ಸಙ್ಘಾದಿಸೇಸಕಥಾವಣ್ಣನಾ
೨೦೧೧. ಏವಂ ‘‘ಯಾ ಪನ ಭಿಕ್ಖುನೀ’’ತಿಆದಿ। ಉಸ್ಸಯವಾದಾತಿ ಕೋಧುಸ್ಸಯಮಾನುಸ್ಸಯವಸೇನ ವಿವದಮಾನಾ। ತತೋಯೇವ ಅಟ್ಟಂ ಕರೋತಿ ಸೀಲೇನಾತಿ ಅಟ್ಟಕಾರೀ। ಏತ್ಥ ಚ ‘‘ಅಟ್ಟೋ’’ತಿ ವೋಹಾರಿಕವಿನಿಚ್ಛಯೋ ವುಚ್ಚತಿ, ಯಂ ಪಬ್ಬಜಿತಾ ‘‘ಅಧಿಕರಣ’’ನ್ತಿಪಿ ವದನ್ತಿ। ಸಬ್ಬತ್ಥ ವತ್ತಬ್ಬೇ ಮುಖಮಸ್ಸಾ ಅತ್ಥೀತಿ ಮುಖರೀ, ಬಹುಭಾಣೀತಿ ಅತ್ಥೋ। ಯೇನ ಕೇನಚಿ ನರೇನ ಸದ್ಧಿನ್ತಿ ‘‘ಗಹಪತಿನಾ ವಾ ಗಹಪತಿಪುತ್ತೇನ ವಾ’’ತಿಆದಿನಾ (ಪಾಚಿ॰ ೬೭೯) ದಸ್ಸಿತೇನ ಯೇನ ಕೇನಚಿ ಮನುಸ್ಸೇನ ಸದ್ಧಿಂ। ಇಧಾತಿ ಇಮಸ್ಮಿಂ ಸಾಸನೇ। ಕಿರಾತಿ ಪದಪೂರಣೇ, ಅನುಸ್ಸವನೇ ವಾ।
೨೦೧೨. ಸಕ್ಖಿಂ ವಾತಿ ಪಚ್ಚಕ್ಖತೋ ಜಾನನಕಂ ವಾ। ಅಟ್ಟಂ ಕಾತುಂ ಗಚ್ಛನ್ತಿಯಾ ಪದೇ ಪದೇ ತಥಾ ದುಕ್ಕಟನ್ತಿ ಯೋಜನಾ।
೨೦೧೩. ವೋಹಾರಿಕೇತಿ ವಿನಿಚ್ಛಯಾಮಚ್ಚೇ।
೨೦೧೪. ಅನನ್ತರನ್ತಿ ತಸ್ಸ ವಚನಾನನ್ತರಂ।
೨೦೧೫. ಇತರೋತಿ ಅಟ್ಟಕಾರಕೋ। ಪುಬ್ಬಸದಿಸೋವ ವಿನಿಚ್ಛಯೋತಿ ಪಠಮಾರೋಚನೇ ದುಕ್ಕಟಂ, ದುತಿಯಾರೋಚನೇ ಥುಲ್ಲಚ್ಚಯನ್ತಿ ವುತ್ತಂ ಹೋತಿ।
೨೦೧೬. ‘‘ತವ, ಮಮಾಪಿ ಚ ಕಥಂ ತುವಮೇವ ಆರೋಚೇಹೀ’’ತಿ ಇತರೇನ ವುತ್ತಾ ಭಿಕ್ಖುನೀತಿ ಯೋಜನಾ। ಯಥಾಕಾಮನ್ತಿ ತಸ್ಸಾ ಚ ಅತ್ತನೋ ಚ ವಚನೇ ಯಂ ಪಠಮಂ ವತ್ತುಮಿಚ್ಛತಿ, ತಂ ಇಚ್ಛಾನುರೂಪಂ ಆರೋಚೇತು।
೨೦೧೮-೯. ಉಭಿನ್ನಮ್ಪಿ ಯಥಾ ತಥಾ ಆರೋಚಿತಕಥಂ ಸುತ್ವಾತಿ ಯೋಜನಾ। ಯಥಾ ತಥಾತಿ ಪುಬ್ಬೇ ವುತ್ತನಯೇನ ಕೇನಚಿ ಪಕಾರೇನ। ತೇಹೀತಿ ವೋಹಾರಿಕೇಹಿ। ಅಟ್ಟೇ ಪನ ಚ ನಿಟ್ಠಿತೇತಿ ಅಟ್ಟಕಾರಕೇಸು ಏಕಸ್ಮಿಂ ಪಕ್ಖೇ ಪರಾಜಿತೇ। ಯಥಾಹ ‘‘ಪರಾಜಿತೇ ಅಟ್ಟಕಾರಕೇ ಅಟ್ಟಪರಿಯೋಸಾನಂ ನಾಮ ಹೋತೀ’’ತಿ। ಅಟ್ಟಸ್ಸ ಪರಿಯೋಸಾನೇತಿ ಏತ್ಥ ‘‘ತಸ್ಸಾ’’ತಿ ಸೇಸೋ। ತಸ್ಸ ಅಟ್ಟಸ್ಸ ಪರಿಯೋಸಾನೇತಿ ಯೋಜನಾ।
೨೦೨೦-೨೩. ಅನಾಪತ್ತಿವಿಸಯಂ ‘‘ದೂತಂ ವಾಪೀ’’ತಿಆದಿ। ಪಚ್ಚತ್ಥಿಕಮನುಸ್ಸೇಹಿ ದೂತಂ ವಾಪಿ ಪಹಿಣಿತ್ವಾ ಸಯಮ್ಪಿ ವಾ ಆಗನ್ತ್ವಾ ಯಾ ಪನ ಆಕಡ್ಢೀಯತೀತಿ ಯೋಜನಾ। ಅಞ್ಞೇಹೀತಿ ಗಾಮದಾರಕಾದೀಹಿ ಅಞ್ಞೇಹಿ। ಕಿಞ್ಚಿ ಪರಂ ಅನೋದಿಸ್ಸಾತಿ ಯೋಜನಾ। ಇಮಿಸ್ಸಾ ಓದಿಸ್ಸ ವುತ್ತೇ ತೇಹಿ ಗಹಿತದಣ್ಡೇ ತಸ್ಸಾ ಚ ಗೀವಾತಿ ಸೂಚಿತಂ ಹೋತಿ। ಯಾ ರಕ್ಖಂ ಯಾಚತಿ ತತ್ಥ ತಸ್ಮಿಂ ರಕ್ಖಾಯಾಚನೇ ತಸ್ಸಾ ಅನಾಪತ್ತಿ ಪಕಾಸಿತಾತಿ ಯೋಜನಾ। ಅಞ್ಞತೋ ಸುತ್ವಾತಿ ಯೋಜನಾ। ಉಮ್ಮತ್ತಿಕಾದೀನನ್ತಿ ಏತ್ಥ ಆದಿ-ಸದ್ದೇನ ಆದಿಕಮ್ಮಿಕಾ ಗಹಿತಾ।
ಸಮುಟ್ಠಾನಂ ಕಥಿನೇನ ತುಲ್ಯನ್ತಿ ಯೋಜನಾ। ಸೇಸಂ ದಸ್ಸೇತುಮಾಹ ‘‘ಸಕಿರಿಯಂ ಇದ’’ನ್ತಿ। ಇದಂ ಸಿಕ್ಖಾಪದಂ। ಕಿರಿಯಾಯ ಸಹ ವತ್ತತೀತಿ ಸಕಿರಿಯಂ ಅಟ್ಟಕರಣೇನ ಆಪಜ್ಜನತೋ। ‘‘ಸಮುಟ್ಠಾನ’’ನ್ತಿ ಇಮಿನಾ ಚ ಸಮುಟ್ಠಾನಾದಿವಿನಿಚ್ಛಯೋ ಉಪಲಕ್ಖಿತೋತಿ ದಟ್ಠಬ್ಬೋ।
