ಮಹಾವಗ್ಗೋ
ಮಹಾಖನ್ಧಕಕಥಾ
ಪಬ್ಬಜ್ಜಾಕಥಾ
೨೪೪೪.
ಸೀಲಕ್ಖನ್ಧಾದಿಯುತ್ತೇನ
ಖನ್ಧಕೇಪಿ ಪವಕ್ಖಾಮಿ, ಸಮಾಸೇನ ವಿನಿಚ್ಛಯಂ॥
೨೪೪೫.
ಮಾತರಾ ಅನನುಞ್ಞಾತಂ, ಪಿತರಾ ವಾಪಿ ಭಿಕ್ಖುನೋ।
ಭಣ್ಡುಕಮ್ಮಮಪುಚ್ಛಿತ್ವಾ, ಪಬ್ಬಾಜೇನ್ತಸ್ಸ ದುಕ್ಕಟಂ॥
೨೪೪೬.
ಉದ್ದೇಸಪರಿಪುಚ್ಛಾಯ, ಸಯಂ ಚೇ ಬ್ಯಾವಟೋ ಸಿಯಾ।
ದಹರೋ ಆಣಾಪೇತಬ್ಬೋ, ಪಬ್ಬಾಜೇತ್ವಾನಯಾತಿ ಚ॥
೨೪೪೭.
ಉಪಜ್ಝಾಯಮಥುದ್ದಿಸ್ಸ, ಅವುತ್ತೋ ದಹರೋ ಪನ।
ಪಬ್ಬಾಜೇತಿ ಸಚೇ ತಂ ಸೋ, ಸಯಮೇವಾಪಿ ವಟ್ಟತಿ॥
೨೪೪೮.
ಸಾಮಣೇರೋಪಿ ವತ್ತಬ್ಬೋ, ದಹರೋ ನತ್ಥಿ ತತ್ಥ ಚೇ।
‘‘ಖಣ್ಡಸೀಮಮಿಮಂ ನೇತ್ವಾ, ಪಬ್ಬಾಜೇತ್ವಾನಯಾ’’ತಿ ಚ॥
೨೪೪೯.
ಸರಣಾನಿ ಪನೇತಸ್ಸ, ದಾತಬ್ಬಾನೇವ ಅತ್ತನಾ।
ಏವಮ್ಪಿ ಭಿಕ್ಖುನಾಯೇವ, ಹೋತಿ ಪಬ್ಬಾಜಿತೋ ನರೋ॥
೨೪೫೦.
ಪುರಿಸಂ ಭಿಕ್ಖುತೋ ಅಞ್ಞೋ, ಪಬ್ಬಾಜೇತಿ ನ ವಟ್ಟತಿ।
ಇತ್ಥಿಂ ಭಿಕ್ಖುನಿತೋ ಅಞ್ಞೋ, ಪಬ್ಬಾಜೇತಿ ನ ವಟ್ಟತಿ॥
೨೪೫೧.
ಸಾಮಣೇರೋಪಿ ವಾ ದಾತುಂ, ಸಾಮಣೇರೀಪಿ ವಾ ತಥಾ।
ಆಣತ್ತಿಯಾ ಉಭಿನ್ನಮ್ಪಿ, ಕಾಸಾಯಾನಿ ಲಭನ್ತಿ ತೇ॥
೨೪೫೨.
ಸಯಮೇವ ಚ ಯಂ ಕಿಞ್ಚಿ, ಪಬ್ಬಾಜೇನ್ತೇನ ಭಿಕ್ಖುನಾ।
ಕೇಸಾಪನಯನಂ ಕತ್ವಾ, ಪಠಮಂ ಉದಕೇ ಪುನ॥
೨೪೫೩.
ನ್ಹಾಪೇತಬ್ಬೋ
ಸರೀರೇ ಪೀಳಕಾ ವಾಪಿ, ಕಚ್ಛು ವಾ ತಸ್ಸ ಹೋನ್ತಿ ಚೇ॥
೨೪೫೪.
ಮಾತಾ ಯಥಾ ನಿಯಂಪುತ್ತಂ, ನ ಜಿಗುಚ್ಛತಿ ಸಬ್ಬಸೋ।
ನ್ಹಾಪೇತಬ್ಬೋವ ಯತಿನಾ, ತಥೇವ ಅಜಿಗುಚ್ಛತಾ॥
೨೪೫೫.
ಕಸ್ಮಾ? ಪನೇತ್ತಕೇನಾಪಿ, ಉಪಕಾರೇನ ಸಾಸನೇ।
ಸೋ ಸದಾ ಬಲವಸ್ನೇಹೋ, ಹೋತುಪಜ್ಝಾಯಕಾದಿಸು॥
೨೪೫೬.
ವಿನೋದೇತ್ವಾ ಪನುಪ್ಪನ್ನಂ, ಉಕ್ಕಣ್ಠಂ ಕುಲಪುತ್ತಕಾ।
ಸಿಕ್ಖಾಯೋ ಪರಿಪೂರೇತ್ವಾ, ನಿಬ್ಬಾನಂ ಪಾಪುಣನ್ತಿ ಹಿ॥
೨೪೫೭.
ಗನ್ಧಚುಣ್ಣೇನ ವಾ ಪಚ್ಛಾ, ಚುಣ್ಣೇನಪಿ ಹಲಿದ್ದಿಯಾ।
ಸರೀರಂ ತಸ್ಸ ಸೀಸಞ್ಚ, ಉಬ್ಬಟ್ಟೇತ್ವಾ ಪುನಪ್ಪುನಂ॥
೨೪೫೮.
ಗಿಹಿಗನ್ಧಂ ವಿನೋದೇತ್ವಾ, ಕಾಸಾಯಾನಿ ಪನೇಕತೋ।
ದ್ವತ್ತಿಕ್ಖತ್ತುಂ ಸಕಿಂ ವಾಪಿ, ದಾತಬ್ಬಾನಿಸ್ಸ ಭಿಕ್ಖುನಾ॥
೨೪೫೯.
ಅಥ ಹತ್ಥೇಪಿ ವಾ ತಸ್ಸ, ಅದತ್ವಾ ಸಯಮೇವ ತಂ।
ಅಚ್ಛಾದೇತಿ ಉಪಜ್ಝಾಯೋ, ವಟ್ಟತಾಚರಿಯೋಪಿ ವಾ॥
೨೪೬೦.
ನಿವಾಸೇತಿ ಅನಾಣತ್ತೋ, ಸೋ ಪಾರುಪತಿ ವಾ ಸಯಂ।
ಅಪನೇತ್ವಾ ತತೋ ಸಬ್ಬಂ, ಪುನ ದಾತಬ್ಬಮೇವ ತಂ॥
೨೪೬೧.
ಭಿಕ್ಖುನಾ ತು ಸಹತ್ಥೇನ, ತಥಾ ಆಣತ್ತಿಯಾಪಿ ವಾ।
ದಿನ್ನಂ ವಟ್ಟತಿ ಕಾಸಾವಂ, ನಾದಿನ್ನಂ ಪನ ವಟ್ಟತಿ॥
೨೪೬೨.
ತಸ್ಸೇವ ಸನ್ತಕಂ ವಾಪಿ, ಕಾ ಕಥಾ ಅತ್ತಸನ್ತಕೇ।
ವನ್ದಾಪೇತ್ವಾ ತತ್ಥ ಭಿಕ್ಖೂ, ಕಾರಾಪೇತ್ವಾನ ಉಕ್ಕುಟಿಂ॥
೨೪೬೩.
ಅಞ್ಜಲಿಂ ಪಗ್ಗಹಾಪೇತ್ವಾ, ದಾತಬ್ಬಂ ಸರಣತ್ತಯಂ।
ಪಟಿಪಾಟಿವಸೇನೇವ, ನ ಚ ಉಪ್ಪಟಿಪಾಟಿಯಾ॥
೨೪೬೪.
ಸಚೇ ಏಕಪದಂ ವಾಪಿ, ದೇತಿ ಏಕಕ್ಖರಮ್ಪಿ ವಾ।
ಪಟಿಪಾಟಿಂ ವಿರಜ್ಝಿತ್ವಾ, ಗಹಿತಂ ಚೇ ನ ವಟ್ಟತಿ॥
೨೪೬೫.
ತಿಕ್ಖತ್ತುಂ ಯದಿ ವಾ ದೇತಿ, ಬುದ್ಧಂ ಸರಣಮೇವ ವಾ।
ತಥಾ ಸೇಸೇಸು ಚೇವಮ್ಪಿ, ನ ದಿನ್ನಾನೇವ ಹೋನ್ತಿ ಹಿ॥
೨೪೬೬.
ಕತ್ವಾನುನಾಸಿಕನ್ತಾನಿ
ವಿಚ್ಛಿನ್ದಿತ್ವಾಥ ಮ-ನ್ತಾನಿ, ದಾತಬ್ಬಾನಿ ವಿಜಾನತಾ॥
೨೪೬೭.
ಉಪಸಮ್ಪದಕಮ್ಮಂ
ನ ಹೋತಿ ಪನ ಪಬ್ಬಜ್ಜಾ, ಉಭತೋಸುದ್ಧಿಯಾ ವಿನಾ॥
೨೪೬೮.
ತಸ್ಮಾ ಆಚರಿಯೇನಾಪಿ, ತಥಾನ್ತೇವಾಸಿಕೇನಪಿ।
ಬು-ದ್ಧ-ಕಾರಾದಯೋ ವಣ್ಣಾ, ಠಾನಕರಣಸಮ್ಪದಂ॥
೨೪೬೯.
ಅಹಾಪೇನ್ತೇನ ವತ್ತಬ್ಬಾ, ಪಬ್ಬಜ್ಜಾಗುಣಮಿಚ್ಛತಾ।
ಏಕವಣ್ಣವಿನಾಸೇನ, ಪಬ್ಬಜ್ಜಾ ಹಿ ನ ರೂಹತಿ॥
೨೪೭೦.
ಯದಿ ಸಿದ್ಧಾಪಿ ಪಬ್ಬಜ್ಜಾ, ಸರಣಾಗಮನತೋವ ಹಿ।
ದಾತಬ್ಬಾ ದಸ ಸೀಲಾನಿ, ಪೂರಣತ್ಥಾಯ ಭಿಕ್ಖುನಾ॥
ಪಬ್ಬಜ್ಜಾಕಥಾ।
೨೪೭೧.
ಉಪಜ್ಝಾಯಮಥಾಚರಿಯಂ, ನಿಸ್ಸಾಯ ವಸತಾ ಪನ।
ಕತ್ತಬ್ಬಾನೇವ ವತ್ತಾನಿ, ಪಿಯಸೀಲೇನ ಭಿಕ್ಖುನಾ॥
೨೪೭೨.
ಆಸನಂ ಪಞ್ಞಪೇತಬ್ಬಂ, ದನ್ತಕಟ್ಠಂ ಮುಖೋದಕಂ।
ದಾತಬ್ಬಂ ತಸ್ಸ ಕಾಲೇನ, ಸಚೇ ಯಾಗು ಭವಿಸ್ಸತಿ॥
೨೪೭೩.
ಯಾಗು ತಸ್ಸುಪನೇತಬ್ಬಾ, ಸಙ್ಘತೋ ಕುಲತೋಪಿ ವಾ।
ಪತ್ತೇ ವತ್ತಞ್ಚ ಕಾತಬ್ಬಂ, ವತ್ತಂ ಗಾಮಪ್ಪವೇಸನೇ॥
೨೪೭೪.
ಚೀವರೇ ಯಾನಿ ವತ್ತಾನಿ, ವುತ್ತಾನಿ ಹಿ ಮಹೇಸಿನಾ।
ಸೇನಾಸನೇ ತಥಾ ಪಾದ-ಪೀಠಕಥಲಿಕಾದಿಸು॥
೨೪೭೫.
ಏವಮಾದೀನಿ ವತ್ತಾನಿ, ಸಬ್ಬಾನಿ ಪನ ರೋಗತೋ।
ವುಟ್ಠಾನಾಗಮನನ್ತಾನಿ, ಸತ್ತತಿಂಸಸತಂ ಸಿಯುಂ॥
೨೪೭೬.
ವತ್ತಭೇದೇನ ಸಬ್ಬತ್ಥ, ದುಕ್ಕಟಂ ತು ಪಕಾಸಿತಂ।
ಅನಾದರವಸೇನೇವ, ಅಕರೋನ್ತಸ್ಸ ಭಿಕ್ಖುನೋ॥
ಉಪಜ್ಝಾಯಾಚರಿಯವತ್ತಕಥಾ।
೨೪೭೭.
ಉಪಜ್ಝಾಯಸ್ಸ
ಸತಂ ತೇರಸ ಹೋನ್ತೇವ, ತಥಾನ್ತೇವಾಸಿಕೇಪಿ ಚ॥
ಸದ್ಧಿವಿಹಾರಿಕನ್ತೇವಾಸಿಕವತ್ತಕಥಾ।
೨೪೭೮.
ಪಕ್ಕನ್ತೇ ವಾಪಿ ವಿಬ್ಭನ್ತೇ, ಪಕ್ಖಸಙ್ಕನ್ತಕೇ ಮತೇ।
ಆಣತ್ತಿಯಾ ಉಪಜ್ಝಾಯಾ, ಪಸ್ಸಮ್ಭತಿ ಚ ನಿಸ್ಸಯೋ॥
೨೪೭೯.
ಹೋತಿ ಆಚರಿಯಮ್ಹಾಪಿ, ಛಧಾ ನಿಸ್ಸಯಭೇದನಂ।
ಪಕ್ಕನ್ತೇ
೨೪೮೦.
ಆಣತ್ತಿಯಂ ಉಭಿನ್ನಮ್ಪಿ, ಧುರನಿಕ್ಖೇಪನೇಪಿ ಚ।
ಏಕೇಕಸ್ಸ ಉಭಿನ್ನಂ ವಾ, ನಾಲಯೇ ಸತಿ ಭಿಜ್ಜತಿ॥
೨೪೮೧.
ಉಪಜ್ಝಾಯಸಮೋಧಾನ-ಗತಸ್ಸಾಪಿ ಚ ಭಿಜ್ಜತಿ।
ದಸ್ಸನಂ ಸವನಞ್ಚಾತಿ, ಸಮೋಧಾನಂ ದ್ವಿಧಾ ಮತಂ॥
೨೪೮೨.
