ಭಿಕ್ಖುನಿವಿಭಙ್ಗೋ
೧೭೦. ವಿನಯಸ್ಸ ವಿನಿಚ್ಛಯೇ ಭಿಕ್ಖೂನಂ ಪಾಟವತ್ಥಾಯಾತಿ ಭಿಕ್ಖುನೀನಂ ಪಾಟವಸ್ಸಾಪಿ ತದಧೀನತ್ತಾ ಪಧಾನದಸ್ಸನವಸೇನ ವುತ್ತಂ। ಅಥ ವಾ ದಸ್ಸನಲಿಙ್ಗನ್ತರಸಾಧಾರಣತ್ತೇ ಇಚ್ಛಿತೇ ಪುಲ್ಲಿಙ್ಗೇನ, ನಪುಂಸಕಲಿಙ್ಗೇನ ವಾ ನಿದ್ದೇಸೋ ಸದ್ದಸತ್ಥಾನುಯೋಗತೋತಿ ‘‘ಭಿಕ್ಖೂನ’’ನ್ತಿ ಪುಲ್ಲಿಙ್ಗೇನ ವುತ್ತಂ।
೧೭೧. ನನ್ದನ್ತೀ ಸಾದಿಯನ್ತೀ।
೧೭೨. ತಿಸ್ಸೋ ಆಪತ್ತಿಯೋ ಫುಸೇತಿ ಯೋಜನಾ। ಜಾಣುಸ್ಸ ಉದ್ಧಂ, ಅಕ್ಖಕಸ್ಸ ಅಧೋ ಗಹಣಂ ಸಾದಿಯನ್ತಿಯಾ ತಸ್ಸಾ ಪಾರಾಜಿಕನ್ತಿ ಯೋಜನಾ।
೧೭೩. ಕಾಯಪಟಿಬದ್ಧೇ ವಾ ಗಹಣಂ ಸಾದಿಯನ್ತಿಯಾ ದುಕ್ಕಟಂ।
೧೭೪. ವಜ್ಜನ್ತಿ ಅಞ್ಞಿಸ್ಸಾ ಭಿಕ್ಖುನಿಯಾ ಪಾರಾಜಿಕಾಪತ್ತಿಂ।
೧೭೬. ತಂ ಲದ್ಧಿನ್ತಿ ಉಕ್ಖಿತ್ತಸ್ಸ ಯಂ ಲದ್ಧಿಂ ಅತ್ತನೋ ರೋಚೇಸಿ, ತಂ ಲದ್ಧಿಂ ನ ನಿಸ್ಸಜ್ಜನ್ತೀತಿ ಯೋಜನಾ।
೧೭೮. ‘‘ಇಧ ಆಗಚ್ಛಾ’’ತಿ ಪದಚ್ಛೇದೋ। ‘‘ವುತ್ತಾ ಆಗಚ್ಛತೀ’’ತಿ ಪದಚ್ಛೇದೋ।
೧೭೯. ಹತ್ಥಪಾಸಪ್ಪವೇಸನೇತಿ ‘‘ಹತ್ಥಗತಪ್ಪವೇಸನೇ’’ತಿ ವಾ ಪಾಠೋ, ಸೋಯೇವ ಅತ್ಥೋ।
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
ಪಾರಾಜಿಕಕಥಾವಣ್ಣನಾ ನಿಟ್ಠಿತಾ।
೧೮೦. ಏಕಸ್ಸಾತಿ ಅತ್ತನೋ ಅತ್ತನೋ ಅಟ್ಟಕಾರಸ್ಸ ವಾ। ಆರೋಚನೇತಿ ವತ್ತಬ್ಬಸ್ಸ ವೋಹಾರಿಕಾನಂ ನಿವೇದನೇ।
೧೮೧. ದುತಿಯಾರೋಚನೇತಿ ದುತಿಯಸ್ಸ, ದುತಿಯಂ ಏವಂ ಆರೋಚನೇ।
೧೮೨. ದ್ವೀಹೀತಿ ದ್ವೀಹಿ ಕಮ್ಮವಾಚಾಹಿ। ಕಮ್ಮವಾಚೋಸಾನೇತಿ ಕಮ್ಮವಾಚಾಓಸಾನೇ।
೧೮೩. ಪರಿಕ್ಖೇಪೇ ಅತಿಕ್ಕನ್ತೇತಿ ಅತ್ತನೋ ಗಾಮತೋ ಗನ್ತ್ವಾ ಇತರಂ ಗಾಮಂ ಪವಿಸನ್ತಿಯಾ ಪಠಮೇನ ಪಾದೇನ ತಸ್ಸ ಗಾಮಸ್ಸ ಪರಿಕ್ಖೇಪೇ ಅತಿಕ್ಕನ್ತೇ, ಪಠಮಪಾದೇ ಪರಿಕ್ಖೇಪಂ ಅತಿಕ್ಕಮೇತ್ವಾ ಅನ್ತೋಗಾಮಸಙ್ಖೇಪಂ ಗತೇತಿ ಅತ್ಥೋ।
