ಸೇಖಿಯಕಣ್ಡಂ

ಸೇಖಿಯೇಸು ಸತಿಪಿ ವೀತಿಕ್ಕಮೇ ಅನಾದರಿಯಾಪೇಕ್ಖಸ್ಸೇವ ಆಪತ್ತೀತಿ ದಸ್ಸನತ್ಥಂ ಕಾರಕೋ ನ ವುತ್ತೋ। ಅಯಞ್ಹಿ ವಿನಯಧಮ್ಮತಾ, ಯದಿದಂ ಸಾಪೇಕ್ಖೇ ಕಾರಕನಿದ್ದೇಸೋ, ಸೋ ವುತ್ತನಿಯಮೇ ವಿಧಿ, ಭುಮ್ಮಕರಣಞ್ಚ। ಅಟ್ಠಙ್ಗುಲಾಧಿಕಮ್ಪಿ ಓತಾರೇತ್ವಾ ನಿವಾಸೇತುಂ ವಟ್ಟತಿ। ತತೋ ಪರಂ ಓತಾರೇನ್ತಸ್ಸ ದುಕ್ಕಟನ್ತಿ ಮಹಾಅಟ್ಠಕಥಾಯಂ ವುತ್ತಂ। ಆರಾಮೇ ವಾತಿ ಬುದ್ಧುಪಟ್ಠಾನಾದಿಕಾಲೇ। ಪಾರುಪಿತಬ್ಬನ್ತಿ ಉತ್ತರಾಸಙ್ಗಕಿಚ್ಚವಸೇನ ವುತ್ತಂ।

ಠತ್ವಾತಿ ಏತ್ಥ ಗಚ್ಛನ್ತೋಪಿ ಪರಿಸ್ಸಯಾಭಾವಂ ಓಲೋಕೇತುಂ ಲಭತಿಯೇವಾತಿ (ವಜಿರ॰ ಟೀ॰ ಪಾಚಿತ್ತಿಯ ೫೮೨) ಲಿಖಿತಂ। ಯಥಾ ವಾಸೂಪಗತಸ್ಸ ಅನ್ತರಘರೇ ಕಾಯಂ ವಿವರಿತ್ವಾ ನಿಸೀದಿತುಂ ವಟ್ಟತಿ, ತಥಾ ತಸ್ಸ ಸನ್ತಿಕೇ ಗನ್ತುಕಾಮಸ್ಸಪಿ ಕಾಯಬನ್ಧನಂ ಅಬನ್ಧಿತ್ವಾ ಸಙ್ಘಾಟಿಂ ಅಪಾರುಪಿತ್ವಾ ಗಾಮಪ್ಪವೇಸನಮನಾರೋಚೇತ್ವಾ ಯಥಾಕಾಮಂ ಗನ್ತುಂ ವಟ್ಟತಿ। ತಸ್ಮಾ ಅದ್ಧಾನಮಗ್ಗಗಮನಕಾಲೇ ಏಕೋ ಭಿಕ್ಖು ಗಾಮಪ್ಪವೇಸನವತ್ತಂ ಪೂರೇತ್ವಾ ಗಾಮಂ ಪವಿಸಿತ್ವಾ ಏಕಂ ಆವಸಥಂ ಪುರತೋವ ಠಿತಂ ಪತ್ವಾ ಪರಿಕ್ಖಾರಂ ಠಪೇತ್ವಾ ವಾಸೂಪಗತೋ ಚೇ ಹೋತಿ, ಇತರೇಹಿ ತಸ್ಸ ಸನ್ತಿಕಂ ಯಥಾಸುಖಂ ಗನ್ತುಂ ವಟ್ಟತಿ। ಕೋ ಪನ ವಾದೋ ಚತೂಹಪಞ್ಚಾಹಂ ವಾಸಮಧಿಟ್ಠಾಯ ವಸಿತಭಿಕ್ಖೂನಂ ಸನ್ತಿಕಂ ಗನ್ತುಞ್ಚ ವಾಸೂಪಗತಾನಂ ಸನ್ತಿಕಂ ಗನ್ತುಞ್ಚ ವಟ್ಟತೀತಿ। ಬುದ್ಧಪೂಜಮ್ಪಿ ಯಥಾಸುಖಂ ಗನ್ತುಂ ವಟ್ಟತಿ। ವುತ್ತಮ್ಪಿ ಚೇತಂ ಅಟ್ಠಕಥಾಯಂ ‘‘ಅನಾಪತ್ತಿ ಕಾರಣಂ ಪಟಿಚ್ಚ ತಹಂ ತಹಂ ಓಲೋಕೇತೀ’’ತಿ। ತತ್ಥ ಕಾರಣಂ ನಾಮ ಆಮಿಸಪೂಜಾತಿ ವೇದಿತಬ್ಬಾತಿ ಲಿಖಿತಂ।