ಅದ್ಧಿಕಸ್ಸ ಗಿಲಾನಸ್ಸ, ಗಿಲಾನುಪಟ್ಠಕಸ್ಸ ಚ।
ಯಾಚಿತಸ್ಸ ನ ದೋಸೋವ, ವಸಿತುಂ ನಿಸ್ಸಯಂ ವಿನಾ॥
೨೪೮೩.
ಜಾನತಾ ಅತ್ತನೋ ಚೇವ, ವನೇ ಫಾಸುವಿಹಾರತಂ।
ಸಭಾಗೇ ದಾಯಕೇಸನ್ತೇ, ವಸಿತುಮ್ಪಿ ಚ ವಟ್ಟತಿ॥
ನಿಸ್ಸಯಪಟಿಪ್ಪಸ್ಸಮ್ಭನಕಥಾ।
೨೪೮೪.
ಕುಟ್ಠಿಂ ಗಣ್ಡಿಂ ಕಿಲಾಸಿಞ್ಚ, ಸೋಸಿಞ್ಚ ಅಪಮಾರಿಕಂ।
ತಥಾ ರಾಜಭಟಂ ಚೋರಂ, ಲಿಖಿತಂ ಕಾರಭೇದಕಂ॥
೨೪೮೫.
ಕಸಾಹತಂ ನರಞ್ಚೇವ, ಪುರಿಸಂ ಲಕ್ಖಣಾಹತಂ।
ಇಣಾಯಿಕಞ್ಚ ದಾಸಞ್ಚ, ಪಬ್ಬಾಜೇನ್ತಸ್ಸ ದುಕ್ಕಟಂ॥
೨೪೮೬.
ಹತ್ಥಚ್ಛಿನ್ನಮಳಚ್ಛಿನ್ನಂ, ಪಾದಚ್ಛಿನ್ನಞ್ಚ ಪುಗ್ಗಲಂ।
ಕಣ್ಣನಾಸಙ್ಗುಲಿಚ್ಛಿನ್ನಂ, ಕಣ್ಡರಚ್ಛಿನ್ನಮೇವ ಚ॥
೨೪೮೭.
ಕಾಣಂ ಕುಣಿಞ್ಚ ಖುಜ್ಜಞ್ಚ, ವಾಮನಂ ಫಣಹತ್ಥಕಂ।
ಖಞ್ಜಂ ಪಕ್ಖಹತಞ್ಚೇವ, ಸೀಪದಿಂ ಪಾಪರೋಗಿನಂ॥
೨೪೮೮.
ಜರಾಯ
ಪೀಠಸಪ್ಪಿಂ ತಥಾ ಮೂಗಂ, ಪಬ್ಬಾಜೇನ್ತಸ್ಸ ದುಕ್ಕಟಂ॥
೨೪೮೯.
ಅತಿದೀಘೋತಿರಸ್ಸೋ ವಾ, ಅತಿಕಾಲೋಪಿ ವಾ ತಥಾ।
ಅಚ್ಚೋದಾತೋಪಿ ವಾ ಮಟ್ಠ-ತಮ್ಬಲೋಹನಿದಸ್ಸನೋ॥
೨೪೯೦.
ಅತಿಥೂಲೋ ಅತಿಕಿಸ್ಸೋ, ಮಹಾಸೀಸೋಪಿ ವಾ ತಥಾ।
ಅತಿಖುದ್ದಕಸೀಸೇನ, ಸಹಿತೇನ ಯುತ್ತೋಪಿ ವಾ॥
೨೪೯೧.
ಕುಟಕುಟಕಸೀಸೋ
ವೇಳುನಾಳಿಸಮಾನೇನ, ಸೀಸೇನ ಚ ಯುತೋ ನರೋ॥
೨೪೯೨.
ಕಪ್ಪಸೀಸೋಪಿ ಪಬ್ಭಾರ-ಸೀಸೋ ವಾ ವಣಸೀಸಕೋ।
ತಥಾ ಕಣ್ಣಿಕಕೇಸೋ ವಾ, ಥೂಲಕೇಸೋಪಿ ವಾ ತಥಾ॥
೨೪೯೩.
ಪೂತಿನಿಲ್ಲೋಮಸೀಸೋ ವಾ, ಜಾತಿಪಣ್ಡರಕೇಸಕೋ।
ಜಾತಿಯಾ ತಮ್ಬಕೇಸೋ ವಾ, ತಥೇವಾವಟ್ಟಸೀಸಕೋ॥
೨೪೯೪.
ಸೀಸಲೋಮೇಕಬದ್ಧೇಹಿ, ಭಮುಕೇಹಿ ಯುತೋಪಿ ವಾ।
ಸಮ್ಬದ್ಧಭಮುಕೋ ವಾಪಿ, ನಿಲ್ಲೋಮಭಮುಕೋಪಿ ವಾ॥
೨೪೯೫.
ಮಹನ್ತಖುದ್ದನೇತ್ತೋ ವಾ, ತಥಾ ವಿಸಮಲೋಚನೋ।
ಕೇಕರೋ ವಾಪಿ ಗಮ್ಭೀರ-ನೇತ್ತೋ ವಿಸಮಚಕ್ಕಲೋ॥
೨೪೯೬.
ಜತುಮೂಸಿಕಕಣ್ಣೋ ವಾ, ಹತ್ಥಿಕಣ್ಣೋಪಿ ವಾ ಪನ।
ಛಿದ್ದಮತ್ತಕಕಣ್ಣೋ ವಾ, ತಥೇವಾವಿದ್ಧಕಣ್ಣಕೋ॥
೨೪೯೭.
ತಥಾ ಟಙ್ಕಿತಕಣ್ಣೋ ವಾ, ಪೂತಿಕಣ್ಣೋಪಿ ವಾ ಪನ।
ಯೋನಕಾದಿಪ್ಪಭೇದೋಪಿ, ನಾಯಂ ಪರಿಸದೂಸಕೋ॥
೨೪೯೮.
ಅತಿಪಿಙ್ಗಲನೇತ್ತೋ ವಾ, ತಥಾ ನಿಪ್ಪಖುಮಕ್ಖಿ ವಾ।
ಅಸ್ಸುಪಗ್ಘರನೇತ್ತೋ ವಾ, ಪಕ್ಕಪುಪ್ಫಿತಲೋಚನೋ॥
೨೪೯೯.
ತಥೇವ ಚ ಮಹಾನಾಸೋ, ಅತಿಖುದ್ದಕನಾಸಿಕೋ।
ತಥಾ ಚಿಪಿಟನಾಸೋ ವಾ, ನರೋ ಕುಟಿಲನಾಸಿಕೋ॥
೨೫೦೦.
ನಿಚ್ಚವಿಸ್ಸವನಾಸೋ
ವಙ್ಕಭಿನ್ನಮುಖೋ ವಾಪಿ, ಮಹಾಓಟ್ಠೋಪಿ ವಾ ಪನ॥
೨೫೦೧.
ತಥಾ ತನುಕಓಟ್ಠೋ ವಾ, ವಿಪುಲುತ್ತರಓಟ್ಠಕೋ।
ಓಟ್ಠಛಿನ್ನೋಪಿ ಉಪ್ಪಕ್ಕ-ಮುಖೋ ಏಳಮುಖೋಪಿ ವಾ॥
೨೫೦೨.
ಸಙ್ಖತುಣ್ಡೋಪಿ ದುಗ್ಗನ್ಧ-ಮುಖೋ ವಾ ಪನ ಪುಗ್ಗಲೋ।
ಮಹಾದನ್ತೋಪಿ ಅಚ್ಚನ್ತಂ, ತಥಾ ಅಸುರದನ್ತಕೋ॥
೨೫೦೩.
ಹೇಟ್ಠಾ ಉಪರಿತೋ ವಾಪಿ, ಬಹಿನಿಕ್ಖನ್ತದನ್ತಕೋ।
ಅದನ್ತೋ ಪೂತಿದನ್ತೋ ವಾ, ಅತಿಖುದ್ದಕದನ್ತಕೋ॥
೨೫೦೪.
ಯಸ್ಸ ದನ್ತನ್ತರೇ ದನ್ತೋ, ಕಾಳಕದನ್ತಸನ್ನಿಭೋ।
ಸುಖುಮೋವ ಠಿತೋ, ತಂ ಚೇ, ಪಬ್ಬಾಜೇತುಮ್ಪಿ ವಟ್ಟತಿ॥
೨೫೦೫.
ಯೋ
ದೀಘೇನ ಹನುನಾ ಯುತೋ।
ಚಿಪಿಟಹನುಕೋ ವಾಪಿ।
ರಸ್ಸೇನ ಹನುನಾ ಯುತೋ॥
೨೫೦೬.
ನಿಮ್ಮಸ್ಸುದಾಠಿಕೋ ವಾಪಿ, ಅತಿದೀಘಗಲೋಪಿ ವಾ।
ಅತಿರಸ್ಸಗಲೋಪಿ ವಾ, ಭಿನ್ನಗಣ್ಠಿಗಲೋಪಿ ವಾ॥
೨೫೦೭.
ತಥಾ ಭಟ್ಠಂಸಕೂಟೋ ವಾ, ಭಿನ್ನಪಿಟ್ಠಿಉರೋಪಿ ವಾ।
ಸುದೀಘರಸ್ಸಹತ್ಥೋ ವಾ, ಕಚ್ಛುಕಣ್ಡುಸಮಾಯುತೋ॥
೨೫೦೮.
ಮಹಾನಿಸದಮಂಸೋ ವಾ, ಉದ್ಧನಗ್ಗುಪಮಾಯುತೋ।
ವಾತಣ್ಡಿಕೋ ಮಹಾಊರು, ಸಙ್ಘಟ್ಟನಕಜಾಣುಕೋ॥
೨೫೦೯.
ಭಿನ್ನಜಾಣು ಮಹಾಜಾಣು, ದೀಘಜಙ್ಘೋ ವಿಜಙ್ಘಕೋ।
ವಿಕಟೋ ವಾಪಿ ಪಣ್ಹೋ ವಾ, ತಥಾ ಉಬ್ಬದ್ಧಪಿಣ್ಡಿಕೋ॥
೨೫೧೦.
ಯಟ್ಠಿಜಙ್ಘೋ ಮಹಾಜಙ್ಘೋ, ಮಹಾಪಾದೋಪಿ ಯೋ ನರೋ।
ತಥಾ ಪಿಟ್ಠಿಕಪಾದೋ ವಾ, ಮಹಾಪಣ್ಹಿಪಿ ವಾ ಪನ॥
೨೫೧೧.
ವಙ್ಕಪಾದೋ
ಯೋ ಪನನ್ಧನಖೋ ವಾಪಿ, ಕಾಳಪೂತಿನಖೋಪಿ ಚ॥
೨೫೧೨.
ಇಚ್ಚೇವಮಾದಿಕಂ ಕಞ್ಚಿ, ನರಂ ಪರಿಸದೂಸಕಂ।
ಪಬ್ಬಾಜೇನ್ತಸ್ಸ ಭಿಕ್ಖುಸ್ಸ, ಹೋತಿ ಆಪತ್ತಿ ದುಕ್ಕಟಂ॥
ಪರಿಸದೂಸಕಕಥಾ।
೨೫೧೩.
‘‘ಸಾಮಣೇರಜ್ಜ ಮಾ ಖಾದ, ಮಾ ಭುಞ್ಜ ಚ ಪಿವಾ’’ತಿ ಚ।
ನಿವಾರೇನ್ತಸ್ಸ ಆಹಾರಂ, ಹೋತಿ ಆಪತ್ತಿ ದುಕ್ಕಟಂ॥
೨೫೧೪.
‘‘ನಿವಾರೇಸ್ಸಾಮಿ ಆಹಾರ’’-ಮಿತಿ ವಾ ಪತ್ತಚೀವರಂ।
ಅನ್ತೋ ನಿಕ್ಖಿಪತೋ ಸಬ್ಬ-ಪಯೋಗೇಸುಪಿ ದುಕ್ಕಟಂ॥
೨೫೧೫.
ದುಬ್ಬಚಸಾಮಣೇರಸ್ಸ, ಅನಾಚಾರಸ್ಸ ಕೇವಲಂ।
ದಣ್ಡಕಮ್ಮಂ ಹವೇ ಕತ್ವಾ, ಹಿತಕಾಮೇನ ಭಿಕ್ಖುನಾ॥
೨೫೧೬.
ಯಾಗುಂ ವಾ ಪನ ಭತ್ತಂ ವಾ, ದಸ್ಸೇತ್ವಾ ಕಿರ ಭಾಸಿತುಂ।
‘‘ಆಹಟೇ ದಣ್ಡಕಮ್ಮೇ ತ್ವಂ, ಲಚ್ಛಸೀದ’’ನ್ತಿ ವಟ್ಟತಿ॥
೨೫೧೭.
ಅಪರಾಧಾನುರೂಪೇನ
ವಾಲಿಕಾಸಲಿಲಾದೀನ-ಮಾಹರಾಪನಮೇವ ತಂ॥
೨೫೧೮.
ಸೀಸೇ ವಾ ನಿಕ್ಖಿಪಾಪೇತುಂ, ಪಾಸಾಣಾದೀನಿ ಕಾನಿಚಿ।
ನಿಪಜ್ಜಾಪೇತುಮುಣ್ಹೇ ವಾ, ಪಾಸಾಣೇ ಭೂಮಿಯಾಪಿ ವಾ॥
೨೫೧೯.
ಉದಕಂ ವಾ ಪವೇಸೇತುಂ, ನ ಚ ವಟ್ಟತಿ ಭಿಕ್ಖುನೋ।
ಇಧಾವರಣಮತ್ತಂ ತು, ದಣ್ಡಕಮ್ಮಂ ಪಕಾಸಿತಂ॥
ನಿವಾರಣಕಥಾ।
೨೫೨೦.
ಪಕ್ಖೋಪಕ್ಕಮಿಕಾಸಿತ್ತಾ, ಚತುತ್ಥೋ ಪನುಸೂಯಕೋ।
ನಪುಂಸಕೇನ ಪಞ್ಚೇತೇ, ಪಣ್ಡಕಾ ಪರಿದೀಪಿತಾ॥
೨೫೨೧.