೧೮೪. ದುತಿಯೇನಾತಿ ಗಾಮಪರಿಕ್ಖೇಪತೋ ಬಹಿ ಠಿತೇನ ದುತಿಯಪಾದೇನ। ಅತಿಕ್ಕನ್ತೇತಿ ತಸ್ಮಿಂ ಗಾಮಪರಿಕ್ಖೇಪೇ ಅತಿಕ್ಕನ್ತೇ, ತಸ್ಮಿಂ ಪಾದೇ ಅನ್ತೋಗಾಮಂ ಪವೇಸಿತೇತಿ ಅತ್ಥೋ। ಸೇಸಂ ಉತ್ತಾನತ್ಥಮೇವ।
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
ಸಙ್ಘಾದಿಸೇಸಕಥಾವಣ್ಣನಾ ನಿಟ್ಠಿತಾ।
೧೯೩. ಇಹ
೧೯೪. ಅಕಾಲಚೀವರಂ ಕಾಲಚೀವರಂ ಕತ್ವಾ ಭಾಜಾಪೇನ್ತಿಯಾತಿ ಯೋಜನಾ। ಪಯೋಗೇತಿ ಭಾಜನಪಯೋಗೇ।
೧೯೫. ಛಿನ್ನೇತಿ
೧೯೬. ತತೋ ಪರನ್ತಿ ತತೋ ಪಠಮತೋ ಅಞ್ಞಂ।
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
ನಿಸ್ಸಗ್ಗಿಯಕಥಾವಣ್ಣನಾ ನಿಟ್ಠಿತಾ।
೧೯೯. ಲಸುಣಂ ಖಾದತಿ ಚೇ, ದ್ವೇ ಆಪತ್ತಿಯೋ ಫುಟಾತಿ ಯೋಜನಾ।
೨೦೦. ಪಯೋಗೇತಿ ಸಂಹಾರಾಪನಪಯೋಗೇ। ಸಂಹಟೇತಿ ಅತ್ತನಾ ಸಂಹಟೇ, ಪರೇನ ಸಂಹರಾಪಿತೇ ಚ ಆಪತ್ತಿ ಪಾಚಿತ್ತಿ ಹೋತಿ।
೨೦೧. ಕತೇತಿ ತಲಘಾತೇ ಕತೇ।
೨೦೨. ಜತುನಾ ಮಟ್ಠಕನ್ತಿ ಜತುನಾ ಕತಂ ಮಟ್ಠದಣ್ಡಕಂ। ‘‘ದುಕ್ಕಟಂ ಆದಿನ್ನೇ’’ತಿ ಪದಚ್ಛೇದೋ।
೨೦೪. ಭುಞ್ಜಮಾನಸ್ಸ ಭಿಕ್ಖುಸ್ಸ ಹತ್ಥಪಾಸೇತಿ ಯೋಜನಾ। ಹಿತ್ವಾ ಹತ್ಥಪಾಸಂ।
೨೦೫. ವಿಞ್ಞಾಪೇತ್ವಾತಿ ಅನ್ತಮಸೋ ಮಾತರಮ್ಪಿ ಯಾಚಿತ್ವಾ। ಅಜ್ಝೋಹಾರೇ ಪಾಚಿತ್ತಿಂ ದೀಪಯೇತಿ ಯೋಜನಾ।
೨೦೬. ಉಚ್ಚಾರಾದಿನ್ತಿ ಆದಿ-ಸದ್ದೇನ ವಿಘಾಸಸಙ್ಕಾರಮುತ್ತಾನಂ ಗಹಣಂ।
ಲಸುಣವಗ್ಗವಣ್ಣನಾ ಪಠಮಾ।
೨೦೯. ಇಧ ಛಟ್ಠೇನ ಸಿಕ್ಖಾಪದೇನ ತುಲ್ಯೋ ಸದಿಸೋತಿ ಯೋಜನಾ।
೨೧೦. ಆಸನೇತಿ ಸಾಮಿಕೇ ಅನಾಪುಚ್ಛಾತಿ ತಸ್ಮಿಂ ಕುಲೇ ಯಂ ಕಿಞ್ಚಿ ವಿಞ್ಞುಮನುಸ್ಸಂ ಅನಾಪುಚ್ಛಾ।