ಅಟ್ಟಕಾರಿಕಾಕಥಾವಣ್ಣನಾ।
೨೦೨೪-೫. ಜಾನನ್ತೀತಿ ‘‘ಸಾಮಂ ವಾ ಜಾನಾತಿ, ಅಞ್ಞೇ ವಾ ತಸ್ಸಾ ಆರೋಚೇನ್ತೀ’’ತಿ (ಪಾಚಿ॰ ೬೮೪) ವುತ್ತನಯೇನ ಜಾನನ್ತೀ। ಚೋರಿನ್ತಿ ಯಾಯ ಪಞ್ಚಮಾಸಗ್ಘನಕತೋ ಪಟ್ಠಾಯ ಯಂ ಕಿಞ್ಚಿ ಪರಸನ್ತಕಂ ಅವಹರಿತಂ, ಅಯಂ ಚೋರೀ ನಾಮ। ವಜ್ಝಂ ವಿದಿತನ್ತಿ ‘‘ತೇನ ಕಮ್ಮೇನ ವಧಾರಹಾ ಅಯ’’ನ್ತಿ ಏವಂ ವಿದಿತಂ। ಸಙ್ಘನ್ತಿ ಭಿಕ್ಖುನಿಸಙ್ಘಂ। ಅನಪಲೋಕೇತ್ವಾತಿ ಅನಾಪುಚ್ಛಾ। ರಾಜಾನಂ ವಾತಿ ರಞ್ಞಾ ಅನುಸಾಸಿತಬ್ಬಟ್ಠಾನೇ ತಂ ರಾಜಾನಂ ವಾ। ಯಥಾಹ ‘‘ರಾಜಾ ನಾಮ ಯತ್ಥ ರಾಜಾ ಅನುಸಾಸತಿ, ರಾಜಾ ಅಪಲೋಕೇತಬ್ಬೋ’’ತಿ। ಗಣಮೇವ ವಾತಿ ‘‘ತುಮ್ಹೇವ ತತ್ಥ ಅನುಸಾಸಥಾ’’ತಿ ರಾಜೂಹಿ ದಿನ್ನಂ ಗಾಮನಿಗಮಮಲ್ಲಗಣಾದಿಕಂ ಗಣಂ ವಾ। ಮಲ್ಲಗಣಂ ನಾಮ ಪಾನೀಯಟ್ಠಪನಪೋಕ್ಖರಣಿಖಣನಾದಿಪುಞ್ಞಕಮ್ಮನಿಯುತ್ತೋ ಜನಸಮೂಹೋ। ಏತೇನೇವ ಏವಮೇವ ದಿನ್ನಗಾಮವರಾ ಪೂಗಾ ಚ ಸೇನಿಯೋ ಚ ಸಙ್ಗಹಿತಾ। ವುಟ್ಠಾಪೇಯ್ಯಾತಿ ಉಪಸಮ್ಪಾದೇಯ್ಯ। ಕಪ್ಪನ್ತಿ ಚ ವಕ್ಖಮಾನಲಕ್ಖಣಂ ಕಪ್ಪಂ। ಸಾ ಚೋರಿವುಟ್ಠಾಪನನ್ತಿ ಸಮ್ಬನ್ಧೋ। ಉಪಜ್ಝಾಯಾ ಹುತ್ವಾ ಯಾ ಚೋರಿಂ ಉಪಸಮ್ಪಾದೇತಿ, ಸಾ ಭಿಕ್ಖುನೀತಿ ಅತ್ಥೋ। ಉಪಜ್ಝಾಯಸ್ಸ ಭಿಕ್ಖುಸ್ಸ ದುಕ್ಕಟಂ।
೨೦೨೬. ಪಞ್ಚಮಾಸಗ್ಘನನ್ತಿ ಏತ್ಥ ಪಞ್ಚಮಾಸಞ್ಚ ಪಞ್ಚಮಾಸಗ್ಘನಕಞ್ಚ ಪಞ್ಚಮಾಸಗ್ಘನನ್ತಿ ಏಕದೇಸಸರೂಪೇಕಸೇಸನಯೇನ ಪಞ್ಚಮಾಸಸ್ಸಾಪಿ ಅತಿರೇಕಗ್ಘನಂ ವಾಪೀತಿ ಏತ್ಥಾಪಿ ಏಸೇವ ನಯೋ।
೨೦೨೭. ಪಬ್ಬಜಿತಂ ಪಬ್ಬಜಿತಪುಬ್ಬಾ। ವುತ್ತಪ್ಪಕಾರಂ ಚೋರಕಮ್ಮಂ ಕತ್ವಾಪಿ ತಿತ್ಥಾಯತನಾದೀಸು ಯಾ ಪಠಮಂ ಪಬ್ಬಜಿತಾತಿ ಅತ್ಥೋ।
೨೦೨೮-೩೦. ಇದಾನಿ ಪುಬ್ಬಪಯೋಗದುಕ್ಕಟಾದಿಆಪತ್ತಿವಿಭಾಗಂ ದಸ್ಸೇತುಮಾಹ ‘‘ವುಟ್ಠಾಪೇತಿ ಚ ಯಾ ಚೋರಿ’’ನ್ತಿಆದಿ। ಇಧ ‘‘ಉಪಜ್ಝಾಯಾ ಹುತ್ವಾ’’ತಿ ಸೇಸೋ। ಇದಂ ಕಪ್ಪಂ ಠಪೇತ್ವಾತಿ ಯೋಜನಾ। ಸೀಮಂ ಸಮ್ಮನ್ನತಿ ಚಾತಿ ಅಭಿನವಂ ಸೀಮಂ ಸಮ್ಮನ್ನತಿ, ಬನ್ಧತೀತಿ ವುತ್ತಂ ಹೋತಿ। ಅಸ್ಸಾತಿ ಭವೇಯ್ಯ। ‘‘ದುಕ್ಕಟ’’ನ್ತಿ ಇಮಿನಾ ಚ ‘‘ಥುಲ್ಲಚ್ಚಯಂ ದ್ವಯ’’ನ್ತಿ ಇಮಿನಾ ಚ ಯೋಜೇತಬ್ಬಂ।
ಕಮ್ಮನ್ತೇತಿ ಉಪಸಮ್ಪದಕಮ್ಮಸ್ಸ ಪರಿಯೋಸಾನೇ, ತತಿಯಾಯ ಕಮ್ಮವಾಚಾಯ ಯ್ಯಕಾರಪ್ಪತ್ತಾಯಾತಿ ವುತ್ತಂ ಹೋತಿ।
೨೦೩೧. ಅಜಾನನ್ತೀತಿ ಚೋರಿಂ ಅಜಾನನ್ತೀ। (ಇದಂ ಸಿಕ್ಖಾಪದಂ।)