ತೇಸು ಆಸಿತ್ತುಸೂಯಾನಂ, ಪಬ್ಬಜ್ಜಾ ನ ನಿವಾರಿತಾ।
ಇತರೇಸಂ ತು ತಿಣ್ಣಮ್ಪಿ, ಪಣ್ಡಕಾನಂ ನಿವಾರಿತಾ॥
೨೫೨೨.
ವಾರಿತಾ
ತಿವಿಧೇ ಪನ ತೇ ಞತ್ವಾ, ಪಬ್ಬಾಜೇನ್ತಸ್ಸ ದುಕ್ಕಟಂ॥
ಪಣ್ಡಕಕಥಾ।
೨೫೨೩.
ಲಿಙ್ಗತ್ಥೇನೋ ಚ ಸಂವಾಸ-ತ್ಥೇನೋ ತದುಭಯಸ್ಸ ಚ।
ಥೇಯ್ಯಸಂವಾಸಕೋ ನಾಮ, ತಿವಿಧೋಪಿ ಪವುಚ್ಚತಿ॥
೨೫೨೪.
ಸಯಮೇವ ಚ ಯೋ ತತ್ಥ, ಪಬ್ಬಜಿತ್ವಾ ನ ಗಣ್ಹತಿ।
ಭಿಕ್ಖುವಸ್ಸಾನಿ ವಾ ನೇವ, ಯಥಾವುಡ್ಢಮ್ಪಿ ವನ್ದನಂ॥
೨೫೨೫.
ಲಿಙ್ಗತ್ಥೇನೋ ಅಯಂ ಲಿಙ್ಗ-ಮತ್ತಸ್ಸ ಥೇನತೋ ಸಿಯಾ।
ಯೋ ಚ ಪಬ್ಬಜಿತೋ ಹುತ್ವಾ, ಭಿಕ್ಖುವಸ್ಸಾನಿ ಗಣ್ಹತಿ॥
೨೫೨೬.
ಸಂವಾಸಂ ಸಾದಿಯನ್ತೋವ, ಸಂವಾಸತ್ಥೇನಕೋ ಮತೋ।
ಉಭಯತ್ಥೇನಕೋ ವುತ್ತ-ನಯೋಯೇವ, ಯಥಾಹ ಚ॥
೨೫೨೭.
‘‘ರಾಜದುಬ್ಭಿಕ್ಖಕನ್ತಾರ-ರೋಗವೇರಿಭಯೇಹಿ ವಾ।
ಚೀವರಾಹರಣತ್ಥಂ ವಾ, ಲಿಙ್ಗಮಾದಿಯತೀಧ ಯೋ॥
೨೫೨೮.
ಸಂವಾಸಂ ನಾಧಿವಾಸೇತಿ, ಯಾವ ಸೋ ಸುದ್ಧಮಾನಸೋ।
ಥೇಯ್ಯಸಂವಾಸಕೋ ನಾಮ, ತಾವ ಏಸ ನ ವುಚ್ಚತಿ’’॥
ಥೇಯ್ಯಸಂವಾಸಕಕಥಾ।
೨೫೨೯.
‘‘ತಿತ್ಥಿಯೋಹಂ
ಸಲಿಙ್ಗೇನೇವ ಯೋ ಯಾತಿ, ತಿತ್ಥಿಯಾನಮುಪಸ್ಸಯಂ॥
೨೫೩೦.
ಗಚ್ಛತೋ ಪದವಾರೇನ, ಹೋತಿ ಆಪತ್ತಿ ದುಕ್ಕಟಂ।
ಹೋತಿ ತಿತ್ಥಿಯಪಕ್ಕನ್ತೋ, ಲಿಙ್ಗೇ ತೇಸಂ ತು ನಿಸ್ಸಿತೇ॥
೨೫೩೧.
‘‘ತಿತ್ಥಿಯೋಹಂ ಭವಿಸ್ಸ’’ನ್ತಿ, ಕುಸಚೀರಾದಿಕಂ ಪನ।
ಸಯಮೇವ ನಿವಾಸೇತಿ, ಸೋಪಿ ಪಕ್ಕನ್ತಕೋ ಸಿಯಾ॥
೨೫೩೨.
ನಗ್ಗೋ
ಲುಞ್ಚಾಪೇತಿ ಸಚೇ ಕೇಸೇ, ವತ್ತಾನಾದಿಯತೀಧ ವಾ॥
೨೫೩೩.
ಮೋರಪಿಞ್ಛಾದಿಕಂ ತೇಸಂ, ಲಿಙ್ಗಂ ಗಣ್ಹಾತಿ ವಾ ಸಚೇ।
ಸಾರತೋ ಚೇವ ವಾ ತೇಸಂ, ಪಬ್ಬಜ್ಜಂ ಲದ್ಧಿಮೇವ ವಾ॥
೨೫೩೪.
ಹೋತಿ ತಿತ್ಥಿಯಪಕ್ಕನ್ತೋ, ನ ಪನೇಸ ವಿಮುಚ್ಚತಿ।
ನಗ್ಗಸ್ಸ ಗಚ್ಛತೋ ವುತ್ತಂ, ಪದವಾರೇನ ದುಕ್ಕಟಂ॥
೨೫೩೫.
ವುತ್ತೋ ಅನುಪಸಮ್ಪನ್ನ-ವಸೇನ ಥೇಯ್ಯವಾಸಕೋ।
ತಥಾ ತಿತ್ಥಿಯಪಕ್ಕನ್ತೋ, ಉಪಸಮ್ಪನ್ನಭಿಕ್ಖುನಾ॥
ತಿತ್ಥಿಯಪಕ್ಕನ್ತಕಥಾ।
೨೫೩೬.
ನಾಗೋ ವಾಪಿ ಸುಪಣ್ಣೋ ವಾ, ಯಕ್ಖೋ ಸಕ್ಕೋಪಿ ವಾ ಇಧ।
ತಿರಚ್ಛಾನಗತೋ ವುತ್ತೋ, ಪಬ್ಬಾಜೇತುಂ ನ ವಟ್ಟತಿ॥
ತಿರಚ್ಛಾನಕಥಾ।
೨೫೩೭.
ಪಞ್ಚಾನನ್ತರಿಕೇ ಪೋಸೇ, ಪಬ್ಬಾಜೇನ್ತಸ್ಸ ದುಕ್ಕಟಂ।
ಉಭತೋಬ್ಯಞ್ಜನಞ್ಚೇವ, ತಥಾ ಭಿಕ್ಖುನಿದೂಸಕಂ॥
೨೫೩೮.
ಏಕತೋಉಪಸಮ್ಪನ್ನಂ, ಭಿಕ್ಖುನೀನಂ ತು ಸನ್ತಿಕೇ।
ದೂಸೇತ್ವಾ ಪನ ಸೋ ನೇವ, ಭಿಕ್ಖುನೀದೂಸಕೋ ಸಿಯಾ॥
೨೫೩೯.
ಸಚೇ ಅನುಪಸಮ್ಪನ್ನ-ದೂಸಕೋ ಉಪಸಮ್ಪದಂ।
ಲಭತೇವ ಚ ಪಬ್ಬಜ್ಜಂ, ಸಾ ಚ ನೇವ ಪರಾಜಿತಾ॥
ಏಕಾದಸಅಭಬ್ಬಪುಗ್ಗಲಕಥಾ।
೨೫೪೦.
ನೂಪಸಮ್ಪಾದನೀಯೋವ
ಕರೋತೋ ದುಕ್ಕಟಂ ಹೋತಿ, ನ ಕುಪ್ಪತಿ ಸಚೇ ಕತಂ॥
೨೫೪೧.
ಕುಪ್ಪತೀತಿ
ಸೇಸೇಸುಪಿ ಅಯಂ ಞೇಯ್ಯೋ, ನಯೋ ಸಬ್ಬತ್ಥ ವಿಞ್ಞುನಾ॥
೨೫೪೨.
ಉಪಸಮ್ಪದಕಮ್ಮಸ್ಸ, ಅಭಬ್ಬಾ ಪಞ್ಚವೀಸತಿ।
ಅಜಾನಿತ್ವಾ ಕತೋ ಚಾಪಿ, ಓಸಾರೋ ನಾಸನಾರಹೋ॥
೨೫೪೩.
ಹತ್ಥಚ್ಛಿನ್ನಾದಿಬಾತ್ತಿಂಸ, ಕುಟ್ಠಿಆದಿ ಚ ತೇರಸ।
ಅಪತ್ತೋ ತೇಸಮೋಸಾರೋ, ಕತೋ ಚೇ ಪನ ರೂಹತಿ॥
೨೫೪೪.
ಏಕೂಪಜ್ಝಾಯಕೋ ಹೋತಿ।
ಹೋನ್ತಿ ಆಚರಿಯಾ ತಯೋ।
ಉಪಸಮ್ಪದಾಪೇಕ್ಖಾ ಚ।
ಹೋನ್ತಿ ದ್ವೇ ವಾ ತಯೋಪಿ ವಾ॥
೨೫೪೫.
ತೀಹಿ ಆಚರಿಯೇಹೇವ, ಏಕತೋ ಅನುಸಾವನಂ।
ಓಸಾರೇತ್ವಾ ಕತಂ ಕಮ್ಮಂ, ನ ಚ ಕುಪ್ಪತಿ ಕಪ್ಪತಿ॥
೨೫೪೬.
ಏಕೂಪಜ್ಝಾಯಕೋ ಹೋತಿ।
ಆಚರಿಯೋಪಿ ತಥೇಕತೋ।
ಉಪಸಮ್ಪದಾಪೇಕ್ಖಾ ಚ।
ಹೋನ್ತಿ ದ್ವೇ ವಾ ತಯೋಪಿ ವಾ॥
೨೫೪೭.
ಅನುಪುಬ್ಬೇನ ಸಾವೇತ್ವಾ, ತೇಸಂ ನಾಮಂ ತು ತೇನ ಚ।
ಏಕತೋ ಅನುಸಾವೇತ್ವಾ, ಕತಮ್ಪಿ ಚ ನ ಕುಪ್ಪತಿ॥
೨೫೪೮.
ನಾನುಪಜ್ಝಾಯಕೇನಾಪಿ, ನಾನಾಚರಿಯಕೇನ ಚ।
ಅಞ್ಞಮಞ್ಞಾನುಸಾವೇತ್ವಾ, ಕತಂ ಕಮ್ಮಞ್ಚ ವಟ್ಟತಿ॥
೨೫೪೯.
ಸುಮನೋ ತಿಸ್ಸಥೇರಸ್ಸ, ಅನುಸಾವೇತಿ ಸಿಸ್ಸಕಂ।
ತಿಸ್ಸೋ ಸುಮನಥೇರಸ್ಸ, ಅನುಸಾವೇತಿ ಸಿಸ್ಸಕಂ॥
೨೫೫೦.
ನಾನುಪಜ್ಝಾಯಕೇನೇವ, ಏಕಾಚರಿಯಕೇನಿಧ।
ಉಪಸಮ್ಪದಾ ಪಟಿಕ್ಖಿತ್ತಾ, ಬುದ್ಧೇನಾದಿಚ್ಚಬನ್ಧುನಾ॥
ಮಹಾಖನ್ಧಕಕಥಾ।
ಉಪೋಸಥಕ್ಖನ್ಧಕಕಥಾ
೨೫೫೧.
ಬದ್ಧಾಬದ್ಧವಸೇನೇವ
ನಿಮಿತ್ತೇನ ನಿಮಿತ್ತಂ ತು, ಘಟೇತ್ವಾ ಪನ ಸಮ್ಮತಾ॥
೨೫೫೨.
ಅಯಂ ಸೀಮಾವಿಪತ್ತೀಹಿ, ಏಕಾದಸಹಿ ವಜ್ಜಿತಾ।
ಬದ್ಧಾ ನಾಮ ಸಿಯಾ ಸೀಮಾ, ಸಾ ತಿಸಮ್ಪತ್ತಿಸಂಯುತಾ॥
೨೫೫೩.
ಖಣ್ಡಸಮಾನಸಂವಾಸಾ-ವಿಪ್ಪವಾಸಾದಿಭೇದತೋ।
ಇತಿ ಬದ್ಧಾ ತಿಧಾ ವುತ್ತಾ, ಅಬದ್ಧಾಪಿ ತಿಧಾ ಮತಾ॥
೨೫೫೪.
ಗಾಮತೋ ಉದಕುಕ್ಖೇಪಾ, ಸತ್ತಬ್ಭನ್ತರತೋಪಿ ಚ।
ತತ್ಥ ಗಾಮಪರಿಚ್ಛೇದೋ, ‘‘ಗಾಮಸೀಮಾ’’ತಿ ವುಚ್ಚತಿ॥
೨೫೫೫.
ಜಾತಸ್ಸರೇ ಸಮುದ್ದೇ ವಾ, ನದಿಯಾ ವಾ ಸಮನ್ತತೋ।
ಮಜ್ಝಿಮಸ್ಸುದಕುಕ್ಖೇಪೋ, ಉದಕುಕ್ಖೇಪಸಞ್ಞಿತೋ॥
೨೫೫೬.
ಅಗಾಮಕೇ ಅರಞ್ಞೇ ತು, ಸತ್ತೇವಬ್ಭನ್ತರಾ ಪನ।
ಸಮನ್ತತೋ ಅಯಂ ಸೀಮಾ, ಸತ್ತಬ್ಭನ್ತರನಾಮಿಕಾ॥
೨೫೫೭.
ಏಕಂ ಅಬ್ಭನ್ತರಂ ವುತ್ತಂ, ಅಟ್ಠವೀಸತಿಹತ್ಥಕಂ।
ಗುಳುಕ್ಖೇಪನಯೇನೇವ, ಉದಕುಕ್ಖೇಪಕಾ ಮತಾ॥
೨೫೫೮.
ಇಮಾ ದ್ವೇ ಪನ ಸೀಮಾಯೋ, ವಡ್ಢನ್ತಿ ಪರಿಸಾವಸಾ।
ಅಬ್ಭನ್ತರೂದಕುಕ್ಖೇಪಾ, ಠಿತೋಕಾಸಾ ಪರಂ ಸಿಯುಂ॥
೨೫೫೯.