೨೧೧. ಅನೋವಸ್ಸನ್ತಿ ಭಿತ್ತಿಯಾ ಬಹಿ ನಿಬ್ಬಕೋಸಬ್ಭನ್ತರಂ। ದುತಿಯಾತಿಕ್ಕಮೇತಿ ದುತಿಯೇನ ಪಾದೇನ ನಿಬ್ಬಕೋಸಸ್ಸ ಉದಕಪಾತಟ್ಠಾನಾತಿಕ್ಕಮೇ।
೨೧೨. ನಿಸೀದಿತೇತಿ ನಿಸಿನ್ನೇ।
೨೧೩. ಪಯೋಗೇತಿ ಉಜ್ಝಾಪನಪಯೋಗೇ।
೨೧೪. ನಿರಯಾದಿನಾ ಅತ್ತಾನಂ ವಾ ಪರಂ ವಾ ಅಭಿಸಪ್ಪೇನ್ತೀ ಸಪಥಂ ಕರೋನ್ತೀ ದ್ವೇ ಫುಸೇತಿ ಯೋಜನಾ। ಅಭಿಸಪ್ಪಿತೇತಿ ಅಭಿಸಪಿತೇ।
೨೧೫. ವಧಿತ್ವಾತಿ ಹತ್ಥಾದೀಹಿ ಪಹರಿತ್ವಾ। ‘‘ಕರೋತಿ ಏಕ’’ನ್ತಿ ಪದಚ್ಛೇದೋ।
ರತ್ತನ್ಧಕಾರವಗ್ಗವಣ್ಣನಾ ದುತಿಯಾ।
೨೧೬. ನಗ್ಗಾತಿ ಅನಿವತ್ಥಾ ವಾ ಅಪಾರುತಾ ವಾ। ಪಯೋಗೇತಿ ಚುಣ್ಣಮತ್ತಿಕಾಅಭಿಸಙ್ಖರಣಾದಿಪಯೋಗೇ।
೨೧೭. ಪಮಾಣಾತಿಕ್ಕನ್ತನ್ತಿ ‘‘ದೀಘಸೋಚತಸ್ಸೋ ವಿದತ್ಥಿಯೋ ಸುಗತವಿದತ್ಥಿಯಾ, ತಿರಿಯಂ ದ್ವೇ ವಿದತ್ಥಿಯೋ’’ತಿ (ಪಾಚಿ॰ ೮೮೮) ವುತ್ತಪಮಾಣಮತಿಕ್ಕನ್ತಂ। ಪಯೋಗೇತಿ ಕಾರಾಪನಪಯೋಗೇ।
೨೧೮. ವಿಸಿಬ್ಬೇತ್ವಾತಿ ದುಸ್ಸಿಬ್ಬಿತಂ ಪುನ ಸಿಬ್ಬನತ್ಥಾಯ ವಿಸಿಬ್ಬೇತ್ವಾ।
೨೧೯. ಪಞ್ಚ ಪಞ್ಚಾಹಂ, ಪಞ್ಚಾಹಮೇವ ಪಞ್ಚಾಹಿಕಂ। ಸಙ್ಘಾಟೀನಂ ಚಾರೋ ಸಙ್ಘಾಟಿಚಾರೋ, ಪರಿಭೋಗವಸೇನ ವಾ ಓತಾಪನವಸೇನ ‘‘ಸಙ್ಘಾಟೀ’’ತಿ ಲದ್ಧನಾಮಾನಂ ‘‘ತಿಚೀವರಂ, ಉದಕಸಾಟಿಕಾ, ಸಂಕಚ್ಚಿಕಾ’’ತಿ ಇಮೇಸಂ ಪಞ್ಚನ್ನಂ ಚೀವರಾನಂ ಪರಿವತ್ತನಂ। ಅತಿಕ್ಕಮೇತಿ ಭಿಕ್ಖುನೀ ಅತಿಕ್ಕಮೇಯ್ಯ। ಅಸ್ಸಾ ಪನ ಏಕಾವ ಪಾಚಿತ್ತಿ ಪರಿದೀಪಿತಾತಿ ಯೋಜನಾ।
೨೨೦. ಸಙ್ಕಮನೀಯನ್ತಿ ಸಙ್ಕಮೇತಬ್ಬಂ। ಅಞ್ಞಿಸ್ಸಾ ಸನ್ತಕಂ ಅನಾಪುಚ್ಛಾ ಗಹಿತಂ ಪುನ ದಾತಬ್ಬಂ ಪಞ್ಚನ್ನಂ ಅಞ್ಞತರಂ।
೨೨೧. ಗಣಚೀವರಲಾಭಸ್ಸಾತಿ ಭಿಕ್ಖುನಿಸಙ್ಘೇನ ಲಭಿತಬ್ಬಚೀವರಸ್ಸ। ಅನ್ತರಾಯಂ ಕರೋತೀತಿ ಯಥಾ ತೇ ದಾತುಕಾಮಾ ನ ದೇನ್ತಿ, ಏವಂ ಪರಕ್ಕಮತಿ।
