ಪಾಟಿದೇಸನೀಯಕಣ್ಡಂ
೨. ತೇಲವಿಞ್ಞಾಪನಾದಿಸಿಕ್ಖಾಪದವಣ್ಣನಾ
ಪಾಳಿಯಂ ಅನಾಗತೇಸು ಪನ ಅಟ್ಠಸುಪೀತಿ ಪಾಳಿಮುತ್ತಕೇಸು ಸಪ್ಪಿಆದೀಸು ಅಟ್ಠಸುಪಿ।
ತೇಲವಿಞ್ಞಾಪನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ।
ಇತಿ ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ
ವಿನಯತ್ಥಮಞ್ಜೂಸಾಯಂ ಲೀನತ್ಥಪ್ಪಕಾಸನಿಯಂ
ಭಿಕ್ಖುನಿಪಾತಿಮೋಕ್ಖೇ ಪಾಟಿದೇಸನೀಯವಣ್ಣನಾ ನಿಟ್ಠಿತಾ।
೧. ಪರಿಮಣ್ಡಲಾದಿಸಿಕ್ಖಾಪದವಣ್ಣನಾ
ಸೇಖಿಯಾನಿ ಚೇವಾತಿ ಪಞ್ಚಸತ್ತತಿ ಸೇಖಿಯಾನಿ ಚೇವ। ‘‘ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ವೇದಿತಬ್ಬಾ’’ತಿ ಇಮಿನಾ ಯಸ್ಮಾ ತಾದಿಸಂಯೇವೇತ್ಥ ಅತ್ಥವಿನಿಚ್ಛಯಂ ವಿದೂ ವದನ್ತಿ, ತಸ್ಮಾ ವಿಸುಂ ತೇಸಂ ಅತ್ಥವಣ್ಣನಾ ನ ವುತ್ತಾ। ತತ್ಥ ಯಾ ವುತ್ತಾ, ಸಾ ಇಧಾಪಿ ವುತ್ತಾಯೇವಾತಿ ದಸ್ಸೇತಿ।
ಪರಿಮಣ್ಡಲಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ।
ಇತಿ ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ
ವಿನಯತ್ಥಮಞ್ಜೂಸಾಯಂ ಲೀನತ್ಥಪ್ಪಕಾಸನಿಯಂ
ಭಿಕ್ಖುನಿಪಾತಿಮೋಕ್ಖವಣ್ಣನಾ ನಿಟ್ಠಿತಾ।
ನಿಗಮನಕಥಾವಣ್ಣನಾ
ಯಂ ‘‘ಮಹಾವಿಹಾರವಾಸೀನ’’ನ್ತಿ ಇದಂ ಪುರಿಮಪಚ್ಛಿಮಪದೇಹಿ ಸದ್ಧಿಂ ಸಮ್ಬನ್ಧಿತಬ್ಬಂ, ಮಹಾವಿಹಾರವಾಸೀನಂ ಪೋರಾಣಟ್ಠಕಥಾಹಿ ವಾತಿ ಚ। ಪಾಳಿಯತ್ಥಞ್ಚ ಕೇವಲನ್ತಿ ಸಕಲಂ ಪಾಳಿಅತ್ಥಞ್ಚ, ಉಭತೋವಿಭಙ್ಗಞ್ಚಾತಿ ವುತ್ತಂ ಹೋತಿ। ಏತ್ಥಾತಿ ಏತಿಸ್ಸಂ ಕಙ್ಖಾವಿತರಣಿಯಂ। ಯಸ್ಮಾ ಯನ್ತಿ ಯಂ ಪದಂ। ಸೀಹಳಟ್ಠಕಥಾನಯನ್ತಿ ಸೀಹಳಮಾತಿಕಟ್ಠಕಥಾನಯಂ। ಅಟ್ಠಕಥಾಸಾರನ್ತಿ ಸೀಹಳಮಾತಿಕಟ್ಠಕಥಾಯಂ ಅತ್ಥಸಾರಂ, ಅಥ ವಾ ವಿನಯಟ್ಠಕಥಾಸು ಅತ್ಥಸಾರಂ। ತೇನೇತಂ ದಸ್ಸೇತಿ – ಸೀಹಳಮಾತಿಕಟ್ಠಕಥಾಯಂ ಅತ್ಥಸಾರಂ ಆದಾಯ ಇಮಂ ಕಙ್ಖಾವಿತರಣಿಂ ಕರೋನ್ತೋ ವಿನಯಟ್ಠಕಥಾಸುಪಿ ಇಧ ವಿನಿಚ್ಛಯೇ ಯೋಗಕ್ಖಮಂ ಅತ್ಥಸಾರಂ ಆದಾಯೇವ ಅಕಾಸಿನ್ತಿ।
ಇದಾನಿ ಸದೇವಕಸ್ಸ ಲೋಕಸ್ಸ ಅಚ್ಚನ್ತಸುಖಾಧಿಗಮಾಯ ಅತ್ತನೋ ಪುಞ್ಞಂ ಪರಿಣಾಮೇನ್ತೋ ‘‘ಯಥಾ ಚ ನಿಟ್ಠಂ ಸಮ್ಪತ್ತಾ’’ತಿಆದಿಗಾಥಾದ್ವಯಮಾಹ। ಕಲ್ಯಾಣನಿಸ್ಸಿತಾತಿ ಕುಸಲನಿಸ್ಸಿತಾ। ಸಬ್ಬಸತ್ತಾನನ್ತಿ ಕಾಮಾವಚರಾದಿಭೇದಾನಂ ಸಬ್ಬೇಸಂ ಸತ್ತಾನಂ।
ನಿಗಮನಕಥಾವಣ್ಣನಾ ನಿಟ್ಠಿತಾ।
ನಿಗಮನಕಥಾ
ಏತ್ತಾವತಾ ಚ –
೧.