ಠಿತೋ ಅನ್ತೋಪರಿಚ್ಛೇದೇ, ಹತ್ಥಪಾಸಂ ವಿಹಾಯ ವಾ।
ತತ್ತಕಂ ಅನತಿಕ್ಕಮ್ಮ, ಪರಿಚ್ಛೇದಮ್ಪಿ ವಾ ಪರಂ॥
೨೫೬೦.
ಠಿತೋ ಕಮ್ಮಂ ವಿಕೋಪೇತಿ, ಇತಿ ಅಟ್ಠಕಥಾನಯೋ।
ತಸ್ಮಾ ಸೋ ಹತ್ಥಪಾಸೇ ವಾ, ಕಾತಬ್ಬೋ ಬಹಿ ವಾ ಪನ॥
೨೫೬೧.
ಬದ್ಧಸೀಮಾಯ ಸಣ್ಠಾನಂ, ನಿಮಿತ್ತಂ ದಿಸಕಿತ್ತನಂ।
ಞತ್ವಾ ಪಮಾಣಂ ಸೋಧೇತ್ವಾ, ಸೀಮಂ ಬನ್ಧೇಯ್ಯ ಪಣ್ಡಿತೋ॥
೨೫೬೨.
ತಿಕೋಣಂ
ವಿತಾನಂ ಧನುಕಾಕಾರಂ, ಮುದಿಙ್ಗಸಕಟೂಪಮಂ॥
೨೫೬೩.
ಪಬ್ಬತಂ
ಉದಕಞ್ಚ ನದಿಞ್ಚಾತಿ, ನಿಮಿತ್ತಾನಟ್ಠ ದೀಪಯೇ॥
೨೫೬೪.
ತೇಸು ತೀಣಿ ನಿಮಿತ್ತಾನಿ, ಆದಿಂ ಕತ್ವಾ ಸಮನ್ತತೋ।
ನಿಮಿತ್ತಾನಂ ಸತೇನಾಪಿ, ಬನ್ಧಿತುಂ ಪನ ವಟ್ಟತಿ॥
೨೫೬೫.
ತಿಯೋಜನಪರಾ ಸೀಮಾ, ಉಕ್ಕಟ್ಠಾತಿ ಪಕಾಸಿತಾ।
ಏಕವೀಸತಿ ಭಿಕ್ಖೂನಂ, ಗಣ್ಹನ್ತೀ ಹೇಟ್ಠಿಮಾ ಮತಾ॥
೨೫೬೬.
ಉಕ್ಕಟ್ಠಾಯಪಿ ಉಕ್ಕಟ್ಠಾ, ಹೇಟ್ಠಿಮಾಯಪಿ ಹೇಟ್ಠಿಮಾ।
ಏತಾ ದ್ವೇಪಿ ಅಸೀಮಾತಿ, ವುತ್ತಾ ಆದಿಚ್ಚಬನ್ಧುನಾ॥
೨೫೬೭.
ನಿಮಿತ್ತಂ ಪನ ಕಿತ್ತೇತ್ವಾ, ಸಬ್ಬಮೇವ ಸಮನ್ತತೋ।
ಪಚ್ಛಾ ಞತ್ತಿದುತಿಯೇನ, ಸೀಮಂ ಬನ್ಧಿತುಮರಹತಿ॥
೨೫೬೮.
ಬನ್ಧಿತ್ವಾನನ್ತರಂ ಪಚ್ಛಾ, ಚೀವರಾವಿಪ್ಪವಾಸಕಂ।
ಸಮ್ಮನ್ನಿತ್ವಾನ ಬದ್ಧಾ ಸಾ-ವಿಪ್ಪವಾಸಾತಿ ವುಚ್ಚತಿ॥
೨೫೬೯.
ನದೀಸರಸಮುದ್ದೇಸು, ಸೀಮಂ ಬನ್ಧತಿ ಚೇ ಪನ।
ನ ವೋತ್ಥರತಿ ತೇನೇವ, ಅಸೀಮಾತಿ ಜಿನೋಬ್ರವಿ॥
ಸೀಮಾಕಥಾ।
೨೫೭೦.
ದಿನಕಾರಕಕತ್ತಬ್ಬಾ-ಕಾರಾನಞ್ಚ ವಸಾ ಪನ।
ನವೇವುಪೋಸಥಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ॥
೨೫೭೧.
ಚಾತುದ್ದಸೋ ಪನ್ನರಸೋ, ಸಾಮಗ್ಗೀ ಚ ಉಪೋಸಥೋ।
ದಿವಸೇನೇವ ನಿದ್ದಿಟ್ಠಾ, ತಯೋಪೇತೇ ಉಪೋಸಥಾ॥
೨೫೭೨.
ಸಙ್ಘೇ ಉಪೋಸಥೋ ಚೇವ, ಗಣೇ ಪುಗ್ಗಲುಪೋಸಥೋ।
ಕಾರಕಾನಂ ವಸೇನೇವ, ತಯೋ ವುತ್ತಾ ಉಪೋಸಥಾ॥
೨೫೭೩.
ಸುತ್ತುದ್ದೇಸಾಭಿಧಾನೋ
ಅಧಿಟ್ಠಾನನ್ತಿ ನಿದ್ದಿಟ್ಠಾ, ತಯೋ ಕಮ್ಮೇನುಪೋಸಥಾ॥
೨೫೭೪.
ಸಙ್ಘಸ್ಸ ಪಾತಿಮೋಕ್ಖೋ ಚ, ಪಾರಿಸುದ್ಧಿ ಗಣಸ್ಸ ಚ।
ಅಧಿಟ್ಠಾನಮಥೇಕಸ್ಸ, ನಿದ್ದಿಟ್ಠಂ ಪನ ಸತ್ಥುನಾ॥
೨೫೭೫.
ಪಾತಿಮೋಕ್ಖಸ್ಸ ಉದ್ದೇಸಾ, ಪಞ್ಚ ವುತ್ತಾ ಮಹೇಸಿನಾ।
ನಿದಾನಂ ಉದ್ದಿಸಿತ್ವಾನ, ಸಾವೇತಬ್ಬಂ ತು ಸೇಸಕಂ॥
೨೫೭೬.
ಅಯಮೇವ
ಚತ್ತಾರೋ ಭಿಕ್ಖುನೀನಞ್ಚ, ಉದ್ದೇಸಾ ನವಿಮೇ ಪನ॥
೨೫೭೭.
ಪಾತಿಮೋಕ್ಖಸ್ಸ ಉದ್ದೇಸೋ, ಕಾತಬ್ಬೋವ ಉಪೋಸಥೇ।
ಅನ್ತರಾಯಂ ವಿನಾ ಚೇವ, ಅನುದ್ದೇಸೋ ನಿವಾರಿತೋ॥
೨೫೭೮.
ಥೇರೋ ಚ ಇಸ್ಸರೋ ತಸ್ಸ।
‘‘ಥೇರಾಧೇಯ್ಯ’’ನ್ತಿ ಪಾಠತೋ।
ಅವತ್ತನ್ತೇನ ಅಜ್ಝಿಟ್ಠೋ।
ಯಸ್ಸ ಸೋ ಪನ ವತ್ತತಿ॥
೨೫೭೯.
ಉದ್ದಿಸನ್ತೇ ಸಮಪ್ಪಾ ವಾ, ಆಗಚ್ಛನ್ತಿ ಸಚೇ ಪನ।
ಉದ್ದಿಟ್ಠಂ ತಂ ಸುಉದ್ದಿಟ್ಠಂ, ಸಾವೇತಬ್ಬಂ ತು ಸೇಸಕಂ॥
೨೫೮೦.
ಉದ್ದಿಟ್ಠಮತ್ತೇ ಭಿಕ್ಖೂನಂ, ಪರಿಸಾಯುಟ್ಠಿತಾಯ ವಾ।
ಪಾರಿಸುದ್ಧಿ ತು ಕತ್ತಬ್ಬಾ, ಮೂಲೇ ತೇಸಂ, ಸಚೇ ಬಹೂ॥
೨೫೮೧.
ಸಮ್ಮಜ್ಜಿತುಂ ಪದೀಪೇತುಂ, ಪಞ್ಞಾಪೇತುಂ ದಕಾಸನೇ।
ವಿನಿದ್ದಿಟ್ಠಸ್ಸ ಥೇರೇನ, ಅಕರೋನ್ತಸ್ಸ ದುಕ್ಕಟಂ॥
೨೫೮೨.
ಕತ್ವಾ ಸಮ್ಮಜ್ಜನಂ ದೀಪಂ, ಠಪೇತ್ವಾ ಉದಕಾಸನಂ।
ಗಣಞತ್ತಿಂ ಠಪೇತ್ವಾವ, ಕತ್ತಬ್ಬೋ ತೀಹುಪೋಸಥೋ॥
೨೫೮೩.
ಪುಬ್ಬಕಿಚ್ಚಂ ಸಮಾಪೇತ್ವಾ, ಅಧಿಟ್ಠೇಯ್ಯ ಪನೇಕಕೋ।
ನೋ ಚೇ ಅಧಿಟ್ಠಹೇಯ್ಯಸ್ಸ, ಹೋತಿ ಆಪತ್ತಿ ದುಕ್ಕಟಂ॥
೨೫೮೪.
ಅಧಮ್ಮೇನ
ತಥಾ ಧಮ್ಮೇನ ವಗ್ಗೇನ, ಸಮಗ್ಗೇನ ಚ ಧಮ್ಮತೋ॥
೨೫೮೫.
ಉಪೋಸಥಸ್ಸ ಏತಾನಿ, ಕಮ್ಮಾನೀತಿ ಜಿನೋಬ್ರವಿ।
ಚತೂಸ್ವಪಿ ಪನೇತೇಸು, ಚತುತ್ಥಂ ಧಮ್ಮಿಕಂ ಮತಂ॥
೨೫೮೬.
ಅಧಮ್ಮೇನಿಧ ವಗ್ಗೋ ಹಿ, ಕತಮೋ ಚೇತ್ಥುಪೋಸಥೋ?
ವಸನ್ತಿ ಏಕಸೀಮಾಯಂ, ಚತ್ತಾರೋ ಯತ್ಥ ಭಿಕ್ಖುನೋ॥
೨೫೮೭.
ಏಕಸ್ಸ ಪಾರಿಸುದ್ಧಿಂ ತೇ, ಆನಯಿತ್ವಾ ತಯೋ ಜನಾ।
ಕರೋನ್ತಿ ಪಾರಿಸುದ್ಧಿಂ ಚೇ, ಅಧಮ್ಮೋ ವಗ್ಗುಪೋಸಥೋ॥
೨೫೮೮.
ಅಧಮ್ಮೇನ ಸಮಗ್ಗೋ ಹಿ, ಚತ್ತಾರೋ ಭಿಕ್ಖುನೇಕತೋ।
ಕರೋನ್ತಿ ಪಾರಿಸುದ್ಧಿಂ ಚೇ, ಸಮಗ್ಗೋ ಹೋತ್ಯಧಮ್ಮಿಕೋ॥
೨೫೮೯.
ಧಮ್ಮೇನ
ವಸನ್ತಿ ಏಕಸೀಮಾಯಂ, ಚತ್ತಾರೋ ಯತ್ಥ ಭಿಕ್ಖುನೋ॥
೨೫೯೦.
ಏಕಸ್ಸ ಪಾರಿಸುದ್ಧಿಂ ತೇ, ಆನಯಿತ್ವಾ ತಯೋ ಜನಾ।
ಪಾತಿಮೋಕ್ಖುದ್ದಿಸನ್ತೇ ಚೇ, ವಗ್ಗೋ ಧಮ್ಮೇನುಪೋಸಥೋ॥
೨೫೯೧.
ಧಮ್ಮತೋ ಹಿ ಸಮಗ್ಗೋ ಸೋ।
ಚತ್ತಾರೋ ಭಿಕ್ಖುನೇಕತೋ।
ಪಾತಿಮೋಕ್ಖುದ್ದಿಸನ್ತೀಧ।
ಸಮಗ್ಗೋ ಧಮ್ಮತೋ ಮತೋ॥
೨೫೯೨.
ವಗ್ಗೇ ಸಮಗ್ಗೇ ವಗ್ಗೋತಿ, ಸಞ್ಞಿನೋ ವಿಮತಿಸ್ಸ ವಾ।
ಉಪೋಸಥಂ ಕರೋನ್ತಸ್ಸ, ಹೋತಿ ಆಪತ್ತಿ ದುಕ್ಕಟಂ॥
೨೫೯೩.
ಭೇದಾಧಿಪ್ಪಾಯತೋ ತಸ್ಸ, ಹೋತಿ ಥುಲ್ಲಚ್ಚಯಂ ಪನ।
ವಗ್ಗೇ ಸಮಗ್ಗೇನಾಪತ್ತಿ, ಸಮಗ್ಗೋತಿ ಚ ಸಞ್ಞಿನೋ॥
೨೫೯೪.
ಉಕ್ಖಿತ್ತೇನ ಗಹಟ್ಠೇನ, ಸೇಸೇಹಿ ಸಹಧಮ್ಮಿಹಿ।
ಚುತನಿಕ್ಖಿತ್ತಸಿಕ್ಖೇಹಿ, ಏಕಾದಸಹಿ ವಾ ಸಹ॥
೨೫೯೫.
ಉಪೋಸಥೋ ನ ಕಾತಬ್ಬೋ, ಸಭಾಗಾಪತ್ತಿಕೇನ ವಾ।
ಛನ್ದೇನ ಪಾರಿವುತ್ಥೇನ, ಕರೋತೋ ಹೋತಿ ದುಕ್ಕಟಂ॥
೨೫೯೬.
ಅದೇಸೇತ್ವಾ
ಉಪೋಸಥೋ ನ ಕಾತಬ್ಬೋ, ದಿನೇ ವಾ ಅನುಪೋಸಥೇ॥
೨೫೯೭.
ಉಪೋಸಥೇ ಪನಾವಾಸಾ, ಸಭಿಕ್ಖುಮ್ಹಾ ಚ ಭಿಕ್ಖುನಾ।
ಆವಾಸೋ ವಾ ಅನಾವಾಸೋ, ನ ಗನ್ತಬ್ಬೋ ಕುದಾಚನಂ॥
೨೫೯೮.