೨೨೨. ಧಮ್ಮಿಕನ್ತಿ ಸಮಗ್ಗೇನ ಸಙ್ಘೇನ ಸನ್ನಿಪತಿತ್ವಾ ಕರಿಯಮಾನಂ। ಪಟಿಬಾಹನ್ತೀತಿ ಪಟಿಸೇಧೇನ್ತೀ। ಪಟಿಬಾಹಿತೇ ಪಟಿಸೇಧಿತೇ।
೨೨೩. ಅಗಾರಿಕಾದಿನೋತಿ ಆದಿ-ಸದ್ದೇನ ‘‘ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ’’ತಿ (ಪಾರಾ॰ ೯೧೭) ವುತ್ತೇ ಸಙ್ಗಣ್ಹಾತಿ। ಸಮಣಚೀವರನ್ತಿ ಕಪ್ಪಕತಂ ನಿವಾಸನಪಾರುಪನುಪಗಂ। ಪಯೋಗೇತಿ ದಾನಪಯೋಗೇ।
೨೨೪. ಚೀವರೇ ದುಬ್ಬಲಾಸಾಯಾತಿ ದುಬ್ಬಲಚೀವರಪಚ್ಚಾಸಾಯ ‘‘ಸಚೇ ಸಕ್ಕೋಮ, ದಸ್ಸಾಮಾ’’ತಿ ಏತ್ತಕಮತ್ತಂ ಸುತ್ವಾ ಉಪ್ಪಾದಿತಾಯ ಆಸಾಯಾತಿ ಅತ್ಥೋ। ಕಾಲನ್ತಿ ಚೀವರಕಾಲಸಮಯಂ। ಸಮತಿಕ್ಕಮೇತಿ ಭಿಕ್ಖುನೀಹಿ ಕಾಲಚೀವರೇ ಭಾಜಿಯಮಾನೇ ‘‘ಆಗಮೇಥ, ಅಯ್ಯೇ, ಅತ್ಥಿ ಸಙ್ಘಸ್ಸ ಚೀವರಪಚ್ಚಾಸಾ’’ತಿ ವತ್ವಾ ತಂ ಚೀವರವಿಭಙ್ಗಂ ಸಮತಿಕ್ಕಮೇಯ್ಯ।
೨೨೫. ಧಮ್ಮಿಕಂ ಕಥಿನುದ್ಧಾರನ್ತಿ ಸಮಗ್ಗೇನ ಸಙ್ಘೇನ ಕರಿಯಮಾನಂ ಕಥಿನಸ್ಸ ಅನ್ತರುಬ್ಭಾರಂ। ಪಟಿಬಾಹನ್ತಿಯಾತಿ ನಿವಾರೇನ್ತಿಯಾ।
ನ್ಹಾನವಗ್ಗವಣ್ಣನಾ ತತಿಯಾ।
೨೨೬. ತುವಟ್ಟೇಯ್ಯುನ್ತಿ ಇತರಂ ಪಾಚಿತ್ತಿಯಂ।
೨೨೭. ಪಯೋಗೇತಿ
೨೨೮. ದುಕ್ಖಿತನ್ತಿ ಗಿಲಾನಂ। ನುಪಟ್ಠಾಪೇನ್ತಿಯಾ ವಾಪೀತಿ ತಸ್ಸಾ ಉಪಟ್ಠಾನಂ ಪರೇಹಿ ಅಕಾರಾಪೇನ್ತಿಯಾ, ಸಯಂ ವಾ ಅಕರೋನ್ತಿಯಾ।
೨೨೯. ಉಪಸ್ಸಯಂ ದತ್ವಾತಿ ಕವಾಟಬನ್ಧಂ ಅತ್ತನೋ ಪುಗ್ಗಲಿಕವಿಹಾರಂ ದತ್ವಾ। ಕಡ್ಢಿತೇತಿ ನಿಕ್ಕಡ್ಢಿತೇ।
೨೩೦. ಸಂಸಟ್ಠಾತಿ ಗಹಪತಿನಾ ವಾ ಗಹಪತಿಪುತ್ತೇನ ವಾ ಸಂಸಟ್ಠವಿಹಾರೀ ಭಿಕ್ಖುನೀ ಸಙ್ಘೇನ ಸಂಸಟ್ಠವಿಹಾರತೋ ನಿವತ್ತಿಯಮಾನಾ। ಞತ್ತಿಯಾ ದುಕ್ಕಟಂ ಫುಸೇತಿ ಸಮನುಭಾಸನಕಮ್ಮಞತ್ತಿಯಾ ದುಕ್ಕಟಂ ಆಪಜ್ಜೇಯ್ಯ।