೨೦೩೨. ಚೋರಿವುಟ್ಠಾಪನಂ ನಾಮಾತಿ ಇದಂ ಸಿಕ್ಖಾಪದಂ ಚೋರಿವುಟ್ಠಾಪನಸಮುಟ್ಠಾನಂ ನಾಮ। ವಾಚಚಿತ್ತತೋತಿ ಖಣ್ಡಸೀಮಂ ಅಗನ್ತ್ವಾ ಕರೋನ್ತಿಯಾ ವಾಚಾಚಿತ್ತೇಹಿ। ಕಾಯವಾಚಾದಿತೋ ಚೇವಾತಿ ಗನ್ತ್ವಾ ಕರೋನ್ತಿಯಾ ಕಾಯವಾಚಾಚಿತ್ತತೋ ಚ ಸಮುಟ್ಠಾತಿ। ಯಥಾಹ ‘‘ಕೇನಚಿದೇವ ಕರಣೀಯೇನ ಪಕ್ಕನ್ತಾಸು ಭಿಕ್ಖುನೀಸು ಅಗನ್ತ್ವಾ ಖಣ್ಡಸೀಮಂ ವಾ ನದಿಂ ವಾ ಯಥಾನಿಸಿನ್ನಟ್ಠಾನೇಯೇವ ಅತ್ತನೋ ನಿಸ್ಸಿತಕಪರಿಸಾಯ ಸದ್ಧಿಂ ವುಟ್ಠಾಪೇನ್ತಿಯಾ ವಾಚಾಚಿತ್ತತೋ ಸಮುಟ್ಠಾತಿ, ಖಣ್ಡಸೀಮಂ ವಾ ನದಿಂ ವಾ ಗನ್ತ್ವಾ ವುಟ್ಠಾಪೇನ್ತಿಯಾ ಕ್ರಿಯಾಕ್ರಿಯನ್ತಿ ಅನಾಪುಚ್ಛಾವುಟ್ಠಾಪನವಸೇನ ಕಿರಿಯಾಕಿರಿಯಂ।
ಚೋರಿವುಟ್ಠಾಪನಕಥಾವಣ್ಣನಾ।
೨೦೩೩-೪. ಗಾಮನ್ತರನ್ತಿ ಅಞ್ಞಂ ಗಾಮಂ। ಯಾ ಏಕಾ ಸಚೇ ಗಚ್ಛೇಯ್ಯಾತಿ ಸಮ್ಬನ್ಧೋ। ನದೀಪಾರನ್ತಿ ಏತ್ಥಾಪಿ ಏಸೇವ ನಯೋ। ನದಿಯಾ ಪಾರಂ ನದೀಪಾರಂ। ‘‘ಏಕಾ ವಾ’’ತಿ ಉಪರಿಪಿ ಯೋಜೇತಬ್ಬಂ। ಓಹೀಯೇಯ್ಯಾತಿ ವಿನಾ ಭವೇಯ್ಯ। ಇಧ ‘‘ಅರಞ್ಞೇ’’ತಿ ಸೇಸೋ। ಅರಞ್ಞಲಕ್ಖಣಂ ‘‘ಇನ್ದಖೀಲ’’ಇಚ್ಚಾದಿನಾ ವಕ್ಖತಿ। ‘‘ಏಕಾ ವಾ ರತ್ತಿಂ ವಿಪ್ಪವಸೇಯ್ಯ, ಏಕಾ ವಾ ಗಣಮ್ಹಾ ಓಹೀಯೇಯ್ಯಾ’’ತಿ ಸಿಕ್ಖಾಪದಕ್ಕಮೋ, ಏವಂ ಸನ್ತೇಪಿ ಗಾಥಾಬನ್ಧವಸೇನ ‘‘ರತ್ತಿಂ ವಿಪ್ಪವಸೇಯ್ಯಾ’’ತಿ ಅನ್ತೇ ವುತ್ತಂ ಪಠಮಾಪತ್ತಿಕೋ, ವೀತಿಕ್ಕಮಕ್ಖಣೇಯೇವ ಆಪಜ್ಜಿತಬ್ಬೋತಿ ಅತ್ಥೋ। ‘‘ಗರುಕಂ ಧಮ್ಮ’’ನ್ತಿ ಇಮಿನಾ ಸಮ್ಬನ್ಧೋ। ಸಕಗಾಮಾ ನಿಕ್ಖಮನ್ತಿಯಾತಿ ಭಿಕ್ಖುನಿಯಾ ಅತ್ತನೋ ವಸನಗಾಮತೋ ನಿಕ್ಖಮನ್ತಿಯಾ।
೨೦೩೫. ತತೋ ಸಕಗಾಮತೋ।
೨೦೩೬-೭. ಏಕೇನ ಪದವಾರೇನ ಇತರಸ್ಸ ಗಾಮಸ್ಸ ಪರಿಕ್ಖೇಪೇ ಅತಿಕ್ಕನ್ತೇ, ಉಪಚಾರೋಕ್ಕಮೇ ವಾ ಥುಲ್ಲಚ್ಚಯನ್ತಿ ಯೋಜನಾ। ಅತಿಕ್ಕನ್ತೇ ಓಕ್ಕನ್ತೇತಿ ಏತ್ಥ ‘‘ಪರಿಕ್ಖೇಪೇ ಉಪಚಾರೇ’’ತಿ ಅಧಿಕಾರತೋ ಲಬ್ಭತಿ।
೨೦೩೮-೯. ನಿಕ್ಖಮಿತ್ವಾತಿ ಅತ್ತನೋ ಪವಿಟ್ಠಗಾಮತೋ ನಿಕ್ಖಮಿತ್ವಾ। ಅಯಮೇವ ನಯೋತಿ ‘‘ಏಕೇನ ಪದವಾರೇನ ಥುಲ್ಲಚ್ಚಯಂ, ದುತಿಯೇನ ಗರುಕಾಪತ್ತೀ’’ತಿ ಅಯಂ ನಯೋ।
ವತಿಚ್ಛಿದ್ದೇನ ‘‘ತಥಾ’’ತಿ ಇಮಿನಾ ‘‘ಪಾಕಾರೇನಾ’’ತಿ ಏತ್ಥಾಪಿ ವಾ-ಸದ್ದಸ್ಸ ಸಮ್ಬನ್ಧನೀಯತಂ ದಸ್ಸೇತಿ। ‘‘ಭಿಕ್ಖುವಿಹಾರಸ್ಸ ಭೂಮಿ ತಾಸಮಕಪ್ಪಿಯಾ’’ತಿ ವಕ್ಖಮಾನತ್ತಾ ವಿಹಾರಸ್ಸ ಭೂಮಿನ್ತಿ ಭಿಕ್ಖುನಿವಿಹಾರಭೂಮಿ ಗಹಿತಾ। ‘‘ಕಪ್ಪಿಯನ್ತಿ ಪವಿಟ್ಠತ್ತಾ’’ತಿ ಇಮಿನಾ ವಕ್ಖಮಾನಸ್ಸ ಕಾರಣಂ ದಸ್ಸೇತಿ। ಕೋಚಿ ದೋಸೋತಿ ಥುಲ್ಲಚ್ಚಯಸಙ್ಘಾದಿಸೇಸೋ ವುಚ್ಚಮಾನೋ ಯೋ ಕೋಚಿ ದೋಸೋ।
೨೦೪೦. ತಾಸನ್ತಿ ಭಿಕ್ಖುನೀನಂ। ‘‘ಅಕಪ್ಪಿಯಾ’’ತಿ ಇಮಿನಾ ತತ್ಥಾಪಿ ಪವಿಟ್ಠಾಯ ಗಾಮನ್ತರಪಚ್ಚಯಾ ಆಪತ್ತಿಸಮ್ಭವಮಾಹ।
೨೦೪೧. ‘‘ಪಠಮಂ ಪಾದಂ ಅತಿಕ್ಕಾಮೇನ್ತಿಯಾ’’ತಿ (ಪಾಚಿ॰ ೬೯೨) ವುತ್ತತ್ತಾ ‘‘ಹತ್ಥಿ…ಪೇ॰… ಅನಾಪತ್ತಿ ಸಿಯಾಪತ್ತಿ, ಪದಸಾ ಗಮನೇ ಪನಾ’’ತಿ ವುತ್ತಂ।
೨೦೪೨. ‘‘ಯಂ ಕಿಞ್ಚಿ…ಪೇ॰… ಆಪತ್ತಿ ಪವಿಸನ್ತಿಯಾ’’ತಿ ವುತ್ತಸ್ಸೇವತ್ಥಸ್ಸ ಉಪಸಂಹಾರತ್ತಾ ನ ಪುನರುತ್ತಿದೋಸೋ।
೨೦೪೩-೪. ಲಕ್ಖಣೇನುಪಪನ್ನಾಯಾತಿ
