ನಿಸ್ಸಗ್ಗಿಯಕಣ್ಡಂ
೧. ಪತ್ತವಗ್ಗೋ
೧. ಪತ್ತಸನ್ನಿಚಯಸಿಕ್ಖಾಪದವಣ್ಣನಾ
ಪಠಮಂ
ಪತ್ತಸನ್ನಿಚಯಸಿಕ್ಖಾಪದವಣ್ಣನಾ ನಿಟ್ಠಿತಾ।
೨. ಅಕಾಲಚೀವರಸಿಕ್ಖಾಪದವಣ್ಣನಾ
ಯಂ ಅತ್ತನಾ ಲದ್ಧಂ, ತಂ ನಿಸ್ಸಗ್ಗಿಯಂ ಹೋತೀತಿ ಯಂ ಚೀವರಂ ಭಾಜಾಪಿತಾಯ ಅತ್ತನಾ ಲದ್ಧಂ, ತಮೇವ ನಿಸ್ಸಗ್ಗಿಯಂ ಹೋತಿ, ತಂ ವಿನಯಕಮ್ಮಂ ಕತ್ವಾಪಿ ಅತ್ತನಾ ನ ಲಬ್ಭತಿ। ತೇನಾಹ ‘‘ನಿಸ್ಸಟ್ಠ’’ನ್ತಿಆದಿ। ತತ್ಥ ನಿಸ್ಸಟ್ಠಂ ಪಟಿಲಭಿತ್ವಾಪೀತಿ ‘‘ಅಯ್ಯಾಯ, ದಮ್ಮೀ’’ತಿ ಏವಂ ನಿಸ್ಸಟ್ಠಂ ಪಟಿಲಭಿತ್ವಾಪಿ। ಯಥಾದಾನೇಯೇವ ಉಪನೇತಬ್ಬನ್ತಿ ಯಥಾ ದಾಯಕೇಹಿ ದಿನ್ನಂ, ತಥೇವ ಉಪನೇತಬ್ಬಂ, ಅಕಾಲಚೀವರಪಕ್ಖೇಯೇವ ಠಪೇತಬ್ಬನ್ತಿ ವುತ್ತಂ ಹೋತಿ।
ಅಕಾಲಚೀವರಸಿಕ್ಖಾಪದವಣ್ಣನಾ ನಿಟ್ಠಿತಾ।
೩. ಚೀವರಪರಿವತ್ತನಸಿಕ್ಖಾಪದವಣ್ಣನಾ
ಮೇತನ್ತಿ ಮೇ ಏತಂ। ಸಕಸಞ್ಞಾಯ ಗಹಿತತ್ತಾ ಪಾಚಿತ್ತಿಯಞ್ಚೇವ ದುಕ್ಕಟಞ್ಚ ವುತ್ತಂ, ಇತರಥಾ ಭಣ್ಡಗ್ಘೇನ ಕಾರೇತಬ್ಬಂ।
ಚೀವರಪರಿವತ್ತನಸಿಕ್ಖಾಪದವಣ್ಣನಾ ನಿಟ್ಠಿತಾ।
೪. ಅಞ್ಞವಿಞ್ಞಾಪನಸಿಕ್ಖಾಪದವಣ್ಣನಾ
ಪಟಿಲಾಭೇನಾತಿ
ತಸ್ಮಿಂ ಅಪ್ಪಹೋನ್ತೇ ಪುನ ತಞ್ಞೇವಾತಿ ಯಂ ಪಠಮಂ ವಿಞ್ಞತ್ತಂ, ಥೋಕತ್ತಾ ತಸ್ಮಿಂ ಅಪ್ಪಹೋನ್ತೇ ಪುನ ತಞ್ಞೇವ ವಿಞ್ಞಾಪೇನ್ತಿಯಾತಿ ಅತ್ಥೋ। ಅಞ್ಞೇನಪಿ ಅತ್ಥೇ ತೇನ ಸದ್ಧಿಂ ಅಞ್ಞಞ್ಚಾತಿ ಯಂ ಪಠಮಂ ವಿಞ್ಞತ್ತಂ, ತೇನ ಸದ್ಧಿಂ ಅಞ್ಞಞ್ಚ। ಕಿಂ ವುತ್ತಂ ಹೋತಿ? ಸಚೇ ಪಠಮಂ ಸಪ್ಪಿ ವಿಞ್ಞತ್ತಂ, ‘‘ಯಮಕಂ ಪಚಿತಬ್ಬ’’ನ್ತಿ ಚ ವೇಜ್ಜೇನ ವುತ್ತತ್ತಾ ತೇಲೇನಾಪಿ ಅತ್ಥೋ ಹೋತಿ। ತತೋ ‘‘ತೇಲೇನಾಪಿ ಮೇ ಅತ್ಥೋ’’ತಿ ಏವಮಾದಿನಾ ಅಞ್ಞಞ್ಚ ವಿಞ್ಞಾಪೇನ್ತಿಯಾತಿ ವುತ್ತಂ ಹೋತಿ। ಆನಿಸಂಸಂ ದಸ್ಸೇತ್ವಾತಿ ‘‘ಸಚೇ ಕಹಾಪಣಸ್ಸ ಸಪ್ಪಿ ಆಭತಂ ಹೋತಿ, ಇಮಿನಾ ಮೂಲೇನ ದ್ವಿಗುಣಂ ತೇಲಂ ಲಬ್ಭತಿ, ತೇಲೇನಾಪಿ ಚ ಇದಂ ಕಿಚ್ಚಂ ನಿಪ್ಪಜ್ಜತಿ, ತಸ್ಮಾ ತೇಲಂ ಆಹರಾ’’ತಿ ಏವಂ ಆನಿಸಂಸಂ ದಸ್ಸೇತ್ವಾ।
ಅಞ್ಞವಿಞ್ಞಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
೫. ಅಞ್ಞಚೇತಾಪನಸಿಕ್ಖಾಪದವಣ್ಣನಾ
ತತೋ ಅಞ್ಞಂ ಚೇತಾಪೇಯ್ಯಾತಿ ಪಠಮಂ ಚೇತಾಪಿತತೋ ಯಂ ಕಿಞ್ಚಿ ಅಞ್ಞಂ ಚೇತಾಪೇಯ್ಯ।
ಅಞ್ಞಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
೬. ಪಠಮಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ
ಅಞ್ಞಸ್ಸತ್ಥಾಯ ದಿನ್ನೇನಾತಿ ಯಂ ಚೇತಾಪೇತಿ, ತತೋ ಅಞ್ಞಸ್ಸತ್ಥಾಯ ದಿನ್ನೇನ। ಅಞ್ಞುದ್ದಿಸಿಕೇನಾತಿ ಪುರಿಮಸ್ಸೇವತ್ಥದೀಪನಂ।
ಸೇಸಕಂ ಉಪನೇನ್ತಿಯಾತಿ ಯದತ್ಥಾಯ ದಿನ್ನೋ, ತಂ ಚೇತಾಪೇತ್ವಾ ಅವಸೇಸಂ ಅಞ್ಞಸ್ಸತ್ಥಾಯ ಉಪನೇನ್ತಿಯಾ। ಸಾಮಿಕೇ ಅಪಲೋಕೇತ್ವಾತಿ ದಾಯಕೇ ಆಪುಚ್ಛಿತ್ವಾ। ಏವರೂಪಾಸೂ ಆಪದಾಸು ಉಪನೇನ್ತೀನನ್ತಿ ಏವರೂಪೇಸು ಉಪದ್ದವೇಸು ಅಞ್ಞಸ್ಸ ಯಸ್ಸ ಕಸ್ಸಚಿ ಅತ್ಥಾಯ ಉಪನೇನ್ತೀನಂ।
ಪಠಮಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
೭. ದುತಿಯಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ
ನ ‘‘ಸಯಂ ಯಾಚಿತಕೇನಾಪೀ’’ತಿ। ವುತ್ತಞ್ಹೇತಂ ಪಾಳಿಯಂ ‘‘ಭಿಕ್ಖುನಿಯೋ ತೇನ ಚ ಪರಿಕ್ಖಾರೇನ ಸಯಮ್ಪಿ ಯಾಚಿತ್ವಾ ಭೇಸಜ್ಜಂ ಚೇತಾಪೇತ್ವಾ ಪರಿಭುಞ್ಜಿಂಸೂ’’ತಿ (ಪಾಚಿ॰ ೭೬೩)। ಮಾತಿಕಾಯಂ ಪನ ಗಮ್ಯಮಾನತ್ತಾ ಪಿ-ಸದ್ದೋ ನಪ್ಪಯುತ್ತೋ। ಗಮ್ಯಮಾನತ್ಥಸ್ಸ ಹಿ ಸದ್ದಸ್ಸ ಪಯೋಗಂ ಪತಿ ಕಾಮಚಾರೋತಿ ಯುತ್ತಿ।
ದುತಿಯಸಙ್ಘಿಕಚೇತಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
೮-೯-೧೦. ಪಠಮಗಣಿಕಚೇತಾಪನಾದಿಸಿಕ್ಖಾಪದವಣ್ಣನಾ
ಅಟ್ಠಮನವಮದಸಮಾನಿ ಉತ್ತಾನತ್ಥಾನೇವ।
ಪಠಮಗಣಿಕಚೇತಾಪನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ।
ಪತ್ತವಗ್ಗೋ ಪಠಮೋ।
೨. ಚೀವರವಗ್ಗೋ
೧೧. ಗರುಪಾವುರಣಸಿಕ್ಖಾಪದವಣ್ಣನಾ
ಯಸ್ಮಾ ಪವಾರಿತಟ್ಠಾನೇ ವಿಞ್ಞತ್ತಿ ನಾಮ ನ ಪಟಿಸೇಧೇತಬ್ಬಾ, ತಸ್ಮಾ ಭಗವಾ ಧಮ್ಮನಿಮನ್ತನವಸೇನ ಪವಾರಿತಟ್ಠಾನೇ ‘‘ವದೇಥಾಯ್ಯೇ, ಯೇನತ್ಥೋ’’ತಿ (ಸಾರತ್ಥ॰ ಟೀ॰ ಪಾಚಿತ್ತಿಯ ೩.೭೮೪) ವುತ್ತಾಯ ಚತುಕ್ಕಂಸಪರಮಂ ವಿಞ್ಞಾಪೇತಬ್ಬನ್ತಿ ಪರಿಚ್ಛೇದಂ ದಸ್ಸೇತೀತಿ ವೇದಿತಬ್ಬಂ। ತೇನೇವ ‘‘ಚೇತಾಪೇತಬ್ಬನ್ತಿ ಠಪೇತ್ವಾ ಸಹಧಮ್ಮಿಕೇ ಚ ಞಾತಕಪ್ಪವಾರಿತೇ ಚ ಅಞ್ಞೇನ ಕಿಸ್ಮಿಞ್ಚಿದೇವ ಗುಣೇ ಪರಿತುಟ್ಠೇನ ‘ವದೇಥಾಯ್ಯೇ, ಯೇನತ್ಥೋ’ತಿ ವುತ್ತಾಯ ವಿಞ್ಞಾಪೇತಬ್ಬ’’ನ್ತಿ ವುತ್ತಂ। ರಾಜಾನನ್ತಿ ಪಸೇನದಿಕೋಸಲರಾಜಾನಂ।
ಗರುಪಾವುರಣಸಿಕ್ಖಾಪದವಣ್ಣನಾ ನಿಟ್ಠಿತಾ।
೧೨. ಲಹುಪಾವುರಣಸಿಕ್ಖಾಪದವಣ್ಣನಾ
ದುತಿಯಂ
ಲಹುಪಾವುರಣಸಿಕ್ಖಾಪದವಣ್ಣನಾ ನಿಟ್ಠಿತಾ।
ಚೀವರವಗ್ಗೋ ದುತಿಯೋ।
ಇತಿ ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ
ವಿನಯತ್ಥಮಞ್ಜೂಸಾಯಂ ಲೀನತ್ಥಪ್ಪಕಾಸನಿಯಂ
ಭಿಕ್ಖುನಿಪಾತಿಮೋಕ್ಖೇ ನಿಸ್ಸಗ್ಗಿಯವಣ್ಣನಾ ನಿಟ್ಠಿತಾ।