೨೩೧. ಅನ್ತೋರಟ್ಠೇತಿ ಯಸ್ಸ ವಿಜಿತೇ ವಿಹರತಿ, ತಸ್ಸ ರಟ್ಠೇ। ಪಟಿಪನ್ನಾಯಾತಿ ಚಾರಿಕಂ ಕಪ್ಪೇನ್ತಿಯಾ। ಸೇಸಕನ್ತಿ ಪಾಚಿತ್ತಿಯಂ।
ತುವಟ್ಟವಗ್ಗವಣ್ಣನಾ ಚತುತ್ಥಾ।
೨೩೩. ರಾಜಾಗಾರಾದಿಕನ್ತಿ ಆದಿ-ಸದ್ದೇನ ಚಿತ್ತಾಗಾರಾದೀನಂ ಗಹಣಂ।
೨೩೫. ಪಯೋಗೇತಿ ಕಪ್ಪಾಸವಿಚಾರಣಂ ಆದಿಂ ಕತ್ವಾ ಸಬ್ಬಪಯೋಗೇ। ಉಜ್ಜವುಜ್ಜವನೇತಿ ಯತ್ತಕಂ ಹತ್ಥೇನ ಅಞ್ಛಿತಂ ಹೋತಿ, ತಸ್ಮಿಂ ತಕ್ಕಮ್ಹಿ ವೇಠಿತೇ।
೨೩೭. ಪಯೋಗೇತಿ ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಾದೀನಂ ದಾನಪಯೋಗೇ।
೨೩೮. ‘‘ಸಮಂ ಆಪತ್ತಿಪಭೇದತೋ’’ತಿ ಪದಚ್ಛೇದೋ।
೨೩೯. ತಿರಚ್ಛಾನಗತಂ ವಿಜ್ಜನ್ತಿ ಯಂ ಕಿಞ್ಚಿ ಬಾಹಿರಕಂ ಅನತ್ಥಸಂಹಿತಂ ಪರೂಪಘಾತಕರಂ ಹತ್ಥಿಸಿಕ್ಖಾದಿಸಿಪ್ಪಂ ಪಠನ್ತಿಯಾತಿ ಸಿಕ್ಖನ್ತಿಯಾ। ಪಯೋಗೇತಿ ದುರುಪಸಙ್ಕಮನಾದಿಪಯೋಗೇ। ಪದೇ ಪದೇತಿ ಪದಾದಿವಸೇನ ಪರಿಯಾಪುಣನ್ತಿಯಾ ಪದೇ ಪದೇ ಅಕ್ಖರಪದಾನಂ ವಸೇನ।
೨೪೦. ನವಮೇ ‘‘ಪರಿಯಾಪುಣಾತೀ’’ತಿ ಪದಂ, ದಸಮೇ ‘‘ವಾಚೇತೀ’’ತಿ ಪದನ್ತಿ ಏವಂ ಪದಮತ್ತಮೇವ ಉಭಿನ್ನಂ ವಿಸೇಸಕಂ ಭೇದಕಂ।
ಚಿತ್ತಾಗಾರವಗ್ಗವಣ್ಣನಾ ಪಞ್ಚಮಾ।
೨೪೧. ತಮಾರಾಮನ್ತಿ ಯತ್ಥ ಭಿಕ್ಖೂ ರುಕ್ಖಮೂಲೇಪಿ ವಸನ್ತಿ, ತಂ ಸಭಿಕ್ಖುಕಂ ಪದೇಸಂ।
೨೪೩. ಅಕ್ಕೋಸತೀತಿ ದಸನ್ನಂ ಅಕ್ಕೋಸವತ್ಥೂನಂ ಅಞ್ಞತರೇನ ಸಮ್ಮುಖಾ ವಾ ಪರಮ್ಮುಖಾ ವಾ ಅಕ್ಕೋಸತಿ। ಪರಿಭಾಸತೀತಿ ಭಯದಸ್ಸನೇನ ತಜ್ಜೇತಿ। ‘‘ಪಾಚಿತ್ತಿ ಅಕ್ಕೋಸಿತೇ’’ತಿ ಪದಚ್ಛೇದೋ।
೨೪೪. ಚಣ್ಡಿಕಭಾವೇನಾತಿ ಕೋಧೇನ। ಗಣನ್ತಿ ಭಿಕ್ಖುನಿಸಙ್ಘಂ। ಪರಿಭಾಸತೀತಿ ‘‘ಬಾಲಾ ಏತಾ’’ತಿಆದೀಹಿ ವಚನೇಹಿ ಅಕ್ಕೋಸತಿ। ಪಯೋಗೇತಿ ಪರಿಭಾಸನಪಯೋಗೇ। ಪರಿಭಟ್ಠೇತಿ ಅಕ್ಕೋಸಿತೇ। ಇತರಂ ಪಾಚಿತ್ತಿಯಂ।