ಲಙ್ಕಿಸ್ಸರೋ ಯೋ ವಿಜಿತಾರಿರಾಜೋ।
ರಾಜಾ ಪರಕ್ಕನ್ತಭುಜೋ ಯಸಸ್ಸೀ।
ತಿಧಾಗತಂ ಸೀಹಳಮೇಕರಜ್ಜಂ।
ಅಕಾ ನಿಕಾಯಞ್ಚ ತಥಾ ಸಮಗ್ಗಂ॥
೨.
ಪುರೇ ಪುಲತ್ಥಿಮ್ಹಿ ವರೇ ಪುರಾನಂ।
ಮಜ್ಝಮ್ಹಿ ನಾನಾರತನಾಕರಾನಂ।
ಅನನ್ತಸಮ್ಪತ್ತಿಭರಾಭಿರಾಮೇ।
ವರಾಚಲುತ್ತಙ್ಗಘರಾಭಿರಾಮೇ॥
೩.
ಅಭೇಜ್ಜಪಾಕಾರಸುಗೋಪುರಸ್ಮಿಂ
ನಿರಾಕುಲಾನೇಕಕುಲಾಕುಲಸ್ಮಿಂ।
ಮುನಿನ್ದದಾಠಙ್ಕುರವಾಸಭೂತೇ।
ಯೋ ಲೋಚನಾನನ್ದವಹೇ ವಸನ್ತೋ॥
೪.
ಸುಫುಲ್ಲಿತಬ್ಭೋರುಹಸಾದುಸೀತ
ಪಸನ್ನನೀರೇಹಿ ಜಲಾಸಯೇಹಿ।
ಸುಪುಪ್ಫಿತಾನೇಕಕದಮ್ಬಜಮ್ಬು-
ಪುನ್ನಾಗನಾಗಾದಿಹಿ ವಾಭಿರಮ್ಮೇ॥
೫.
ಸುಧಾವದಾತೇಹಿ ಮನೋಹರೇಹಿ।
ಪಾಕಾರಪನ್ತೀಹಿ ಚ ಗೋಪುರೇಹಿ।
ವಿಕಿಣ್ಣಮುತ್ತಾಫಲಸನ್ನಿಭೇಹಿ।
ವಿಲೋಕನೀಯೇಹಿ ಸುಧಾತಲೇಹಿ॥
೬.
ಕತ್ವಾನ ಪಾಸಾದಸಹಸ್ಸರಮ್ಮೇ।
ತಹಿಂ ತಹಿಂ ಪೀತಿಕರೇ ವಿಹಾರೇ।
ಮಹಾದಯೋ ಜೇತವನಾದಯೋಪಿ।
ಸುಸಂಯಮಾನಂ ಯತಿನಂ ಅದಾಸಿ॥
೭.
ಯೋ ಸಾದುಭೂತಂ ಚತುಪಚ್ಚಯಞ್ಚ।
ಗುಣಪ್ಪಸನ್ನೋ ಸಮಣೇಸು ತೇಸು।
ನಿಚ್ಚಂ ಮಹೋಘಂ ವಿಯ ವತ್ತಯನ್ತೋ।
ಯೋಜೇತಿ ತೇ ಗನ್ಥವಿಪಸ್ಸನಾಸು॥
೮.