ಪಠಮಂ ಪಾದಂ ಉದ್ಧರಿತ್ವಾನ ತೀರೇ ಠಪೇನ್ತಿಯಾತಿ ‘‘ಇದಾನಿ ಪದವಾರೇನ ಅತಿಕ್ಕಮತೀ’’ತಿ ವತ್ತಬ್ಬಕಾಲೇ ಪಠಮಂ ಪಾದಂ ಉಕ್ಖಿಪಿತ್ವಾ ಪರತೀರೇ ಠಪೇನ್ತಿಯಾ। ‘‘ದುತಿಯಪಾದುದ್ಧಾರೇ ಸಙ್ಘಾದಿಸೇಸೋ’’ತಿ (ಪಾಚಿ॰ ಅಟ್ಠ॰ ೬೯೨) ಅಟ್ಠಕಥಾವಚನತೋ ‘‘ಅತಿಕ್ಕಮೇ’’ತಿ ಇಮಿನಾ ಉದ್ಧಾರೋ ಗಹಿತೋ।
೨೦೪೫. ಅನ್ತರನದಿಯನ್ತಿ ನದಿವೇಮಜ್ಝೇ। ಭಣ್ಡಿತ್ವಾತಿ ಕಲಹಂ ಕತ್ವಾ। ಓರಿಮಂ ತೀರನ್ತಿ ಆಗತದಿಸಾಯ ತೀರಂ। ತಥಾ ಪಠಮೇ ಥುಲ್ಲಚ್ಚಯಂ ಅಟ್ಠಕಥಾಪಿ ಉಲ್ಲಿಙ್ಗಿತಾ।
೨೦೪೬. ರಜ್ಜುಯಾತಿ ವಲ್ಲಿಆದಿಕಾಯ ಯಾಯ ಕಾಯಚಿ ರಜ್ಜುಯಾ।
೨೦೪೭. ಪಿವಿತುನ್ತಿ ಏತ್ಥ ‘‘ಪಾನೀಯ’’ನ್ತಿ ಪಕರಣತೋ ಲಬ್ಭತಿ। ಅವುತ್ತಸಮುಚ್ಚಯತ್ಥೇನ ಅಪಿ-ಸದ್ದೇನ ಭಣ್ಡಧೋವನಾದಿಂ ಸಙ್ಗಣ್ಹಾತಿ। ಅಥಾತಿ ವಾಕ್ಯಾರಮ್ಭೇ ನಿಪಾತೋ। ‘‘ನಹಾನಾದಿಕಿಚ್ಚಂ ಸಮ್ಪಾದೇತ್ವಾ ಓರಿಮಮೇವ ತೀರಂ ಆಗಮಿಸ್ಸಾಮೀ’’ತಿ ಆಲಯಸ್ಸ ವಿಜ್ಜಮಾನತ್ತಾ ಆಹ ‘‘ವಟ್ಟತೀ’’ತಿ।
೨೦೪೮. ಪದಸಾನದಿಂ ಓತರಿತ್ವಾನಾತಿ ಯೋಜನಾ। ಸೇತುಂ ಆರೋಹಿತ್ವಾ ತಥಾ ಪದಸಾ ಉತ್ತರನ್ತಿಯಾ ಅನಾಪತ್ತೀತಿ ಯೋಜನಾ।
೨೦೪೯. ಗನ್ತ್ವಾನಾತಿ ಏತ್ಥ ‘‘ನದಿ’’ನ್ತಿ ಸೇಸೋ। ಉತ್ತರಣಕಾಲೇ ಪದಸಾ ಯಾತೀತಿ ಯೋಜನಾ।
೨೦೫೦. ವೇಗೇನಾತಿ ಏಕೇನೇವ ವೇಗೇನ, ಅನ್ತರಾ ಅನಿವತ್ತಿತ್ವಾತಿ ಅತ್ಥೋ।
೨೦೫೧. ‘‘ನಿಸೀದಿತ್ವಾ’’ತಿ ಇದಂ ‘‘ಖನ್ಧೇ ವಾ’’ತಿಆದೀಹಿಪಿ ಯೋಜೇತಬ್ಬಂ। ಖನ್ಧಾದಯೋ ಚೇತ್ಥ ಸಭಾಗಾನಮೇವ ಗಹೇತಬ್ಬಾ। ಹತ್ಥಸಙ್ಘಾತನೇ ವಾತಿ ಉಭೋಹಿ ಬದ್ಧಹತ್ಥವಲಯೇ ವಾ।
೨೦೫೨-೩. ಪಾಸನ್ತಿ ‘‘ಆಭೋಗಂ ವಿನಾ’’ತಿ ಇಮಿನಾ ‘‘ಗಮಿಸ್ಸಾಮೀ’’ತಿ ಆಭೋಗೇ ಕತೇ ಅಜಾನನ್ತಿಯಾ ಅರುಣೇ ‘‘ಏಕಗಬ್ಭೇಪಿ ವಾ’’ತಿ। ಏಕಗಬ್ಭೇಪಿ ವಾ ದುತಿಯಿಕಾಯ ಹತ್ಥಪಾಸಂ ಅತಿಕ್ಕಮ್ಮ ಅರುಣಂ ಉಟ್ಠಪೇನ್ತಿಯಾ ಭಿಕ್ಖುನಿಯಾ ಆಪತ್ತಿ ಸಿಯಾತಿ ಯೋಜನಾ।
೨೦೫೪. ದುತಿಯಾಪಾಸನ್ತಿ ದುತಿಯಿಕಾಯ ಹತ್ಥಪಾಸಂ। ‘‘ಗಮಿಸ್ಸಾಮೀ’’ತಿ ಆಭೋಗಂ ಕತ್ವಾ ಗಚ್ಛನ್ತಿಯಾ ಸಚೇ ಅರುಣಂ ಉಟ್ಠೇತಿ, ನ ದೋಸೋತಿ ಯೋಜನಾ।
೨೦೫೫-೬. ಅಞ್ಞತ್ಥ ಪಞ್ಚಧನುಸತಿಕಸ್ಸ (ಪಾರಾ॰ ೬೫೪) ಪಚ್ಛಿಮಸ್ಸ ಆರಞ್ಞಕಸೇನಾಸನಸ್ಸ ವುತ್ತತ್ತಾ ತತೋ ನಿವತ್ತೇತುಮಾಹ ‘‘ಇನ್ದಖೀಲಮತಿಕ್ಕಮ್ಮಾ’’ತಿಆದಿ। ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ। ದೀಪಿತನ್ತಿ ಅಟ್ಠಕಥಾಯ ‘‘ಅರಞ್ಞೇತಿ ಏತ್ಥ ನಿಕ್ಖಮಿತ್ವಾ ಬಹಿ ಇನ್ದಖೀಲಾ ಸಬ್ಬಮೇತಂ ಅರಞ್ಞ’’ನ್ತಿ (ಪಾಚಿ॰ ಅಟ್ಠ॰ ೬೯೨) ಏವಂ ವುತ್ತಲಕ್ಖಣಮೇವ ಅರಞ್ಞಂ ದಸ್ಸಿತನ್ತಿ ಅತ್ಥೋ।
ದುತಿಯಿಕಾಯ ದಸ್ಸನೂಪಚಾರಂ ವಿಜಹನ್ತಿಯಾ ತಸ್ಸಾತಿ ಯೋಜನಾ। ‘‘ಜಹಿತೇ’’ತಿ ಇದಂ ಅಪೇಕ್ಖಿತ್ವಾ ‘‘ಉಪಚಾರೇ’’ತಿ ವಿಭತ್ತಿವಿಪರಿಣಾಮೋ ಕಾತಬ್ಬೋ।