೨೪೫. ನಿಮನ್ತಿತಾತಿ ಗಣಭೋಜನೇ ವುತ್ತನಯೇನ ನಿಮನ್ತಿತಾ। ಪವಾರಿತಾತಿ ಪವಾರಣಸಿಕ್ಖಾಪದೇ ವುತ್ತನಯೇನ ವಾರಿತಾ। ಖಾದನಂ ಭೋಜನಮ್ಪಿ ವಾತಿ ಯಾಗುಪೂವಖಜ್ಜಕಂ, ಯಾವಕಾಲಿಕಂ ಮೂಲಖಾದನೀಯಾದಿಖಾದನೀಯಂ, ಓದನಾದಿಭೋಜನಮ್ಪಿ ವಾ ಯಾ ಭಿಕ್ಖುನೀ ಭುಞ್ಜನ್ತೀ ಹೋತಿ, ಸಾ ಪನ ದ್ವೇಯೇವ ಆಪತ್ತಿಯೋ ಫುಸೇತಿ ಯೋಜನಾ।
೨೪೭. ಮಚ್ಛರಾಯನ್ತೀತಿ ಮಚ್ಛರಂ ಕರೋನ್ತೀ, ಅತ್ತನೋ ಪಚ್ಚಯದಾಯಕಕುಲಸ್ಸ ಅಞ್ಞೇಹಿ ಸಾಧಾರಣಭಾವಂ ಅಸಹನ್ತೀತಿ ಅತ್ಥೋ ಪಯೋಗೇತಿ ತದನುರೂಪೇ ಕಾಯವಚೀಪಯೋಗೇ। ಮಚ್ಛರಿತೇತಿ ಮಚ್ಛರವಸೇನ ಕತಪಯೋಗೇ ನಿಪ್ಫನ್ನೇ।
೨೪೮. ಅಭಿಕ್ಖುಕೇ ಪನಾವಾಸೇತಿ ಯತೋ ಭಿಕ್ಖುನುಪಸ್ಸಯತೋ ಅದ್ಧಯೋಜನಬ್ಭನ್ತರೇ ಓವಾದದಾಯಕಾ ಭಿಕ್ಖೂ ನ ವಸನ್ತಿ, ಮಗ್ಗೋ ವಾ ಅಖೇಮೋ ಹೋತಿ, ನ ಸಕ್ಕಾ ಅನನ್ತರಾಯೇನ ಗನ್ತುಂ, ಏವರೂಪೇ ಪುಬ್ಬಕಿಚ್ಚೇಸೂತಿ ‘‘ವಸ್ಸಂ ವಸಿಸ್ಸಾಮೀ’’ತಿ ಸೇನಾಸನಪಞ್ಞಾಪನಪಾನೀಯಉಪಟ್ಠಾಪನಾದಿಪುಬ್ಬಕಿಚ್ಚೇ ಪನ ಕರಿಯಮಾನೇ ದುಕ್ಕಟಂ ಭವೇತಿ ಯೋಜನಾ।
೨೪೯. ವಸ್ಸಂವುತ್ಥಾತಿ ಪುರಿಮಂ ವಾ ಪಚ್ಛಿಮಂ ವಾ ತೇಮಾಸಂ ವುತ್ಥಾ। ಉಭತೋಸಙ್ಘೇತಿ ಭಿಕ್ಖುನಿಸಙ್ಘೇ, ಭಿಕ್ಖುಸಙ್ಘೇ ಚ। ತೀಹಿಪಿ ಠಾನೇಹೀತಿ ‘‘ದಿಟ್ಠೇನ ವಾ’’ತಿಆದಿನಾ ವುತ್ತೇಹಿ ತೀಹಿ ಕಾರಣೇಹಿ।
೨೫೦. ಓವಾದತ್ಥಾಯಾತಿ ಗರುಧಮ್ಮೋವಾದನತ್ಥಾಯ। ಸಂವಾಸತ್ಥಾಯಾತಿ ಉಪೋಸಥಪುಚ್ಛನತ್ಥಾಯ ಚೇವ ಪವಾರಣತ್ಥಾಯ ಚ। ನ ಗಚ್ಛತೀತಿ ಭಿಕ್ಖುಂ ನ ಉಪಗಚ್ಛತಿ।
೨೫೧. ಓವಾದಮ್ಪಿ ನ ಯಾಚನ್ತೀತಿ ಉಪೋಸಥಾದಿವಸೇನ ಓವಾದೂಪಸಙ್ಕಮನಂ ಭಿಕ್ಖುಂ ನ ಯಾಚನ್ತೀ ನ ಪುಚ್ಛನ್ತೀ। ಉಪೋಸಥನ್ತಿ ಉಪೋಸಥದಿವಸತೋ ಪುರಿಮದಿವಸೇ ತೇರಸಿಯಂ ವಾ ಚಾತುದ್ದಸಿಯಂ ವಾ ಉಪೋಸಥಂ ನ ಪುಚ್ಛನ್ತೀ।