ಯಸ್ಮಿಂ ಉಪೋಸಥೇ ಕಿಚ್ಚಂ।
ಆವಾಸೇ ಪನ ವತ್ತತಿ।
ಸೋ ಚೇ ಸಭಿಕ್ಖುಕೋ ನಾಮ।
ಆವಾಸೋತಿ ಪಕಾಸಿತೋ॥
೨೫೯೯.
ಉಪೋಸಥೋ ಕಿಮತ್ಥಾಯ, ಕಿಮತ್ಥಾಯ ಪವಾರಣಾ।
ಉಪೋಸಥೋ ಸಮಗ್ಗತ್ಥೋ, ವಿಸುದ್ಧತ್ಥಾ ಪವಾರಣಾ॥
೨೬೦೦.
ಕೋಪೇತುಂ ಧಮ್ಮಿಕಂ ಕಮ್ಮಂ, ಪಟಿಕ್ಕೋಸೇಯ್ಯ ದುಕ್ಕಟಂ।
ಛನ್ದಂ ವಾ ಕಾಯಸಾಮಗ್ಗಿಂ, ಅದೇನ್ತಸ್ಸಪಿ ದುಕ್ಕಟಂ॥
೨೬೦೧.
ಹೋತಿ
ಸೋ ಚ ಕತ್ತಬ್ಬಕಮ್ಮಸ್ಸ, ವಸೇನ ಪರಿದೀಪಿತೋ॥
೨೬೦೨.
ಪವಾರಣಂ ತಥಾಬ್ಭಾನಂ, ಕಮ್ಮಞ್ಚ ಉಪಸಮ್ಪದಂ।
ಠಪೇತ್ವಾ ಚತುವಗ್ಗೇನ, ಅಕತ್ತಬ್ಬಂ ನ ವಿಜ್ಜತಿ॥
೨೬೦೩.
ಪಞ್ಚವಗ್ಗೇನ ಅಬ್ಭಾನಂ, ಮಜ್ಝದೇಸೂಪಸಮ್ಪದಂ।
ದಸವಗ್ಗೇನ ಅಬ್ಭಾನಂ, ವಿನಾ ಸಬ್ಬಂ ತು ವಟ್ಟತಿ॥
೨೬೦೪.
ಕಮ್ಮಂ ವೀಸತಿವಗ್ಗೇನ, ನ ಕತ್ತಬ್ಬಂ ನ ಕಿಞ್ಚಿಪಿ।
ಊನೇ ದೋಸೋತಿ ಞಾಪೇತುಂ, ನಾಧಿಕೇ ಅತಿರೇಕತಾ॥
೨೬೦೫.
ಚತ್ತಾರೋ ಪಕತತ್ತಾವ, ಕಮ್ಮಪ್ಪತ್ತಾತಿ ದೀಪಿತಾ।
ಚತುವಗ್ಗೇನ ಕತ್ತಬ್ಬೇ, ಸೇಸೇಸು ಚ ಅಯಂ ನಯೋ॥
೨೬೦೬.
ಚತುವಗ್ಗಾದಿಕತ್ತಬ್ಬಂ, ಕತ್ವಾಸಂವಾಸಪುಗ್ಗಲಂ।
ಗಣಪೂರಂ ಕರೋನ್ತಸ್ಸ, ಕತಂ ಕುಪ್ಪತಿ ದುಕ್ಕಟಂ॥
೨೬೦೭.
ಪರಿವಾಸಾದಿಕಮ್ಮೇಪಿ
ಕತ್ವಾ ಪನ ಕರೋನ್ತಾನಂ, ತಥಾ, ಸೇಸಂ ತು ವಟ್ಟತಿ॥
ಉಪೋಸಥಕ್ಖನ್ಧಕಕಥಾ।
ವಸ್ಸೂಪನಾಯಿಕಕ್ಖನ್ಧಕಕಥಾ
೨೬೦೮.
ಪುರಿಮಾ ಪಚ್ಛಿಮಾ ಚಾತಿ, ದುವೇ ವಸ್ಸೂಪನಾಯಿಕಾ।
ಆಲಯೋ ವಾ ವಚೀಭೇದೋ, ಕತ್ತಬ್ಬೋ ಉಪಗಚ್ಛತಾ॥
೨೬೦೯.
ವಸ್ಸೂಪಗಮನಂ ವಾಪಿ, ಜಾನಂ ಅನುಪಗಚ್ಛತೋ।
ತೇಮಾಸಮವಸಿತ್ವಾ ವಾ, ಚರನ್ತಸ್ಸಪಿ ದುಕ್ಕಟಂ॥
೨೬೧೦.
ರುಕ್ಖಸ್ಸ ಸುಸಿರೇ ಛತ್ತೇ, ಚಾಟಿಛವಕುಟೀಸು ವಾ।
ಅಜ್ಝೋಕಾಸೇಪಿ ವಾ ವಸ್ಸಂ, ಉಪಗನ್ತುಂ ನ ವಟ್ಟತಿ॥
೨೬೧೧.
ವಸ್ಸಚ್ಛೇದೇ ಅನಾಪತ್ತಿ, ಅನ್ತರಾಯೋ ಸಚೇ ಸಿಯಾ।
ಛಿನ್ನವಸ್ಸಸ್ಸ ಭಿಕ್ಖುಸ್ಸ, ವಾರಿತಾವ ಪವಾರಣಾ॥
೨೬೧೨.
ಮಾತಾಪಿತೂನಂ
ಪಞ್ಚನ್ನಮತ್ಥೇ ಸಹಧಮ್ಮಿಕಾನಂ।
ದಟ್ಠುಂ ಗಿಲಾನಂ ತದುಪಟ್ಠಕಾನಂ।
ಭತ್ತಾದಿ ನೇಸಂ ಪರಿಯೇಸನತ್ಥಂ॥
೨೬೧೩.
ತಥಾನಭಿರತಂ ಗನ್ತ್ವಾ, ವೂಪಕಾಸೇಸ್ಸಮುಟ್ಠಿತಂ।
ದಿಟ್ಠಿಂ ವಾ ತಸ್ಸ ಕುಕ್ಕುಚ್ಚಂ, ವಿನೋದೇಸ್ಸಾಮಹನ್ತಿ ವಾ॥
೨೬೧೪.
ಏವಂ ಸತ್ತಾಹಕಿಚ್ಚೇನ, ಭಿಕ್ಖುನಾ ವಿನಯಞ್ಞುನಾ।
ಅಪೇಸಿತೇಪಿ ಗನ್ತಬ್ಬಂ, ಪಗೇವ ಪಹಿತೇ ಪನ॥
೨೬೧೫.
ವಸ್ಸಂ ಉಪಗತೇನೇತ್ಥ, ಅನಿಮನ್ತಿತಭಿಕ್ಖುನಾ।
ಧಮ್ಮಸ್ಸ ಸವನತ್ಥಾಯ, ಗನ್ತುಂ ಪನ ನ ವಟ್ಟತಿ॥
೨೬೧೬.
‘‘ಅಸುಕಂ
ಇಚ್ಚೇವಂ ಕತಿಕಾ ಪುಬ್ಬಂ, ಕತಾ ಚೇ ಪನ ವಟ್ಟತಿ॥
೨೬೧೭.
‘‘ಧೋವಿಸ್ಸಾಮಿ ರಜಿಸ್ಸಾಮಿ, ಭಣ್ಡಕ’’ನ್ತಿ ನ ವಟ್ಟತಿ।
ಸಚಾಚರಿಯುಪಜ್ಝಾಯಾ, ಪಹಿಣನ್ತಿ ಚ ವಟ್ಟತಿ॥
೨೬೧೮.
ಉದ್ದೇಸಾದೀನಮತ್ಥಾಯ, ಗನ್ತುಂ ನೇವ ಚ ವಟ್ಟತಿ।
ಗರೂನಂ ದಸ್ಸನತ್ಥಾಯ, ಗನ್ತುಂ ಲಭತಿ ಪುಗ್ಗಲೋ॥
೨೬೧೯.
ಸಚೇ ಆಚರಿಯೋ ‘‘ಅಜ್ಜ, ಮಾ ಗಚ್ಛಾಹೀ’’ತಿ ಭಾಸತಿ।
ರತ್ತಿಚ್ಛೇದೇ ಅನಾಪತ್ತಿ, ಹೋತೀತಿ ಪರಿದೀಪಿತಾ॥
೨೬೨೦.
ಯಸ್ಸ ಕಸ್ಸಚಿ ಞಾತಿಸ್ಸ, ಉಪಟ್ಠಾಕಕುಲಸ್ಸ ವಾ।
ಗಚ್ಛತೋ ದಸ್ಸನತ್ಥಾಯ, ರತ್ತಿಚ್ಛೇದೇ ಚ ದುಕ್ಕಟಂ॥
೨೬೨೧.
‘‘ಆಗಮಿಸ್ಸಾಮಿ ಅಜ್ಜೇವ, ಗನ್ತ್ವಾಹಂ ಗಾಮಕ’’ನ್ತಿ ಚ।
ಸಚೇ ಪಾಪುಣಿತುಂ ಗಚ್ಛಂ, ನ ಸಕ್ಕೋತೇವ ವಟ್ಟತಿ॥
೨೬೨೨.
ವಜೇ ಸತ್ಥೇಪಿ ನಾವಾಯಂ, ತೀಸು ಠಾನೇಸು ಭಿಕ್ಖುನೋ।
ವಸ್ಸಚ್ಛೇದೇ ಅನಾಪತ್ತಿ, ಪವಾರೇತುಞ್ಚ ವಟ್ಟತಿ॥
೨೬೨೩.
ಸತಿ ಪಚ್ಚಯವೇಕಲ್ಲೇ, ಸರೀರಾಫಾಸುತಾಯ ವಾ।
ಏಸೇವ ಅನ್ತರಾಯೋತಿ, ವಸ್ಸಂ ಛೇತ್ವಾಪಿ ಪಕ್ಕಮೇ॥
೨೬೨೪.
ಯೇನ ಕೇನನ್ತರಾಯೇನ, ವಸ್ಸಂ ನೋಪಗತೋ ಹಿ ಯೋ।
ದುತಿಯಾ ಉಪಗನ್ತಬ್ಬಾ, ಛಿನ್ನವಸ್ಸೇನ ವಾ ಪನ॥
೨೬೨೫.
ವಸ್ಸಂ
ಬಹಿದ್ಧಾ ಏವ ಸತ್ತಾಹಂ, ಉಪಗನ್ತ್ವಾಪಿ ವಾ ಪನ॥
೨೬೨೬.
ವೀತಿನಾಮೇತಿ ಚೇ ತಸ್ಸ, ಪುರಿಮಾಪಿ ನ ವಿಜ್ಜತಿ।
ಪಟಿಸ್ಸವೇ ಚ ಭಿಕ್ಖುಸ್ಸ, ಹೋತಿ ಆಪತ್ತಿ ದುಕ್ಕಟಂ॥
೨೬೨೭.
ವಸ್ಸಂ ಪನುಪಗನ್ತ್ವಾ ಚ, ಉಟ್ಠಾಪೇತ್ವಾ ನ ಚಾರುಣಂ।
ಗಚ್ಛತೋ ಪನ ಸತ್ತಾಹ-ಕರಣೇನೇವ ಭಿಕ್ಖುನೋ॥
೨೬೨೮.
ಅನ್ತೋಯೇವ ಚ ಸತ್ತಾಹಂ, ನಿವತ್ತನ್ತಸ್ಸ ತಸ್ಸ ತು।
ಅನಾಪತ್ತೀತಿ ಕೋ ವಾದೋ, ವಸಿತ್ವಾ ಬಹಿ ಗಚ್ಛತೋ॥
೨೬೨೯.
‘‘ವಸಿಸ್ಸಾಮೀಧ
ನೋಪೇತಸತಿಯಾ ವಸ್ಸಂ, ತೇನ ಸೇನಾಸನಂ ಪನ॥
೨೬೩೦.
ಗಹಿತಂ ಸುಗ್ಗಹಿತಂ ಹೋತಿ, ಛಿನ್ನವಸ್ಸೋ ನ ಹೋತಿ ಸೋ।
ಲಭತೇವ ಪವಾರೇತುಂ, ನ ದೋಸೋ ಕೋಚಿ ವಿಜ್ಜತಿ॥
೨೬೩೧.
‘‘ಇಮಸ್ಮಿಂ ವಿಹಾರೇ ತೇಮಾಸಂ, ಇಮಂ ವಸ್ಸಂ ಉಪೇಮಿ’’ತಿ।
ನಿಚ್ಛಾರಿತೇ ಚ ತಿಕ್ಖತ್ತುಂ, ವಸ್ಸಂ ಉಪಗತೋ ಸಿಯಾ॥
೨೬೩೨.
ಆದಿಂ ತು ನವಮಿಂ ಕತ್ವಾ, ಗನ್ತುಂ ವಟ್ಟತಿ ಭಿಕ್ಖುನೋ।
ಆಗಚ್ಛತು ಚ ಪಚ್ಛಾ ಸೋ, ಮಾ ವಾ ದೋಸೋ ನ ವಿಜ್ಜತಿ॥
ವಸ್ಸೂಪನಾಯಿಕಕ್ಖನ್ಧಕಕಥಾ।
ಪವಾರಣಕ್ಖನ್ಧಕಕಥಾ
೨೬೩೩.
ಚಾತುದ್ದಸೀ ಪಞ್ಚದಸೀ, ಸಾಮಗ್ಗೀ ಚ ಪವಾರಣಾ।
ತೇವಾಚೀ ದ್ವೇಕವಾಚೀ ಚ, ಸಙ್ಘೇ ಚ ಗಣಪುಗ್ಗಲೇ॥
೨೬೩೪.
ಏತಾ ಪನ ಮುನಿನ್ದೇನ, ವುತ್ತಾ ನವ ಪವಾರಣಾ।
ತೀಣಿ ಕಮ್ಮಾನಿ ಮುಞ್ಚಿತ್ವಾ, ಅನ್ತೇನೇವ ಪವಾರಯೇ॥
೨೬೩೫.
