ್ವಾ ವಿನಿಚ್ಛಯಪರಿಯೋಸಾಪನತ್ಥನ್ತಿ ಅಧಿಪ್ಪಾಯೋ।
‘‘ಮಾ ಖೋ ತುರಿತೋ ಅಭಣೀ’’ತಿಆದಿನಾ ಅಭಿಮುಖೇ ಠಿತಂ ಕಞ್ಚಿ ಅನುವಿಜ್ಜಕಂ ಓವದನ್ತೇನ ವಿಯ ಥೇರೇನ ಅನುವಿಜ್ಜಕವತ್ತಂ ಕಥಿತಂ।
ಅನುಯುಞ್ಜನವತ್ತನ್ತಿ ಅನುಯುಜ್ಜನಕ್ಕಮಂ, ತಂ ಪನ ಯಸ್ಮಾ ಸಬ್ಬಸಿಕ್ಖಾಪದವೀತಿಕ್ಕಮವಿಸಯೇಪಿ ತಂತಂಸಿಕ್ಖಾಪದಾನುಲೋಮೇನ ಕತ್ತಬ್ಬಂ, ತಸ್ಮಾ ‘‘ಸಿಕ್ಖಾಪದಾನುಲೋಮಿಕ’’ನ್ತಿ ವುತ್ತಂ। ಅತ್ತನೋ ಗತಿಂ ನಾಸೇತೀತಿ ಅತ್ತನೋ ಸುಗತಿಗಮನಂ ವಿನಾಸೇತಿ।
ಅನುಸನ್ಧಿತ-ಸದ್ದೋ ಭಾವಸಾಧನೋತಿ ಆಹ ‘‘ಅನುಸನ್ಧಿತನ್ತಿ ಕಥಾನುಸನ್ಧೀ’’ತಿ। ವತ್ತಾನುಸನ್ಧಿತೇನಾತಿ ಏತ್ಥಾಪಿ ಏಸೇವ ನಯೋ। ವತ್ತಾನುಸನ್ಧಿತೇನಾತಿ ಆಚಾರಾನುಸನ್ಧಿನಾ, ಆಚಾರೇನ ಸದ್ಧಿಂ ಸಮೇನ್ತಿಯಾ ಪಟಿಞ್ಞಾಯಾತಿ ಅತ್ಥೋ। ತೇನಾಹ ‘‘ಯಾ ಅಸ್ಸ ವತ್ತೇನಾ’’ತಿಆದಿ।
ಪಾಳಿಯಂ ಸಞ್ಚಿಚ್ಚ ಆಪತ್ತಿನ್ತಿಆದಿ ಅಲಜ್ಜಿಲಜ್ಜಿಲಕ್ಖಣಂ ಭಿಕ್ಖುಭಿಕ್ಖುನೀನಂ ವಸೇನ ವುತ್ತಂ ತೇಸಞ್ಞೇವ ಸಬ್ಬಪ್ಪಕಾರತೋ ಸಿಕ್ಖಾಪದಾಧಿಕಾರತ್ತಾ। ಸಾಮಣೇರಾದೀನಮ್ಪಿ ಸಾಧಾರಣವಸೇನ ಪನ ಸಞ್ಚಿಚ್ಚ ಯಥಾಸಕಂ ಸಿಕ್ಖಾಪದವೀತಿಕ್ಕಮನಾದಿಕಂ ಅಲಜ್ಜಿಲಜ್ಜಿಲಕ್ಖಣಂ ವೇದಿತಬ್ಬಂ।
ಕಥಾನುಸನ್ಧಿವಚನನ್ತಿ ಚುದಿತಕಅನುವಿಜ್ಜಕಾನಂ ಕಥಾಯ ಅನುಸನ್ಧಿಯುತ್ತಂ ವಚನಂ ನ ಜಾನಾತಿ, ತೇಹಿ ಏಕಸ್ಮಿಂ ಕಾರಣೇ ವುತ್ತೇ ಸಯಂ ತಂ ಅಸಲ್ಲಕ್ಖೇತ್ವಾ ಅತ್ತನೋ ಅಭಿರುಚಿತಮೇವ ಅಸಮ್ಬನ್ಧಿತತ್ಥನ್ತಿ ಅತ್ಥೋ। ವಿನಿಚ್ಛಯಾನುಸನ್ಧಿವಚನಞ್ಚಾತಿ ಅನುವಿಜ್ಜಕೇನ ಕತಸ್ಸ ಆಪತ್ತಾನಾಪತ್ತಿವಿನಿಚ್ಛಯಸ್ಸ ಅನುಗುಣಂ, ಸಮ್ಬನ್ಧವಚನಞ್ಚ।
ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ ನಿಟ್ಠಿತಾ।