೨೫೨. ಅಪುಚ್ಛಿತ್ವಾವ ಸಙ್ಘಂ ವಾತಿ ಸಙ್ಘಂ ವಾ ಗಣಂ ವಾ ಅನಪಲೋಕೇತ್ವಾವ। ‘‘ಭೇದಾಪೇತೀ’’ತಿ ಇದಂ ನಿದಸ್ಸನಮತ್ತಂ ‘‘ಫಾಲಾಪೇಯ್ಯ ವಾ ಧೋವಾಪೇಯ್ಯ ವಾ ಆಲಿಮ್ಪಾಪೇಯ್ಯ ವಾ ಬನ್ಧಾಪೇಯ್ಯ ವಾ ಮೋಚಾಪೇಯ್ಯ ವಾ’’ತಿ ಇಮೇಸಮ್ಪಿ ಕಿರಿಯಾವಿಕಪ್ಪಾನಂ ಸಙ್ಗಹೇತಬ್ಬತ್ತಾ। ಪಸಾಖಜನ್ತಿ ನಾಭಿಯಾ ಹೇಟ್ಠಾ, ಜಾಣುಮಣ್ಡಲಾನಂ ಪಯೋಗೇತಿ ಭೇದಾಪನಾದಿಪಯೋಗೇ।
ಆರಾಮವಗ್ಗವಣ್ಣನಾ ಛಟ್ಠಾ।
೨೫೩. ಗಬ್ಭಿನಿನ್ತಿ ಆಪನ್ನಸತ್ತಂ ಸಿಕ್ಖಮಾನಂ। ವುಟ್ಠಾಪೇನ್ತೀತಿ ಉಪಜ್ಝಾಯಾ ಹುತ್ವಾ ಉಪಸಮ್ಪಾದೇನ್ತೀ। ಪಯೋಗೇತಿ ಗಣಪರಿಯೇಸನಾದಿಪಯೋಗೇ। ವುಟ್ಠಾಪಿತೇತಿ ಉಪಸಮ್ಪಾದಿತೇ, ಕಮ್ಮವಾಚಾಪರಿಯೋಸಾನೇತಿ ಅತ್ಥೋ।
೨೫೫. ಸಹಜೀವಿನಿನ್ತಿ ಸದ್ಧಿವಿಹಾರಿನಿಂ। ನಾನುಗ್ಗಣ್ಹನ್ತೀತಿ ಉದ್ದೇಸದಾನಾದೀಹಿ ನ ಸಙ್ಗಣ್ಹನ್ತೀ।
ಗಬ್ಭಿನಿವಗ್ಗವಣ್ಣನಾ ಸತ್ತಮಾ।
೨೫೮. ‘‘ಅಲಂ ವುಚ್ಚಮಾನಾ ಭಿಕ್ಖುನೀಹಿ ನಿವಾರಿಯಮಾನಾ। ಖೀಯತೀತಿ ಅಞ್ಞಾಸಂ ಬ್ಯತ್ತಾನಂ ಲಜ್ಜೀನಂ ವುಟ್ಠಾನಸಮ್ಮುತಿಂ ದೀಯಮಾನಂ ದಿಸ್ವಾ ‘‘ಅಹಮೇವ ನೂನ ಬಾಲಾ’’ತಿಆದಿನಾ ಭಣಮಾನಾ ಖೀಯತಿ। ಪಯೋಗೇತಿ ಖೀಯಮಾನಪಯೋಗೇ। ಖೀಯಿತೇತಿ ಖೀಯನಪಯೋಗೇ ನಿಟ್ಠಿತೇ।
ಕುಮಾರಿಭೂತವಗ್ಗವಣ್ಣನಾ ಅಟ್ಠಮಾ।
೨೬೦. ಛತ್ತುಪಾಹನನ್ತಿ ವುತ್ತಲಕ್ಖಣಂ ಛತ್ತಞ್ಚ ಉಪಾಹನಾಯೋ ಚ। ಪಯೋಗೇತಿ ಧಾರಣಪಯೋಗೇ।
೨೬೧. ಯಾನೇನಾತಿ ವಯ್ಹಾದಿನಾ। ಯಾಯನ್ತೀತಿ ಸಚೇ ಯಾನೇನ ಗತಾ ಹೋತಿ।
೨೬೨. ಸಙ್ಘಾಣಿನ್ತಿ ಯಂ ಕಿಞ್ಚಿ ಕಟೂಪಗಂ। ಧಾರೇನ್ತಿಯಾತಿ ಕಟಿಯಂ ಪಟಿಮುಚ್ಚನ್ತಿಯಾ।