ಪುಬ್ಬಕಿಚ್ಚಂ ಸಮಾಪೇತ್ವಾ, ಪತ್ತಕಲ್ಲೇ ಸಮಾನಿತೇ।
ಞತ್ತಿಂ ಠಪೇತ್ವಾ ಸಙ್ಘೇನ, ಕತ್ತಬ್ಬಾ ಹಿ ಪವಾರಣಾ॥
೨೬೩೬.
ಪವಾರೇನ್ತೇಸು
ಸಯಂ ಯಾವ ಪವಾರೇಯ್ಯ, ತಾವ ಉಕ್ಕುಟಿಕಞ್ಹಿ ಸೋ॥
೨೬೩೭.
ಞತ್ತಿಂ ವತ್ವಾ ಪವಾರೇಯ್ಯುಂ, ಚತ್ತಾರೋ ವಾ ತಯೋಪಿ ವಾ।
ಪುಬ್ಬಕಿಚ್ಚಂ ಸಮಾಪೇತ್ವಾ, ಏಕಾವಾಸೇ ವಸನ್ತಿ ಚೇ॥
೨೬೩೮.
ಅಞ್ಞಮಞ್ಞಂ ಪವಾರೇಯ್ಯುಂ, ವಿನಾ ಞತ್ತಿಂ ದುವೇ ಜನಾ।
ಅಧಿಟ್ಠೇಯ್ಯ ಪನೇಕೋಪಿ, ಸೇಸಾ ಸಙ್ಘಪವಾರಣಾ॥
೨೬೩೯.
ಪವಾರಿತೇ
ಅವುಟ್ಠೋ ಛಿನ್ನವಸ್ಸೋ ವಾ, ಪಾರಿಸುದ್ಧಿಉಪೋಸಥಂ॥
೨೬೪೦.
ಪಞ್ಚ ಯಸ್ಮಿಂ ಪನಾವಾಸೇ, ಚತ್ತಾರೋ ವಾ ತಯೋಪಿ ವಾ।
ಏಕೇಕಸ್ಸ ಹರಿತ್ವಾನ, ಸಮಣಾ ತೇ ಪವಾರಣಂ॥
೨೬೪೧.
ಅಞ್ಞಮಞ್ಞಂ ಪವಾರೇನ್ತಿ, ಸಚೇ ಆಪತ್ತಿ ದುಕ್ಕಟಂ।
ಸೇಸಂ ಉಪೋಸಥೇ ವುತ್ತ-ನಯೇನಿಧ ನಯೇ ಬುಧೋ॥
೨೬೪೨.
ಪಾರಿಸುದ್ಧಿಪ್ಪದಾನೇನ, ಸಮ್ಪಾದೇತತ್ತನೋ ಸುಚಿಂ।
ಛನ್ದದಾನೇನ ಸಙ್ಘಸ್ಸ, ಸಬ್ಬಂ ಸಾಧೇತಿ, ನತ್ತನೋ॥
೨೬೪೩.
ತಸ್ಮಾ ಪನ ಉಭಿನ್ನಮ್ಪಿ, ಕಿಚ್ಚಸಿದ್ಧತ್ಥಮೇವಿಧ।
ಪಾರಿಸುದ್ಧಿಪಿ ದಾತಬ್ಬಾ, ಛನ್ದಂ ದೇನ್ತೇನ ಭಿಕ್ಖುನಾ॥
೨೬೪೪.
ಛನ್ದೇಕೇನ ಬಹೂನಮ್ಪಿ, ಹಾತಬ್ಬೋ ಪಾರಿಸುದ್ಧಿಪಿ।
ಪರಮ್ಪರಾಹಟೋ ಛನ್ದೋ, ನ ಗಚ್ಛತಿ ವಿಸುದ್ಧಿಯಾ॥
೨೬೪೫.
ಛನ್ದಂ ವಾ ಪಾರಿಸುದ್ಧಿಂ ವಾ, ಗಹೇತ್ವಾ ವಾ ಪವಾರಣಂ।
ಸಾಮಣೇರಾದಿಭಾವಂ ವಾ, ಪಟಿಜಾನೇಯ್ಯ ಹಾರಕೋ॥
೨೬೪೬.
ಸಚೇ ಸೋ ಸಙ್ಘಮಪ್ಪತ್ವಾ, ವಿಬ್ಭಮೇಯ್ಯ ಮರೇಯ್ಯ ವಾ।
ನಾಹಟಞ್ಚೇವ ತಂ ಸಬ್ಬಂ, ಪತ್ವಾ ಚೇವಂ ಸಿಯಾಹಟಂ॥
೨೬೪೭.
ಸಙ್ಘಂ ಪತ್ವಾ ಪಮತ್ತೋ ವಾ, ಸುತ್ತೋ ವಾ ಖಿತ್ತಚಿತ್ತಕೋ।
ನಾರೋಚೇತಿ ಅನಾಪತ್ತಿ, ಹೋತಿ ಸಞ್ಚಿಚ್ಚ ದುಕ್ಕಟಂ॥
೨೬೪೮.
ಯೇ ತೇ ವಿಪಸ್ಸನಾಯುತ್ತಾ, ರತ್ತಿನ್ದಿವಮತನ್ದಿತಾ।
ಪುಬ್ಬರತ್ತಾಪರರತ್ತಂ, ವಿಪಸ್ಸನಪರಾಯಣಾ॥
೨೬೪೯.
ಲದ್ಧಫಾಸುವಿಹಾರಾನಂ, ಸಿಯಾ ನ ಪರಿಹಾನಿತಿ।
ಪವಾರಣಾಯ ಸಙ್ಗಾಹೋ, ವುತ್ತೋ ಕತ್ತಿಕಮಾಸಕೇ॥
ಪವಾರಣಕ್ಖನ್ಧಕಕಥಾ।
ಚಮ್ಮಕ್ಖನ್ಧಕಕಥಾ
೨೬೫೦.
ಏಳಕಾಜಮಿಗಾನಂ
ರೋಹಿತೇಣಿಕುರಙ್ಗಾನಂ, ಪಸದಂಮಿಗಮಾತುಯಾ॥
೨೬೫೧.
ಠಪೇತ್ವಾ ಚಮ್ಮಮೇತೇಸಂ, ಅಞ್ಞಂ ದುಕ್ಕಟವತ್ಥುಕಂ।
ಥವಿಕೋಪಾಹನೇ ಸಬ್ಬಂ, ಚಮ್ಮಂ ವಟ್ಟತ್ಯಮಾನುಸಂ॥
೨೬೫೨.
ವಟ್ಟನ್ತಿ ಮಜ್ಝಿಮೇ ದೇಸೇ, ನ ಗುಣಙ್ಗುಣುಪಾಹನಾ।
ವಟ್ಟನ್ತಿ ಅನ್ತೋಆರಾಮೇ, ಸಬ್ಬತ್ಥಾಪಿ ಚ ರೋಗಿನೋ॥
೨೬೫೩.
ಪುಟಖಲ್ಲಕಬದ್ಧಾ ಚ, ತಥೇವ ಪಾಲಿಗುಣ್ಠಿಮಾ।
ತೂಲಪುಣ್ಣಾ ನ ವಟ್ಟನ್ತಿ, ಸಬ್ಬನೀಲಾದಯೋಪಿ ಚ॥
೨೬೫೪.
ಚಿತ್ರಾ ಉಪಾಹನಾ ಮೇಣ್ಡ-ವಿಸಾಣೂಪಮವದ್ಧಿಕಾ।
ನ ಚ ವಟ್ಟನ್ತಿ ಮೋರಸ್ಸ, ಪಿಞ್ಛೇನ ಪರಿಸಿಬ್ಬಿತಾ॥
೨೬೫೫.
ಮಜ್ಜಾರಕಾಳಕೋಲೂಕ-ಸೀಹಬ್ಯಗ್ಘುದ್ದದೀಪಿನಂ।
ಅಜಿನಸ್ಸ ಚ ಚಮ್ಮೇನ, ನ ವಟ್ಟತಿ ಪರಿಕ್ಖಟಾ॥
೨೬೫೬.
ಪುಟಾದಿಂ ಅಪನೇತ್ವಾ ವಾ, ಛಿನ್ದಿತ್ವಾ ವಾಪಿ ಸಬ್ಬಸೋ।
ವಣ್ಣಭೇದಂ ತಥಾ ಕತ್ವಾ, ಧಾರೇತಬ್ಬಾ ಉಪಾಹನಾ॥
೨೬೫೭.
ಸಬ್ಬಾಪಿ ಪನ ಧಾರೇತುಂ, ನ ಚ ವಟ್ಟನ್ತಿ ಪಾದುಕಾ।
ಠಪೇತ್ವಾ ತತ್ಥ ಪಸ್ಸಾವ- ವಚ್ಚಾಚಮನಪಾದುಕಾ॥
೨೬೫೮.
ಆಸನ್ದಿಞ್ಚೇವ ಪಲ್ಲಙ್ಕಂ, ಉಚ್ಚಾಸಯನಸಞ್ಞಿತಂ।
ಅತಿಕ್ಕನ್ತಪಮಾಣಂ ತು, ಸೇವಮಾನಸ್ಸ ದುಕ್ಕಟಂ॥
೨೬೫೯.
ಗೋನಕಂ ಕುತ್ತಕಂ ಚಿತ್ತಂ, ಪಟಿಕಂ ಪಟಲಿಕಮ್ಪಿ ಚ।
ಏಕನ್ತಲೋಮಿಂ ವಿಕತಿಂ, ತೂಲಿಕಂ ಉದ್ದಲೋಮಿಕಂ॥
೨೬೬೦.
ಕಟ್ಟಿಸ್ಸಂ ಪನ ಕೋಸೇಯ್ಯಂ, ಹತ್ಥಿಅಸ್ಸರಥತ್ಥರಂ।
ಕದಲಿಮಿಗಪವರ-ಪಚ್ಚತ್ಥರಣಕಮ್ಪಿ ಚ॥
೨೬೬೧.
ಹೇಟ್ಠಾ
ಅಕಪ್ಪಿಯಮಿದಂ ಸಬ್ಬಂ, ದುಕ್ಕಟಂ ಪರಿಭುಞ್ಜತೋ॥
೨೬೬೨.
ಹೇಟ್ಠಾ
ಉದ್ಧಂ ಸೇತವಿತಾನಮ್ಪಿ, ತಸ್ಮಿಂ ಅಸತಿ ವಟ್ಟತಿ॥
೨೬೬೩.
ಆಸನ್ದಿಂ ಪನ ಪಲ್ಲಙ್ಕಂ, ಠಪೇತ್ವಾ ತೂಲಿಕಮ್ಪಿ ಚ।
ಸೇಸಂ ಪನ ಚ ಸಬ್ಬಮ್ಪಿ, ಲಭತೇ ಗಿಹಿಸನ್ತಕಂ॥
೨೬೬೪.
ಧಮ್ಮಾಸನೇ ಅನಾಪತ್ತಿ, ಭತ್ತಗ್ಗೇಪಿ ನಿಸೀದಿತುಂ।
ಭೂಮತ್ಥರಣಕೇ ತತ್ಥ, ಸಯಿತುಮ್ಪಿ ಚ ವಟ್ಟತಿ॥
ಚಮ್ಮಕ್ಖನ್ಧಕಕಥಾ।
ಭೇಸಜ್ಜಕ್ಖನ್ಧಕಕಥಾ
೨೬೬೫.
ವುತ್ತಾ ಗಹಪತಿಸ್ಸಾಪಿ, ಸಮ್ಮುತುಸ್ಸಾವನನ್ತಿಕಾ।
ಗೋನಿಸಾದೀತಿ ಕಪ್ಪಿಯಾ, ಚತಸ್ಸೋ ಹೋನ್ತಿ ಭೂಮಿಯೋ॥
೨೬೬೬.
ಸಙ್ಘಸ್ಸ ಸನ್ತಕಂ ಗೇಹಂ, ಸನ್ತಕಂ ಭಿಕ್ಖುನೋಪಿ ವಾ।
ಕಪ್ಪಿಯಂ ಪನ ಕತ್ತಬ್ಬಂ, ಸಹಸೇಯ್ಯಪ್ಪಹೋನಕಂ॥
೨೬೬೭.
ಠಪೇತ್ವಾ ಭಿಕ್ಖುಮಞ್ಞೇಹಿ, ದಿನ್ನಂ ಕಪ್ಪಿಯಭೂಮಿಯಾ।
ಅತ್ಥಾಯ ಸನ್ತಕಂ ತೇಸಂ, ಗೇಹಂ ಗಹಪತೇವಿದಂ॥
೨೬೬೮.
ಸಾ ಹಿ ಸಮ್ಮುತಿಕಾ ನಾಮ, ಯಾ ಹಿ ಸಙ್ಘೇನ ಸಮ್ಮತಾ।
ಕಮ್ಮವಾಚಮವತ್ವಾ ವಾ, ವಟ್ಟತೇವಾಪಲೋಕನಂ॥
೨೬೬೯.
ಪಠಮಿಟ್ಠಕಪಾಸಾಣ-ಥಮ್ಭಾದಿಟ್ಠಪನೇ ಪನ।
‘‘ಕಪ್ಪಿಯಕುಟಿಂ ಕರೋಮಾ’’ತಿ, ವದನ್ತೇಹಿ ಸಮನ್ತತೋ॥
೨೬೭೦.
ಉಕ್ಖಿಪಿತ್ವಾ ಠಪೇನ್ತೇಸು, ಆಮಸಿತ್ವಾ ಪರೇಸು ವಾ।
ಸಯಮೇವುಕ್ಖಿಪಿತ್ವಾ ವಾ, ಠಪೇಯ್ಯುಸ್ಸಾವನನ್ತಿಕಾ॥
೨೬೭೧.
ಇಟ್ಠಕಾದಿಪತಿಟ್ಠಾನಂ
ವಾಚಾಯ ಪರಿಯೋಸಾನಂ, ಸಮಕಾಲಂ ತು ವಟ್ಟತಿ॥
೨೬೭೨.