೨೦೫೭. ಸಾಣಿಪಾಕಾರಪಾಕಾರತರುಅನ್ತರಿತೇ ಠಾನೇ ಅಸತಿ ದಸ್ಸನೂಪಚಾರೇ ಸತಿಪಿ ಸವನೂಪಚಾರೇ ಆಪತ್ತಿ ಹೋತೀತಿ ಯೋಜನಾ।
೨೦೫೮-೬೦. ಏತ್ಥ ಕಥನ್ತಿ ಯತ್ಥ ದೂರೇಪಿ ದಸ್ಸನಂ ಹೋತಿ, ಏವರೂಪೇ ಅಜ್ಝೋಕಾಸೇ ಆಪತ್ತಿನಿಯಮೋ ಕಥಂ ಕಾತಬ್ಬೋತಿ ‘‘ಮಗ್ಗ…ಪೇ॰… ಏವರೂಪಕೇ’’ತಿ। ಏತ್ಥ ‘‘ಠಾನೇ’’ತಿ ಸೇಸೋ। ಕೂಜನ್ತಿಯಾತಿ ಯಥಾವಣ್ಣವವತ್ಥಾನಂ ನ ಹೋತಿ, ಏವಂ ಅಬ್ಯತ್ತಸದ್ದಂ ಕರೋನ್ತಿಯಾ।
ಏವರೂಪಕೇ ಠಾನೇ ಧಮ್ಮಸ್ಸವನಾರೋಚನೇ ವಿಯ ಚ ಮಗ್ಗಮೂಳ್ಹಸ್ಸ ಸದ್ದೇನ ವಿಯ ಚ ‘‘ಅಯ್ಯೇ’’ತಿ ಕೂಜನ್ತಿಯಾ ‘‘ಭಿಕ್ಖುನಿಯಾ ಗರುಕಾ ಹೋತೀ’’ತಿ ಇದಂ ‘‘ದುತಿಯಿಕಂ ನ ಪಾಪುಣಿಸ್ಸಾಮೀ’’ತಿ ನಿರುಸ್ಸಾಹವಸೇನ ವೇದಿತಬ್ಬಂ। ತೇನೇವ ವಕ್ಖತಿ ‘‘ಓಹೀಯಿತ್ವಾಥ ಗಚ್ಛನ್ತೀ’’ತಿಆದಿ। ಏತ್ಥಾತಿ ‘‘ಗಣಮ್ಹಾ ಓಹೀಯೇಯ್ಯಾ’’ತಿ ಇಮಸ್ಮಿಂ।
೨೦೬೧. ಅಥ ಗಚ್ಛನ್ತೀ ಓಹೀಯಿತ್ವಾತಿ ಯೋಜನಾ। ‘‘ಇದಾನಿ ಅಹಂ ಪಾಪುಣಿಸ್ಸಾಮಿ’’ ಇತಿ ಏವಂ ಸಉಸ್ಸಾಹಾ ಅನುಬನ್ಧತಿ, ವಟ್ಟತಿ, ದುತಿಯೋಪಚಾರಾತಿಕ್ಕಮೇಪಿ ಅನಾಪತ್ತೀತಿ ವುತ್ತಂ ಹೋತಿ।
೨೦೬೨. ‘‘ಗಚ್ಛತು ಅಯಂ’’ ಇತಿ ಉಸ್ಸಾಹಸ್ಸಚ್ಛೇದಂ ಕತ್ವಾ ಓಹೀನಾ ಚೇ, ತಸ್ಸಾ ಆಪತ್ತೀತಿ ಅಜ್ಝಾಹಾರಯೋಜನಾ।
೨೦೬೩. ಇತರಾಪೀತಿ ಗನ್ತುಂ ಸಮತ್ಥಾಪಿ। ಓಹೀಯತು ಅಯನ್ತಿ ಚಾತಿ ನಿರುಸ್ಸಾಹಪ್ಪಕಾರೋ ಸನ್ದಸ್ಸಿತೋ। ವುತ್ತತ್ಥಮೇವ ಸಮತ್ಥಯಿತುಮಾಹ ‘‘ಸಉಸ್ಸಾಹಾ ನ ಹೋತಿ ಚೇ’’ತಿ।
೨೦೬೪-೫. ಪುರಿಮಾ ಏಕಕಂ ಮಗ್ಗಂ ಯಾತೀತಿ ಯೋಜನಾ। ಏಕಮೇವ ಏಕಕಂ। ತಸ್ಮಾತಿ ಯಸ್ಮಾ ಏಕಿಸ್ಸಾ ಇತರಾ ಪಕ್ಕನ್ತಟ್ಠಾನೇ ತಿಟ್ಠತಿ, ತಸ್ಮಾ। ತತ್ಥಾತಿ ತಸ್ಮಿಂ ಗಣಮ್ಹಾಓಹೀಯನೇ। ಪಿ-ಸದ್ದೋ ಏವಕಾರತ್ಥೋ। ಅನಾಪತ್ತಿ ಏವ ಪಕಾಸಿತಾತಿ ಯೋಜನಾ।
೨೦೬೬-೭. ಗಾಮನ್ತರಗತಾಯಾತಿ ಗಾಮಸೀಮಗತಾಯ। ‘‘ನದಿಯಾ’’ತಿ ಇಮಿನಾ ಸಮ್ಬನ್ಧೋ। ಆಪತ್ತಿಯೋಚತಸ್ಸೋಪೀತಿ ರತ್ತಿವಿಪ್ಪವಾಸ ಗಾಮನ್ತರಗಮನ ನದಿಪಾರಗಮನ ಗಣಮ್ಹಾಓಹೀಯನ ಸಙ್ಖಾತಾ ಚತಸ್ಸೋ ಏಕಕ್ಖಣೇತಿ ಗಾಮೂಪಚಾರಂ ಸನ್ಧಾಯಾಹ।
೨೦೬೮-೯. ಯಾ ಸದ್ಧಿಂ ಯಾತಾ ದುತಿಯಿಕಾ, ಸಾ ಚ ಪಕ್ಕನ್ತಾ ವಾ ಸಚೇ ಹೋತಿ, ವಿಬ್ಭನ್ತಾ ವಾ ಹೋತಿ, ಪೇತಾನಂ ಲೋಕಂ ಯಾತಾ ವಾ ಹೋತಿ, ಕಾಲಕತಾ ವಾ ಹೋತೀತಿ ಅಧಿಪ್ಪಾಯೋ, ಪಕ್ಖಸಙ್ಕನ್ತಾ ವಾ ಹೋತಿ, ತಿತ್ಥಾಯತನಸಙ್ಕನ್ತಾ ವಾ ಹೋತೀತಿ ಅಧಿಪ್ಪಾಯೋ, ನಟ್ಠಾ ವಾ ಹೋತಿ, ಪಾರಾಜಿಕಾಪನ್ನಾ ವಾ ಹೋತೀತಿ
೨೦೭೦. ‘‘ಅಗಾಮಕೇ ಅರಞ್ಞೇ’’ತಿ ಇದಂ ಗಾಮಾಭಾವೇನ ವುತ್ತಂ, ನ ವಿಞ್ಝಾಟವಿಸದಿಸತಾಯ।