೨೬೩. ಗನ್ಧವಣ್ಣೇನಾತಿ ಗನ್ಧೋ ನಾಮ ಚನ್ದನಾಲೇಪಾದಿ। ವಣ್ಣೋ ನಾಮ ಕುಙ್ಕುಮಹಲಿದ್ದಾದಿ। ಪಯೋಗೇತಿ ಗನ್ಧಾದಿಪಯೋಗೇ ರಚನತೋ ಪಟ್ಠಾಯ ಪುಬ್ಬಪಯೋಗೇ।
೨೬೬. ಅನಾಪುಚ್ಛಾತಿ ‘‘ನಿಸೀದಾಮಿ, ಅಯ್ಯಾ’’ತಿ ಅನಾಪುಚ್ಛಿತ್ವಾ। ನಿಸೀದಿತೇ ಭಿಕ್ಖುಸ್ಸ ಉಪಚಾರೇ ಅನ್ತಮಸೋ ಛಮಾಯ ನಿಸಿನ್ನೇ।
೨೬೭. ಅನೋಕಾಸಕತನ್ತಿ ‘‘ಅಸುಕಸ್ಮಿಂ ನಾಮ ಠಾನೇ ಪುಚ್ಛಿಸ್ಸಾಮೀ’’ತಿ ಏವಂ ಅಕತಓಕಾಸಂ।
೨೬೮. ಪವಿಸನ್ತಿಯಾತಿ ವಿನಿಚ್ಛಯಂ ಆರಾಮವಗ್ಗಸ್ಸ ಪಠಮೇನೇವ ಸಿಕ್ಖಾಪದೇನ ಸದಿಸಂ ಕತ್ವಾ ವದೇಯ್ಯಾತಿ ಯೋಜನಾ।
ಛತ್ತುಪಾಹನವಗ್ಗವಣ್ಣನಾ ನವಮಾ।
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
ಪಾಚಿತ್ತಿಯಕಥಾವಣ್ಣನಾ ನಿಟ್ಠಿತಾ।
೨೬೯-೭೦. ಅಟ್ಠಸು ತತೋತಿ ಗಹಣಹೇತು। ಸಬ್ಬೇಸೂತಿ ಪಾಟಿದೇಸನೀಯಸಿಕ್ಖಾಪದೇಸು।
ಪಾಟಿದೇಸನೀಯಕಥಾವಣ್ಣನಾ।
೨೭೧-೨. ಇಮಂ ಪರಮಂ ಉತ್ತಮಂ ನಿರುತ್ತರಂ ಕೇನಚಿ ವಾ ವತ್ತಬ್ಬೇನ ಉತ್ತರೇನ ರಹಿತಂ ನಿದ್ದೋಸಂ ಉತ್ತರಂ ಏವಂನಾಮಕಂ ಧೀರೋ ಪಞ್ಞವಾ ಭಿಕ್ಖು ಅತ್ಥವಸೇನ ವಿದಿತ್ವಾ ದುರುತ್ತರಂ ಕಿಚ್ಛೇನ ಉತ್ತರಿತಬ್ಬಂ ಪಞ್ಞತ್ತಮಹಾಸಮುದ್ದಂ ವಿನಯಮಹಾಸಾಗರಂ ಸುಖೇನೇವ ಯಸ್ಮಾ ಉತ್ತರತಿ, ತಸ್ಮಾ ಕಙ್ಖಚ್ಛೇದೇ ವಿನಯವಿಚಿಕಿಚ್ಛಾಯ ಛಿನ್ದನೇ ಸತ್ಥೇ ಅಸ್ಮಿಂ ಸತ್ಥೇ ಇಮಸ್ಮಿಂ ಉತ್ತರಪಕರಣೇ ಉಸ್ಮಾಯುತ್ತೋ ಕಮ್ಮಜತೇಜೋಧಾತುಯಾ ಸಮನ್ನಾಗತೋ ಜೀವಮಾನೋ ಭಿಕ್ಖು ನಿಚ್ಚಂ ನಿರನ್ತರಂ ಸತ್ತೋ ಅಭಿರತೋ ನಿಚ್ಚಂ ಯೋಗಂ ಸತತಾಭಿಯೋಗಂ ಕಾತುಂ ಯುತ್ತೋ ಅನುರೂಪೋತಿ ಯೋಜನಾ।
ಭಿಕ್ಖುನಿವಿಭಙ್ಗೋ ನಿಟ್ಠಿತೋತಿ ಏತ್ಥಾಪಿ ಉಪ್ಪತ್ತಿ ವುತ್ತನಯೇನೇವ ವೇದಿತಬ್ಬಾ।
ಇತಿ ಉತ್ತರೇ ಲೀನತ್ಥಪಕಾಸನಿಯಾ
ಭಿಕ್ಖುನಿವಿಭಙ್ಗವಣ್ಣನಾ ನಿಟ್ಠಿತಾ।