ಆರಾಮೋ ಅಪರಿಕ್ಖಿತ್ತೋ, ಸಕಲೋ ಭುಯ್ಯತೋಪಿ ವಾ।
ದುವಿಧೋಪಿ ಚ ವಿಞ್ಞೂಹಿ, ಗೋನಿಸಾದೀತಿ ವುಚ್ಚತಿ॥
೨೬೭೩.
ಏತಾ
ಏತ್ಥ ಪಕ್ಕಞ್ಚ ವುತ್ಥಞ್ಚ, ಸಬ್ಬಂ ವಟ್ಟತಿ ಆಮಿಸಂ॥
೨೬೭೪.
ಉಸ್ಸಾವನನ್ತಿಕಾ ಯಾ ಸಾ, ಥಮ್ಭಾದೀಸು ಅಧಿಟ್ಠಿತಾ।
ಥಮ್ಭಾದೀಸ್ವಪನೀತೇಸು, ತದಞ್ಞೇಸುಪಿ ತಿಟ್ಠತಿ॥
೨೬೭೫.
ಅಪನೀತೇಸು ಸಬ್ಬೇಸು, ಸಿಯಾ ಜಹಿತವತ್ಥುಕಾ।
ಗೋನಿಸಾದೀ ಪರಿಕ್ಖಿತ್ತಾ, ಸೇಸಾ ಛದನನಾಸತೋ॥
೨೬೭೬.
ಭಿಕ್ಖುಂ ಠಪೇತ್ವಾ ಅಞ್ಞೇಸಂ, ಹತ್ಥತೋ ಚ ಪಟಿಗ್ಗಹೋ।
ತೇಸಞ್ಚ ಸನ್ನಿಧಿ ಅನ್ತೋ- ವುತ್ತಂ ಭಿಕ್ಖುಸ್ಸ ವಟ್ಟತಿ॥
೨೬೭೭.
ಭಿಕ್ಖುಸ್ಸ ಭಿಕ್ಖುನಿಯಾ ವಾ, ಸನ್ತಕಂ ಸಙ್ಘಿಕಮ್ಪಿ ವಾ।
ಅನ್ತೋವುತ್ಥಞ್ಚ ಪಕ್ಕಞ್ಚ, ಉಭಿನ್ನಂ ನ ಚ ವಟ್ಟತಿ॥
೨೬೭೮.
ಅಕಪ್ಪಕುಟಿಯಾ ವುತ್ಥಂ, ಸಪ್ಪಿಆದಿವಿಮಿಸ್ಸಿತಂ।
‘‘ಅನ್ತೋವುತ್ಥ’’ನ್ತಿ ನಿದ್ದಿಟ್ಠಂ, ಪಠಮಂ ಕಾಲಿಕದ್ವಯಂ॥
೨೬೭೯.
ತೇಹೇವ ಸಪ್ಪಿಆದೀಹಿ, ಭಿಕ್ಖುನಾ ಯಾವಜೀವಿಕಂ।
ಪಕ್ಕಂ ತಂ ಪನ ಸತ್ತಾಹಂ, ವಟ್ಟತೇವ ನಿರಾಮಿಸಂ॥
೨೬೮೦.
ಸಚೇ ಆಮಿಸಸಂಸಟ್ಠಂ, ಪಕ್ಕಂ ತಂ ಪರಿಭುಞ್ಜತಿ।
ಅನ್ತೋವುತ್ಥಞ್ಚ ಭಿಯ್ಯೋಪಿ, ಸಾಮಪಕ್ಕಞ್ಚ ಭುಞ್ಜತಿ॥
೨೬೮೧.
ಯಾವಕಾಲಿಕಮಾಹಾರೋ, ಪಾನಕಂ ಯಾಮಕಾಲಿಕಂ।
ಸತ್ತಾಹಕಾಲಿಕಂ ನಾಮ, ಸಪ್ಪಿಆದಿಕಪಞ್ಚಕಂ॥
೨೬೮೨.
ಸೇಸಂ ಪನ ಹಲಿದ್ದಾದಿ, ಭೇಸಜ್ಜಂ ಯಾವಜೀವಿಕಂ।
ಚತುಧಾ ಕಾಲಿಕಾ ವುತ್ತಾ, ಉದಕಂ ಹೋತ್ಯಕಾಲಿಕಂ॥
೨೬೮೩.
ಪಟಿಗ್ಗಹವಸೇನೇವ, ಕಾಲಾತೀತಾ ತಿಕಾಲಿಕಾ।
ಹೋನ್ತಿ ದೋಸಕರಾ ಭುತ್ತಾ, ಅಭುತ್ತಂ ತತಿಯಮ್ಪಿ ಚ॥
೨೬೮೪.
ಅಮ್ಬಂ
ಸಾಲು ಫಾರುಸಕಞ್ಚಾತಿ, ಪಾನಕಂ ಅಟ್ಠಧಾ ಮತಂ॥
೨೬೮೫.
ಪಾನಕತ್ಥಮನುಞ್ಞಾತಂ, ಫಲಂ ಪಕ್ಕಞ್ಚ ಆಮಕಂ।
ಪಾನಹೇತು ಪಟಿಕ್ಖಿತ್ತೋ, ಸವತ್ಥುಕಪಟಿಗ್ಗಹೋ॥
೨೬೮೬.
ಅಮ್ಬಪಕ್ಕಂ ಸುಕೋಟ್ಟೇತ್ವಾ, ಮದ್ದಿತ್ವಾ ಉದಕೇ ಪನ।
ಪಚ್ಛಾ ಪರಿಸ್ಸವಂ ಕತ್ವಾ, ಪಾತುಂ ವಟ್ಟತಿ ಪಾನಕಂ॥
೨೬೮೭.
ವಟ್ಟತಾದಿಚ್ಚಪಾಕಂ
ಏಸೇವ ಚ ನಯೋ ಸೇಸ-ಪಾನಕೇಸುಪಿ ದೀಪಿತೋ॥
೨೬೮೮.
ಪುಪ್ಫಪತ್ತಫಲುಚ್ಛೂನಂ, ಚತ್ತಾರೋ ಪನಿಮೇ ರಸಾ।
ಅನುಞ್ಞಾತಾ ಇಮಾನಟ್ಠ, ಪಾನಾನಿ ಅನುಜಾನತಾ॥
೨೬೮೯.
ಸಬ್ಬೋ ಪುಪ್ಫರಸೋ ವುತ್ತೋ, ಮಧುಕಸ್ಸ ರಸಂ ವಿನಾ।
ಸಬ್ಬೋ ಪತ್ತರಸೋ ವುತ್ತೋ, ಪಕ್ಕಡಾಕರಸಂ ವಿನಾ॥
೨೬೯೦.
ಸತ್ತನ್ನಂ ಸಾನುಲೋಮಾನಂ, ಧಞ್ಞಾನಂ ಫಲಜಂ ರಸಂ।
ಠಪೇತ್ವಾನುಮತೋ ಸಬ್ಬೋ, ವಿಕಾಲೇ ಫಲಜೋ ರಸೋ॥
೨೬೯೧.
ಯಾವಕಾಲಿಕಪತ್ತಾನ-ಮಪಿ ಸೀತುದಕೇ ಕತೋ।
ಮದ್ದಿತ್ವಾದಿಚ್ಚಪಾಕೋಪಿ, ವಿಕಾಲೇ ಪನ ವಟ್ಟತಿ॥
೨೬೯೨.
ತಾಲಞ್ಚ ನಾಳಿಕೇರಞ್ಚ, ಪನಸಂ ಲಬುಜಮ್ಪಿ ಚ।
ತಿಪುಸಾಲಾಬುಕುಮ್ಭಣ್ಡಂ, ತಥಾ ಪುಸ್ಸಫಲಮ್ಪಿ ಚ॥
೨೬೯೩.
ಏವಮೇಳಾಲುಕಞ್ಚಾತಿ, ನವೇತಾನಿ ಫಲಾನಿ ಹಿ।
ಅಪರಣ್ಣಞ್ಚ ಸಬ್ಬಮ್ಪಿ, ಸತ್ತಧಞ್ಞಾನುಲೋಮಿಕಂ॥
೨೬೯೪.
ಬದರಂ ತಿಮ್ಬರೂ ಸೇಲು, ಕೋಸಮ್ಬಂ ಕರಮದ್ದಕಂ।
ಮಾತುಲುಙ್ಗಕಪಿತ್ಥಞ್ಚ, ವೇತ್ತಂ ಚಿಞ್ಚಫಲಮ್ಪಿ ಚ॥
೨೬೯೫.
ಫಲಾನಂ ಏವಮಾದೀನಂ, ಖುದ್ದಕಾನಂ ರಸೋ ಪನ।
ಅಟ್ಠಪಾನಾನುಲೋಮತ್ತಾ, ನಿದ್ದಿಟ್ಠೋ ಅನುಲೋಮಿಕೇ॥
೨೬೯೬.
ಸಾನುಲೋಮಸ್ಸ
ಅಞ್ಞೋ ಫಲರಸೋ ನತ್ಥಿ, ಅಯಾಮಕಾಲಿಕೋ ಇಧ॥
ಭೇಸಜ್ಜಕ್ಖನ್ಧಕಕಥಾ।
ಕಥಿನಕ್ಖನ್ಧಕಕಥಾ
೨೬೯೭.
ಭಿಕ್ಖೂನಂ ವುಟ್ಠವಸ್ಸಾನಂ, ಕಥಿನತ್ಥಾರಮಬ್ರವಿ।
ಪಞ್ಚನ್ನಂ ಆನಿಸಂಸಾನಂ, ಕಾರಣಾ ಮುನಿಪುಙ್ಗವೋ॥
೨೬೯೮.
ನ
ಚೀವರಂ ಭಿಕ್ಖುನಾದಾಯ, ಉದ್ಧರಿತ್ವಾ ಪುರಾಣಕಂ॥
೨೬೯೯.
ನವಂ ಅಧಿಟ್ಠಹಿತ್ವಾವ, ವತ್ತಬ್ಬಂ ವಚಸಾ ಪುನ।
‘‘ಇಮಿನಾನ್ತರವಾಸೇನ, ಕಥಿನಂ ಅತ್ಥರಾಮಿ’’ತಿ॥
೨೭೦೦.
ವುತ್ತೇ ತಿಕ್ಖತ್ತುಮಿಚ್ಚೇವಂ, ಕಥಿನಂ ಹೋತಿ ಅತ್ಥತಂ।
ಸಙ್ಘಂ ಪನುಪಸಙ್ಕಮ್ಮ, ಆದಾಯ ಕಥಿನಂ ಇತಿ॥
೨೭೦೧.
‘‘ಅತ್ಥತಂ ಕಥಿನಂ ಭನ್ತೇ, ಸಙ್ಘಸ್ಸ ಅನುಮೋದಥ।
ಧಮ್ಮಿಕೋ ಕಥಿನತ್ಥಾರೋ’’, ವತ್ತಬ್ಬಂ ತೇನ ಭಿಕ್ಖುನಾ॥
೨೭೦೨.
‘‘ಸುಅತ್ಥತಂ ತಯಾ ಭನ್ತೇ, ಸಙ್ಘಸ್ಸ ಕಥಿನಂ ಪುನ।
ಧಮ್ಮಿಕೋ ಕಥಿನತ್ಥಾರೋ, ಅನುಮೋದಾಮಿ’’ತೀರಯೇ॥
೨೭೦೩.
ಕಥಿನಸ್ಸ ಚ ಕಿಂ ಮೂಲಂ, ಕಿಂ ವತ್ಥು ಕಾ ಚ ಭೂಮಿಯೋ।
ಕತಿಧಮ್ಮವಿದೋ ಭಿಕ್ಖು, ಕಥಿನತ್ಥಾರಮರಹತಿ॥
೨೭೦೪.
ಮೂಲಮೇಕಂ, ಸಿಯಾ ವತ್ಥು, ತಿವಿಧಂ, ಭೂಮಿಯೋ ಛ ಚ।
ಅಟ್ಠಧಮ್ಮವಿದೋ ಭಿಕ್ಖು, ಕಥಿನತ್ಥಾರಮರಹತಿ॥
೨೭೦೫.
ಸಙ್ಘೋ ಮೂಲನ್ತಿ ನಿದ್ದಿಟ್ಠಂ, ವತ್ಥು ಹೋತಿ ತಿಚೀವರಂ।
ಖೋಮಾದೀನಿ ಛ ವುತ್ತಾನಿ, ಚೀವರಾನಿ ಛ ಭೂಮಿಯೋ॥
೨೭೦೬.
ಪುಬ್ಬಪಚ್ಚುದ್ಧರಾಧಿಟ್ಠಾ-ನತ್ಥಾರೋ
ಪಲಿಬೋಧೋ ಚ ಉದ್ಧಾರೋ, ಆನಿಸಂಸಾ ಪನಟ್ಠಿಮೇ॥
೨೭೦೭.
ಧೋವನಞ್ಚ ವಿಚಾರೋ ಚ, ಛೇದನಂ ಬನ್ಧನಮ್ಪಿ ಚ।
ಸಿಬ್ಬನಂ ರಜನಂ ಕಪ್ಪಂ, ‘‘ಪುಬ್ಬಕಿಚ್ಚ’’ನ್ತಿ ವುಚ್ಚತಿ॥
೨೭೦೮.
ಸಙ್ಘಾಟಿ ಉತ್ತರಾಸಙ್ಗೋ, ಅಥೋ ಅನ್ತರವಾಸಕೋ।
ಪಚ್ಚುದ್ಧಾರೋ ಅಧಿಟ್ಠಾನಂ, ಅತ್ಥಾರೋಪೇಸಮೇವ ತು॥
೨೭೦೯.
ಪಕ್ಕಮನಞ್ಚ ನಿಟ್ಠಾನಂ, ಸನ್ನಿಟ್ಠಾನಞ್ಚ ನಾಸನಂ।
ಸವನಾಸಾ ಚ ಸೀಮಾ ಚ, ಸಹುಬ್ಭಾರೋತಿ ಅಟ್ಠಿಮಾ॥
೨೭೧೦.
ಕತಚೀವರಮಾದಾಯ, ಆವಾಸೇ ನಿರಪೇಕ್ಖಕೋ।
ಅತಿಕ್ಕನ್ತಾಯ ಸೀಮಾಯ, ಹೋತಿ ಪಕ್ಕಮನನ್ತಿಕಾ॥
೨೭೧೧.