ಕಾರಿತೇಸು ವಿಹಾರೇಸು, ತೇನ ತೇಸು ಯಸಸ್ಸಿನಾ।
ರಮ್ಮೋ ಯೋ ಪಚ್ಛಿಮಾರಾಮೋ, ಪುಪ್ಫಾರಾಮಾದಿಸೋಭಿತೋ॥
೯.
ಪರಿವೇಣಮ್ಹಿ ನಾಮೇನ, ತಹಿಂ ಚೋಳಕುಲನ್ತಿಕೇ।
ಪಾಸಾದೇ ದಸ್ಸನೀಯಮ್ಹಿ, ವಸನ್ತೋ ಕರುಣಾಪರೋ॥
೧೦.
ಸಿಸ್ಸೋ
ಸಾರಿಪುತ್ತಮಹಾಥೇರ-ಮಹಾಸಾಮಿಸ್ಸ ತಾದಿನೋ॥
೧೧.
ಧೀರಾನೇಕಗುಣೋಘೇನ, ಥೇರೇನ ಸುಚಿವುತ್ತಿನಾ।
ವಿನಯಟ್ಠಿತಿಕಾಮೇನ, ಸುಮೇಧೇನಾಭಿಯಾಚಿತೋ॥
೧೨.
ಸೋ ಬುದ್ಧನಾಗತ್ಥೇರೋಹಂ, ಭಿಕ್ಖೂನಂ ಪರಮಂ ಹಿತಂ।
ಮಹಾವಿಹಾರವಾಸೀನಂ, ಯತೀನಂ ಸಮಯಾನುಗಂ॥
೧೩.
ವಿನಯತ್ಥಾದಿಮಞ್ಜೂಸಂ
ಮಾತಿಕಟ್ಠಕಥಾಯೇಮಂ, ಅಕಾಸಿಂ ಸಾಧು ವಣ್ಣನಂ॥
೧೪.
ಸಾಯಂ ಸುಬೋಧಾ ಬುಧವಣ್ಣನೀಯಾ।
ಸಂವಣ್ಣನಾ ಸತ್ತಸಹಸ್ಸಮತ್ತಾ।
ನಿರಾಕರೋನ್ತೀ ವಿನಯಮ್ಹಿ ಮೋಹಂ।
ತಮಂ ಚರನ್ತೀ ಸಸಿ ಖೇವ ಭಾತು॥
೧೫.
ಆಕಙ್ಖಮಾನೇನ ಪರತ್ಥಮಿಟ್ಠಂ।
ಮಹತ್ಥಸಾರಂ ಸುವಿನಿಚ್ಛಯಞ್ಚ।
ಸಂವಣ್ಣನಂ ಸಾಧು ಪಕುಬ್ಬತಾ ಯಂ।
ಚಿತಂ ಮಯಾ ಪುಞ್ಞಮನಪ್ಪಭೂತಂ॥
೧೬.
ಪುಞ್ಞೇನ ತೇನಾಚಿತದಾನಸೀಲ-
ಮಯಾದಿನಾನೇಕವಿಧೇನ ಚೇವ।
ಸತ್ತಾ ಅನೀಘಾ ಸುಖಿನೋ ಅವೇರಾ।
ಪಪ್ಪೋನ್ತು ಸಬ್ಬೇ ಸುಗತಿಂ ಸಿವಞ್ಚ॥
೧೭.
ಸದ್ಧಿಂ ಯಥೋಪದ್ದವಮನ್ತರೇನ।
ಗತಾ ಹಿ ಲೀನತ್ಥಪದೀಪನೀಯಂ।
ತಥಾ
ಮನೋರಥಾ ಸಿದ್ಧಿಮುಪೇನ್ತು ನಿಚ್ಚಂ॥
೧೮.
ಕಾಲೇ ಪವಸ್ಸನ್ತು ಸದಾ ಪಯೋದಾ।
ಧಮ್ಮೇನ ಪಾಲೇನ್ತು ಮಹಿಂ ಮಹಿನ್ದಾ।
ಸತ್ತಾ ಪಸನ್ನಾ ರತನತ್ತಯಸ್ಮಿಂ।
ದಾನಾದಿಪುಞ್ಞಾಭಿರತಾ ಭವನ್ತೂತಿ॥
ವಿನಯತ್ಥಮಞ್ಜೂಸಾ ಲೀನತ್ಥಪ್ಪಕಾಸನೀನಾಮಿಕಾಕಙ್ಖಾವಿತರಣೀಅಭಿನವಟೀಕಾ ನಿಟ್ಠಿತಾ।