೨೦೭೧. ಗಾಮಭಾವತೋ ನದಿಪಾರಗಮನಗಣಮ್ಹಾಓಹೀಯನಾಪತ್ತಿ ನ ಸಮ್ಭವತಿ, ತಸ್ಸಾಪಿ ಸಕಗಾಮತ್ತಾ ಗಾಮನ್ತರಗಮನಮೂಲಿಕಾಪತ್ತಿ ಚ ದಿವಸಭಾಗತ್ತಾ ರತ್ತಿವಿಪ್ಪವಾಸಮೂಲಿಕಾಪತ್ತಿ ಚ ನ ಸಮ್ಭವತೀತಿ ಆಹ ‘‘ಸಕಗಾಮೇ…ಪೇ॰… ನ ವಿಜ್ಜರೇ’’ತಿ। ಯಥಾಕಾಮನ್ತಿ ಯಥಿಚ್ಛಿತಂ, ದುತಿಯಿಕಾಯ ಅಸನ್ತಿಯಾಪೀತಿ ಅತ್ಥೋ।
೨೦೭೨. ಸಮುಟ್ಠಾನಾದಯೋ ಪಠಮನ್ತಿಮವತ್ಥುನಾ ತುಲ್ಯಾತಿ ಯೋಜನಾ।
ಗಾಮನ್ತರಗಮನಕಥಾವಣ್ಣನಾ।
೨೦೭೩. ಸೀಮಾಸಮ್ಮುತಿಯಾ ಚೇವಾತಿ ‘‘ಸಮಗ್ಗೇನ ಸಙ್ಘೇನ ಧಮ್ಮೇನ ವಿನಯೇನ ಉಕ್ಖಿತ್ತಂ ಭಿಕ್ಖುನಿಂ ಕಾರಕಸಙ್ಘಂ ಅನಾಪುಚ್ಛಾ ತಸ್ಸೇವ ಕಾರಕಸಙ್ಘಸ್ಸ ಛನ್ದಂ ಅಜಾನಿತ್ವಾ ಓಸಾರೇಸ್ಸಾಮೀ’’ತಿ ನವಸೀಮಾಸಮ್ಮನ್ನನೇ ಚ। ದ್ವೀಹಿ ಕಮ್ಮವಾಚಾಹಿ ದುವೇ ಥುಲ್ಲಚ್ಚಯಾ ಹೋನ್ತೀತಿ ಯೋಜನಾ।
೨೦೭೪. ಕಮ್ಮಸ್ಸ ಪರಿಯೋಸಾನೇತಿ ಓಸಾರಣಕಮ್ಮಸ್ಸ ಅವಸಾನೇ। ತಿಕಸಙ್ಘಾದಿಸೇಸನ್ತಿ ‘‘ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ಸಙ್ಘಾದಿಸೇಸಸ್ಸ। ಧಮ್ಮಕಮ್ಮೇ ವೇಮತಿಕಾ, ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ಸಙ್ಘಾದಿಸೇಸಸ್ಸಾ’’ತಿ (ಪಾಚಿ॰ ೬೯೭) ತಿಕಸಙ್ಘಾದಿಸೇಸಂ ವುತ್ತಂ। ಕಮ್ಮನ್ತಿ ಚ ಉಕ್ಖೇಪನೀಯಕಮ್ಮಂ। ಅಧಮ್ಮೇ ತಿಕದುಕ್ಕಟನ್ತಿ ‘‘ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ದುಕ್ಕಟಸ್ಸ। ಅಧಮ್ಮಕಮ್ಮೇ ವೇಮತಿಕಾ, ಅಧಮ್ಮಕಮ್ಮಸಞ್ಞಾ ಓಸಾರೇತಿ, ಆಪತ್ತಿ ದುಕ್ಕಟಸ್ಸಾ’’ತಿ ತಿಕದುಕ್ಕಟಂ ವುತ್ತಂ।
೨೦೭೫. ಗಣಸ್ಸಾತಿ ತಸ್ಸೇವ ಕಾರಕಗಣಸ್ಸ। ವತ್ತೇ ವಾ ಪನ ವತ್ತನ್ತಿನ್ತಿ ತೇಚತ್ತಾಲೀಸಪ್ಪಭೇದೇ ನೇತ್ತಾರವತ್ತೇ ವತ್ತಮಾನಂ। ತೇಚತ್ತಾಲೀಸಪ್ಪಭೇದಂ ಪನ ವತ್ತಕ್ಖನ್ಧಕೇ (ಚೂಳವ॰ ೩೭೬) ಆವಿ ಭವಿಸ್ಸತಿ। ನೇತ್ತಾರವತ್ತೇತಿ ಕಮ್ಮತೋ ನಿತ್ಥರಣಸ್ಸ ಹೇತುಭೂತೇ ವತ್ತೇ।
೨೦೭೭. ಓಸಾರಣಂ ಕ್ರಿಯಂ। ಅನಾಪುಚ್ಛನಂ ಅಕ್ರಿಯಂ।
ಚತುತ್ಥಂ।
೨೦೭೮-೯. ಅವಸ್ಸುತಾತಿ ಮೇಥುನರಾಗೇನ ತಿನ್ತಾ। ಏವಮುಪರಿಪಿ। ‘‘ಮನುಸ್ಸಪುಗ್ಗಲಸ್ಸಾ’’ತಿ ಇಮಿನಾ ಯಕ್ಖಾದೀನಂ ಪಟಿಕ್ಖೇಪೋ। ‘‘ಉದಕೇ…ಪೇ॰… ದುಕ್ಕಟ’’ನ್ತಿ ವಕ್ಖಮಾನತ್ತಾ ಆಮಿಸನ್ತಿ ಅಞ್ಞತ್ರ ದನ್ತಪೋನಾ ಅಜ್ಝೋಹರಣೀಯಸ್ಸ ಗಹಣಂ। ಪಯೋಗತೋತಿ ಪಯೋಗಗಣನಾಯ।
೨೦೮೦. ಏಕತೋವಸ್ಸುತೇತಿ ಪುಮಿತ್ಥಿಯಾ ಸಾಮಞ್ಞೇನ ಪುಲ್ಲಿಙ್ಗನಿದ್ದೇಸೋ। ಕಥಮೇತಂ ವಿಞ್ಞಾಯತೀತಿ? ‘‘ಏಕತೋಅವಸ್ಸುತೇತಿ ಏತ್ಥ ಭಿಕ್ಖುನಿಯಾ ಅವಸ್ಸುತಭಾವೋ ದಟ್ಠಬ್ಬೋತಿ ಮಹಾಪಚ್ಚರಿಯಂ ವುತ್ತಂ। ಮಹಾಅಟ್ಠಕಥಾಯಂ ಪನೇತಂ ನ ವುತ್ತಂ, ತಂ ಏತಂ ನ ವುತ್ತನ್ತಿ ‘‘ಭಿಕ್ಖುನಿಯಾ ಅವಸ್ಸುತಭಾವೋ ದಟ್ಠಬ್ಬೋ’’ತಿ ಏತಂ ನಿಯಮನಂ ನ ವುತ್ತಂ। ತನ್ತಿ ತಂ ನಿಯಮೇತ್ವಾ ಅವಚನಂ। ಪಾಳಿಯಾ ಸಮೇತೀತಿ ‘‘ಏಕತೋಅವಸ್ಸುತೇ’’ತಿ (ಪಾಚಿ॰ ೭೦೧-೭೦೨) ಅವಿಸೇಸೇತ್ವಾ ವುತ್ತಪಾಳಿಯಾ, ‘‘ಅನವಸ್ಸುತೋತಿ ಜಾನನ್ತೀ ಪಟಿಗ್ಗಣ್ಹಾತೀ’’ತಿ (ಪಾಚಿ॰ ೭೦೩) ಇಮಾಯ ಚ ಪಾಳಿಯಾ ಸಮೇತಿ। ಯದಿ ಹಿ ಪುಗ್ಗಲಸ್ಸ ಅವಸ್ಸುತಭಾವೋ ನಪ್ಪಮಾಣಂ, ಕಿಂ ‘‘ಅನವಸ್ಸುತೋತಿ ಜಾನನ್ತೀ’’ತಿ ಇಮಿನಾ ವಚನೇನ। ‘‘ಅನಾಪತ್ತಿ ಉಭೋ ಅನವಸ್ಸುತಾ ಹೋನ್ತಿ, ಅನವಸ್ಸುತಾ ಪಟಿಗ್ಗಣ್ಹಾತೀ’’ತಿ ಏತ್ತಕಮೇವ ವತ್ತಬ್ಬಂ ಸಿಯಾ। ಅಜ್ಝೋಹಾರಪಯೋಗೇಸು ಬಹೂಸು ಥುಲ್ಲಚ್ಚಯಚಯೋ ಥುಲ್ಲಚ್ಚಯಾನಂ ಸಮೂಹೋ ಸಿಯಾ, ಪಯೋಗಗಣನಾಯ ಬಹೂನಿ ಥುಲ್ಲಚ್ಚಯಾನಿ ಹೋನ್ತೀತಿ ಅಧಿಪ್ಪಾಯೋ।
೨೦೮೧. ಸಮ್ಭವೇ, ಬ್ಯಭಿಚಾರೇ ಚ ವಿಸೇಸನಂ ಸಾತ್ಥಕಂ ಭವತೀತಿ ‘‘ಮನುಸ್ಸವಿಗ್ಗಹಾನ’’ನ್ತಿ ಇದಂ ವಿಸೇಸನಂ ಯಕ್ಖಪೇತತಿರಚ್ಛಾನಪದೇಹಿ ಯೋಜೇತಬ್ಬಂ। ಉಭತೋಅವಸ್ಸುತೇ ಸತಿ ಮನುಸ್ಸವಿಗ್ಗಹಾನಂ ಯಕ್ಖಪೇತತಿರಚ್ಛಾನಾನಂ ಹತ್ಥತೋ ಚ ಪಣ್ಡಕಾನಂ ಹತ್ಥತೋ ಚ ತಥಾತಿ ಯೋಜನಾ। ತಥಾ-ಸದ್ದೇನೇತ್ಥ ‘‘ಯಂ ಕಿಞ್ಚಿ ಆಮಿಸಂ ಪಟಿಗ್ಗಣ್ಹಾತಿ, ದುಕ್ಕಟಂ। ಅಜ್ಝೋಹಾರಪಯೋಗೇಸು ಥುಲ್ಲಚ್ಚಯಚಯೋ ಸಿಯಾ’’ತಿ ಯಥಾವುತ್ತಮತಿದಿಸತಿ।
೨೦೮೨. ಏತ್ಥಾತಿ ಇಮೇಸು ಯಕ್ಖಾದೀಸು। ಏಕತೋಅವಸ್ಸುತೇ ಸತಿ ಆಮಿಸಂ ಪಟಿಗ್ಗಣ್ಹನ್ತಿಯಾ ದುಕ್ಕಟಂ। ಸಬ್ಬತ್ಥಾತಿ ಸಬ್ಬೇಸು ಮನುಸ್ಸಾಮನುಸ್ಸೇಸು ಏಕತೋ, ಉಭತೋ ವಾ ಅನವಸ್ಸುತೇಸು। ಉದಕೇ ದನ್ತಕಟ್ಠಕೇತಿ ಪರಿಭೋಗೇ ಚಾತಿ ಪಟಿಗ್ಗಹಣೇ ಚೇವ ಪರಿಭೋಗೇ ಚ।
೨೦೮೩-೪. ಉಭಯಾವಸ್ಸುತಾಭಾವೇತಿ ಭಿಕ್ಖುನಿಯಾ, ಪುಗ್ಗಲಸ್ಸ ಚ ಉಭಿನ್ನಂ ಅವಸ್ಸುತತ್ತೇ ಅಸತಿ ಯದಿ ಆಮಿಸಂ ಪಟಿಗ್ಗಣ್ಹಾತಿ ಅಯಂ ಪುರಿಸಪುಗ್ಗಲೋ। ನ ಚ ಅವಸ್ಸುತೋತಿ ನೇವ ಅವಸ್ಸುತೋತಿ ಞತ್ವಾ। ಯಾ ಪನ ಆಮಿಸಂ ಪಟಿಗ್ಗಣ್ಹಾತಿ, ತಸ್ಸಾ ಚ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ ಪಕಾಸಿತಾತಿ ಯೋಜನಾ। ‘‘ಯಾ ಗಣ್ಹಾತಿ, ತಸ್ಸಾ ಅನಾಪತ್ತೀ’’ತಿ ವುತ್ತೇಪಿ ಪರಿಭುಞ್ಜನ್ತಿಯಾವ ಅನಾಪತ್ತಿಭಾವೋ ದಟ್ಠಬ್ಬೋ।
ಪಞ್ಚಮಂ।
೨೦೮೫. ಉಯ್ಯೋಜನೇತಿ ‘‘ಕಿಂ ತೇ ಅಯ್ಯೇ ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ, ಇಙ್ಘ ಅಯ್ಯೇ ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ, ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ (ಪಾಚಿ॰ ೭೦೫) ವುತ್ತನಯೇನ ನಿಯೋಜನೇ। ಏಕಿಸ್ಸಾತಿ ಉಯ್ಯೋಜಿಕಾಯ। ಇತರಿಸ್ಸಾತಿ ಉಯ್ಯೋಜಿತಾಯ। ಪಟಿಗ್ಗಹೇತಿ ಅವಸ್ಸುತಸ್ಸ ಹತ್ಥತೋ ಆಮಿಸಪಟಿಗ್ಗಹಣೇ। ದುಕ್ಕಟಾನಿ ಚಾತಿ ಉಯ್ಯೋಜಿಕಾಯ ದುಕ್ಕಟಾನಿ। ಭೋಗೇಸೂತಿ ಉಯ್ಯೋಜಿತಾಯ ತಥಾ ಪಟಿಗ್ಗಹಿತಸ್ಸ ಆಮಿಸಸ್ಸ ಪರಿಭೋಗೇಸು। ಥುಲ್ಲಚ್ಚಯಗಣೋ ಸಿಯಾತಿ ಉಯ್ಯೋಜಿಕಾಯ ಥುಲ್ಲಚ್ಚಯಸಮೂಹೋ ಸಿಯಾತಿ ಅತ್ಥೋ।