ಆನಿಸಂಸಮಥಾದಾಯ, ವಿಹಾರೇ ಅನಪೇಕ್ಖಕೋ।
ಗನ್ತ್ವಾ ಪನ ವಿಹಾರಂ ಸೋ, ಅಞ್ಞಂ ಸುಖವಿಹಾರಿಕಂ॥
೨೭೧೨.
ತತ್ಥ
ನಿಟ್ಠಿತೇ ಚೀವರೇ ತಸ್ಮಿಂ, ನಿಟ್ಠಾನನ್ತಾತಿ ವುಚ್ಚತಿ॥
೨೭೧೩.
‘‘ಚೀವರಂ ನ ಕರಿಸ್ಸಾಮಿ, ನ ಪಚ್ಚೇಸ್ಸಂ ತಮಸ್ಸಮಂ’’।
ಏವಂ ತು ಧುರನಿಕ್ಖೇಪೇ, ಸನ್ನಿಟ್ಠಾನನ್ತಿಕಾ ಮತಾ॥
೨೭೧೪.
ಕಥಿನಚ್ಛಾದನಂ ಲದ್ಧಾ, ‘‘ನ ಪಚ್ಚೇಸ್ಸ’’ನ್ತಿ ಚೇ ಗತೋ।
ಕರೋನ್ತಸ್ಸೇವ ನಟ್ಠಂ ವಾ, ದಡ್ಢಂ ವಾ ನಾಸನನ್ತಿಕಾ॥
೨೭೧೫.
ಲದ್ಧಾನಿಸಂಸೋ ಸಾಪೇಕ್ಖೋ, ಬಹಿಸೀಮಂ ಗತೋ ಪನ।
ಸುಣಾತಿ ಚನ್ತರುಬ್ಭಾರಂ, ಸಾ ಹೋತಿ ಸವನನ್ತಿಕಾ॥
೨೭೧೬.
ಚೀವರಾಸಾಯ ಪಕ್ಕನ್ತೋ, ಬಹಿಸೀಮಂ ಗತೋ ಪನ।
‘‘ದಸ್ಸಾಮಿ ಚೀವರಂ ತುಯ್ಹಂ’’, ವುತ್ತೋ ಸವತಿ ಕೇನಚಿ॥
೨೭೧೭.
ಪುನ ವುತ್ತೇ ‘‘ನ ಸಕ್ಕೋಮಿ, ದಾತುನ್ತಿ ತವ ಚೀವರಂ’’।
ಆಸಾಯ ಛಿನ್ನಮತ್ತಾಯ, ಆಸಾವಚ್ಛೇದಿಕಾ ಮತಾ॥
೨೭೧೮.
ವಸ್ಸಂವುಟ್ಠವಿಹಾರಮ್ಹಾ
ಆಗಚ್ಛಂ ಅನ್ತರಾಮಗ್ಗೇ, ತದುದ್ಧಾರಮತಿಕ್ಕಮೇ॥
೨೭೧೯.
ತಸ್ಸ ಸೋ ಕಥಿನುದ್ಧಾರೋ, ಸೀಮಾತಿಕ್ಕನ್ತಿಕೋ ಮತೋ।
ಕಥಿನಾನಿಸಂಸಮಾದಾಯ, ಸಾಪೇಕ್ಖೋವ ಸಚೇ ಗತೋ॥
೨೭೨೦.
ಸಮ್ಭುಣಾತಿ ಪುನಾಗನ್ತ್ವಾ, ಕಥಿನುದ್ಧಾರಮೇವ ಚೇ।
ತಸ್ಸ ಸೋ ಕಥಿನುದ್ಧಾರೋ, ‘‘ಸಹುಬ್ಭಾರೋ’’ತಿ ವುಚ್ಚತಿ॥
೨೭೨೧.
ಪಕ್ಕಮನಞ್ಚ ನಿಟ್ಠಾನಂ, ಸನ್ನಿಟ್ಠಾನಞ್ಚ ಸೀಮತೋ।
ಚತ್ತಾರೋ ಪುಗ್ಗಲಾಧೀನಾ, ಸಙ್ಘಾಧೀನನ್ತರುಬ್ಭರೋ॥
೨೭೨೨.
ನಾಸನಂ ಸವನಞ್ಚೇವ, ಆಸಾವಚ್ಛೇದಿಕಾಪಿ ಚ।
ತಯೋಪಿ ಕಥಿನುಬ್ಭಾರಾ, ನ ತು ಸಙ್ಘಾ, ನ ಭಿಕ್ಖುತೋ॥
೨೭೨೩.
ಆವಾಸಪಲಿಬೋಧೋ ಚ, ಪಲಿಬೋಧೋ ಚ ಚೀವರೇ।
ಪಲಿಬೋಧಾ ದುವೇ ವುತ್ತಾ, ಯುತ್ತಮುತ್ತತ್ಥವಾದಿನಾ॥
೨೭೨೪.
ಅಟ್ಠನ್ನಂ ಮಾತಿಕಾನಂ ವಾ, ಅನ್ತರುಬ್ಭಾರತೋಪಿ ವಾ।
ಉಬ್ಭಾರಾಪಿ ದುವೇ ವುತ್ತಾ, ಕಥಿನಸ್ಸ ಮಹೇಸಿನಾ॥
೨೭೨೫.
ಅನಾಮನ್ತಾಸಮಾದಾನಂ, ಗಣತೋ ಯಾವದತ್ಥಿಕಂ।
ತತ್ಥ ಯೋ ಚೀವರುಪ್ಪಾದೋ, ಆನಿಸಂಸಾ ಚ ಪಞ್ಚಿಮೇ॥
ಕಥಿನಕ್ಖನ್ಧಕಕಥಾ।
ಚೀವರಕ್ಖನ್ಧಕಕಥಾ
೨೭೨೬.
ಚೀವರಸ್ಸ
ಸೀಮಾಯ ದೇತಿ, ಕತಿಕಾ, ಭಿಕ್ಖಾಪಞ್ಞತ್ತಿಯಾ, ತಥಾ॥
೨೭೨೭.
ಸಙ್ಘಸ್ಸ, ಉಭತೋಸಙ್ಘೇ, ವಸ್ಸಂವುಟ್ಠಸ್ಸ ದೇತಿ ಚ,।
ಆದಿಸ್ಸ, ಪುಗ್ಗಲಸ್ಸಾತಿ, ಅಟ್ಠಿಮಾ ಪನ ಮಾತಿಕಾ॥
೨೭೨೮.
ತತ್ಥ ಸೀಮಾಯ ದೇತೀತಿ, ಅನ್ತೋಸೀಮಂ ಗತೇಹಿ ತು।
ಭಿಕ್ಖೂಹಿ ಭಾಜೇತಬ್ಬನ್ತಿ, ವಣ್ಣಿತಂ ವರವಣ್ಣಿನಾ॥
೨೭೨೯.
ಕತಿಕಾಯ ಚ ದಿನ್ನಂ ಯೇ, ವಿಹಾರಾ ಏಕಲಾಭಕಾ।
ಏತ್ಥ ದಿನ್ನಞ್ಚ ಸಬ್ಬೇಹಿ, ಭಾಜೇತಬ್ಬನ್ತಿ ವುಚ್ಚತಿ॥
೨೭೩೦.
ಸಙ್ಘಸ್ಸ ಧುವಕಾರಾ ಹಿ, ಯತ್ಥ ಕರೀಯನ್ತಿ ತತ್ಥ ಚ।
ಭಿಕ್ಖಾಪಞ್ಞತ್ತಿಯಾ ದಿನ್ನಂ, ದಿನ್ನಂ ವುತ್ತಂ ಮಹೇಸಿನಾ॥
೨೭೩೧.
ಸಙ್ಘಸ್ಸ ಪನ ಯಂ ದಿನ್ನಂ, ಉಜುಭೂತೇನ ಚೇತಸಾ।
ತಞ್ಹಿ ಸಮ್ಮುಖಿಭೂತೇನ, ಭಾಜೇತಬ್ಬನ್ತಿ ವುಚ್ಚತಿ॥
೨೭೩೨.
ಉಭತೋಸಙ್ಘ ಮುದ್ದಿಸ್ಸ, ದೇತಿ ಸದ್ಧಾಯ ಚೀವರಂ।
ಥೋಕಾ ವಾ ಬಹು ವಾ ಭಿಕ್ಖೂ, ಸಮಭಾಗೋವ ವಟ್ಟತಿ॥
೨೭೩೩.
ವಸ್ಸಂವುಟ್ಠಸ್ಸ ಸಙ್ಘಸ್ಸ, ಚೀವರಂ ದೇತಿ ಯಂ ಪನ।
ತಂ ತಸ್ಮಿಂ ವುಟ್ಠವಸ್ಸೇನ, ಭಾಜೇತಬ್ಬನ್ತಿ ವಣ್ಣಿತಂ॥
೨೭೩೪.
ಯಾಗುಯಾ ಪನ ಭತ್ತೇ ವಾ, ದೇತಿಆದಿಸ್ಸ ಚೇ ಪನ।
ಚೀವರಂ ತತ್ಥ ತತ್ಥೇವ, ಯೋಜೇತಬ್ಬಂ ವಿಜಾನತಾ॥
೨೭೩೫.
ಪುಗ್ಗಲಂ ಪನ ಉದ್ದಿಸ್ಸ, ಚೀವರಂ ಯಂ ತು ದೀಯತಿ।
ಪುಗ್ಗಲೋದಿಸ್ಸಕಂ ನಾಮ, ದಾನಂ ತಂ ತು ಪವುಚ್ಚತಿ॥
೨೭೩೬.
ಸಹಧಮ್ಮಿಕೇಸು ಯೋ ಕೋಚಿ, ಪಞ್ಚಸ್ವಪಿ ‘‘ಮಮಚ್ಚಯೇ।
ಅಯಂ ಮಯ್ಹಂ ಪರಿಕ್ಖಾರೋ, ಮಾತುಯಾ ಪಿತುನೋಪಿ ವಾ॥
೨೭೩೭.
ಉಪಜ್ಝಾಯಸ್ಸ ವಾ ಹೋತು’’, ವದತಿಚ್ಚೇವಮೇವ ಚೇ।
ನ ಹೋತಿ ಪನ ತಂ ತೇಸಂ, ಸಙ್ಘಸ್ಸೇವ ಚ ಸನ್ತಕಂ॥
೨೭೩೮.
ಪಞ್ಚನ್ನಂ
ಸಙ್ಘಸ್ಸೇವ ಚ ತಂ ಹೋತಿ, ಗಿಹೀನಂ ಪನ ರೂಹತಿ॥
೨೭೩೯.
ಭಿಕ್ಖು ವಾ ಸಾಮಣೇರೋ ವಾ, ಕಾಲಂ ಭಿಕ್ಖುನುಪಸ್ಸಯೇ।
ಕರೋತ್ಯಸ್ಸ ಪರಿಕ್ಖಾರಾ, ಭಿಕ್ಖೂನಂಯೇವ ಸನ್ತಕಾ॥
೨೭೪೦.
ಭಿಕ್ಖುನೀ
ಹೋನ್ತಿ ತಸ್ಸಾ ಪರಿಕ್ಖಾರಾ, ಭಿಕ್ಖುನೀನಂ ತು ಸನ್ತಕಾ॥
೨೭೪೧.
‘‘ದೇಹಿ ನೇತ್ವಾಸುಕಸ್ಸಾ’’ತಿ, ದಿನ್ನಂ ತಂ ಪುರಿಮಸ್ಸ ತು।
‘‘ಇದಂ ದಮ್ಮೀ’’ತಿ ದಿನ್ನಂ ತಂ, ಪಚ್ಛಿಮಸ್ಸೇವ ಸನ್ತಕಂ॥
೨೭೪೨.
ಏವಂ ದಿನ್ನವಿಧಿಂ ಞತ್ವಾ, ಮತಸ್ಸ ವಾಮತಸ್ಸ ವಾ।
ವಿಸ್ಸಾಸಂ ವಾಪಿ ಗಣ್ಹೇಯ್ಯ, ಗಣ್ಹೇ ಮತಕಚೀವರಂ॥
೨೭೪೩.
ಮೂಲಪತ್ತಫಲಕ್ಖನ್ಧ-ತಚಪುಪ್ಫಪ್ಪಭೇದತೋ।
ಛಬ್ಬಿಧಂ ರಜನಂ ವುತ್ತಂ, ವನ್ತದೋಸೇನ ತಾದಿನಾ॥
೨೭೪೪.
ಮೂಲೇ ಹಲಿದ್ದಿಂ, ಖನ್ಧೇಸು, ಮಞ್ಜೇಟ್ಠಂ ತುಙ್ಗಹಾರಕಂ।
ಪತ್ತೇಸು ಅಲ್ಲಿಯಾ ಪತ್ತಂ, ತಥಾ ಪತ್ತಞ್ಚ ನೀಲಿಯಾ॥
೨೭೪೫.
ಕುಸುಮ್ಭಂ ಕಿಂಸುಕಂ ಪುಪ್ಫೇ, ತಚೇ ಲೋದ್ದಞ್ಚ ಕಣ್ಡುಲಂ।
ಠಪೇತ್ವಾ ರಜನಂ ಸಬ್ಬಂ, ಫಲಂ ಸಬ್ಬಮ್ಪಿ ವಟ್ಟತಿ॥
೨೭೪೬.
ಕಿಲಿಟ್ಠಸಾಟಕಂ ವಾಪಿ, ದುಬ್ಬಣ್ಣಂ ವಾಪಿ ಚೀವರಂ।
ಅಲ್ಲಿಯಾ ಪನ ಪತ್ತೇನ, ಧೋವಿತುಂ ಪನ ವಟ್ಟತಿ॥
೨೭೪೭.
ಚೀವರಾನಂ ಕಥಾ ಸೇಸಾ, ಪಠಮೇ ಕಥಿನೇ ಪನ।
ತತ್ಥ ವುತ್ತನಯೇನೇವ, ವೇದಿತಬ್ಬಾ ವಿಭಾವಿನಾ॥
ಚೀವರಕ್ಖನ್ಧಕಕಥಾ।
ಮಹಾವಗ್ಗೋ ನಿಟ್ಠಿತೋ।