ಛಬ್ಬೀಸತಿಸಾರುಪ್ಪವಣ್ಣನಾ ನಿಟ್ಠಿತಾ।

ಯಸ್ಮಾ ‘‘ಸಮತಿತ್ತಿಕೋ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ’’ತಿ (ಪಾಚಿ॰ ೬೦೨-೬೦೩) ವಚನಂ ಪಿಣ್ಡಪಾತೋ ಸಮಪುಣ್ಣೋ ಪಟಿಗ್ಗಹೇತಬ್ಬೋತಿ ದೀಪೇತಿ, ತಸ್ಮಾ ಅತ್ತನೋ ಹತ್ಥಗತೇ ಪತ್ತೇ ಪಿಣ್ಡಪಾತೋ ದಿಯ್ಯಮಾನೋ ಥೂಪೀಕತೋಪಿ ಚೇ ಹೋತಿ, ವಟ್ಟತೀತಿ ದೀಪಿತೋ ಹೋತಿ। ಸೂಪೋದನವಿಞ್ಞತ್ತಿಯಂ ಮುಖೇ ಪಕ್ಖಿಪಿತ್ವಾ ವಿಪ್ಪಟಿಸಾರೇ ಉಪ್ಪನ್ನೇ ಪುನ ಉಗ್ಗಿರಿತುಕಾಮಸ್ಸಾಪಿ ಸಹಸಾ ಚೇ ಪವಿಸತಿ, ಏತ್ಥ ಅಸಞ್ಚಿಚ್ಚ ಭುಞ್ಜತಿ ನಾಮ। ವಿಞ್ಞತ್ತಿಕತಞ್ಚ ಅಕತಞ್ಚ ಏಕಸ್ಮಿಂ ಠಾನೇ ಠಿತಂ ಸಹಸಾ ಅನುಪಧಾರೇತ್ವಾ ಗಹೇತ್ವಾ ಭುಞ್ಜತಿ, ಅಸ್ಸತಿಯಾ ಭುಞ್ಜತಿ ನಾಮ।

ಸಯಂ ಯಾನಗತೋ ಹುತ್ವಾ, ಯಥಾ ಯಾನಗತಸ್ಸ ಚೇ।

ಅಲಂ ವತ್ಥುಂ ತಥಾ ನಾಲಂ, ಸಛತ್ತೋ ಛತ್ತಪಾಣಿನೋ॥

‘‘ಸೂಪೋದನವಿಞ್ಞತ್ತಿಸಿಕ್ಖಾಪದಂ ಥೇಯ್ಯಸತ್ಥಸಮುಟ್ಠಾನಂ, ಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ಅಕುಸಲಚಿತ್ತಂ, ದುಕ್ಖವೇದನ’’ನ್ತಿ ಪಾಠೋ।

ಸೇಖಿಯವಣ್ಣನಾ ನಿಟ್ಠಿತಾ।

ಭಿಕ್ಖುಪಾತಿಮೋಕ್ಖವಣ್ಣನಾ ನಿಟ್ಠಿತಾ।

॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