೨೦೮೬-೭. ಭೋಜನಸ್ಸಾವಸಾನಸ್ಮಿನ್ತಿ ಉಯ್ಯೋಜಿತಾಯ ಭೋಜನಪರಿಯನ್ತೇ। ಸಙ್ಘಾದಿಸೇಸತಾತಿ ಉಯ್ಯೋಜಿಕಾಯ ಸಙ್ಘಾದಿಸೇಸಾಪತ್ತಿ ಹೋತಿ।
ಯಕ್ಖಾದೀನನ್ತಿ ಏತ್ಥ ಆದಿ-ಸದ್ದೇನ ಪೇತಪಣ್ಡಕತಿರಚ್ಛಾನಗತಾ ಗಹಿತಾ। ತಥೇವ ಪುರಿಸಸ್ಸ ಚಾತಿ ಅವಸ್ಸುತಸ್ಸ ಮನುಸ್ಸಪುರಿಸಸ್ಸ। ‘‘ಗಹಣೇ ಉಯ್ಯೋಜನೇ’’ತಿ ಪದಚ್ಛೇದೋ। ಗಹಣೇತಿ ಉಯ್ಯೋಜಿತಾಯ ಗಹಣೇ। ಉಯ್ಯೋಜನೇತಿ ಉಯ್ಯೋಜಿಕಾಯ ಅತ್ತನೋ ಉಯ್ಯೋಜನೇ। ತೇಸನ್ತಿ ಉದಕದನ್ತಪೋನಾನಂ। ಪರಿಭೋಗೇತಿ ಉಯ್ಯೋಜಿತಾಯ ಪರಿಭುಞ್ಜನೇ। ದುಕ್ಕಟಂ ಪರಿಕಿತ್ತಿತನ್ತಿ ಉಯ್ಯೋಜಿಕಾಯ ದುಕ್ಕಟಂ ವುತ್ತಂ।
೨೦೮೮. ಸೇಸಸ್ಸಾತಿ ‘‘ಗಹಣುಯ್ಯೋಜನೇ’’ತಿಆದಿ ವುತ್ತನಯಮೇವ।
೨೦೮೯-೯೦. ಯಾ ಪನ ಭಿಕ್ಖುನೀ ‘‘ಅನವಸ್ಸುತೋ’’ತಿ ಞತ್ವಾ ಉಯ್ಯೋಜೇತಿ, ‘‘ಕುಪಿತಾ ವಾ ನ ಪಟಿಗ್ಗಣ್ಹತೀ’’ತಿ ಉಯ್ಯೋಜೇತಿ, ‘‘ಕುಲಾನುದ್ದಯತಾ ವಾಪಿ ನ ಪಟಿಗ್ಗಣ್ಹತೀ’’ತಿ ಉಯ್ಯೋಜೇತಿ, ತಸ್ಸಾ ಚ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ ಪಕಾಸಿತಾತಿ ಯೋಜನಾ। ಯಥಾಹ ‘‘ಅನಾಪತ್ತಿ ‘ಅನವಸ್ಸುತೋ’ತಿ ಜಾನನ್ತೀ ಉಯ್ಯೋಜೇತಿ, ‘ಕುಪಿತಾ ನ ಪಟಿಗ್ಗಣ್ಹತೀ’ತಿ ಉಯ್ಯೋಜೇತಿ, ‘ಕುಲಾನುದ್ದಯತಾಯ ನ ಪಟಿಗ್ಗಣ್ಹತೀ’ತಿ ಉಯ್ಯೋಜೇತೀ’’ತಿಆದಿ (ಪಾಚಿ॰ ೭೦೮)।
ಛಟ್ಠಂ।
೨೦೯೧. ಸತ್ತಮನ್ತಿ ‘‘ಯಾ ಪನ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇಯ್ಯ ಬುದ್ಧಂ ಪಚ್ಚಕ್ಖಾಮೀ’’ತಿಆದಿನಯಪ್ಪವತ್ತಂ (ಪಾಚಿ॰ ೭೧೦) ಸತ್ತಮಸಿಕ್ಖಾಪದಞ್ಚ। ಅಟ್ಠಮನ್ತಿ ‘‘ಯಾ ಪನ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ’’ತಿಆದಿನಯಪ್ಪವತ್ತಂ (ಪಾಚಿ॰ ೭೧೬) ಅಟ್ಠಮಸಿಕ್ಖಾಪದಞ್ಚ।
ಸತ್ತಮಟ್ಠಮಾನಿ।
೨೦೯೨. ನವಮೇತಿ ‘‘ಭಿಕ್ಖುನಿಯೋ ಪನೇವ ಸಂಸಟ್ಠಾ ವಿಹರನ್ತೀ’’ತಿಆದಿಸಿಕ್ಖಾಪದೇ (ಪಾಚಿ॰ ೭೨೨) ಚ। ದಸಮೇತಿ ‘‘ಯಾ ಪನ ಭಿಕ್ಖುನೀ ಏವಂ ವದೇಯ್ಯ ಸಂಸಟ್ಠಾವ ಅಯ್ಯೇ ತುಮ್ಹೇ ವಿಹರಥ, ಮಾ ತುಮ್ಹೇ ನಾನಾ ವಿಹರಿತ್ಥಾ’’ತಿಆದಿಸಿಕ್ಖಾಪದೇ (ಪಾಚಿ॰ ೭೨೮) ಚ।
ನವಮದಸಮಾನಿ।
೨೦೯೩. ತೇನ ಮಹಾವಿಭಙ್ಗಾಗತೇನ ದುಟ್ಠದೋಸದ್ವಯೇನ ಚ ತತ್ಥೇವ ಆಗತೇನ ತೇನ ಸಞ್ಚರಿತ್ತಸಿಕ್ಖಾಪದೇನ ಚಾತಿ ಇಮೇಹಿ ತೀಹಿ ಸದ್ಧಿಂ ಇಧಾಗತಾನಿ ಛ ಸಿಕ್ಖಾಪದಾನೀತಿ ಏವಂ ನವ ಪಠಮಾಪತ್ತಿಕಾ ಇತೋ ಭಿಕ್ಖುನಿವಿಭಙ್ಗತೋ ಚತ್ತಾರಿ ಯಾವತತಿಯಕಾನಿ ತತೋ ಮಹಾವಿಭಙ್ಗತೋ ಚತ್ತಾರಿ ಯಾವತತಿಯಕಾನೀತಿ ಅಟ್ಠ ಯಾವತತಿಯಕಾನಿ, ಪುರಿಮಾನಿ ನವ ಚಾತಿ ಸತ್ತರಸ ಸಙ್ಘಾದಿಸೇಸಸಿಕ್ಖಾಪದಾನಿ ಮಯಾ ಚೇತ್ಥ ದಸ್ಸಿತಾನೀತಿ ಅಧಿಪ್ಪಾಯೋ।
ಇತಿ ವಿನಯತ್ಥಸಾರಸನ್ದೀಪನಿಯಾ ವಿನಯವಿನಿಚ್ಛಯವಣ್ಣನಾಯ
ಸಙ್ಘಾದಿಸೇಸಕಥಾವಣ್ಣನಾ ನಿಟ್ಠಿತಾ।